HECHOS 1

1Mamin Teófilo, yul b'ab'el hin libro xin tz'ib'n̈etoj tawetan, hat chala hantaj tzet xu Comam Jesús, b'oj hantaj tzet xa' scuyu anma yettax x'ichitij scuywayi 2masanto x'apni stz'ayical b'ay x'iottoj satcan̈. Yet maẍto ẍto satcan̈ tu', xacanoj schejb'anil heb'ya' apóstol sic'leb'il yu, yu yip Comam Espíritu Santo. 3Lawi spitzc'acan̈ Comam yin̈ camical, tx'ihal el sye sb'a tet heb'ya'. Yulb'al cawinaj tz'ayic, syeni ta caw yeli itzitz. Xalni tet heb'ya' tzet chu yocoj Comam Dios Yahawoj. 4Yet yamantoc'oj heb'ya' apóstol tu' b'oj Comam, xalni tet heb'ya': —Wal heye yul con̈ob' Jerusalén ti' masanto chija' sb'a tzet halb'il teyet yu hin Maman, haca' xwute walni teyetan. 5Yeli, xi' ha' anma yu ya' Juan, yaja' ha'n̈e. Walex, yulb'al hayeb'ojxa tz'ayic che chab' Espíritu Santo haca' ji'ni ha'. 6Yaman heb'ya' b'oj Comam Jesús sk'amb'en heb'ya': —Mamin, ¿tom ha' tinan̈ cha colo'loj co con̈ob' ti'an cat jin̈n̈encan co b'aan? . 7Xta'wi Comam: —Hexti' mat yetwanoj ay heyohtajn̈en stz'ayical b'oj b'ak'in̈ st'in̈b'a' Comam Dios hej tzetet han̈c'a chu yalni. 8Yaja' yet che chanoj Espíritu Santo, che chab' scan̈il heyeyi cat heyelojtoj heyalnojc'oj yul con̈ob' Jerusalén ti', b'oj sunil yul xtx'otx'al Judea, Samaria, b'oj sunil shoyanil satyib'an̈k'inal ti' tzetaj xwalan b'oj tzet xwuan. 9Lawi yalni Comam hunk'aan tu', yin̈ sat heb'ya' x'iotcan̈ satcan̈. Lan̈antic'a tu' xhul hune' asun schanoj Comam, yuxin matxa xil heb'ya' yin̈. 10T'an̈antocan̈ heb'ya' yilni sto Comam yul satcan̈, syenican̈ sb'a cawan̈ ángel sc'atan̈ heb'ya', sajpok'pon̈e xil sk'ap, 11xalni tet heb'ya': —Hex ah Galilea hexti', ¿tzet yuxin yehn̈e he t'an̈ican̈? Comam Jesús x'iotcan̈ te xol ti', xeyil yahtoj yul satcan̈ ti', chuluj pax Comam haca'tic'a xu heyilni yahtoj ti'. 12Lawitu' xpaxaytij heb'ya' swi' witz Olivo, xmeltzotoj heb'ya' yul con̈ob' Jerusalén. Etza hune' kilómetro yeloj witz tu' yin̈ con̈ob' Jerusalén. 13Ha' x'apni heb'ya' yul con̈ob' tu', x'ahtoj heb'ya' yin̈ scab' pisoal hune' te' n̈ah b'ay ay sposada: Ya' Pedro, ya' Juan, ya' Jacobo, ya' Andrés, ya' Felipe, ya' Tomás, ya' Bartolomé, ya' Mateo, ya' Jacobo sc'ahol ya' Alfeo, ya' Simón, aytic'acoj yin̈ partido cananista, b'oj ya' Judas sc'ahol ya' Jacobo. 14Sunil heb'ya' ti' yamann̈etic'a ya'ni oración b'oj heb'ya' ix ẍtic'a ec' tzujtzun yin̈ Comam, b'oj ya' María, smi' Comam, b'oj heb'ya' yuẍtaj Comam. 15Sunil heb'ya' yamanicoj tu' ay mi heb'ya' 120oj. Yet hunec tu', x'ah lin̈noj ya' Pedro xol heb'ya' xalni ya': 16—Hex wuẍtaj, hex wanab', yilal yijni sb'a tzet tz'ib'n̈eb'ilcan yul Yum Comam Dios yu ya' David. Ha' Comam Espíritu Santo x'a'ni stz'ib'n̈e ya' yin̈ tzet cha'le' naj Judas, naj x'initoj heb'naj xb'ey tzab'noj Comam Jesús. 17Naj Judas tu' co tz'ajtic'a ye naj yin̈ hune' munil ti'. 18(Naj tu' slok' naj hune' tx'otx'otx' yu stohol scha yin̈ xtx'ojal xu. Hat xto xulna naj, xlin̈mocaniltij yul sc'ul naj. 19Hune' tu', sunil anma yul con̈ob' Jerusalén ti' x'ab'eni, yuxin Acéldama x'aotcoj sb'ihoj hune' tx'otx' tu'. Ha' chaliloj yul ab'xub'al hebreo Tx'otx' lok'b'il yu stohol chic'.) 20Chalni pax ya': Hactu' yet ay juni, haxca hactu' yalni yin̈ Salmos:Canojab' tin̈na yatut naj. Matxa mac ch'occan yul te', ẍi.Chalni pax yin̈ hunxa:Ocojab' hunujxa mac sheleloj naj yin̈ smunil, ẍi paxayoj. 21- 22Tinan̈, yilal co sayni shelel naj camom Judas tu' xol heb'ya' jetb'i ti' yun̈e scolwa yalnic'oj ta xpitzc'acan̈ Comam Jesús xol hej camom. Mac ẍco saya' tu', ha' hunuj mac xjet ichencoj b'oj Comam, ch'ichitij yin̈ yet xi'ni ha' Comam yu ya' Juan, b'oj yulb'al x'ehc'oj co xol masanto x'iottoj yul satcan̈. 23Yuxin saylax cawan̈xa heb'ya' xol heb'ya' yamanc'oj tu', ya' José, chij Barsabás xhal-lax pax Justo yin̈, b'oj ya' Matías, yun̈e yil-laxi mac ẍcanoj. 24Yuxin, x'oc heb'ya' ya'noj oración, xalni heb'ya': —Mamin, hawohtaj tzet ib'il yu yanma hunun anma. Yuxin yeltoj jetan mac cha sic'le ch'oc ha chejab'oj xol heb'ya' cawan̈ jetb'i ti'an, 25yun̈e schani ha munil xcan yu naj Judas yet xtocan naj b'ay yet ay stoyi. 26Lawitu' x'oc heb'ya' yilwenoj mac yetwanoj scani. C'uxan x'ay yib'an̈ ya' Matías. Yuxin xcan ya' stz'ajoj heb'ya' hunlan̈wan̈ apóstol.


Copyright
Learn More

will be added

X\