HECHOS 14

1Ha'tic'a tzet xa'le ya' Pablo b'oj ya' Bernabé yul con̈ob' Antioquía, ha'tic'a xa'le pax heb'ya' yul con̈ob' Iconio. Yet x'apni heb'ya' Iconio tu', x'octoj heb'ya' yul scapiya anma israel. Caw c'ul xu stzotel heb'ya' yin̈ stzoti' Comam Dios b'etu', yuxin caw tx'ihal anma israel xa' yuluj sc'ul yin̈ Comam Jesús b'oj anma mat israeloj. 2Haxa heb'naj israel mach sje ya'a' yuluj sc'ul xa' heb'naj sc'uluj anma mat israeloj yun̈e spaq'uicoj yin̈ heb'ya'. 3Yaja' nahatilto xcan heb'ya' yul hune' con̈ob' tu'. Sunil sc'ul heb'ya' chalnicoj heb'ya' Comam Jahaw. Ha' Comam ch'a'ni yip stzoti', yet chalnic'oj heb'ya' sc'ulch'anil sc'ul Comam. Xa' Comam scan̈il ye heb'ya' yuni hej tzetet c'ayb'alc'ule syeb'aniloj to caw yel chal heb'ya'. 4Anma ay yul hune' con̈ob' tu' spohtoj sb'a, hune' majan xto yin̈ anma israel maxto cha' yuluj sc'ul yin̈ Comam, hune'xa majan xto yin̈ heb'ya' apóstol. 5Lawitu' sk'umlancan̈ sb'a heb'naj mat israeloj b'oj heb'naj israel b'oj heb'naj swi'al yin̈ heb'naj, x'oc heb'naj yiche'coj howal yin̈ heb'ya' cawan̈, sc'ojnicamoj heb'naj heb'ya' yalni. 6Ha' xab'en heb'ya' hune' tu', x'el heb'ya', xto heb'ya' yul con̈ob' Listra b'oj Derbe aycoj yul scuenta Licaonia, b'oj hej shoyanil tu'. 7Hat x'oc heb'ya' scuyu' anma yin̈ tzoti' yet colb'anil. 8Yul con̈ob' Listra ahayoj hune' naj tx'oj ye yoj yet xpitzc'ayi. Maẍtic'a hunecoj xb'elwi naj. Yet hunec, tz'on̈anay naj lan̈an yab'en naj tzet chal ya' Pablo. 9X'occan t'an̈noj ya' yin̈ naj. Ha' xilni ya' to cha' naj yuluj sc'ul ta chu swatx'i naj yu Comam Dios, 10xalni ya' yin̈ ip tet naj: —Ahan̈lin̈noj, ẍi ya' tet naj.Yin̈n̈e ha' mataj x'ahna lin̈noj naj, x'ichi sb'elwi naj. 11Ha' xilni anma hune' tzet xu ya' tu', ichi yalni yin̈ ip yin̈ yab'xub'al anma ah Licaonia, chalni heb'jetb'i: —Ilwejc'anab'i, ay cawan̈ dios xpaq'ui anmail x'ayiloj co xol. 12Naj Bernabé ti' dios Zeus, naj Pablo dios Hermes, haxca ha' naj ẍalni jet, ẍi anma. 13Naj yalcal txah yet tioẍ Zeus tu', xb'ey naj yi'a'tij hunk'aan no' wacax b'oj te' hak'b'al b'et stemplo aycoj xtxam con̈ob'. Xinitij naj sti' spultail con̈ob', xa'ni naj xahanb'al b'oj anma tet heb'ya' yalni. 