HECHOS 10

1Yin̈tic'a hunk'aan tz'ayic tu', ay hune' ya' Cornelio sb'ih ay yul hune' con̈ob' Cesarea. Yahaw ya' yin̈ hunmajan heb'naj soldado ẍhalot Italianoal. 2Aycoj yanma ya' yin̈ Comam Dios, b'oj sunil anma ay yul yatut, b'oj ẍnanon ya' tet Comam. Caw ẍcolwa ya yin̈ anma meb'a', ton̈etic'a aycoj ya' ya'ni yoración tet Comam Dios. 3Yet hune' sk'ejb'alil xil ya' yocapnoj hune' yángel Comam Dios b'ay aya, haca' yul wayique. Lawitu' xalni hune' ángel tu' tet ya': —Cornelio. 4Ha' x'oc t'an̈noj ya' yin̈ ángel tu' caw xiwcan̈ ya', xalni ya': —¿Tzet chawala Mamin?. Xalni ángel tu': —Chab'etoj Comam Dios haworación, b'oj chil Comam tzet chu ha colwa yin̈ anma meb'a'. Mach snahuln̈etoj Comam hune' chawu tu'. 5Yuxin tinan̈, atoj hun cawan̈oj heb'naj yul con̈ob' Jope yi'a'tij ya' Simón, chij Pedro. 6Hata' ay ya' sc'atan̈ hunxa naj Simón sb'ih, tz'ahom tz'um, ay yatut sti' ha' mar., ẍi ángel tu' tet ya' Cornelio 7Lawi sc'aycan̈ ángel tu', xawten ya' Cornelio cawan̈ heb'naj schejab' b'oj hune' naj soldado ẍmunlacoj yin̈. Naj soldado tu' aypaxcoj yanma naj yin̈ Comam Dios. 8Sunil tzet xal ángel tet ya', xal ya' tet heb'naj chejab' tu'. Lawitu' xanitoj ya' heb'naj yul con̈ob' Jope. 9Haxa hunxa tz'ayic, lan̈anxa shitzicoj heb'naj chejab' yin̈ con̈ob', chumanxa mi. Wal ya' Pedro x'ahtoj ya' ya'a yoración yac'alil swi' te' n̈ah b'ay ay tu'. 10Yet ahatoj ya' b'etu' xn̈ohchacan̈ ya'. C'un watx'i ita, xilni ya' haca' yul wayique. 11Shajni sb'a satcan̈, chilni ya' yaytij hune' haca' sábana tzab'b'il can̈eb' xtxiquin, leantoj x'ayiloj yin̈ sat ya'. 12Yul hune' sábana tu' ahaytoj sunil no' nok', nanann̈e slow jilni no': Ay no' can̈eb' yoj, ay no' lab'ah, b'oj no' ch'ic. 13Lawitu' xab'en ya' yalni: —Pedro, potx' hunk'aan no' nok' ti' ha c'uxu'. 14Yaja' xal ya': —Machoj Mam Wahaw, haxca mach hunecoj xin c'ux hunuj no' comon nok'an, ni hunuj tzetet cachb'il yu sley ya' Moisés. 15Xalni pax hunecxa: —B'aytet chal Comam Dios ta scha hawuni, machu hawalni ta cachb'il hach. 16Oxel stzotelaytij. Lawitu' x'ilaxatoj hune' tu'. 17Lan̈an xtxumtxun sc'ul ya' yin̈ tzet chaliloj tzet xil tu', x'apni heb'naj schejab' ya' Cornelio, yin̈ k'amb'eb'al aycoj heb'naj, x'apnican heb'naj sti' yatut naj Simón. 18Ch'awictoj heb'naj, chalni heb'naj: —¿Ham b'eti' ay ya' Simón, ya' ẍhalot Pedroal?. 19Lan̈an b'in yec' hune' tzet xil ya' tu' yin̈ sc'ul, xalni pax Comam Espíritu Santo tet ya': —Ab'i, ay oxwan̈ heb'naj chach k'amb'eni. 20Ayan̈toj il heb'naj cat ha to yin̈ heb'naj. Mach ẍcab'con ha c'ul ha toyi, haxca hayin xwitij heb'najan. 21Ha' x'ayiloj ya', xalni ya' tet heb'naj: —¿Hayin chin he k'amb'ean? ¿Tzet he chejb'anil yuxin xquex hul b'eti'?. 22Xalni heb'naj tet ya': —Hune' ya' yahaw yin̈ heb'naj soldado, Cornelio sb'ih, xcon̈ anitij hach jila'an. Caw c'ul sc'ul ya', ẍnanon ya' tet Comam Dios, caw c'ul ya' yul sat hawet con̈ob' israel. Hune' yángel Comam Dios xhalni tet ya' ta chach to yatut ya' yun̈e yab'en ya' tzet chawala. 23Yuxin x'iotictoj heb'naj yul n̈ah yu ya'. Hat xcan heb'naj wayoj hune' ak'b'al tu'.Haxa hunxa tz'ayic xto ya' b'oj heb'naj, xto pax hunk'aanxa heb'ya' xax ya' yuluj sc'ul yin̈ Comam ay b'et Jope tu'. 24Ewi yel heb'ya' Jope b'oj heb'naj chejab', x'apni heb'ya' yul con̈ob' Cesarea. Ya' Cornelio chechmac'oj ya' yapni ya' Pedro, yamanc'oj mactaj ayto yu sb'a ya' b'oj, aypaxc'oj heb'naj caw yamigo ya'. 