1 Hach caw inc'aholti'an, caw ak' hawip hawatx'enico haba yin̈ isc'ulal isc'ul Comam Dios chiyak' jet, yuto caw hunxa je yeb Comam Jesucristo. 2 Huntek'an cuybanile hawabe walnic'ojan xol anma, ha' chatak'e tet ebnaj juẍtaj yijem chute isba, yeb tz'ajan chute isc'ul ebnaj iscuyni hunuxa yet anmahil. 3 Hach ti' xin techahojab isya'tajil hawu haca' hunu naj soldado, yuto ischejab Comam Jesucristo hawehi. 4 Machi hunu naj soldado ti' ayco soldadohal cat istopaxo iswatx'eno hunuxa nan munilal, yuto yilal isyijen naj tzet chal yahawil. 5 Hacpax tu' hunu naj chiak'ni an̈e, mach chischah naj ismatan ta mach chisyije naj yin̈ tzet chu istzujcha apno hune' matan tu'. 6 Haca' hunu naj tz'unum awal, yilal ismunla naj babel cat ischahni naj sat istz'unub tu'. 7 Aco hawanma yin̈ huntek'an cuybanile chiwalan tawet ti', ha' xin Comam ch'ak'ni cam hatxumu' yin̈ tzet yehi. 8 Nati Comam Jesucristo, Comam pitzc'acan̈ xol camom, Comam tit yin̈ yuninal naj jichmam David, haca' yalni Tzoti' yet colbanile chiwalic'ojan xol anma. 9 Yu chiwalic'ojan hune' cuybanile ti', yuxin chiwabehan isya'tajil. Caw xin ayinicojan preso haca' hunu mac caw xiwquilta ismul, yaj wal Ttzoti' yet colbanile xin mach ayoco preso. 10 Yuxin, sunil chiwak' techahojan yu ayco wanmahan yin̈ macta sic'bilxacan̈ yu Comam, yun̈e ischahni iscolbanil caw c'ulch'ancanoj, mach istan̈bal, hune' chiak'lax jet yu hunxa je yeb Comam Jesucristo. 11 Hune' cuybanile ti' caw yel chala: Tato xacon̈cam yeb Comam, chon̈itzitzbipaxocan̈ yeb Comam yin̈ sunilbal tiempo. 12 Tato chijabe isya'tajil, chon̈ocpaxo yahawilo yeb Comam. Ta chijala ta mach johtajo Comam, chiyalpaxo Comam ta mach con̈yohtajoj. 13 Ta mach c'ulo chijute coba, wal Comam Dios c'ul Comam, yuto mach chisman̈c'o Comam yin̈ tzet chala. 14 Nati huntek'an tzet chiwalti'an tet ebnaj juẍta ink'ana'an. Cam tak'ecano tet ebnaj sata Comam Dios ta mach ch'oc ebnaj isteye'le isba yin̈ej tzoti' matzet chal yelapnoj, yuto matzet c'ul chiswatx'e, ton̈e chetato isnabal macta chiabeni. 15 Caw hantatic'a chu hawu lahico hawec' yin̈ isc'ulal, haxinwal chitzala Comam Dios tawin̈, haca' hunu munlawom matzet yin̈ wal istx'ixwican̈, hune' mac ha' cuybanile caw yel chalic'oj. 16 Caw mach chachah hawabe huntek'an tx'ojla tzoti' chal anma, yeb tzoti' matzet c'ul chak'a, yuto ha' mac chihalni huntek'an tzoti' tu' niẍtejal isto sutsun xol istx'ojal. 17 Haca' hunu tx'ac chik'atoj cat yec' lebohi, hac tu' chiyu yec' lebo huntek'an tzoti' chiyal ebnaj tu'. Hac tu' yute isba naj Himeneo yeb naj Fileto. 18 Xaisbejcano ebnaj hune' cuybanile caw yel chala, chalni ebnaj tato xapitzc'acan̈ ej camom. Ay xin huntek'an mac ayxaco yanma yin̈ Comam chicabconcan̈ isc'ul yu tzet chal ebnaj. 19 Yaja' wal Istzoti' Comam Dios yak'cano jet, caw ay yip, lahan haca' hunu xe' n̈a machi nino chibili. Ayco hune' sello yin̈ chalni haca' ti': “Yohta Comam Dios macta yetxa Comam yehi,” ẍi. Chalnipaxoj: “Macxan̈etic'a anmahil chaco isba yul isk'ab Comam Jesucristo, yilal chisbejcano sunil istx'ojal,” ẍi. 20 K'inalo hunu niman n̈a tinan̈, caw tzetc'a k'uybe ayicto yul; ay munlabal naba oro yeb naba plata ayicto yul. Aypaxo munlabal naba te'n̈e, aypaxo naba tx'otx'n̈e. Huntek'an munlabal tu' ay ec'bal yelapno ismunil, aypaxo xin comontan̈e ismunil. 21 Lahanon̈ haca' huntek'an munlabal tu'. Tato sunil machiswalilal chicobejcanoj, niman jelapno yul sat Comam Dios. Haxa Comam ayon̈ yet, xacon̈ocnico yu Comam yin̈ ismunil, helanon̈xa cowatx'en sunil isc'ulal. 22 Elan̈ tet sunil istx'ojal choche ebnaj hawet tzehal iswatx'e; wal xin ocan̈ tzujno yinta istoholal. Cam lahico hawanico hawanma yin̈ Comam, xahan chawil hawet anmahil. Caw ayojab ak'anc'ulal yul hawanma haca' sunil macta chiawten Comam yin̈. 23 Yaj mach chawabeto tzoti' machiswalil matzet chaliloj, yuto hawohtaj tato howal chíti huntek'an tu'. 24 Yuto hune' ischejab Comam Dios, mach chiyu yanito isba xol howal. Wal xin c'ul chute isba yin̈ sunil anma, helanpaxo iscuywahi, yeb xin niman chute isc'ul. 25 Ak'anc'ulal xin chiyu iscuywa yin̈ mac mach chischah cuybanile, yuto chalo yanico huntek'an mac tu' Comam Dios yin̈ isc'ul cat ishelni isbeybal, cat yohtan̈enilo hune' cuybanile caw yeli, 26 yun̈e iscolchalo yul isk'ab naj matzwalil bay preso yeco yu naj; chiswatx'en baytet choche isc'ul naj.
