HECHOS 15

1Yet hune' tiempohal tu' xin, ay huntek'an ebnaj ayxaco yul isk'ab Comam Jesús tit bey Judea, yapni ebnaj yul con̈ob Antioquía. Istzabnico ebnaj yalni tet ebnaj juẍta tu' haca' ti': —Tato mach chioc hune' yechel circuncisión teyin̈ haca' yalni isley naj Moisés, caw mach chexcolchahi, ẍi ebnaj tet ebnaj juẍta tu'. 2Ha' xin naj Pablo yeb naj Bernabé oc ebnaj iscaja' huntek'an tzoti' yin̈ hune' circuncisión tu'. Yoccano ebnaj tzotelo yiban̈ilo huntek'an tzoti' tu' yeb ebnaj chalni hun tu'. Yu maẍtic'a watx'ayo yu ebnaj, yuxin yal ebnaj juẍta tu' tato chito naj Pablo yeb naj Bernabé bey Jerusalén; istopaxo haywan̈xa ebnaj juẍta yinta ebnaj, cat isk'ambelax tet ebnaj ischejab Comam Jesús yeb tet ebnaj anciano ay bey tu' ta caw yeli chak' circuncidar isba ebnaj juẍta mach Israeloj, mato machoj. 3Hac tu' yu ischejlaxto ebnaj yu ebnaj ayxaco yul isk'ab Comam ay yul con̈ob Antioquía. Hayet yec' ebnaj yul ismajul Fenicia yeb Samaria, yalni ebnaj tet ebnaj ayxaco yul isk'ab Comam bey huntek'anxa con̈ob tu' tato ay ebnaj mach Israelo yacano hune' icham beybale ik'biltic'a yu, yanico isba ebnaj yul isk'ab Comam Jesús. Hayet yaben ebnaj juẍta isk'umal hune' tu', caw tzalacanocan̈ yanma ebnaj yabeni. 4Hayet yapni ebnaj bey yul con̈ob Jerusalén caw tzalahilal yu ischahlax ebnaj yu ebnaj ischejab Comam Jesús, yeb ebnaj anciano, yeb sunil anma ayxaco yul isk'ab Comam bey tu'. Lahwi tu' xin, yoc naj Pablo yeb naj Bernabé yalni hanta tzettaj isc'ulal iswatx'e Comam Dios yu ebnaj. 5Yaja' xin ay haywan̈ ebnaj fariseo xayaco isba yul isk'ab Comam Jesucristo yet yalan̈tocanoj, ha' ebnaj tu' xin ah lin̈noj, yalni ebnaj: —Ha' ebnaj mach Israelo chichahni Comam Jesús yul yanma, caw yilal ch'ak'lax circuncidar ebnaj, cat jalni tet ebnaj tato caw chisyije ebnaj tzet chal isley naj Moisés, ẍi ebnaj fariseo tu'. 6Hac tu' xin yu iscutxbanico isba ebnaj ischejab Comam yeb ebnaj anciano, yoc ebnaj iscuyni yin̈ tzet ch'elico hune' tu'. 7Lahwi islahti'n̈en isba ebnaj yin̈ tzet chucano hune' tu', yah lin̈no naj Pedro, yalni naj haca' ti': —Hex wuẍtaj, caw heyohtaj ta yet caw yalan̈tocanoj ha' Comam quinsaynilojan texol yu walnic'ojan Tzoti' yet colbanile xol anma mach Israeloj, yu yabeni cat ischahni anma tu' Comam Jesucristo yul yanma. 8Wal xin Comam Dios ohtan̈e tzet ay yul yanma hunun anma, yuxin yak' Comam Comam Espíritu Santo tet anma mach Israelo haca' yu yak'ni Comam jet. Hac tu' yute Comam yun̈e isyeniloj tato c'ulpaxo ebnaj jet anmahil tu' yul sat Comam. 9Wal yul sat Comam Dios xin, caw lahanon̈ yeb anma mach Israeloj, yuto ha' Comam sajn̈encano yanma anma tu' yet ischahni anma Comam Jesucristo Iscolomaloj. 10Wal tinan̈ xin, ¿tzet yin̈ yuxinto mach cheyoche hechahba' tzet iswatx'e Comam Dios ti'? Haca' huno ijatz caw alcanoj, matxa chon̈ah yalan̈ yu yalil, hac tu' xin ye isley naj Moisés. Caw maẍtic'a k'oji ebnaj jichmam iswatx'en tzet chal hune' ley tu', hacon̈pax tu' caw mach ch'ijcha ju. Yuxin ¿tzet yin̈ yuxinto cheyaco hune' tu' yiban̈ ebnaj mach Israelo xayaco isba yul isk'ab Comam? 