2 TIMOTEO 4

1Chin tak'e tawet yin̈ sat Comam Dios b'oj yin̈ sat Comam Cristo Jesús, Comam chuluj cat yocoj Reyal, Comam ch'ilnoj tzet chute anma itzitz b'oj mac camnajxa. Chin tak'e tawetan 2ta cha pujb'ac'oj tzoti' yet colb'anil ta choche anma yab'e mato machoj. Niman ha c'ul cha cachni anma b'oj cha mayni ta tx'oj chu, chawiptzen haca' chal cuywab'al. 3Ch'apnoj stz'ayicalil b'ay matxa chab'e'toj anma cuywab'al st'in̈anil yeyi, saynoj hun tenanoj scuywaom haca' chal sc'ul. Hunk'aan cuywaom tu', han̈c'a b'aytet choche anma yab'e', ha' chala'. 4Anma tu' smajche' xtxiquin tet st'in̈anil cat yab'enojtoj sunil yic'ti'al hej tzetet. 5Yaja' walach itz'at chawute ha b'a, ijleaytoj sya'tajil, ocan̈ pujb'ac'oj tzoti' yet colb'anil, caw c'ul chawute ha yijyen ha munil. 6Hayin ti'an, lan̈anxa waltelaxoj xahanb'alilan. Lan̈anxa yapnoj stz'ayical hin camojan. 7Haca' chu yinitij hune' naj yanma yin̈ hunuj sajach, hactu' xu winitij wanma yin̈ smunil Comam Diosan. Xax quin apni b'ay ch'a'lax spaj yin̈ tzet xwu'an, xin yijye hune' b'ay ẍja' yuluj co c'ulan. 8Tinan̈ ayxac'oj hin corona cha'a' Comam Jahaw wet spajoj stoholal xwuan, hune' cha'a' Comam yin̈ stz'ayical b'ay chila' Comam tzet chute' Comam anma yin̈ stoholal. Matn̈e hayinoj b'ay cha'a' Comam hune' corona tu'an, to cha'a pax tet mactaj sunil sc'ul ẍmajni yul Comam hunecxa. 9Timoteo, a' yilal ha titna hin hawila'an, 10haxca ya' Demas caw chim yoche ya' hej tzetet yet satyib'an̈k'inal ti', yuxin xquin stin̈chacan ya'an, xto ya' Tesalónica. Ya' Crescente xto ya' b'et Galacia, ya' Tito xto ya' Dalmacia. 11Han̈c'a ya' Lucas ay tin c'atan̈an. Ec'an̈ i' ya' Marcos haxca caw ẍcolwa ya' win̈ b'eti' yin̈ hin munilan. 12Xwatoj ya' Tíquico yul con̈ob' Éfesoan. 13Yet chach tij, chawi'a'tij wen̈el xwacan yul con̈ob' Troas yatut ya' Carpoan, b'oj hej te' hum, ha' ti' k'a' yilal ye ẍwab'ean hej pergamino. 14Naj Alejandro chac'om ch'en, caw ay xtx'ojal naj xacoj yul hin satan, yaja' ha' Comam Jahaw ch'a'noj spaj tet naj yin̈ xtx'ojal xu. 15Nann̈e hawu haxca caw xpaq'uicoj naj yin̈ cuyb'anile ẍjalic'oj. 16Yet xquin oc yin̈ sat naj yahaw Roma yet xin colni hin b'a sb'ab'elalan, mach hunuj mac xcolwa win̈an, sunil mac xquin tin̈chancanan. Oẍimi cha' ec'otoj Comam hune' tzet xu heb'ya' ti'. 17Yaja' xcolwa Comam Jahaw win̈an, xa'ni Comam wipan, yuxin chu yijnoj sb'a spujb'alaxojc'oj hune' tzoti' yet colb'anil ti', cat yal-laxoj yab'e' anma mat israeloj. Hactu' xu hin scolni Comam Jahaw yul sti' no' b'alaman. 18Hactu' hin scolnoj pax Comam tet sunil xtx'ojalan, cat hin syan̈enoj Comaman masanto chin apni yul sk'ab' Comam b'et satcan̈an. ¡Hal-laxojab' tzoti' c'ul tet Comam yin̈ stohb'alk'inal! Amén. 19A' scawil sc'ul ya' Prisca b'oj ya' Aquila, b'oj tet mac ay yul yatut ya' Onesíforo. 20Ya' Erasto xcan ya' yul con̈ob' Corinto, pax ya' Trófimo xtx'ojb'ican sc'ul ya', xwanican ya' yul con̈ob' Miletoan. 21Anacoj yin̈ ha c'ul ha tit yin̈ lemb'il yalan̈to maẍto chul stz'ayical b'ay ch'ay chew. Chatoj ya' Eubulo ha cawil, ya' Pudente, ya' Lino, ya' Claudia b'oj sunil heb'ya' jetb'i ayxacoj yin̈ Comam. 22Ẍwochean ta aycoj Jahaw Jesucristo tawin̈, ya'ab' Comam Dios sc'ulch'anil sc'ul teyet te hunil.


Copyright
Learn More

will be added

X\