HECHOS 14

1Haca'tic'a yak'le naj Pablo yeb naj Bernabé bey yul con̈ob Antioquía, hac tu' yak'lepaxo ebnaj yul con̈ob Iconio. Hayet yapni ebnaj bey yul con̈ob Iconio tu', yocto ebnaj yul iscapilla ebnaj Israel. Caw c'ul yute yalnilo ebnaj Istzoti' Comam Dios, yuxin caw hantan̈e ebnaj Israel yeb huntek'anxa anma mach Israelo anayto yul yanma yin̈ tzet yal ebnaj. 2Yaj wal ebnaj Israel mach chahnayto yul yanma yin̈ Comam, oc ebnaj ak'oc'ule tet ebnaj mach Israelo bey tu' yun̈e tx'oj isnani ebnaj yin̈ ebnaj juẍtaj. 3Yaja' nahatil ec' naj Pablo yeb naj Bernabé yul hune' con̈ob tu'. Caw yin̈ sunil yanma ebnaj istzotel yin̈ isc'ulal isc'ul Comam Dios. Yun̈e yillaxi tato yel chal ebnaj, yak' Comam ishelanil ebnaj iswatx'en tzettaj ye tu' caw c'ulcanoj yeb xin ej c'aybalc'ule. 4Ha' anma ay yul hune' con̈ob tu', ispoh isba. Hune' majan ebnaj oc tzujno yinta ebnaj Israel, mach yayto ebnaj yul yanma yin̈ Comam, hunxa majan ebnaj xin occano tzujno yinta naj Pablo yeb naj Bernabé. 5Lahwi tu' xin, islahti'n̈en isba ebnaj Israel yeb anma mach Israeloj, yebpaxo ebnaj yahawil yeco yin̈ con̈ob tu', yoc ebnaj yichenico hune' howal yin̈ naj Pablo yeb naj Bernabé yun̈e isk'ojlax camo ebnaj. 6Yaja' yet yaben ebnaj cawan̈ hune' tu', yelcan̈ ebnaj, isto ebnaj bey yul con̈ob Listra, yeb bey con̈ob Derbe; cabeb con̈ob tu' ayco yul ismajul Licaonia, istopaxo ebnaj yul huntek'anxa con̈ob hoyanico bey tu'. 7Yul huntek'an con̈ob tu' ocpaxo ebnaj yala' tetej anma Tzoti' c'ul yet colbanile. 8Yul con̈ob Listra ay hune' naj tx'oj ye yoj yettaxtic'a ispitzc'ahi, maẍtic'a xin chibelwi naj. 9Tz'on̈anayo naj yaben tzet chal naj Pablo. Yilni naj Pablo tu' tato caw ayco yanma naj yin̈ Comam Dios, yeb ta chu iswatx'i naj yu Comam, yuxin oc t'an̈no naj Pablo yin̈ naj, 10yalni naj tet naj yin̈ ip: —Ahan̈wanoj, cat hatoholban̈en haba yiban̈ hawoj, ẍi naj Pablo. Yin̈ hamataj ah lin̈no naj, yichico naj isbelwi. 11Haxa yet yilni anma tzet iswatx'e naj Pablo tu', yah yaw anma yin̈ caw ip, yalni anma yin̈ abxubal chihallax bey tx'otx' Licaonia tu' haca' ti': —Ilwec'anabi lah, ay cawan̈ codiosal mahul coxol mayuteco isba anmahil. 12Ha' naj Bernabé ti', ha' codiosal Júpiter, wal naj Pablo ti' xin, ha' codiosal Mercurio, yuto ha' naj matzotelilto coxol, ẍi anma yin̈ ebnaj cawan̈ tu'. 13Ay hune' naj sacerdote yet isdiosal Júpiter tu', caw yahawil yeco naj yin̈ hune' yatut tioẍ Júpiter ayco yin̈ istxam con̈ob. Bey naj yik'a'ti huntek'an no' tzehla wacax yeb huntek'an te' xaj te', yu choche naj yeb anma tu' yak'aco xahanbalil tet ebnaj cawan̈ ischejab Comam tu' bey ispultahil istxam con̈ob. 14Hayet yaben naj Bernabé yeb naj Pablo hune' tu', istzilnito ebnaj xil isk'ap yun̈e isyenilo ebnaj tato chitac isc'ul. Yoc ebnaj xol anma, yalni yin̈ caw ip haca' ti': 15—Wal tinan̈ hex wet anmahil, ¿tzet yin̈ yuxinto cheyute hune' ti'? Walon̈ti'an̈ caw anma on̈an̈ haca' hex ti', yuxinto chon̈hulan̈ jala'an̈ teyet ta chebejcano huntek'an machiswalil chewatx'e caw matzet chaliloj, cat heyanico heba yul isk'ab Comam Dios itzitzn̈etic'a yin̈ sunilbal tiempo. Ha' hune' Comam ti', watx'en̈e satcan̈ yeb tx'o tx'otx' yeb sunil tzet ay sat tx'otx', iswatx'enpaxo Comam ha' mar yeb sunil tzet ay xol ha'. 