2 TESALONICENSES 2

1Tinan̈ hex wuẍtaj hex wanab', xwoche chin tz'ib'n̈e teyetan yin̈ tzet chub' yuluj Jahaw Jesucristo hunecxa, yet chon̈ shunb'anojcoj yin̈. 2Chin k'an teyetan ta mat lemb'iloj chex xiwnacan̈. Machca somk'atoj yul he wi' yin̈ tzet xhal-lax teyet to xax ichicoj stz'ayical b'ay chila' Comam Jahaw tzet chute' Comam anma. Waxan̈cami ay mac ẍalni teyet ta ay tzet x'il-lax yin̈ haca' wayique, mato ay stzoti' Comam xja'an, mato hunuj hum xjatoj teyet yib'an̈iloj hune' tu'an, 3macheya' sub'u he b'a. Haxca yalan̈to maẍto chul hune' tz'ayic tu', tx'ihal mac ẍpac'ojcoj yin̈ Comam Dios, b'oj syeb'can̈ sb'a naj yahaw xtx'ojal, naj tu' halb'ilxa to ẍc'aylaxojiloj naj. 4Naj ti' chi'a'can̈ sb'a naj cat spac'ojcoj naj yin̈ sunil tzet ẍhal-lax diosal, mato ẍhak'elaxi. Hasta scawxec'toj sb'a naj yul yatut Comam Dios, chalnoj sb'a naj diosal. 5Tijab' yin̈ he c'ul to xwal hune' ti' teyetan yet ayin te xolan. 6Yaja' heyohtajxa tzet ẍpahni yulb'al naj tinan̈, yun̈e machul naj yalan̈to maẍto chij sb'a stz'ayical b'ay halb'il yu Comam Dios. 7Waxan̈ca xa munla tx'ojal yin̈ ewan tinan̈, yaja' mach chija' sb'a masanto shec'aloj sb'a hune' mac pahn̈e sat xtx'ojal tu'. 8Hato tu' syeb'can̈ sb'a naj yahaw xtx'ojal tu', yaja' yet syenojcan̈ sb'a Jahaw Jesús ib'il smay sk'ak'al yu, ch'ayoj naj yu Comam, cat sc'aylaxojiloj naj yu yip stzoti' Comam. 9Naj tu', syeb'can̈ sb'a naj yu yip naj matzwalil. Tx'ihal c'ayb'alc'ule chub' naj, caw tx'ihal smay sk'ak'al naj syeb' yun̈e sub'cha anma. 10Caw tx'ihal xtx'ojal ẍmunlaoj yu naj, yun̈e sub'chaoj anma lan̈an yetantoj sb'a, haxca hunk'aan tu', maẍtic'a sje sc'ul schab' st'in̈anil stzoti' Comam yu schani scolb'anil. 11Yuxin cha'a' Comam Dios c'ayoj snab'al heb'naj, yun̈e ya'ni yuluj sc'ul yin̈ lek'ti'al chala naj. 12Hactu' chu scawxojcoj smul yib'an̈ mac mach'a'ni yuluj sc'ul yin̈ tzoti' st'in̈anil yeyi, haxca k'a' chochetoj xtx'ojal. 13Hex wuẍtaj hex wanab' ocheb'il yu Comam Jahaw, yet ay ja'ni yuch'antioẍ tet Comam Dios stohb'alk'inal heyuan, haxca yalan̈to xquex sic'le Comam yun̈e he colcha yu Comam Espíritu. Quex pohniloj yetoj, b'oj yu tzoti' st'in̈anil ye b'ay xeya' yuluj he c'ul. 14Yu hune' tu' quex yawte Comam yu tzoti' yet colb'anil xjal teyetan, yun̈e ay he yoc yin̈ yeltich'anil tzet ye Jahaw Jesucristo. 15Tinan̈ hex wuẍtaj hex wanab', lin̈anexn̈etic'a yin̈ Comam, mache nahuln̈etoj he cuyb'anil ẍja'an, wal co tzoti'an, mato yu hune' hum ẍjatoj teyetan. 16Yu sc'ulch'anil sc'ul Jahaw Jesucristo b'oj Comam Dios co Mamwej xcon̈ ocheni, xa' yak'lob'al co c'ul mach stan̈b'al, xa'nipax hune' sc'ulch'anil b'ay ẍcawxi co c'ul. 17Yuxin chin k'an tet Comaman ta chex yiptze b'oj chex slin̈b'a, yun̈e heyalni cat heyuni sunil hej tzetet c'ul.


Copyright
Learn More

will be added

X\