2 TESALONICENSES 3

1Tinan̈ hex wuẍtaj hex wanab', a'wej heyoración jin̈an, yun̈e lemb'il ch'apni stzoti' Comam Jahaw sunil yul hej con̈ob', b'oj yun̈e schani anma cat sya'iln̈eni haca' xu he chani hexti'. 2Che k'an pax tet Comam, ta chon̈ scol Comam yul sk'ab' anma tx'ojan, haxca mat suniloj anma cha' yuluj sc'ul yin̈ Comam. 3Yaja' wal Comam Jahaw ẍtic'a yij sb'a tzet chal Comam, chex slin̈b'a' Comam cat hex scolni tet naj matzwalil. 4Yin̈ Comam ẍcawxi co c'ulan ta che yijye, b'oj ẍcam heyub' b'aytet xjalan ta cheyu. 5Colwaojab' Jahaw Jesús teyin̈ yun̈e heyab'en yin̈ heyanma hantaj chex yoche Comam Dios, b'oj stechaoj sya'tajil heyu haca' xu stecha yu Comam Cristo. 6Hex wuẍtaj hex wanab', ẍjal teyetan hacojtam Jahaw Jesucristo ẍhalni, ta mach caw che hunb'a he b'a b'oj heb'ya' jetb'i mach sje sc'ul munlaoj, b'oj mach'ec' yi'a' cuywab'al xax ja' teyetan. 7Heyohtaj tzet chu heyehc'oj haca' xu jehc'ojan yet ayon̈ te xolan, haxca mach hunecoj ta mach xcon̈ munlaan. 8Heyohtaj to mat nab'a'oj xcon̈ wa' te xolan, to xcon̈ siqui co munla tz'ayic ak'b'alan, yun̈e mach xjacoj cob'a heyijatzojan. 9Yettic'am aya xco k'an tzet ch'ocnicoj ju teyetan, yaja' xcon̈ munlaan yun̈e co yeni heyila'an ta yilal co munlayi. 10Yet ayon̈ te xolan xjalnian: Mac mach sje sc'ul munlaoj, mat yetoj aya ẍwa'i, con̈ chian. 11Xjab'e sk'umalan to ay mac texol mach munlayi, ton̈e ch'ec' coloyi, tonc'a niman chacoj sb'a xol tzetet mach yoc yin̈. 12Ẍjaltoj tzoti' tet hunk'aan heb'ya' tu'an, b'oj ẍco chilb'aan hacojtam Jahaw Jesucristo ẍhalni, ta ẍmunla heb'ya' yin̈ ak'anc'ulal, yun̈e chu yec' yu heb'ya'. 13Hex wuẍtaj hex wanab', mach cajtza he c'ul heyuni b'aytet c'ul. 14Ta ay mac mach ch'ab'entoj tzet ẍjaltoj yul hune' te hum ti'an, ton̈e cheyila maca, matxa che hunb'a he b'a b'oj, taxca xtx'ixwican̈ ninoj. 15Yaja' macheyacoj he howal yin̈, to cheya' sc'uluj ta chitij yanma yin̈ haxca juẍtaj yeyi. 16Ha' Comam Jahaw, i'n̈e ak'anc'ulal, ch'a'ni ak'anc'ulal teyet stohb'alk'inal, wal tzalalal heyeyi, wal ay b'isc'ulal cheyila. Ẍwochean ta ayn̈etic'acoj Comam yin̈ heyanma te hunil. 17Hayin Pablo hin ti'an, hayin caw chin tz'ib'n̈etoj hune' he cawil ti'an. Hacti' ẍwute pax hunk'aanxa wum xaxtic'a watojan. 18Ya'ab' Jahaw Jesucristo sc'ulch'anil sc'ul teyet te hunil.


Copyright
Learn More

will be added

X\