3 JUAN 1

1Hayin anciano hin ti'an, chin tz'ib'n̈etoj hune' wum ti' tawetan wuẍtaj Gayo, caw yeli chach wochean. 2Wuẍtaj caw ocheb'il wuan, chin k'an tet Comam Diosan, ta haca' sc'ulch'anil hawe yin̈ hej tzetet yet Comam, hacojab' tu' sc'ulal ch'ec' hawu, b'oj yu ha cawilwalil. 3Caw xquin tzala yu wab'en yalni heb'ya' juẍtajan, yet xhul heb'ya', to caw yijyom hach yin̈ b'aytet st'in̈anil. 4Mach hunujxa tzalalal k'a ec'b'alto ye sataj yet xwab'en yin̈ mactaj xchani Comam yin̈ yanma wuan caw yijyom chute sb'a yin̈ cuywab'al st'in̈anil yeyi. 5Wuẍtaj caw ocheb'il wuan, caw c'ul chawute ha yijyen munil yin̈ ha colwa yin̈ heb'ya' juẍtaj, hasta yin̈ heb'ya' nan con̈ob'al ch'ec' ta c'atan̈. 6Yet yamanon̈ b'eti'an, xalni heb'ya' xhul b'eti' to caw xahan chawil heb'ya' b'etu'. Tinan̈ chin k'an tawetan ta chach colwa yin̈ heb'ya' yet ẍtoj heb'ya' hunujxa b'aya, yun̈e mach ẍmahlan heb'ya', haxca schejab' Comam ye heb'ya'. 7Heb'ya' ti', stzoti' Comam Jesús ch'ec' heb'ya' yalac'oj, mach ninoj tzet sk'an heb'ya' tet mac maxtocoj yin̈ Comam. 8Yuxin yilal co colwa yin̈ heb'ya'. Ta chon̈ colwa yin̈ heb'ya', hacojtam hayon̈ hun chon̈ munla b'oj heb'ya' yet ch'ec' heb'ya' scuynuj st'in̈anil. 9Xin tz'ib'n̈etoj hune' wum teyet hex ayexxacoj yin̈ Comam ay b'etu'an, yaja' ya' Diótrefes chacoj sb'a ya' swi'aloj yalni. Yin̈ hantaj tzet ẍjala matzet chaliloj yul sat ya'. 10Yuxin yet chin apnoj b'etu'an, ẍwala'loj xtx'ojal ya'an. Haxca ch'ec' ya' yala'c'oj co k'umal teyet b'etu'an. Matn̈etaj co k'umal chalc'oj ya'an, to mach ẍcha ya' heb'ya' jetb'i ch'ec' b'etu'. How pax ya' yin̈ heb'ya' ẍchani heb'ya' ch'ec' yul yatut, hasta b'eh tzumb'eniloj ya' heb'ya' tu' xol heb'ya' syamb'a sb'a b'etu'. 11Wuẍtaj ocheb'il wuan, machon̈ ec' ji'a' tzet chu hej mac tx'oj chu, hatcachan tzet chu anma c'ul, ha' chon̈ ec' ji'a'. Ta han̈c'a tzetet c'ul ẍju, yin̈ hactu' yet Comam Dios je chaltu', yaja' mac mat c'uluj chu, mat yohtajoj Comam Dios. 12Wal ya' juẍtaj Demetrio caw c'ul chute sb'a ya' xol anma. Sunil mac ẍhalni to caw yijyom ya' yin̈ cuywab'al st'in̈anil yeyi. Hactu' walni paxan. Hawohtaj to yet ẍwalni hunuj tzetet yin̈ hunuj anmaan, yel ẍwalan. 13Caw tx'ihalto tzet ẍwal wala' tawetan, yaja' mach ẍwayoj yul hune' wum ti'an, 14haxca chin toj hach wila' walnian, catto co tzoteloj. 15Ehan̈c'oj yin̈ sc'ulch'anil. Chatoj heb'ya' jetb'i scawil ha c'ul. A' pax scawil sc'ul hunun heb'ya' jetb'i b'etu'.


Copyright
Learn More

will be added

X\