2 TIMOTEO 1

1Hanin Pablo inti'an, ischejab Comam Jesucristo wehan, yuto hac tu' el yin̈ isc'ul Comam Dios, yu walnic'ojan hune' k'inale mach istan̈bal chiilcha yin̈ Comam Jesucristo, haca' yu yaltencano Comam Dios. 2Chintz'ibn̈etojan hune' incartati'an tawet wuẍta Timoteo, caw xahan ayach wuhan, yuto inc'aholan hawe yin̈ Comam. Ha'ojab Comam Dios Mame yeb xin Comam Jesucristo chiak'ni isc'ulch'anil isc'ul yeb ak'anc'ulal tawet, cat istz'ay isc'ul tawin̈. 3Hayet chaẍinnanitijan yet chintxahlihan hunun tz'ayic yeb hunun ak'bal chiwak'an yuch'andiosal tet Comam Dios tawin̈. Yin̈ istoholal innabalan chinmunlahan yin̈ ismunil Comam Dios, haca' yu ismunla ebnaj wichmaman yet payat. 4Chinnatijan yet hawok'i yet hacancano wuhan. Chiwochehan chachwilan hunelxa yun̈e cam yahcanocan̈ tzalahilal yul wanmahan. 5Chinnatijan tato yin̈ caw yeli ayco hawanma yin̈ Comam Jesucristo. Haca' hami' ixnam Loida yeb hami' Eunice, ha' babel yaco yanma yin̈ Comam, caw xin wohtajan tato hac tu' hawanipaxico hawanma yin̈ Comam. 6Yuxin chiwaltojan tawet tato ayachojabn̈etic'aco hawanico yip hahelanil yak'cano Comam Dios tawet yet wanayo ink'aban yiban̈ hawi'. 7Wal xin, hune' Espíritu xayak' Comam Dios jet, mach chiyak' xiwquilal yul janma, walxinto chak' yip janma, yeb coxahann̈en coba, yebpaxo cocachni coba yin̈ej istx'ojal. 8Yuxin mach chaẍtx'ixwi hawalnic'o Istzoti' Comam Jesucristo, yeb xin mach chaẍtx'ixwipaxoj yuto ayinicojan yul preso ti' yu Istzoti' Comam. Wal xin yu hawip chak' Comam Dios yilal hachahni ej isya'tajil chihul tawiban̈ yu chawalic'o Istzoti' Comam chiak'ni colbanile. 9Wal tinan̈ colbilon̈xa yu Comam, yeb awtebilon̈xa yu joccano yeto Comam. Yaj maẍtaj yu tzet chicowatx'e yuxin colbilon̈xa, machoj; walxinto yu nabilxatic'a yu Comam yet yalan̈ato maẍto chiswatx'e Comam yul sat yiban̈k'inal ti', yak'nipaxo isc'ulch'anil isc'ul jet yu Comam Jesucristo. 10Isyelo Comam Dios isc'ulch'anil isc'ul tu' yin̈ Comam Jesús yet yulic'o yul sat yiban̈k'inal ti'. Yak'nicano tan̈o yip hune' camical jiban̈, yak'ni ohtan̈elaxo hune' k'inale mach istan̈bal yu cuybanile yet colbanile. 11Ha' Comam Dios ak'n̈e inmunilan walnic'ojan hune' Tzoti' yet colbanile ti', quinyanicojan ischejabo Comam Jesucristo, yeb cuywawomal xol anma mach Israeloj. 12Yuxin chiwilan huntek'an isya'tajil chiay wiban̈ti'an, yaja' machi nich'ano chintx'ixwihan, yuto wohtajan mac yin̈ ayco wanmahan. Wohtapaxojan ta tzet chiwak'an isc'uba' Comam Dios, ay yip Comam isc'ubani masanto yet ch'ayilo islahobal tz'ayic. 13Huntek'an cuybanile ak'bil tawet wuhan, yin̈ caw yeli yet Comam Dios yehi. Ha' huntek'an cuybanile ti' chawilto habeybaln̈eni. Tinan̈ hunxan̈e je yeb Comam Jesucristo, yuxin aco hawanma yin̈ Comam, yeb xin xahan chawil hawet anmahil. 14Wal xin, yu yip Comam Espíritu Santo ayco jin̈ hununon̈, yuxin caw chaya'iln̈e huntek'an cuybanile ak'bil tawet yu Comam Dios. 15Hawohtaj tato sunil ebnaj ay bey yul ismajul Asia bejn̈e incanojan, xol ebnaj tu' ayco naj Figelo yeb naj Hermógenes. 16Ha'ojab Comam Dios chianayo isc'ulal yiban̈ macta ay bey yatut juẍta Onesíforo, yuto tx'i'al el hulic'o naj yak'a' isnimanbal inc'ulan. Waxan̈ca ayinictijan yul preso ti' yaj xin mach chitx'ixwilo naj win̈an. 17Wal xin huln̈e naj yul con̈ob Roma ti', yoc naj quinissaynihan, maẍtic'a xin isbej naj quinissaynihan masan quinilchahan yu naj. 18Ha'ojab Comam Dios chiak'ni isc'ulch'anil isc'ul tet juẍta Onesíforo tu' yin̈ islahobal tz'ayic. Hach ti' caw hawohtaj ta colwa naj jin̈ yet ayon̈ yul con̈ob Efeso.

will be added

X\