2 TIMOTEO 4

1Yin̈ sat Comam Dios yeb yin̈ sat Comam Jesucristo, Comam chul Jahawiloj, yeb chul ilno ismul macta itzitz yeb macta camomxa, chintak'etojan 2ta chawalic'o cuybanile yet Comam xol anma. Ta choche anma yabe', maca mach choche anma yabe', yaja' masan chawalic'oj. Ak' yohtan̈elo yin̈ istx'ojal chiswatx'e, cat xin hacachwa yin̈. Chawiptzenpaxoj, yeb niman chawute hac'ul hacuynipaxo yin̈ cuybanile. 3Yuto ay hune' tiempohal chuli bay matxa chischah yabe' anma cuybanile caw yel chala. Haxan̈e comon tzoti' choche yabe'. Yuxin hantan̈e ebnaj cuywawom chiscutxbaco anma, cat yoc cuywal yin̈ anma tu', yaja' cachann̈e tzoti' caw choche isc'ul anma tu' chal ebnaj. 4Anma tu' chismajche istxiquin yin̈ cuybanile yel chala, yin̈xan̈e xin comon ic'ti' bay chaco yanma anma tu'. 5Yaja' wal hach ti', toholojabn̈etic'a chawute hanabal, techahojab isya'tajil hawu, ec'an̈ hawala'c'o Tzoti' yet colbanile, yije hamunil tzabiloco hawu. 6Yaj wal haninti'an toxa chinpotx'laxan haca' huno no nok' chioc yin̈ xahanbalil, caw cawilxa yeti istz'ayical bay chincaman. 7Haca' hunu mac chioc yin̈ hunu an̈e, hac tu' yu wak'ni wanmahan inmunlahan yin̈ ismunil Comam Dios. Tinan̈ xin xaquink'ojihan inlahnihan inmunilan yin̈ caw c'ul, caw inya'iln̈ehan cuybanile bay ayco janma. 8Wal tinan̈ c'uwanxa hune' sabehal chiak'lax wetan ispaj selel inmunilan. Hune' chak' Comam wetan yet chiapni istz'ayical bay chul Comam istoholaln̈etic'a chiswatx'e, cat yilni yin̈ tzet chielico anma. Maẍn̈etajinan xin chinchahan inmatanan tet Comam, to chischahpaxo sunil anma yin̈ sunil isc'ul chiechmali yin̈ yulbal Comam yet iscayelal. 9Chiwochehan ta chawaco yin̈ hac'ul hawul quinhawilnojan yin̈ an̈e, 10yuto naj Demas xaquinisbejcanojan naj, xato naj bey Tesalónica, yuto ec'bal ayco yanma naj yin̈ tzet ay yul sat yiban̈k'inal ti'. Wal juẍta Crescente xin, hata bey Galacia to naj. Walpaxo juẍta Tito xin, hata bey Dalmacia topaxo naj. 11Cachanxan̈e naj Lucas ayc'o inc'atan̈an. Wal xin ec'an̈ hawik'a naj Marcos cat hawiniti naj tawintaj, yuto chiwochehan chicolwa naj wintajan yin̈ ismunil Comam Dios. 12Wal naj juẍta Tíquico, xainchejtojan naj bey Efeso. 13Yet chaẍtita, chawiti hune' incapahan wacanojan bey yatut juẍta Carpo, bey con̈ob Troas, yeb huntek'an inlibrohan, yeb huntek'an wuman caw yilal yehi. 14Naj Alejandro, naj chac'om ch'en, tzetc'axa ismachiswalilal xaiswatx'e naj win̈an. Ha' Comam Dios chipajtzeno tet naj, haca'tic'a ismachiswalilal naj tu'. 15Chawil haba tet naj, yuto caw chiscaj naj cuybanile chijalic'o ti'. 16Yet wocan babel sata ebnaj yahaw yu yillaxi ta ay inmulan, caw machi hunu mac quincolnihan. Sunil ebnaj quinbejnicanojan; machojab xin chitit ishowal Comam Dios yiban̈ ebnaj yu hune' tu'. 17Yaja' wal Comam Dios colwa win̈an, yak'nipaxo wipan yun̈e yijni isba walnic'ojan cuybanile yet colbanile xol sunil anma mach Israeloj, hac tu' yu yabencantoj. Caw colwa Comam win̈an haca'tan̈e quiniscolan Comam yul isk'ab no' balam. 18Ha' Comam Dios chincolnihan tet sunil ismachiswalilal, cat xin quinisc'ubanan Comam yun̈e quinyinitojan isc'atan̈ yul satcan̈. ¡Alaxojabico ismay Comam Dios yin̈ sunilbal tiempo! Hacojab tu'. 19Chawal tet ix janab Prisca yeb tet juẍta Aquila ta chil isba. Chawalpaxo tet yuninal juẍta Onesíforo ta chilpaxo isba. 20Wal naj juẍta Erasto wacanojan naj yul con̈ob Corinto, walpaxo juẍta Trófimo yabi ay naj, yuxin wacanojan naj yul con̈ob Mileto. 21Chawaco yin̈ hac'ul hatit yin̈ an̈e yalan̈to maẍto chioc ha' n̈ab. Chalto juẍta Eubulo yeb juẍta Pudente yeb juẍta Lino yeb ix janab Claudia ta chawil haba yin̈ hacawil. Yeb sunil mac ayxaco yul isk'ab Comam bey ti' chalpaxtoj ta chawil haba. 22Ha'ojab Comam Jesucristo chioc hawetbihoj, cat xin yak'ni Comam isc'ulch'anil isc'ul teyet hesunil bey tu'. ¡Hacojab tu'!

will be added

X\