HECHOS 10

1Yin̈ hune' tiempohal tu', ay hune' naj chiyij Cornelio bey yul con̈ob Cesarea. Caw yahawil yeco naj yin̈ hune' majan ebnaj soldado chiyij Italiano. 2Hune' naj tu' mach Israelo naj, yaj ayco yanma naj yin̈ Comam Dios yeb sunil mac ay bey yatut, caw chiyo isba tet Comam Dios. Caw niman tzettaj ye tu' chissah naj tet anma meba' Israel. Chi-tic'a-txahli naj tet Comam Dios. 3Yet hune' tz'ayical yin̈ ch'en oxeb yin̈ k'ejbiyalil yilni naj yoc apno hune' naj yángel Comam Dios isc'atan̈ haca'tan̈e yul wayique. Yalni naj ángel tu': —¡Cornelio! ẍi naj. 4Hayet yoc t'an̈no naj yin̈ naj ángel, isxiwcan̈ naj, istak'wi naj: —¿Tzet chawal Mamin? ẍi naj. Yalni naj ángel tu' xin: —Caw chabe Comam Dios hatxah, caw chilpaxo Comam hacolwal chawak' tet anma meba'. Mach chic'ayto huntek'an ti' yu Comam. 5Wal tinan̈ chejto haywan̈o ebnaj bey yul con̈ob Jope, ik'wal yin̈ naj Simón, naj chiyij Pedro. 6Ay naj bey yatut hune'xa naj chiyij Simón, naj watx'emilo tz'um, ay bey isti' ha' mar. Ha' naj Pedro tu' chihulo halno tawet tzet wal hawuten haba, ẍi naj ángel tet naj Cornelio tu'. 7Yet istocano naj ángel tu' xin, yawtenti naj cawan̈ isc'amte' yeb hune' naj issoldado chicolwa yin̈. Hune' naj ti' aypaxo yanma naj yin̈ Comam Dios. 8Sunil tzet hallax tet naj yu naj ángel, yal naj tet ebnaj. Ischejlaxto ebnaj bey yul con̈ob Jope tu' xin. 9Yet hune'xa tz'ayic yin̈mi chuman, yet lan̈anxa yapni ebnaj iscawilal con̈ob Jope tu', yahto naj Pedro txahlo yiban̈ yac'alil iswi' te' n̈a bay aya. 10Yet ayahto naj txahlo bey tu', isn̈ohchacan̈ naj. Lan̈an xin iswatx'elax tzet chislo naj, yin̈n̈ena tu' xin, isyelax yin̈ sajsatil tet naj. 11Ishajni isba satcan̈, yilni naj hune' niman sábana leyanayti yin̈ sat naj, ximbilayo can̈eb istxiquin k'ap. 12Yul hune' sábana tu', ayayto sunil no nok'; no' can̈eb yoj, no' chishatxic'o isc'ul, yeb no' ch'ic. 13Yet yayilo hune' sábana tu', yaben naj Pedro yul hune' nuk'e, halni tet haca' ti': —Pedro, ahan̈wanoj, potx'camo huntek'an no nok' ti' cat hac'uxni no', ẍi hune' yul nuk'e tu'. 14Yalni naj haca' ti': —Mamin, machoj, yuto caw maẍto hunelo chinc'uxan huno no' comon nok' ti', maca hunuxa tzet ye tu' mach sajoj haca' yalni isley naj Moisés, ẍi naj. 15Yuxin yal hune' yul nuk'e tu' hunelxa tet naj: —Sunil tzet sajxa ye yu Dios, mach chawal tz'ilal, ẍi. 16Caw xin oxel yu haca' tu'. Lahwi tu' yilaxto hune' sábana tu' yul satcan̈ hunelxa. 17Haxa yet yapni ebnaj ischejab naj Cornelio yul con̈ob Jope, isk'ambelo ebnaj tet anma baytu'wal ay yatut naj Simón. Caw aytoco naj Pedro istxumni yin̈ tzet chal yelapno hune' yil tu', yet yapni ebnaj isti' ispultahil te' n̈a bay ay naj. 18Yet ayxa ebnaj bey tu', isk'amben ebnaj: —¿Ham ti' ayc'o naj Simón, naj chiyij Pedro? ẍi ebnaj. 