2 TIMOTEO 2

1Walach Timoteo hacaojtam hach hin c'aholan, cha yip hawanma yu sc'ulch'anil sc'ul Comam Cristo Jesús cha' jet. 2Hantaj tzet xawab'e walni yin̈ sat tx'ihal anmaan, acoj yul sk'ab' heb'ya' ẍcawxi co c'ul yin̈, ẍc'oji scuynitoj tet haywan̈ojxa anma. 3Haca' stechah sya'tajil yu naj soldado yet aycoj naj yin̈ servicio, hactu' stechah hawu yin̈ sya'tajil chul tawin̈, yun̈e c'ul ha yijyen Comam Cristo Jesús. 4K'inaloj yet ayto hunuj naj yin̈ soldadoal, mach hunujxa munil ch'oc naj yub', to han̈c'an̈e tzet chal naj swi'al yecoj yin̈ naj tu', ha' chu naj yun̈e stzala naj swi'al tu' yin̈ naj. 5K'inaloj hune' naj sajchom, matzet ch'a'laxoj tet naj ta mach'ec' naj yi'a' syijyeb'anil hune' sajach tu'. 6Hactu' naj munlawom, ta chitij naj yanma yin̈ smunla yin̈ c'ul, yettic'a aya, ha' naj ch'ab'lenoj b'ab'el sat stz'unub' ch'elnaloj tu'. 7Ta chawacoj yin̈ ha c'ul tzet ẍwal ti'an, hato Comam Jahaw ch'a'noj cam ha txumu' tzet ch'elicoj. 8Tijab' yin̈ ha c'ul ta ha' Comam Jesucristo xpitzc'acan̈ xol hej camom, yic'al ya' rey David yeyi. Ha' hune' ti' stzoti'al colb'anil chin pujb'ac'oj ti'an. 9Yu walnic'oj hune' tzoti' ti'an, caw ẍwil sya'tajilan, hasta ayincoj presu haca' mac caw xiquiltaj smul. Yaja' wal stzoti'al colb'anile ti' mat presuoj yeyi. 10Yuxin chin ta'wecoj sunil hunk'aan sya'tajil ti' wib'an̈an, yu hantaj mac sic'le Comam Dios yalan̈to tu', yun̈e ta ha'hun stzujchaapnoj scolb'anil cha' Comam Cristo Jesús, hune' sc'ulch'anil mach ẍtan̈ojiloj. 11Caw yel hune' tzet ẍhalot, chalni: Ta xcon̈ cam yin̈ Comam Cristo, hun chon̈ ehoj b'oj Comam chaltu'. 12Ta ẍtecha sya'tajil ju sya'iloj Comam, chon̈ ocoj yahawoj b'oj Comam chaltu'. Ta ẍjala to machon̈coj yin̈ Comam, chala' Comam ta machon̈coj yin̈. 13Waxan̈ca mach co yijye, wal Comam ẍtic'a syijye tzet chala, haxca machu sman̈c'on Comam tzet yeyi. 14Natij hune' tzet ẍwal ti' tet heb'ya'an. Yin̈ sat Comam Jahaw cha cach heb'ya' ta mach ch'oc heb'ya' steye' sb'a yin̈ hej tzoti' matzet chaliloj, haxca matzet c'ul swatx'e, ton̈e chetatoj yul swi' mactaj ch'ab'eni. 15A' yilal hawehc'oj yin̈ c'ul yin̈ sat Comam Dios haca' hune' chejab' mach hunuj b'ay chu xtx'ixwi, hune' mac ẍhalnic'oj stzoti' Comam yin̈ haca' caw yeyi. 16Machawacoj ha b'a xol mac ẍalni tzoti' tx'oj mach yelapnoj yeyi, haxca mac hactu' stzoteli ton̈e cam ẍto yin̈ xtx'ojal. 17Scuywab'al hunk'aan tu' ẍch'ib' haca' hune' lahwilal matxa cha' tajoj sb'a. Xol heb'naj tu' aycoj naj Himeneo b'oj naj Fileto. 18Heb'naj tu' xax yiloj sb'a heb'naj yin̈ st'in̈anil tzoti'. Chalni heb'naj ta xax pitzc'acan̈ hej camom. Yu hune' tu' sucn̈etoj heb'naj yul swi' haywan̈ heb'ya' xax ya' yuluj sc'ul yin̈ Comam. 19Yaja' mach shec' sb'a stzoti' Comam Dios xa' jet, haca' cimientoal xe hune' n̈ah, hactu' yeyi. Yin̈ hune' tu' tz'ib'n̈eb'ilcoj hunk'aan tzoti' chalni: Yohtaj Comam Jahaw mactaj yet-xa. B'oj chal paxoj: Mactaj ẍalni ta yet-xa Comam, yilal yiniloj sb'a yin̈ xtx'ojal, ẍiayoj. 20Yul yatut anma k'alom matn̈etaj munlab'al c'ul aya, haca'na oro b'oj plata, to ay pax comon munlab'al, haca'na te'te' b'oj tx'otx'otx' tz'ajb'il. Hej tzetet c'ul, yin̈ hej tzetet c'ul ch'ocnicoj, tzetet comon, yin̈ tzetet comon ch'ocnicoj. Haca' ye hunk'aan munlab'al tu', hactu' jeyi. 21Ta ẍjacan hej tzetet tx'oj haca' lan̈an walni ti'an, lahanon̈ b'oj munlab'al c'ul, yet-xa Comam Jahaw jeyi. Chu jocnicoj yin̈ c'ul yu Comam. 22Yuxin tinan̈, machawacoj ha b'a xol hej tzetet tx'oj chu hej hawet tzehal. Ha' hawet, yin̈ stoholal chach ehc'oj yin̈ hawa'ni yuluj ha c'ul, yin̈ hawochen hawet-anmail b'oj yin̈ ak'anc'ulal haca' chute mac sajxa ye yanma ch'awten Comam Jahaw yin̈. 23Machawacoj ha b'a xol mac xalni comon tzoti' mach yelapnoj yeyi, haxca hunk'aan tu' sucaln̈e yeyi. Hawohtaj ta hunk'aan tu' howal chu stan̈canoj. 24Wal hune' schejab' Comam Jahaw, mat yetoj aya chacoj sb'a xol howal. Ha' yet, to c'ul chute sc'ul yin̈ sunil anma, ay snimanil sc'ul scuywayi. 25Mach'ah showal yet scuynitoj mac ẍpaq'uicoj yin̈ cuywab'al st'in̈anil yeyi, yun̈e ta c'uxan ẍmeltzo snab'al yin̈ Comam Dios, cat yohtajn̈eniloj st'in̈anil tzoti'. 26Haxca heb'naj tu' haca' to c'alan heb'naj yu slec'ab' naj matzwalil yun̈e yuni heb'naj b'aytet chal sc'ul naj. Yaja' ta ẍnanb'iloj yu heb'naj, ẍcolcha heb'naj yul slec'ab' naj matzwalil tu', chaltu'.


Copyright
Learn More

will be added

X\