25Yet lan̈an yapni ya' Pedro tu', x'eltij ya' Cornelio chawal. X'ayna jahnoj ya' shak'enoj ya' yalni. 26Yaja' x'oc ya' Pedro yin̈ sk'ab' ya', xalni ya': —Ahan̈lin̈noj haxca lahan anmaon̈. 27Lawitu' stzotel heb'ya', x'octoj heb'ya' yul n̈ah. Ha' xilni ya' Pedro to tx'ihal mac yamanc'oj, 28xalni ya': —Hexti' heyohtaj ta hayon̈ israelon̈ ti'an, cachb'ilon̈ joctoj yul yatut hunuj mac nancon̈ob'alan. Yaja' Comam Dios x'a'ni wohtajn̈e'an tato tzan mac b'ay chu hin hunb'an in b'a b'ojan. 29Yuxin, xin yijye hin tit yin̈ heb'naj xb'ey hin inojtij ti'an. Hal tinan̈ tzet yuxin xquin hawatijan. 30Xalni ya' Cornelio tet ya': —Syoxixam tinan̈, yab'mi ora ti' lan̈an wa'ni woración yul n̈ah ti'an yet sk'ejb'alil, syenican̈ sb'a hune' naj sajpok'pon̈e xil sk'ap. 31Xalni naj wetan: Cornelio, xab'etoj Comam Dios ha woración, b'oj snatij Comam to chach colwa yin̈ anma meb'a'. 32Tinan̈ atoj hun cawan̈oj heb'naj yul con̈ob' Jope yi'a'tij naj Simón ẍhalot Pedroal, hat ay naj yatut naj Simón tz'ahom tz'um ay sti' ha' mar, ẍi naj wetan. 33Yuxin xcach wa'tijan, yuch'antioẍ tawet xcach huli. Tinan̈ ayon̈coj yin̈ sat Comam Dios yu jab'en tzet xa' Comam hawala' jetan. 34Lawitu' x'oc ya' Pedro yalnoj: —Tinan̈ wohtajan to caw lahan ye anma sunil yul sat Comam Dios. 35Tzan mac anmail ta ẍnanon tet Comam, waxan̈ca mat israeloj, scha Comam ta c'ul chute sc'ul. 36Haxca heyohtaj mi ta xa' Comam Dios stzoti' jet hayon̈ israelon̈ ti'an, xalni Comam ta chu joc yin̈ ak'anc'ulal yu Comam Jesucristo, Comam Yahaw yin̈ sunil. 37Tinan̈ heyohtajxam hej tzetet xu co xol hayon̈ israelon̈ ti'an. B'et Galilea x'ichican̈ hune' tu', yet xtan̈canoj ya' Juan ya'ni stzoti' Comam Dios b'oj ya'ni ya' ha' yi'a' anma. 38Heyohtaj paxoj ta xa' Comam Dios Yespíritu tet Comam Jesús ah Nazaret, xa'ni pax Comam scan̈il yeyi. Sunil b'ay x'ec' Comam Jahaw colwaoj yin̈ anma, chan̈ten mactaj aycoj yul sk'ab' naj matzwalil. Sunil tu' xu Comam, haxca aycoj Comam Dios yetb'ioj. 39Hayon̈ ti'an ẍja' co b'a yin̈ tzet xu Comam tu'an, yet syeni c'ayb'alc'ule yul con̈ob' Jerusalén b'oj sunil hej sat xtx'otx'al Judea. Lawitu' xpotx'ot Comam yu jetcon̈ob' israelan yet spahnicoj heb'naj yin̈ culus. 40Yaja' yin̈ sca'fial xpitzc'aotcan̈ yu Comam Dios, ha' x'a'ni syeb'can̈ sb'a, 41yaja' mat tet suniloj jetcon̈ob' b'ay sye sb'a, to jetn̈e hayon̈ xcon̈ sic'lecan yalan̈toan yu jalnic'oj tzet xa'le Comaman, hayon̈ hun xcon̈ wa' b'ojan lawi spitzc'acan̈ yin̈ camical. 42Xalni jetan ta caw yilal jec' jalnoj tet anmaan haxca caw syelal yeyi to xa' Comam Dios schejb'anil Comam Jesús yu yilnoj tzet ẍtan̈oj sunil anma, mac itzitzto b'oj mac camnajxa. 43Ha' Comam Jesús ti' b'ay xa'sb'a heb'ya' schejab'lom Comam Dios ta hantaj mac cha' yuluj sc'ul yin̈, ẍtan̈ojcan smul yib'an̈ yu scan̈il yeyi. 44Yet lan̈an yalni ya' Pedro hune' tu', xhul Comam Espíritu Santo yib'an̈ anma lan̈an yab'en stzoti' Comam Dios. 45Heb'ya' israel xax ya' yuluj sc'ul yin̈ Comam tzujan yin̈ ya' Pedro, xc'ayiloj sc'ul heb'ya', haxca somanta anma mat israeloj b'ay xa' Comam Dios Yespíritu Santo. 46Chab'en pax heb'ya' to stzotel yul hunk'aanxa ab'xub'al chanicoj smay Comam Dios. Yuxin xal ya' Pedro: 47—¿Tox chu scachlax anma ti' yi'ni ha'? Haxca xax a'lax Comam Espíritu Santo tet, haca' xu ya'lax jet. 48Yuxin xal ya' Pedro ta chi' anma tu' ha' yin̈ sb'ih Comam Jesucristo. Lawi yi'nican anma tu' ha', sk'anni ta ẍcan ya' hayeb'ojxa tz'ayic sc'atan̈.


Copyright
Learn More

will be added

X\