2 TIMOTEO 1

1Hayin Pablo hin ti'an, yapóstol Comam Cristo Jesús wean, haxca hactu' x'el yin̈ sc'ul Comam Dios, yu walnic'oj hune' k'inal aycoj yin̈ Comam Cristo Jesús halteb'il yu Comam Dios. 2Ẍwatoj hune' wum ti' tawetan Timoteo, haca'tic'a hin c'ahol caw xahan ay wu hawean. Tz'aojab' sc'ul Comam Dios Padre b'oj Jahaw Cristo Jesús tawin̈. Ya'ab' sc'ulch'anil sc'ul b'oj ak'anc'ulal tawet. 3Yet chach hin nanitij yin̈ woración tz'ayic ak'b'alan, ẍtic'a wa' yuch'antioẍ tet Comam Diosan. Saj hin satan chin hak'en Comaman haca' xu shak'en heb'ya' jichmam Comam yet payxa. 4Naun̈e ẍtit yin̈ hin c'ulan yet xcach ok'i, yuxin ay wala'an ẍwilna pax tawin̈an yun̈e stzala hin c'ulan. 5Ẍtit yin̈ hin c'ulan to caw yeli chawa' yuluj ha c'ul yin̈ Comam, haca' xu ya'ni ha mi' ixnam Loida yuluj sc'ul, b'oj ya' ha mi' Eunice. Wohtajan ta hactu' hawa'ni pax yuluj ha c'ul. 6Yuxin chin natij tawetan ta ayachn̈etic'acoj hawa'ni yip hune' munil xa' Comam tawet yet xwanicoj hin k'ab' yin̈ ha wi'an. 7Haxca mataj hune' xiwquilal xa' Comam jet, to xa' jip yin̈ co lin̈b'an co b'a, b'oj jochen jetb'i, b'oj co cachni co b'a. 8Yuxin machach tx'ixwi hawalnic'oj stzoti' Comam Jahaw, machca chach tx'ixwi wuan haxca ayincoj presu syayiloj Comaman. Ha' hawet, yu hawip xa' Comam Dios, ta'wecoj sya'tajil chul tawin̈ yu hawalnic'oj tzoti' yet colb'anil. 9Comam xcon̈ colni, xcon̈ yawten yetoj. Yaja' matoj yu sc'ulal xju, to yu sc'ulch'anil sc'ul xa' jet yin̈ Comam Cristo Jesús. Nab'ilxatic'a hune' ti' yu Comam yettax x'ichitij satyib'an̈k'inal ti'. 10Tinan̈ syeloj sb'a sc'ulch'anil sc'ul Comam Dios, haxca xhul Scolomal jet Comam Cristo Jesús. Ha' xc'ayniloj scan̈il ye camical, xa'ni stzujchaoj k'inal mach stan̈b'al yu tzoti' yet colb'anil. 11Yu hin pujb'anc'oj hune' tzoti' yet colb'anile ti'an, yuxin xquin yacoj Comam apóstolalan, b'oj cuywaomal. 12Yu hune' ti' ch'ec' ya' wanma yin̈ hune' sya'tajil ẍwil ti'an. Yaja' mach cab'con in c'ul yuan, haxca caw wohtaj Comam b'ay xwa' yuluj hin c'ul ti'an. Yuxin ẍcawxi hin c'ulan to ay scan̈il ye Comam stan̈en wanmaan masanto ch'apnoj slahub'al tz'ayic haxca ab'ilxatic'acoj yul sk'ab' wuan. 13Iloj hawet yin̈ cuywab'al c'ul xawab'eloj win̈an. Ehan̈c'oj yin̈ hawa'ni yuluj ha c'ul yin̈ Comam b'oj yin̈ hawochen hawet-anmail, haxca ayon̈xacoj yin̈ Comam Cristo Jesús. 14Caw cha ya'iln̈e cuywab'al xac'oj Comam Dios yul ha k'ab' yu scolwal Comam Espíritu Santo tawin̈, Comam ch'ehc'oj yin̈ janma hununon̈. 15Hawohtajxa ta sunil heb'ya' speto Asia quin tin̈chancanan, ha'hun ya' Figelo b'oj ya' Hermógenes xol heb'ya'. 16Tz'a'ojab' sc'ul Comam Dios yin̈ mac ay yatut ya' Onesíforo, haxca ya' tu' tx'ihal el xa' ya' yak'lob'al hin c'ulan b'oj maẍtic'a xtx'ixwi ya' haxca ayincoj presuan. 17To ha' yet ya', maẍtic'a xewilal xil ya' x'oc ya' hin saynojan yet xhul ya' yul con̈ob' Roma ti', masanto quin chalo yu ya'an. 18Ẍwochean ta yet ch'apnoj slahub'al tz'ayic cha'a' Comam Jahaw sc'ulch'anil sc'ul tet ya'. Hachti' k'a' hawohtaj hantaj xcolwa ya' jin̈ yet ayon̈ Éfeso tu'.


Copyright
Learn More

will be added

X\