HECHOS 13

1Xol heb'ya' xax ya' yuluj sc'ul yin̈ Comam yul con̈ob' Antioquía, ay heb'ya' b'ay xa' Comam Dios schejb'anil yalni stzoti' tet anma. Ay pax heb'ya' yetwanoj ay scuyni heb'ya' xax ya' yuluj sc'ul yin̈ Comam, haca'na ya' Bernabé b'oj ya' Simón ẍhalot Q'uejal, b'oj ya' Lucio ah Cirene, ya' Saulo, b'oj ya' Manaén, xetch'ib' naj Herodes gobernador b'et Galilea. 2Yet hunec yaman heb'ya' yin̈ ayuno yu shak'en Comam Dios, xalni Comam Espíritu Santo tet heb'ya': —Pohwejiltoj ya' Bernabé b'oj ya' Saulo cat yoc heb'ya' yin̈ munil b'ay ẍwalan ta ch'oqui. 3Lawi ya'ni heb'ya' ayuno b'oj oración, xanicoj heb'ya' sk'ab' yin̈ swi' ya' Bernabé b'oj ya' Saulo, x'aottoj heb'ya' yin̈ smunil. 4- 5Lawi yaottoj heb'ya' yu Comam Espíritu Santo, x'ayapnoj heb'ya' yul con̈ob' Seleucia. Hat x'octoj heb'ya' yul hune' te' barco, x'apni heb'ya' yul con̈ob' Salamina aycoj b'et Chipre. Ha' x'apni heb'ya' b'etu', xto heb'ya' yalnoj stzoti' Comam Dios yul scapiya anma israel ay b'etu'. Xcolwa ya' Juan Marcos yin̈ heb'ya'. 6Lawi sculusn̈enic'toj heb'ya' Chipre tu' x'apni heb'ya' yul con̈ob' Pafos. Ha' b'etu' xilayoj heb'ya' hune' naj israel, Barjesús sb'ih. Naj tu', ahb'e naj, ton̈e stz'aj naj yala' ta schejab'lom Comam Dios ye naj. 7Yetb'i sb'a naj b'oj naj gobernador, Sergio Paulo. Naj gobernador tu', caw tz'ajan sc'ul naj. Xawte naj ya' Bernabé b'oj ya' Saulo, haxca choche naj yab'e' stzoti' Comam Dios. 8Naj ahb'e tu', Elimas sb'ih naj yin̈ griego, xpaq'uic'oj naj yin̈ tzet chal heb'ya' cawan̈, yun̈e macha' naj Sergio yuluj sc'ul yin̈ Comam Dios. 9Aycoj ya' Saulo, Pablo sb'ih paxoj, yalan̈ schejb'anil Comam Espíritu Santo, x'occan t'an̈noj ya' yin̈ naj ahb'e tu'. 10Xalni ya': —¡Hachti' hach sc'ahol naj matzwalil, paquinaj hachc'oj yin̈ sunil tzetet c'ul! Mat c'uluj tzet nab'il hawu, sub'um anma ach. Ayachn̈etic'acoj hawetantoj scuywab'al Comam Jahaw. 11Tinan̈, ẍtit sya'tajil tawib'an̈ yu Comam Dios, matxa chu hawilnoj sajilk'inal hunuj tiempoal, ẍi ya' Pablo tet naj.Yin̈n̈ena tu', xk'ejholiloj chil naj. Toxan̈e ch'ec' tzab'tzon naj, sayni naj mac ch'inic'oj. 12Ha' xilni naj gobernador hune' tu', xa'ni naj yuluj sc'ul yin̈ Comam. Caw xc'ayiloj sc'ul naj yab'en scuywab'al Comam Jahaw. 13X'octoj ya' Pablo b'oj heb'ya' yetb'i yul hune' te' barco, x'el heb'ya' yul con̈ob' Pafos, x'apni heb'ya' yul con̈ob' Perge yul scuenta Panfilia. Wal ya' Juan Marcos, xican sb'a ya', xmeltzo ya' Jerusalén. 14Lawitu' x'el heb'ya' Perge, xto heb'ya' yul con̈ob' Antioquía aycoj yul scuenta Pisidia. Yin̈ tz'ayic xewb'al xto heb'ya' yul scapiya anma israel ay b'etu', x'ay tz'on̈noj heb'ya'. 15Lawi yil-lax sley Comam Dios, b'oj tzet tz'ib'n̈eb'ilcan yu heb'ya' schejab'lom Comam, xalni heb'naj yahaw capiya tet ya' Pablo b'oj ya' Bernabé yin̈ hacti': —Hex wetcon̈ob', ta ay hunuj tzoti' cheyoche cheya' scawxob'aloj co c'ulan, halwej tinan̈. 16X'ah lin̈noj ya' Pablo, x'ec' sk'ab' ya', xalni ya': —Hex wetcon̈ob' israel, b'oj hantaj hex mat israeloj chex nanon tet Comam Dios, ab'ewej tzet ẍwal ti'an. 17Ha' co Diosal hayon̈ israelon̈ ti', ha' sic'len heb'ya' jichmam. Yet x'ec'le heb'ya' Egipto x'el yin̈ sc'ul Comam ta swatx'e Comam hune' con̈ob' caw nimejal yin̈ heb'ya'. Lawitu' xiniloj Comam heb'ya' Egipto tu' yu scan̈il yeyi. 18Yet ay heb'ya' yul tajin̈ witzac'al, cawinaj hab'il snimann̈e Comam sc'ul yin̈ heb'ya'. 