HECHOS 15

1Yet hunec tu', ay hunk'aan heb'naj speto Judea, xhul Antioquía. X'oc heb'naj yalnoj tet heb'ya' xax ya' yuluj sc'ul yin̈ Comam, chalni heb'naj: —Ta mache cha circuncisión yin̈ he nimanil haca' yalni sley ya' Moisés, mache chab' he colb'anil. 2- 3Yuxin ya' Pablo b'oj ya' Bernabé caw steye sb'a heb'ya' b'oj heb'naj, yaja' matzet swatx'e heb'ya', yuxin x'aottoj heb'ya' b'oj haywan̈ heb'ya' ah Antioquía tu', sk'amb'e' tet heb'ya' apóstol b'oj heb'ya' anciano ay yul con̈ob' Jerusalén tzet ẍtan̈ hune' tu'. Yuxin ẍto heb'ya'. Yulb'al aycoj heb'ya' yin̈ b'el x'ec' heb'ya' b'et Fenicia b'oj Samaria. X'ichi yalni heb'ya' tet heb'ya' xax ya' yuluj sc'ul yin̈ Comam b'etu', to ay heb'ya' mat israeloj xacan b'aytic'a ayicoj, xmeltzocoj yin̈ Comam Dios. Ha' xab'en heb'ya' hune' tu' caw stzalacan̈ heb'ya'. 4Yet x'apni heb'ya' Jerusalén, tzalalal xu schaot heb'ya' yu heb'ya' apóstol, heb'ya' anciano b'oj yu hunk'aanxa heb'ya' xax ya' yuluj sc'ul yin̈ Comam. Lawitu' x'oc heb'ya' yalnoj hantaj tzetet c'ul xu Comam Dios yin̈ heb'ya' . 5Yaja' ay haywan̈ heb'ya' aycoj yin̈ spartido heb'naj fariseo xa' yuluj sc'ul yin̈ Comam, x'ah lin̈noj heb'ya', xalni heb'ya': —Heb'ya' mat israeloj cha' yuluj sc'ul yin̈ Comam Jesús yilal schani heb'ya' circuncisión, yilal jalni ta syijye heb'ya' sley ya' Moisés. 6Yuxin xyamicoj heb'ya' apóstol b'oj heb'ya' anciano sk'umlan sb'a heb'ya' tzet chucan hune' tu'. 7Caw maytax ichi steyen sb'a heb'ya', x'ah lin̈noj ya' Pedro, xalni ya': —Wuẍtaj, heyohtaj to payxa xquin sic'leltoj Comam Dios yu walni tzoti' yet colb'anil tet anma mat israelojan, yun̈e ya'ni anma tu' yuluj sc'ul yin̈ Comam Jesucristo. 8Yohtaj Comam Dios tzet ib'il yu sc'ul hunun anma, yuxin xa' Comam Comam Espíritu Santo tet anma mat israeloj haca' xu ya'ni jet. Hactu' xute Comam yun̈e syeni to c'ulxa pax heb'ya' tu' yul sat Comam. 9Yuxin lahanxa heb'ya' yul sat Comam b'oj hayon̈, haxca xax tan̈canoj smul heb'ya' yet xa'ni yuluj sc'ul yin̈ Comam Jesucristo. 10Tinan̈, ¿tzet yuxin cheyacoj Comam Dios yin̈ ilweb'al heyalni? Hune' sley ya' Moisés tu' haca' hune' ijatz caw al mach'ah ju. Machon̈ c'oji co yijyeni, machca xc'oji heb'ya' jichmam syijyeni. ¿Tzet yuxin cheyoche cheyacoj hune' tu' yib'an̈ heb'ya' mat israeloj xa' yuluj sc'ul yin̈ Comam? 11Mach sje ta hactu' cheyute, haxca johtaj to yun̈e sc'ulch'anil sc'ul Jahaw Jesús ẍco cha colb'anil haca' heb'ya' tu'. 