19Caw aytoco yin̈ isc'ul naj tzet caw chalilo hune' yil naj tu', yalni Comam Espíritu Santo tet naj haca' ti': —Pedro, ay oxwan̈ ebnaj chaẍsaynic'oj. 20Ahan̈wanoj, ayan̈toj cat hato yinta ebnaj tinan̈ yuto haninan chejn̈eti ebnaj tac'atan̈ ti', ẍi Comam Espíritu Santo tu' tet naj. 21Yayti naj xin, yapni naj isc'atan̈ ebnaj ischejab naj Cornelio tu', yalni naj: —Haninan chinhesayic'ojan. ¿Tzet hechejbanil wetan? ẍi naj tet ebnaj. 22Yalni ebnaj haca' ti' xin: —Ay hune' naj chiyij Cornelio, yahawil yeco yin̈ huntek'an ebnaj soldado, ha' naj macon̈chejnitijan̈. Caw toholcano isbeybal naj, caw chiyo isba naj tet Comam Dios, yeb xin caw c'ulcano naj yul sat anma Israel. Yaj xin ay hune' yángel Comam Dios apni halno tet naj tato yilal hato yatut naj yu yabencano naj tzet chawala, ẍi ebnaj chejab tu' tet naj Pedro. 23Yilaxicto ebnaj yul n̈a yu naj Pedro tu', ha' tu' way ebnaj. Haxa yet sahab sac'ayalil yin̈ hune'xa tz'ayic isto naj Pedro yinta ebnaj; aypaxo haywan̈ ebnaj juẍtaj ah Jope tu' to yinta ebnaj. 24Haxa yet hune'xa tz'ayic xin, yapni ebnaj yul con̈ob Cesarea. Caw echmabil yapni ebnaj yu naj Cornelio tu', cutxanxaco yic'al naj yu, yeb mac ay yul yatut naj tu', yeb yamigo naj awtebil yu. 25Yet yapni naj Pedro bey tu', yelti naj Cornelio ischahno naj, yay jahno naj sata naj Pedro. 26Yaj ilaxcan̈ naj yu naj Pedro, yalni naj xin: —Ahan̈wanoj yuto caw lahan anma hon̈, ẍi naj tet naj. 27Caw xin tzotelo chu naj Pedro yeb naj yet yocto ebnaj yul n̈a. Hac tu' xin yu yilni naj Pedro ta caw hantan̈e anma cutxanicoj. 28Yalni naj tet anma haca' ti': —Caw heyohtaj tato han̈on̈ Israel on̈ti'an̈ cachbilon̈an̈ yu isley naj Moisés cohunban cobahan̈ yeb hunuxa anma nan con̈obal, yeb xin joctojan̈ yul yatut. Yaj isyelo Comam Dios wetan tato mach chu inyahnihan hunu anma. 29Yu hune' tu' yuxinto manyijehan intitan yinta ebnaj ma-bey-quinino'tijan. Wal tinan̈, halwe wetan ¿tzet yin̈ yuxinto maquinheyawtehan? ẍi naj Pedro tu'. 30Yalni naj Cornelio tet naj haca' ti': —Can̈ebxa tz'ayic tinan̈ haca'mi hora ti' yin̈ ch'en oxeb, yet lan̈an intxahlihan tet Comam Dios, yin̈ hamataj isyenican̈ isba hune' naj wetan, caw saj jilnicano xil isk'ap naj, toxan̈e chitzejtzoni. 31Yalni naj wetan: —Cornelio, caw mayabe Comam Dios hatxah yeb isnaniti sunil hacolwal chawak' tet anma meba'. 32Wal tinan̈ chejto hun cawan̈o ebnaj bey yul con̈ob Jope, cat isto yinoti naj Simón, chiyijpaxo Pedro. Ay naj bey yatut naj Simón, naj watx'emilo tz'um. Ayco yatut naj tu' isti' ha' mar. Yet chihul naj Pedro tu' cat yalni naj tzet wal hawuten haba, ẍi naj wetan. 33Yuxin inchejtojan ebnaj ti' saywal tawin̈. Caw yuch'andios tawet macaẍtit yinta ebnaj. Wal tinan̈ ayon̈ic'ojan̈ cosunilan̈ sata Comam Dios yu chijoche jabehan̈ sunil tzet halbilcano tawet yu Comam Dios, ẍi naj Cornelio. 