16Wal yet yalan̈tocanoj ton̈e yil Comam Dios tzet chu anma yin̈ baytetejn̈etic'a chal isc'ul chiswatx'e. 17Yaja' matolo yu chon̈isnahuln̈eto Comam, ¡machoj! Walxinto chisyelo isba Comam jet yin̈ej isc'ulal chiswatx'e, haca' yaniti Comam ha' n̈ab jiban̈ cat isch'ib sunil tzet chicotz'unu. Ch'ak'nipaxo Comam sunil tzet chicolo, cat yak'nipaxo tzalaho coc'ul, ẍi ebnaj tet anma tu'. 18Waxan̈ca yal naj Pablo yeb naj Bernabé haca' tu', yaja' caw lan̈o islin̈ba anma yalni tato chicam no' wacax yin̈ xahanbalil tet ebnaj. 19Yaj wal xin ay huntek'an ebnaj Israel ay yul con̈ob Antioquía yeb con̈ob Iconio apni yul con̈ob Listra tu'. Yoc ebnaj ak'oc'ule tet anma, hac tu' xin yu ishelni anma tu' isnabal, yoc anma isk'ojnocan̈ naj Pablo. Ham yalni anma tato cam naj, yuxin oc anma ishatxacanilto naj yintalto con̈ob. 20Yapni ebnaj ayxaco yul isk'ab Comam isc'atan̈ naj Pablo tu', yoc hoyno ebnaj yin̈ naj. Lahwi tu' xin yah lin̈no naj, yocpaxto naj yul con̈ob tu'. Haxa yin̈ hune'xa tz'ayic xin, isto naj yeb naj Bernabé bey hune'xa con̈ob chiyij Derbe. 21Hayet yapni ebnaj bey tu', yalnic'o ebnaj Tzoti' c'ul yet colbanile. Tzetc'a anma chahni Comam Dios yul yanma yu tzet yal ebnaj. Lahwi tu' xin ismeltzopaxo ebnaj yul con̈ob Listra hunelxa, yeb bey Iconio, yebpaxo bey con̈ob Antioquía ay yul ismajul Pisidia. 22Hayet yec' ebnaj yul hunun con̈ob tu', yiptzencano ebnaj ebnaj ayxaco yul isk'ab Comam. Yalnicano ebnaj haca' ti': —Lahweco heyanico heyanma yin̈ Comam yuto han̈on̈ ayon̈xaco yul isk'ab Comam Dios caw tx'i'al isya'tajil ch'ec' jiban̈, ẍi ebnaj cawan̈ tu'. 23Yul hunun con̈ob xol ebnaj ayxaco yul isk'ab Comam tu' xin, issaycano ebnaj mac chioc ancianohal xol ebnaj juẍta tu'. Lahwi tu' yoc ebnaj sunil yin̈ hune' yet mach chon̈wa'i yu cotxahli tet Comam Dios, hac tu' yu yabenn̈elaxcanto ebnaj tu' yul isk'ab Comam Dios, Comam chahbilxa yu ebnaj. 24Lahwi isk'axponic'to naj Pablo yeb naj Bernabé yul ismajul tx'otx' Pisidia, yapni ebnaj yul ismajul tx'otx' Panfilia. 25Yalnic'o ebnaj Istzoti' Comam Dios yul con̈ob Perge, tzujan tu' xin yay apno ebnaj yul con̈ob Atalia. 26Ha' bey tu' xin, oc ebnaj yul hune' te' barco, ismeltzo ebnaj yul con̈ob Antioquía hunelxa, bay tak'elaxto ebnaj yul isk'ab Comam Dios yu ebnaj juẍtaj yet yichico ebnaj yin̈ ismunil yalnic'o Istzoti' Comam Dios yulajla con̈ob; wal xin yijcano isba hune' ismunil ebnaj tu'. 27Yet yapni ebnaj yul con̈ob Antioquía tu' xin, iscutxbanayo isba ebnaj ayxaco yul isk'ab Comam, yoc ebnaj yalno yin̈ hanta isc'ulal iswatx'e Comam Dios yin̈ ebnaj. Yalnipaxo ebnaj yin̈ tzet yu yak'nipaxo Comam isc'ulal yiban̈ anma mach Israeloj, yun̈e ischahni anma tu' Comam Iscolomaloj. 28Naj Pablo yeb naj Bernabé nahatilto ec' ebnaj isc'atan̈ ebnaj ayxaco yul isk'ab Comam bey tu'.

will be added

X\