2 TIMOTEO 3

1Ay hune' tzet yilal hawohtajn̈eni: Yet chuluj slahub'al tz'ayic caw ya'taj chute'loj sb'a. 2Yet tu' etza sunil anma han̈c'axan̈e cha'a'coj sb'a yin̈ sc'ul, k'a' cha'a'coj yanma yin̈ ch'en melyu, caw can̈tajn̈e ye chute' sb'a, cha'a'coj lolo'al yin̈. Matxa ẍnanonoj stzoteloj tet anma, matxa syijye' smam smi'. Mach ab'al yuch'antioẍ sat. Matxa yelapnoj ye Comam Dios yul sat. 3Matxa choche' yet-anmail. Matxaca stz'a'oj sc'ul yin̈. Hob'om tzoti' chute' sb'a. Matxa cha' cacha' sb'a yin̈ xtx'ojal, ec'najxa chute' sb'a, b'oj caw ẍpac'ojcoj yin̈ hej tzetet c'ul. 4Xa pac'ojcoj yin̈ yetb'i, b'oj caw sk'ejn̈e' yanma, choche' ta han̈c'an̈e ahatoj stel. Han̈c'axan̈e xtx'ojal choche snimanil, ha' choche' yub'. Choche ya'a tet yanma, matxacoj yanma yin̈ Comam Dios. 5Hunk'aan tu' jala'xic'a ta aycoj yanma yin̈ Comam Dios, yaja' mach ch'elwan scan̈il smay Comam Dios yin̈.Machawacoj ha b'a xol anma hactu' ye snab'al. 6Xol hunk'aan anma tu' aycoj heb'naj ch'oc yulaj n̈ah cat sub'cha heb'ix mat c'uloj yecoj snab'al, caw ayxa smul, ijb'ab'il yu hej tzetet chochetoj. 7Heb'ix tu' ẍtic'a cuywi heb'ix, yaja' maẍtic'a xtxumcha st'in̈anil yu. 8Haca' xute naj Janes b'oj naj Jambres xpaq'uicoj heb'naj yin̈ ya' Moisés, hactu' ye heb'naj ti' ẍpac'ojcoj yin̈ b'aytet st'in̈anil. Mach swalil ye yul swi' heb'naj, ib'ilxaloj heb'naj yin̈ b'ay xja' yuluj co c'ul. 9Yaja' mach nahatwoj yoj xtx'ojal heb'naj ti' haxca lemb'il ch'ixtan̈woj sucal heb'naj, haca' xa'le heb'naj cawan̈ xpaq'uicoj yin̈ ya' Moisés tu'. 10Hachti' ayxa hawohtajn̈entij hin cuywab'alan, tzet chu wehc'ojan, tzet nab'il wuan, tzet chu wa'ni yuluj hin c'ul yin̈ Comaman, snimanil hin c'ulan, wochen anmaan, b'oj hantaj ẍtecha sya'tajil wuan. 11Hawohtaj tzet xu hin cajlaxan b'oj wilni sya'tajil yul con̈ob' Antioquíaan, b'oj Iconio, b'oj Listra. Hantaj sya'tajil xwil b'etu'an, yaja' ha' Comam Jahaw xquin colni tet sunil hunk'aan tu'an. 12Hantaj mac choche syijye' Comam Dios haxca aycoj yanma yin̈ Comam Cristo Jesús, ẍtic'a yil sya'tajil haxca ẍcajot yu anma. 13Anma tx'oj, b'oj mac sub'um anma, hunk'aan tu' yanin̈etic'a toj sb'a yin̈ tx'ojal, ch'etli, yaja' ch'etaot paxoj. 14Walach, lin̈anachn̈etic'a yin̈ hantaj xa cuyu, hunk'aan b'ay xawa' yuluj ha c'ul. Hawohtaj mac x'a'ni ha cuyu. 15Yin̈tax ha ni'antoal hawohtaj tzet chal Yum Comam Dios. Hune' tu' chu hach yinitoj yin̈ tzet chu hawohtajn̈en chub'il chon̈ colchayi yun̈e ẍja'ni yuluj co c'ul yin̈ Comam Cristo Jesús. 16Sunil tzet ahayoj yul Yum Comam Dios, ha' Comam x'a'ni tz'ib'n̈elaxoj, yun̈e yocnicoj yin̈ scuyni st'in̈anil tzoti' b'oj syeniltoj b'ay mat st'in̈aniloj yeyi. Ch'ocnicoj yin̈ scachni co tx'ojal, b'oj scuywa yin̈ juni stoholal, 17yun̈e tz'ajan lahan ẍjucan hayon̈ hon̈ yet-xa Comam Dios ti', xa sje co munla yin̈ juni hej tzetet c'ul.


Copyright
Learn More

will be added

X\