19Lawitu' hujeb' con̈ob' sc'ayiloj Comam b'et Canaán, xa'ni Comam xtx'otx' heb'jetb'i xc'aylaxiloj tu' tet heb'ya'. 20Sunil tzet xu ti' yictaj sho' ciento hab'il xi'toj. Lawitu' x'a'otcoj heb'naj juez xol heb'ya' yu Comam yu scolwa heb'naj yin̈ heb'ya' masanto xtan̈canoj yin̈ ya' Samuel schejab'lom Comam. 21Lawitu' sk'anni heb'ya' hune' srey ch'oc yahawoj. Yuxin xacoj Comam Dios ya' Saul sc'ahol ya' Cis reyal xol heb'ya', yic'al ya' Benjamín ye ya'. Cawinaj hab'il xa' ya' Saul tu' reyal. 22Lawi yiotiloj ya' Saul reyal yu Comam Dios, xanicoj Comam ya' David sheleloj ya'. Xalni Comam: Xchalo naj David sc'ahol naj Isaí wuan. Naj David ti' yin̈ caw yeli chin tzala yin̈ najan, naj ti' syijye' naj sunil tzet ẍwala'an, ẍi Comam. 23Yic'al ya' David tu' ye Comam Jesús, hune' mac xa' Comam Dios Scolomaloj jet hayon̈ israelon̈ ti' haca' xu yaltencan Comam. 24Yalan̈to maẍto chichecoj Comam smunil, scuy ya' Juan anma israel ta yilal sb'ejcan yanicoj smul cat yi'ni ha'. 25Yet toxa ẍtan̈ojcan smunil ya' Juan tu', xalni ya': Hexti' chim heyala ta hayin Cristo hinan, yaja' machoj. Ya' Cristo tu', tzujantij ya' win̈an, hasta winiloj xan̈ab' ya' yin̈ yojan, mat yetoj ay ẍwab'ean, ẍi ya' Juan. 26Hex wetcon̈ob' yic'al ya' Abraham b'oj hantaj hex mat hex israeloj chex nanon tet Comam Dios, hune' cuywab'al yet colb'anil ti' jetwej co hunil yeyi. 27Yaja' heb'naj ah con̈ob' Jerusalén b'oj heb'naj yahaw xol heb'naj, mach xtxum heb'naj ta ha' Comam Jesús ha' Scolomal jet. Hunun tz'ayic xewb'al yab'en heb'naj cuywab'al tz'ib'n̈eb'ilcan yu heb'ya' schejab'lom Comam Dios, yaja' maẍtic'a xtxum heb'naj. Yuxin yet shob'nican heb'naj smul Comam Jesús yib'an̈, xijnican sb'a tzet tz'ib'n̈eb'ilcanoj. 28Waxan̈ca mach hunuj xtx'ojal Comam xchalo yu heb'naj ch'a'ni camoj, xtic'a sk'an heb'naj tet naj Pilato ta ẍcam Comam. 29Lawi yijnican sb'a sunil tzet tz'ib'n̈eb'ilcan yib'an̈ Comam yu heb'naj, xiotaytij snimanil yin̈ culus, xto mujlaxoj. 30Yaja' xpitzc'aotcan̈ Comam xol hej camom yu Comam Dios. 31Lawitu' yulb'al cawinaj tz'ayic sye sb'a tet heb'ya' ẍcuywi yin̈, heb'ya' xtit yin̈ b'et Galilea xhul Jerusalén yalan̈to maẍto ẍcami. Heb'ya' tu' cha' sb'a yin̈ Comam tinan̈ yin̈ sat jetcon̈ob'. 32Hacon̈an, lan̈an jalni tzoti' c'ul teyetan, hune' tzet xalte Comam Dios tet heb'ya' jichmam. 33Hayon̈ hun b'ay xalte Comam hune' ti', haxca yic'al heb'ya' jeyi. Yet xpitzc'acan̈ Comam Jesús, xijni sb'a tzet halb'ilcan yu Comam Dios, haca' xu stz'ib'n̈elaxcan yul scab' Salmo b'ay chalayoj: Hachti' hach hin C'aholan. Yin̈ hune' tz'ayic ti' ẍwa' ohtajn̈elaxojan to yeli hach hin c'aholan, ẍi Comam yul Yum. 34Xaltenpax Comam Dios yul Yum to spitzc'acan̈ Comam snimanil Comam Jesús xol hej camom, yun̈e mach'etaxtoj snimanil Comam. Chalni yin̈ hacti': Mach yec'b'anil wa'noj sc'ulal hin c'ul teyetan, hune' ti' halteb'il wu tet naj Davidan, ẍi Comam. 