11Wal xin caw johtaxa tato han̈c'an̈e yu isc'ulal isc'ul Comam Jesucristo yuxinto chon̈colchahi. Hacpax tu' xin chu iscolcha anma mach Israeloj, ẍi naj Pedro tu'. 12Hayet yaben ebnaj hune' tu', caw matxa tzet yal ebnaj. Yabenpaxo ebnaj yet yalni naj Bernabé yeb naj Pablo ta caw hantan̈e c'aybalc'ule yak'cano Comam Dios iswatx'e' ebnaj yet yec' ebnaj xol anma mach Israeloj. 13Lahwi istzotel ebnaj, yalni naj Jacobo haca' ti': —Hex wuẍtaj, abewe tzet chiwalan teyet. 14Lan̈anto yalni naj Simón Pedro jet tato isye Comam Dios isc'ulal isc'ul tet anma mach Israeloj, yuto lan̈an issic'nican̈ Comam anma tu' yoc yuninaloj. 15Ha' hune' lan̈an iswatx'en Comam ti', lan̈an yijni isba tzet yalcano Comam Dios bay tz'ibn̈ebil yu ebnaj ischejab Comam Dios yet payat, bay chala: 16Chiapni hune' tiempo bay chiwatojan hune' yuninal isc'ahol icham rey David selelo naj yin̈ ismunil. Yuto haca' hunu n̈a etaxnato sic'lebil, hac tu' yecano ismunil naj rey David, yaja' chinwatx'ecan̈an hunelxa. 17Hac tu' xin, tx'i'al anma mach Israeloj chaco isnabal win̈an, hanin Yahaw inti'an. Ha' ton sunil anma tu' chaco isba yul ink'aban, ha' chiwawtecojan yoc incon̈obojan, ẍi Comam. 18Hac tu' yute yalnicano Comam Dios Jahawil, yet yak'ni huntek'an ti' yohtan̈elo anma yettax caw payxa, ẍiayo yul Yum Comam, ẍi naj Jacobo tu'. 19Yalnipaxo naj Jacobo hunelxa: —Chintxumilojan ta matxa chu janico hune' ijatz yet ley yiban̈ ebnaj mach Israeloj, yuto ebnaj tu' isbejcano ebnaj huntek'an beybale ik'biltic'a yu, yu yanico isba yul isk'ab Comam Dios. 20Yuxin ha' hune' yilal cotak'ento yul hunu carta ta matxa chisc'ux ebnaj no' chibe haltebilxa tetej tioẍ, yeb xin ta mach chiec' ebnaj yin̈ ixloj, yeb mach chisc'uxpaxo ebnaj ischibehal no nok' ton̈e chihojlax camoj, mach chislopaxo ebnaj no' chic'. 21Chiwalan hune' ti', yuto yettax payxa ichicanti yilni ebnaj isley naj Moisés yulaj iscapilla ebnaj jet Israelal yin̈ hunun tz'ayic xewilal. Hacpax tu' tinan̈, caw hune'n̈etic'a ha' yalnilto ebnaj yul hunun con̈ob, ẍicano naj Jacobo tu' tet ebnaj. 22Ha' tzet yal naj Jacobo tu', caw ischah yabe' ebnaj ischejab Comam Jesús yeb ebnaj anciano, yebpaxo sunil ebnaj ayxaco yul isk'ab Comam tu'. Hac tu' xin issaylax haywan̈ ebnaj xol ebnaj chito yetbiho naj Bernabé yeb naj Pablo yul con̈ob Antioquía tu' hunelxa. Yuxin hac tu' yu issaylax naj Judas, naj chihallaxpaxo Barsabás, yebpaxo naj Silas. Ha' ebnaj cawan̈ ti' caw aycano yelapno ye xol ebnaj ayxaco yul isk'ab Comam. 23Lahwi tu' xin, ischejlaxto ebnaj, yak'a' te' carta bay chal haca' ti': —Han̈on̈ti'an̈ ischejab Comam Jesús jehan̈, yeb han̈on̈ anciano on̈ti'an̈, heyuẍta jehan̈ yin̈ Comam Jesucristo, chicok'ambehan̈ teyet hanic' heye yin̈ hecawil hex wuẍta mach Israelo ay yul con̈ob Antioquía, yeb yul tx'otx' Siria yeb yul tx'otx' Cilicia. 