HECHOS 12

1Yin̈tic'a hunk'aan tz'ayic tu' x'oc naj rey Herodes ya'a' ec'oj ya' yanma haywan̈ heb'ya' xax ya' yuluj sc'ul yin̈ Comam Jesús. 2Schejni naj potx'laxoj ya' Jacobo yuẍtaj ya' Juan yu ch'en espada. 3Ha' xilni naj to scha swi' heb'naj israel hune' tu', schejni naj tzab'laxoj ya' Pedro. (Yulb'al k'in̈ yet ẍwalax ixim pan machcoj yan̈al, hatu' stzab'lax ya'.) 4X'alaxictoj ya' yul presu, x'alaxcoj wajlan̈wan̈ heb'naj soldado stan̈e' ya'. Shelob'tajn̈e sb'a heb'naj, can̈tajwan̈ chucuj heb'naj stan̈en ya'. Ha' choche naj Herodes to chin̈e ec' k'in̈, cat yilaxiltij ya' yul presu, cat spotx'lax ya' yin̈ sat anma. 5Yuxin caw ya' tan̈eb'il ya' yul presu. Wal heb'ya' yak'b'il xax ya' yuluj sc'ul yin̈ Comam, caw aycoj yin̈ sc'ul heb'ya' ya'ni oración tet Comam Dios yun̈e scolcha ya'. 6Hecalojxan̈e b'ay ch'ilaxiltij ya' Pedro yul presu yu naj Herodes, lan̈an sway ya' ak'b'alil xolb'al cawan̈ heb'naj soldado, c'alb'il ya' yu cab' ch'en cadena. Ay pax cawan̈ heb'naj soldado ẍtan̈en sti' presu. 7X'ocapnoj lemna hune' yángel Comam Jahaw b'ay ayictoj ya', sajpok'iloj yul presu tu' yu. Lawitu' spitnicoj sti' smotx ya', yun̈e yel swayan̈ ya', xalni ángel tu' tet ya': —Ahan̈wanoj yin̈ lemb'il. Yin̈n̈ena tu', x'ay b'ulna ch'en cadena aycoj yin̈ sk'ab' ya'. 8Xalni pax hune' ángel tu': —Tinan̈, cawxecoj xil ha k'ap tawin̈ cat hawanicoj ha xan̈ab', Lawitu' xalni paxoj: —Acoj ha pix tawin̈ cat hawoc tzujnuj win̈an. 9Lawitu' x'oc tzujnuj ya' yin̈ hune' ángel tu', x'eltij ya' yul presu. Ham yalni ya' ta wayqueloj chu ya'. Mach txum ya' ta yeli. 10Lawitu' x'ec'toj hune' ángel tu' b'oj ya', b'ay aycoj naj b'ab'el b'oj naj scab' ẍtan̈en sti' presu tu', x'apnican heb'ya' sti' pulta nab'a' ch'en aycoj sti' calle. Lemb'il shajna sb'a schuquil. Ha' x'eliloj hune' ángel tu' b'oj ya', xb'elwitoj masanto x'apni b'et hunxa calle, hat x'alaxcan ya' yu hune' ángel tu'. 11Hato tu' xnanb'iloj yu ya'. Lawitu' xtxumniloj ya': —Tinan̈ chin txuman ta caw yeli xatij Comam Jahaw yángel hin scolo'loj yul sk'ab' naj rey Herodesan, b'oj tet sunil tx'oj nab'il win̈ yu wetcon̈ob'an. 12Lawi tu' xb'eytzen ya' yila' yatut ya' María smi' ya' Juan ẍhalot Marcosal. Tx'ihal heb'ya' yamanc'oj b'etu' ya'ni yoración yin̈ ya'. 13Ha' sc'on̈q'uen ya' Pedro pulta, x'eliloj hune' ix x'ahawlom, Rode sb'ih, shajnoj te' yalni. 14Yaja' yet xab'en ix yul snuk' ya', matxa shaj ix te' yu tzalalal, xtona ix yin̈ an̈e yalnoj ta lin̈ancan ya' Pedro sti' pulta. 15Xalni heb'ya' tet ix: —Tita suc ha c'ul. —Machoj, to caw yeli xwab'e yul snuk' ya'an. Yuxin xal heb'ya': —Matmitaj ya', tita yángel ya' ẍtan̈eni, ha' chawala. 16Yet lan̈an stzotel heb'ya', sc'on̈q'uen ya' pulta. Lawi shajni heb'ya' te', xc'ayiloj sc'ul heb'ya' x'ocapnoj ya'. 17X'ec' sk'ab' ya' ta mach mac stzoteli. Lawitu' x'oc ya' yalnoj tzet xu scol-lax ya' yul presu yu Comam Jahaw. Xalni ya' tet heb'ya': —Halwej hune' ti' tet ya' Jacobo b'oj hunk'aanxa heb'ya' juẍtaj. Lawitu' x'eltij ya' xol heb'ya', shecnitoj sb'a ya'. 18Yet sajb'iloj, somchatoj yul swi' heb'naj soldado haxca mat yohtajoj heb'naj tzet xu yel ya' Pedro b'etu'. 19Ha' xab'entij naj Herodes hune' tu', xanitoj naj sayomal yet ya', yaja' mach xchalo ya' yu heb'naj, yuxin sk'amb'e naj tet heb'naj soldado tzet xu yel ya', ẍchejni naj ta ẍpotx'lax heb'naj soldado tu'. Lawitu' x'el naj yul con̈ob' Jerusalén, xto naj ehoj yul con̈ob' Cesarea. 20Yin̈tic'a hunk'aan tz'ayic tu', caw xa' naj rey Herodes chiwaoj sc'ul yin̈ anma ay b'et con̈ob' Tiro b'oj Sidón. Yuxin sk'umla sb'a heb'naj ay b'etu', xhul heb'naj yalnoj tet naj. Yaja' b'ab'el x'oc heb'naj smonte' naj Blasto, swi'al yin̈ heb'naj schejab' naj rey tu'. Yuxin x'octoj naj yin̈ heb'naj tzoteloj tet naj. Ẍnanon heb'naj haxca sat xtx'otx' naj rey ẍtit tzet slo heb'naj. 21Yuxin xal naj rey tzet tz'ayical chu yapni heb'naj yin̈ sat naj. Haxa x'apni stz'ayical tu', xanicoj naj xil sk'ap caw c'ul yin̈. Lawitu' x'oc tz'on̈noj naj yul sdespacho. X'oc naj tzoteloj tet heb'naj. 22Ha' xab'en heb'naj stzotel naj, xalnican̈ heb'naj: —Hune' mac stzotel ti' mat anmaoj, to ham hunuj hej dios stzoteli. 23Hunep tu' xtx'ojb'ican̈ sc'ul naj Herodes tu' yu hune' yángel Comam Jahaw, haxca mach xacoj naj smay Comam Dios, yuxin lujum no' xlonitoj yul sc'ul naj, hactu' xu scamiloj naj. 24Wal stzoti' Comam Jahaw b'elay spujna xol anma, caw tx'ihal mac xa' yuluj sc'ul yin̈ Comam. 25Lawi yijni sb'a tzet xul yub' ya' Bernabé b'oj ya' Saulo yul con̈ob' Jerusalén, xmeltzo heb'ya' Antioquía, xinitoj heb'ya' ya' Juan Marcos.


Copyright
Learn More

will be added

X\