12Ha' xab'en heb'ya' hune' tu', xpax tz'inna heb'ya' sunil. Lawitu' xalni ya' Bernabé b'oj ya' Pablo hantaj hej c'ayb'alc'ule syeni scan̈il ye Comam xa' yub' heb'ya' yet x'ec' heb'ya' xol anma mat israeloj. 13Lawi yalni heb'ya' hune' tu', xalni ya' Jacobo: —Wuẍtaj, ab'ewej tzet ẍwala' ti'an. 14Lan̈anto yalni ya' Simón jet tzet xu yichencan̈ Comam Dios scolwa yin̈ anma mat israeloj, yet sic'leniltoj Comam xol heb'jetb'i mactaj ch'oc scon̈ob'oj. 15Ha' hune' lan̈an yuni Comam ti', lahan ch'elicoj b'oj tzet tz'ib'n̈eb'il yu heb'ya' schejab'lom Comam Dios, chalni yin̈ hacti': 16Yet b'ak'in̈aloj chin hulujpaxan, cat wanojcoj hune' yic'al naj rey David shelb'alojan, haxca haca' hunuj n̈ah x'ec' wejnayi, hactu' xucan schejb'anil naj David tu' yaja' chin watx'e paxcan̈an, 17yun̈e tx'ihal mac mat israeloj cha'a'coj yanma win̈ hayin Yahawin ti'an. Ha' ẍwal ti'an, ha' hantaj mac sic'leb'ilxa wu, yul hunun con̈ob' yu yoc hin con̈ob'ojan, ẍi Comam. 18Hactu' xute Comam Dios Jahaw ya'ni hunk'aan ti' yohtajn̈e anma yettax caw payxa, ẍiayoj. 19Yuxin ha' ẍwute walnian, ta matxa tzet ẍco chilb'a yib'an̈ heb'ya' mat israeloj x'anican b'ay aytic'acoj, ẍmeltzocoj yin̈ Comam Dios. 20To han̈c'a ẍco tak'e tet heb'ya' yul hunuj human, ta matxa sc'ux no' chib'e halteb'ilxa tet hej tioẍ, ta matxa ch'ixli heb'ya', b'oj matxa sc'ux heb'ya' schib'eal no' nok' mat elnajoj schiq'uil, b'oj matxa slo heb'ya' schiq'uil hej no' nok'. 21Ẍwal hune' ti'an haxca yettax payxa ch'awtelax sley ya' Moisés xol anma yulaj capiya yet hunun tz'ayic xewb'al. Hasta tinan̈ yehn̈eto yal-lax yul hunun con̈ob'. 22Hune' tu', c'ul yalni heb'ya' apóstol, heb'ya' anciano b'oj heb'ya' yak'b'il xax ya' yuluj sc'ul yin̈ Comam, ta sic'lelax huncawan̈oj heb'ya' xol heb'ya' ẍto yetb'ioj ya' Pablo b'oj ya' Bernabé yul con̈ob' Antioquía. Yuxin sic'lelax ya' Judas, ẍhalot Barsabás yin̈, b'oj ya' Silas. Heb'ya' tu' ay yelapnoj ye heb'ya' xol heb'ya' xax ya' yuluj sc'ul yin̈ Comam. 23Lawitu' x'a'lax schejb'anil heb'ya' yinitoj hune' hum. Chalni te': Hayon̈ apóstolon̈ ti'an, b'oj hayon̈ ancianoon̈ ti'an, juẍtaj co b'a yin̈ Comam Jesucristo, ẍjatoj he cawil hex juẍtaj mat israeloj hex ayex yul con̈ob' Antioquía, b'oj sunil yul scuenta Siria b'oj Cilicia. 24Xjab'ean to ay hunk'aan heb'ya' ay co xol ti' sti'en̈e sb'a sto cuywal te xol. Xjab'ean ta xa' heb'ya' tacoj he c'ul yu hej tzet xal teyet. Mam somk'atoj yul he wi' yu tzet xal heb'ya' teyet. 