24Jabehan̈ tato ay haywan̈ ebnaj el coxolan̈ bey ti' ton̈e xin yaco yet ebnaj isto bey tu'. Jabenpaxojan̈ tato chiyak' taco ebnaj hec'ul yu tzet chala, cat yak'ni somchahoto henabal, chalni ebnaj ta yilal ch'oc hune' circuncisión teyin̈, cat heyijen tzet chal isley naj Moisés. 25Yuxinto colahti'n̈e cobahan̈, cosaynilojan̈ haywan̈ ebnaj chito texol tu'. Hune'n̈e chiyu isto ebnaj yeb juẍta Bernabé yeb juẍta Pablo, ebnaj caw xahan ay juti'an̈. 26Ebnaj cawan̈ ti', caw hinan ebnaj yaben isya'tajil yin̈ yet Comam Jesucristo, ayxapaxo bay caw etzaxa cam ebnaj yu anma. 27Yuxin chijatojan̈ juẍta Judas yeb juẍta Silas tec'atan̈, ha' ebnaj xin chihalni teyet tzet chalilo huntek'an tzoti' ayayo yul carta. 28Comam Espíritu Santo halni jetan̈ ta matxa ijatz chijacojan̈ teyiban̈, han̈c'an̈e huntek'an caw yilal ye ti': 29Mach chec'ux ischibehal no nok' xaak'lax xahanbalil tet tioẍ. Machi xin chelopaxo ischiq'uil hunu no nok' yebpaxo xin mach chec'ux ischibehal no nok' chishoj camo isba, mach xin chexec' ixloj. Ta cheyije huntek'an ti', toholxa heyeco chal tu'. Caw cheya'iln̈e heba, ẍiayo yul te' carta. 30Hac tu' yu ischejlaxto ebnaj bey yul con̈ob Antioquía. Hayet yapni ebnaj, iscutxbanayo isba sunil anma ayxaco yul isk'ab Comam bey tu', yak'ni ebnaj te' carta tet ebnaj. 31Lahwi yilni ebnaj tzet chal te' carta tu', caw tzalacanocan̈ yanma ebnaj yuto yak' te' yak'lobal yanma ebnaj. 32Naj Judas yeb naj Silas tu', yalpaxo ebnaj Tzoti' chitit tet Comam Dios, hac tu' yu yak'ni ebnaj yak'lobal yanma ebnaj ayxaco yul isk'ab Comam, yiptzelaxpaxcano ebnaj yin̈ yet Comam yu ebnaj. 33Lahwi yec' hayeb tz'ayic yiban̈ ebnaj, istak'licano ebnaj tet ebnaj ayxaco yul isk'ab Comam bey tu', yet ismeltzoxato ebnaj isc'atan̈ ebnaj juẍta an̈eti ebnaj bey con̈ob Jerusalén. 34Yaj wal naj Silas, oc yin̈ isnabal naj iscancano bey Antioquía tu'. 35Canpaxcano naj Pablo yeb naj Bernabé bey Antioquía tu'. Hune'n̈e ec' ebnaj yeb huntek'anxa ebnaj juẍtaj ay bey tu' iscuyu' anma, ispujbanic'o ebnaj Istzoti' Comam Dios. 36Lahwi yec' hayeb tz'ayic xin, yalni naj Pablo tet naj Bernabé: —Ton̈ jila' ebnaj juẍta bey yul hunun con̈ob bayxatic'a con̈ec' jala' Istzoti' Comam, cat jilni hanic' ye ebnaj, ẍi naj Pablo tu'. 37Ha' naj Bernabé tu' xin, ay yala' naj tato chito juẍta Juan Marcos yetbiho ebnaj. 38Yaja' yal naj Pablo tato mach chiyu isto naj yintaj ebnaj, yuto yet hunel elcano naj yinta ebnaj bey yul con̈ob Panfilia; hacn̈e tu' xin, matxa islah naj hune' ismunil tu'. 39Yuxin iscajlecan̈ isba ebnaj cawan̈ tu' yin̈ naj Juan Marcos, ispolen isba ebnaj, nananxa behal tocano hunun ebnaj. Hac tu' yu yoc tzujnu naj Juan Marcos yinta naj Bernabé, yoc ebnaj yul hune' te' barco, isto ebnaj bey tx'otx' Chipre. 40Wal naj Pablo xin, haxa naj Silas yito naj. Caw tak'elaxcano ebnaj yul isk'ab Comam Dios yu ebnaj juẍta ay bey tu', tzujan tu' xin isto ebnaj. 41Yec' ebnaj yul ismajul tx'otx' Siria yeb yul ismajul tx'otx' Cilicia yiptzencano ebnaj juẍtaj yebpaxo ebix janab yin̈ isc'ulal Comam yulajla hunun con̈ob bay la-ec' ebnaj tu'.

will be added

X\