35Ay hune'xa b'ay chalayoj yin̈ tzet ye Comam Cristo, chalni yin̈ hacti': Mamin, mach xa cha etaxojtoj hin nimanil hayin sic'leb'ilin hawu ti'an, ẍiayoj. 36Haxca ya' David, xmunla ya' haca' chal sc'ul Comam Dios yulb'al ayc'oj ya' xol anma, yaja' yet xcam ya', xmujlax snimanil ya' haca' chu smujlax snimanil hej jichmam, xtic'a etaxtoj snimanil ya'. 37Wal Comam Cristo mach x'etaxtoj snimanil haxca x'iotcan̈ yu Comam Dios xol hej camom. 38- 39Yuxin ẍwal heyab'e'an hex wuẍtaj, ta han̈c'a Comam Jesús chu ya'ni tan̈oj co mul. Yuxin ch'a'lax hune' tzoti' ti' teyet, haxca sley ya' Moisés mach ẍc'oji yiniloj hej co mul. Wal mac cha' yuluj sc'ul yin̈ Comam Jesús, sunil smul ẍtan̈can yib'an̈ yu Comam. 40Tinan̈, nann̈e heyu, haxca taj xeya'le haca' hune' tzet tz'ib'n̈eb'ilcan yu heb'ya' schejab'lom Comam Dios. Chalni heb'ya': 41Ab'ewej hex ton̈e cheyetatoj stzoti' Comam Dios ti', c'ayojab' he c'ul heyilni, cat he cami, haxca hayin Dios ti'an, ay hune' tzet ẍwub' yulb'al he k'inal ti'an, waxan̈ca ay mac ẍalni teyet, yaja' macheya'a' yuluj he c'ul. ẍi ya' Pablo tet heb'naj. 42Yet lan̈an yeltij ya' Pablo b'oj ya' Bernabé yul capiya, sk'anni anma ta ẍcuylax heb'ya' yin̈ hune' cuywab'al ti' yet hune'xa tz'ayic xewb'al. 43Yet xtan̈can cuywab'al yul capiya tu', tx'ihal anma israel b'oj mat israeloj ocnaj yin̈ scuywab'al anma israel xto yin̈ heb'ya'. Yuxin xa' heb'ya' yip hunk'aan tu' yun̈e huneln̈e chutecoj yanma yin̈ sc'ulch'anil sc'ul Comam Dios. 44Haxa yet hune'xa tz'ayic xewb'al, etza sunil con̈ob' xhul ab'enoj stzoti' Comam Dios. 45Yaja' ha' yet xilni anma israel to caw tx'ihal anma xyamicoj, xchiwacan̈ sc'ul yin̈ ya' Pablo. Xalni heb'naj to lek'ti'al chal ya', x'oc heb'naj pohloj yin̈ ya'. 46Yaja' xcam yitij heb'ya' yanma yin̈, xalni heb'ya': —Hex wetcon̈ob' israel, yilaltic'a teyet b'ab'el ẍhal-lax stzoti' Comam Dios ti'. Yaja' haxca mache cha heyab'e, yuxin tita mat heyetoj ye he chani k'inal mach stan̈b'al, k'a' t'in̈an chon̈ to co cuyu' anma mat israelojan. 47Haxca hactu' xute Comam Jahaw yalni jetan, xalni yin̈ hacti':Xcach wacoj haca' sajilk'inal ẍmujli yin̈ yanma anma mat israelojan, yun̈e ay mac ẍcolchaoj yul hunun con̈ob' satyib'an̈k'inal ti', ẍiayoj, ẍi heb'ya'. 48Wal anma mat israeloj, caw stzalacan̈ yet xab'en hune' tu'. Lawitu' ichi yalni heb'jetb'i ta caw c'ul stzoti' Comam Jahaw. Ha' mac sic'leb'ilxatic'a yu Comam Dios yu schani k'inal mach stan̈b'al, xa' yuluj sc'ul yin̈ Comam. 49Hactu' xu spujna stzoti' Comam Jahaw sunil shoyanil Antioquía. 50Yaja' heb'naj israel xa' heb'naj sc'uluj hunk'aan heb'ix caw xiquiltajn̈en sreligión, b'oj ay smay yul sat anma, b'oj hunk'aan heb'naj aysmay yul con̈ob' tu'. Yuxa tu', xmeltzo swi' anma, x'oc ya'noj howal yin̈ ya' Pablo b'oj ya' Bernabé, stzumb'eotiloj heb'ya' b'et Antioquía b'oj sunil shoyanil tu'. 51Yuxin span̈iloj heb'ya' spojojal hune' con̈ob' tu' yin̈ yoj yun̈e syeniloj sb'a to matxa yoc heb'ya' yin̈ hunk'aan anma tu'. Lawitu' xto heb'ya' yul con̈ob' Iconio. 52Wal heb'ya' xax ya' yuluj sc'ul yin̈ Comam Dios ay yul con̈ob' Antioquía tu', caw stzala heb'ya', b'oj aycoj heb'ya' yalan̈ schejb'anil Comam Espíritu Santo.


Copyright
Learn More

will be added

X\