2 TESALONICENSES 3

1Wal tinan̈, hex wuẍtaj hex wanab, txahlan̈we jin̈an̈, haxinwal yin̈ an̈e chiapni Istzoti' Comam Dios sunil baytajtu'wal, yeb yun̈e istzala isc'ul anma ischahnicanoj, haca' yu istzala hec'ul yet heyanico heba yul isk'ab Comam. 2Txahlan̈wepaxo yu con̈iscolnilojan̈ Comam Dios yul isk'ab anma machiswalil yeb tx'oj isnabal, yuto mach sunilo anma chichahnayto Istzoti' Comam Dios yul yanma. 3Wal Comam Dios chij isba sunil tzet chala, ha' Comam chexiptzeni, cat quexiscolni yul isk'ab istx'ojal. 4Chicawxi coc'ulan̈ yin̈ Comam Dios tato ayexico heyijen sunil tzet chijalan̈ teyet, yeb ta caw chelahico heyijeni. 5Ha'ojab Comam Jesucristo chicolwa teyin̈, haxinwal cheyohtan̈e ta xahan ayex yu Comam Dios, cat xin istecha sunil isya'tajil heyu yu yip Comam Jesucristo. 6Hex wuẍtaj hex wanab, yin̈ isbi Cocolomal Jesucristo chijaltojan̈ hune' chejbanile ti' teyet tato chepohilo heba yin̈ ebnaj juẍta mach chisje isc'ul munlahoj, yeb mach chisyije cuybanile halbilcano teyet juhan̈. 7Yuto heyohtaxatic'a tzet wal heyuni, haca' yebil teyet juhan̈. Han̈on̈ti'an̈ yet ayon̈an̈ texol machi hunu tz'ayical ti' mach con̈munlahan̈. 8Heyohtaj tato mach ton̈eho con̈wa'an̈ texol, wal xin con̈munlahan̈ tz'ayical yeb ak'balil yun̈e matzet chicok'anan̈ teyet. 9Waxan̈ca xin ay jipan̈ cok'annihan̈ tzet chicolohan̈ teyet, yaj con̈munlahan̈ yun̈e coyenicanojan̈ tato hac tu' cheyutepaxoj. 10Yet ayon̈an̈ texol tu', chijalnihan̈ hune' cuybanile ti': “Mac mach chisje isc'ul chimunlahi, machojab chiwa'paxoj,” con̈chiyan̈. 11Yaj xin xajabepaxojan̈ tato ay mac texol tu' ton̈e chieq'ui, mach chimunlahi; ton̈e chilo istiempo anma. 12Ha' tet huntek'an anma tu' chijaltojan̈ yu yip Comam Jesucristo tato munlahojab yin̈ ak'anc'ulal, haxinwal ha' caw chiik'ni tzet chislo. 13Hex wuẍtaj hex wanab, machojab chexsiquilo hewatx'en isc'ulal. 14Tato ay mac mach chiyijen tzet chijaltojan̈ yul hune' hum ti', ton̈eojab cheyila maca matxa xin chehunba heba yebi haxinwal chitx'ixwican̈. 15Yaj xin mach cheyaco hehowal yin̈, wal xin cuywe yin̈ istoholal, yuto juẍtapaxo yehi. 16Ha'ojab Comam yahawil ak'anc'ulal chiak'ni ak'anc'ulal teyet hesunil yin̈ sunilbal tiempo. Tzalahojab hec'ul, waxan̈ca ay bisc'ulal chiay texol. Ayojabn̈etic'aco Comam heyetbiho hesunil. 17Wal hanin Pablo inti'an, han-caw-inan chintz'ibn̈etojan tato cheyil heba yin̈ hecawil. Inbihan chioc yin̈ hune' hum ti' haca' chu intz'ibn̈entojan sunilej incartahan. 18Ha'ojab Comam Jesucristo chiak'ni isc'ulch'anil teyet hesunil. ¡Hacojab tu'!

will be added

X\