25Yuxin xco lahti'n̈e co b'aan, xco sic'leniltoj cawan̈ heb'ya' co xol ti'an yun̈e sto heb'ya' te xol. Hun chu yapnoj heb'ya' b'oj ya' juẍtaj Bernabé b'oj ya' juẍtaj Pablo caw xahan ay ju ti'an. 26Heb'ya' ti' hinanxa yanicoj sk'inal yin̈ sya'tajil yu yocnicoj yin̈ smunil Jahaw Jesucristo. 27Ẍjatoj ya' Judas b'oj ya' Silas teyetan, ha' hun heb'ya' ẍhalnoj teyet tzet xco watx'e b'eti'an. 28Xco lahsatn̈e cob'aan ta mat tx'ihaloj hej chejb'anil ẍjatoj heyijyean. Hactu' xu syeniltoj Comam Espíritu Santo. Han̈c'a hunk'aan ti' yet ay he yijyeni: 29Ta matxa che c'ux schib'eal no' nok' xax haltelax tet hej tioẍ. Machca che lo schiq'uil no' nok'. Machca che c'ux schib'eal no' nok' mat elnajoj schiq'uil. Matxaca chex ixli. Ta che yijye hunk'aan st'in̈anil ti', c'ul chex elojc'oj, Caw nann̈e heyu, ẍiayoj yul te hum. 30Ha' x'alaxtoj heb'ya' tu', x'apni heb'ya' yul con̈ob' Antioquía. Lawi syamb'an heb'ya' heb'ya' xax ya' yuluj sc'ul yin̈ Comam ay b'etu', xanic'oj heb'ya' te' hum tu'. 31Lawi yilni heb'ya' te', caw stzalacan̈ heb'ya', haxca cha' te' yak'lob'al sc'ul heb'ya'. 32Ya' Judas b'oj ya' Silas cha' pax heb'ya' tzoti' ẍtit tet Comam Dios, yuxin hunay stzotel heb'ya' b'oj heb'ya' xax ya' yuluj sc'ul yin̈ Comam ay b'etu', cha'ni heb'ya' yak'lob'al sc'ul heb'ya' b'oj yip sc'ul. 33Lawi yec' heb'ya' hayeb' tz'ayical b'etu' x'a'ot yuch'antioẍ tet heb'ya', yun̈e smeltzo heb'ya' xol heb'ya' x'anitoj. 34Wal ya' Silas k'a scha swi' ya' scancan b'et Antioquía tu'. 35Pax ya' Pablo b'oj ya' Bernabé xcan heb'ya' b'etu'. Hun x'ec' heb'ya' b'oj hunk'aanxa heb'ya' ay b'etu' scuynuj anma b'oj spujb'anc'oj stzoti' Comam Jahaw. 36Ayxana tu', xalni ya' Pablo tet ya' Bernabé: —Ton̈ jila' heb'ya' xax ya' yuluj sc'ul yin̈ Comam ay yul hunun con̈ob' b'ay xaxtic'a con̈ ec' jala'c'oj stzoti' Comam Jahaw, cat co k'amb'eni hanic' yecoj heb'ya', ẍi ya'. 37Ay yala' ya' Bernabé ẍto ya' Juan Marcos yin̈ heb'ya', 38yaja' mach sje ya' Pablo ta ẍto ya' yin̈ heb'ya', haxca xtin̈chaotcan heb'ya' hunec yu ya' yul con̈ob' Panfilia, mach slah ya' yec' yin̈ heb'ya' yin̈ sya'tajil b'el. 39Yuxin x'el howal yin̈ hune' tu' yu heb'ya', spohnitoj sb'a heb'ya', nanan b'ehal xi'toj hunun heb'ya'. Ya' Bernabé xitoj ya' ya' Marcos yin̈, x'oc ya' yul hune' te' barco xto ya' b'et Chipre. 40Wal ya' Pablo, ya' Silas xitoj ya' yin̈. Lawi sk'anni heb'ya' ay Antioquía sc'ulal sc'ul Comam Jahaw yib'an̈ heb'ya', xto heb'ya'. 41Xto sla heb'ya' yec' yul scuenta Siria b'oj yul scuenta Cilicia ya'noj yak'lob'al sc'ul heb'ya' xax ya' yuluj sc'ul yin̈ Comam yul hunun iglesia.


Copyright
Learn More

will be added

X\