34Yichenico naj Pedro istzotel xol ebnaj sunil, yalni naj: —Wal tinan̈ caw chiwohtan̈elojan tato caw lahann̈e sunil anma yul sat Comam Dios. 35Macxan̈etic'a ay yelapno ye Comam Dios yul sat yeb xin c'ul isbeybal yul sat Comam, waxan̈ca mach Israeloj, caw chitzalacano Comam yin̈. 36Comam Dios an̈ecano tzoti' yet ak'anc'ulal jetan̈, han̈on̈ Israel on̈ti'an̈, hune' haltebilcano coxol yu Comam Jesucristo, Comam Yahawil sunil anma. 37Walex hex ti', caw heyohtaj tzet yu coxolan̈, han̈on̈ Israel on̈ti'an̈. Bey Galilea ichiti hune' tu' yet lahwi ismunil naj Juan yalnic'o Istzoti' Comam Dios, yeb yanicanocan̈ naj ha' iswi' anma. 38Caw heyohtaj hex ti' tato Comam Dios, ha' ak'ni yip Comam Espíritu Santo tet Comam Jesucristo ah Nazaret. Yak'nicano Comam Dios yip Comam yu iscolwa yin̈ anma. Sunil huntek'an anma bay ayco ischejab naj matzwalil cawxicanocan̈ yu Comam. Sunil huntek'an ti' iswatx'e Comam yuto ayco Comam Dios yetbihoj. 39Walon̈ti'an̈, caw chijak' cobahan̈ jalnihan̈ yin̈ sunil tzet iswatx'e Comam Jesús yul ismajul Judea, yeb yul con̈ob Jerusalén, yuto jilicojan̈ yu cosatan̈. Lahwi iswatx'en Comam huntek'an tu' xin, yalaxcan̈ yin̈ culus yu ebnaj Israel, hac tu' yute yak'ni camo ebnaj Comam. 40Haxa yin̈ yox tz'ayic yulcan̈ isc'ul Comam yu yip Comam Dios, isyeni isba Comam Jesús tu' jetan̈. 41Yaja' mach tet sunilo jet con̈oban̈ bay isye isba Comam, cachann̈e jetan̈ han̈on̈ saybilon̈xahan̈ yet yalan̈tocanoj, yu jak'ni cobahan̈ jalnic'ojan̈. Con̈wa'an̈ yeb Comam yet lahwi ispitzc'acan̈ xol camom. 42Yalcano Comam jetan̈ tato caw yilal jec'an̈ jalnoc'ojan̈ tet anma tato ha' Comam Dios anico Comam Jesús Yahawilo yilni tzet ch'elico sunil anma itzitzto yebpaxo mac camnaxa. 43Yet payat yalcano ebnaj ischejab Comam Dios cuybanil yin̈ Comam Jesús. Halbilcano yu ebnaj tato ha' mac chichahni Comam yul yanma, chitan̈cano ismul yiban̈ yu yip Comam, ẍi naj Pedro tu' tet ebnaj. 44Yet aytoco naj Pedro tu' istzoteli, yayilo Comam Espíritu Santo yiban̈ anma chiaben tzet chal naj. 45Caw c'aycan̈ isc'ul ebnaj Israel ayxaco yul isk'ab Comam tit yinta naj bey Jope, yuto ak'laxpaxo Comam Espíritu Santo tet anma mach Israeloj. 46Yaben ebnaj tato nanantaxan̈e tzoti'al chal hunun ebnaj, yabenpaxo ebnaj yalni c'ulla tzoti' yin̈ Comam Dios. 47Lahwi tu' xin, yalni naj Pedro tu': —¿Chimyu cocachni yahcano ha' iswi' ebnaj machahni Comam Espíritu Santo haca' yu cochahni han̈on̈ ti'? ẍi naj Pedro tu'. 48Yalni naj Pedro tu' xin tato chiahcano ha' iswi' ebnaj yin̈ isbi Comam Jesucristo. Yet yahcano ha' iswi' ebnaj, yalni ebnaj tet naj Pedro tato chican naj hayebo tz'ayical isc'atan̈ ebnaj.

will be added

X\