HECHOS 11

1Xab'e heb'ya' apóstol b'oj heb'ya' xax ya' yuluj sc'ul yin̈ Comam yul scuenta Judea to ay anma nancon̈ob'al xchani stzoti' Comam Dios. 2Yuxin ha' x'apni ya' Pedro yul con̈ob' Jerusalén, tx'oj chal heb'ya' ẍto nanon tet sley ya' Moisés tet ya'. 3Xalni heb'ya': —¿Tzet yuxin xcach b'ey xol heb'jetb'i nancon̈ob'al, cach wa' xol heb'jetb'i? . 4Yuxin x'oc ya' stzote' tet heb'ya' tzet xa'le ya', xichentij ya' yalni: 5—Yet ayin yul con̈ob' Jope yet hune' tz'ayical tu'an, lan̈an wa'ni woraciónan, haca' yul wayique xu wilni yayiloj yul satcan̈ hune' niman sábana saj leantoj, ib'il scan̈eb'al xtxiquin x'ayiloj yin̈ hin satan. 6Xwilnian tzet ahaytoj yul: Ay no' nok' can̈eb' yoj, ay no' xoltelajil nok', ay no' lab'ah, b'oj no' ch'ic. 7Lawitu' xwab'en hunk'aan tzoti'an chalni yin̈ hacti': Pedro, ahan̈lin̈noj potx' hunk'aan no' nok' ti' ha c'uxu', ẍi wetan. 8Xwalnian: Machoj Mam Wahaw, haxca mach hunecoj xin c'ux hunuj no' comon nok'an, ni hunuj tzetet cachb'il yu sley ya' Moisés, quin chian. 9Xalni paxaytij: B'aytet chal Comam Dios ta scha hawuni, machu hawalni ta cachb'il hach, ẍiaytij. 10Oxel xalaytij. Lawitu' x'iotatoj hune' haca' sábana tu' yul satcan̈. 11Hunip tu' x'apni oxwan̈ heb'naj hin saya' b'et te' n̈ah b'ay ayin tu'an. Speto heb'naj yul con̈ob' Cesarea. 12Xalni Comam Espíritu wetan: As yin̈ heb'naj tu', mach ẍcab'con ha c'ul ha toyi, ẍi. Xto wajwan̈ heb'ya' juẍtaj ti' win̈an. Yet xcon̈ apni yul con̈ob' Cesareaan, xcon̈ to yatut ya' Cornelio tu'an. 13Xalni ya' jetan to x'apni lin̈noj hune' ángel yul yatut ya', xalni tet ya': Atoj hun cawan̈oj heb'naj yul con̈ob' Jope yi'a'tij hune' naj chij Simón, ẍhalot Pedroal. 14Ha' naj ẍhalnoj tawet tzet chu ha chanoj ha colb'anil b'oj sunil mac ayc'oj ta c'atan̈, ẍi ángel tet ya' yalni. 15Yet xquin ichitij hin tzotelan, x'oc Comam Espíritu Santo yin̈ yanma heb'jetb'i tu', haca'tic'a xu co chani yet sb'ab'elal. 16Lemb'il xtitna yin̈ hin c'ulan tzet xal Comam Jahaw yet xalni Comam: Yin̈ caw yeli, ya' Juan ha'n̈e xa' ya' yi'a' anma. Walex, ha' Comam Espíritu Santo ch'a'laxoj teyet haca' ib'alha', ẍi Comam. 17Xa' Comam Dios Yespíritu tet heb'jetb'i tu' haca' xu ya'ni Yespíritu jet hayon̈ xja' yuluj co c'ul yin̈ Jahaw Jesucristo. Yuxin, ¿tox hayin to chin man̈c'o' tzet choche Comam Dios yub'an? 18Ha' xab'en heb'ya' ay b'et Jerusalén tu', xpax tz'inna heb'ya', x'oc heb'ya' yanojcoj smay Comam Dios, chalni heb'ya': —Somanta anma nancon̈ob'al xa' Comam snab'sb'a sc'ul, yun̈e schani k'inal mach stan̈b'al. 19Xol heb'ya' xpujnatoj yet x'ichican̈ hune' tzab'wal lawi sc'ojlaxcamoj ya' Esteban, ay heb'ya' x'apni b'et Fenicia, b'et Chipre, b'oj b'et con̈ob' Antioquía. Tetn̈e anma israel ay b'etu' xal heb'ya' tzoti' c'ul yet Comam Jesús. 20Yaja' ay hunk'aan heb'ya' ah Chipre b'oj ah Cirene x'apni yul con̈ob' Antioquía tu'. Hatu' scuy heb'ya' anma mat israeloj ta Comam Jesús ha' Jahaw yeyi. 21Aycoj scan̈il ye Comam Jahaw yin̈ heb'ya', yuxin caw tx'ihal mac sb'ejcanoj xtx'ojal, xa'ni yuluj sc'ul yin̈ Comam. 22Yet xab'en heb'ya' xax ya' yuluj sc'ul yin̈ Comam ay yul con̈ob' Jerusalén hune' tu', xanitoj heb'ya' ya' Bernabé yul con̈ob' Antioquía. 23Yet x'apni ya', xilni ya' hantaj sc'ulal sc'ul Comam Dios xu yin̈ anma ay b'etu'. Caw stzala ya' xiptzen ya' anma tu'. Chalni ya' ta sunil sc'ul chanicoj yanma yin̈ Comam Jesús stohb'alk'inal. 24Hactu' xute ya' Bernabé stzotel tet heb'ya', haxca caw c'ulch'an sc'ul ya', aycoj ya' yalan̈ schejb'anil Comam Espíritu Santo b'oj caw cha' ya' yuluj sc'ul yin̈ Comam Dios. Yuxin caw tx'ihal anma ay b'etu' xa' yuluj sc'ul yin̈ Comam Jahaw yu ya'. 25Yet hune' tz'ayical, xto ya' Bernabé yul con̈ob' Tarso saya' ya' Saulo. Lawi schalo ya', xijb'antij ya' ya' yul con̈ob' Antioquía. 26Hune' hab'il xcan heb'ya' xol anma xax ya' yuluj sc'ul yin̈ Comam Jesús ay b'etu', scuyni heb'ya' heb'ya' haxca caw tx'ihalxa heb'ya'. Yul con̈ob' Antioquía tu', hat b'ab'el xhal-lax Cristiano yin̈ anma xax ya' yuluj sc'ul yin̈ Comam. 27Yet hunec tu', x'apni hunk'aan heb'ya' b'ay xa' Comam Dios schejb'anil ya'ni stzoti', speto heb'ya' Jerusalén, x'apni yul con̈ob' Antioquía. 28Ay hune' yetb'i heb'ya' Agabo sb'ih. X'ah lin̈noj ya' xol anma, xalni ya' yu scan̈il ye Comam Espíritu Santo:—Ay hune' niman wahil ch'ayoj sunil sat tx'otx'otx' aycoj yalan̈ schejb'anil Roma ti', ẍi ya'. (Yaja' yeli, yet aycoj naj Claudio yahawoj, hatu' x'ay hune' niman wahil.) 29Yuxin heb'ya' xax ya' yuluj sc'ul yin̈ Comam ay yul con̈ob' Antioquía, x'oc yin̈ sc'ul heb'ya' scolwatoj yin̈ heb'ya' ay b'et Judea hantaj chuapnoj yu. 30Hantajtic'a xcutxi, xatoj heb'ya' tet heb'ya' yancianoal iglesia ay Judea. Ya' Bernabé b'oj ya' Saulo x'initoj.


Copyright
Learn More

will be added

X\