14Ha' xab'en heb'ya' hune' tu', tzilniloj heb'ya' xil sk'ap syeb'aniloj to ẍtac sc'ul heb'ya'. X'oc lemna heb'ya' xol anma yalnoj yin̈ ip: 15—Hex mamin, ¿tzet yuxin cheyu hune' ti'? Hayon̈ ti'an lahan anmaon̈ b'oj hexan. To yu he b'ejnican hunk'aan tzetet ti', yuxin chon̈ hul ja'a' tzoti' yet colb'anil teyetan; haxca hunk'aan tzetet cheyu ti' matzet chaliloj. Tinan̈ awejxacanoj, awejcoj heyanma yin̈ Comam Dios itzitz, Comam xwatx'en satcan̈, tx'otx'otx', ha' mar b'oj sunil tzetet ib'il yu. 16Yet yalan̈to, ton̈e chil Comam Dios tzet chu anma, b'aytetn̈etic'a chal sc'ul cat yuni. 17Yaja' matoj yu chon̈ snahuln̈etoj Comam, to sye Comam jet tzet caw ye yin̈ hej tzetet c'ul chu, yet chaniayoj Comam ha' n̈ab' co xol. Ha' Comam ch'a'ni syaxil hej tz'unub' chon̈ a'ni wa'oj, cha'ni pax Comam tzalalal yin̈ janma. 18Waxan̈ca hactu' yalni heb'ya', lan̈o xa' cacha sb'a anma tu', to yilal chacoj xahanb'al yin̈ sat heb'ya' yalni. 19Lan̈anto tu' x'apni hunk'aan heb'naj israel speto Antioquía b'oj Iconio. X'oc heb'naj ya'noj sc'uluj anma, x'oc heb'naj sc'ojnojcamoj ya' Pablo yalni. Ham yalni heb'naj ta xax cam ya', yuxin startoj heb'naj ya' xtxam con̈ob'. 20Wal heb'ya' xax ya' yuluj sc'ul yin̈ Comam, ha' x'apni heb'ya', x'oc hoynoj heb'ya' yin̈ ya'. Lawitu' x'ah lin̈noj ya', x'ocpaxtij ya' yul con̈ob'. Haxa hunxa tz'ayic xto ya' b'oj ya' Bernabé yul con̈ob' Derbe. 21Ha' x'apni heb'ya' b'etu' xalni heb'ya' tzoti' yet colb'anil. Tx'ihal anma xa' yuluj sc'ul yin̈ Comam Dios yu tzet xal heb'ya'. Lawitu' xmeltzo pax heb'ya' yul con̈ob' Listra, Iconio b'oj Antioquía. 22Yet ch'ec' heb'ya' yul hunun con̈ob', chiptze heb'ya' heb'ya' xax ya' yuluj sc'ul yin̈ Comam. Chalni heb'ya':—A'wej yilal scawxi he c'ul yin̈ Comam haxca yulb'al lan̈an co b'elwi yin̈ joc yul sk'ab' Comam Dios, yilal jec' yin̈ hej sya'tajil, ẍi heb'ya'. 23Xol heb'ya' yin̈ hunun iglesia sic'lecan heb'ya' heb'ya' ch'oc ancianoal. Lawi ya'ni heb'ya' oración b'oj ayuno, stak'encan heb'ya' heb'ya' yul sk'ab' Comam Jahaw b'ay xax ya' yuluj sc'ul. 24Lawi sculusn̈enic'toj heb'ya' cawan̈ tu' tx'otx' Pisidia, x'apni heb'ya' b'et Panfilia. 25X'oc heb'ya' stzotenoj stzoti' Comam Dios yul con̈ob' Perge. Lawitu' x'ayapnoj heb'ya' yul con̈ob' Atalia. 26Hat x'oc heb'ya' yul hune' te' barco, xmeltzo heb'ya' yul con̈ob' Antioquía b'ay aya yet xtak'eot heb'ya' yul sk'ab' Comam Dios yu sto heb'ya' yalnoj stzoti' Comam. Hune' munil tu' xijcan sb'a yu heb'ya' tinan̈. 27Yet x'apni heb'ya', syamb'ancoj heb'ya' heb'ya' xax ya' yuluj sc'ul yin̈ Comam ay b'etu'. X'oc heb'ya yalnoj hantaj tzetet c'ul syeloj sb'a yin̈ heb'ya' yu Comam Dios, b'oj tzet chu schani Comam mac mat israeloj xa'nican heb'ya' yuluj sc'ul yin̈ Comam. 28Nahatil to xcan heb'ya' sc'atan̈ heb'ya' xax ya' yuluj sc'ul ay b'et Antioquía tu'.


Copyright
Learn More

will be added

X\