2 TESALONICENSES 1

1Hayin Pablo hin ti'an, ya' Silvano b'oj ya' Timoteo, ẍjatoj hune' hum ti' teyet hex ayexcoj yin̈ yiglesia Comam Dios ay yul con̈ob' Tesalónica, hex hunxa heyecoj yin̈ Comam Dios co Mamwej b'oj Jahaw Jesucristo. 2Ya'ab' co Dios co Mam b'oj Jahaw Jesucristo sc'ulch'anil sc'ul b'oj ak'anc'ulal teyet. 3Hex wuẍtaj hex wanab', yetwanoj ja'ni yuch'antioẍ tet Comam Dios heyuan, haxca b'elay k'a' cheya' yuluj he c'ul yin̈ Comam Dios, b'oj k'a'xa heyoche heb'ya' jetb'i. 4Yuxin hayon̈ caw ẍjalic'oj he c'ulal tet hej yiglesia Comam Dios yul hunun con̈ob'an, haxca caw che lin̈b'a he b'a b'oj caw cheya' yuluj he c'ul yin̈ Comam, waxan̈ca caw chex cajot b'oj ch'a'ot ec'oj ya' heyanma. 5Hati' ẍyeniloj ta caw tohol yalni Comam Dios yet chalnoj Comam to yet ay heyehojc'oj b'ay chocoj Comam Yahawoj, haxca yu hune' ti' lan̈an yec' ya' heyanma tinan̈. 6Haxca yettic'a aya, cha'a' Comam Dios ec'oj ya' yanma mac ch'a'ni ec'oj ya' heyanma ti'. 7Walex ch'a'ot ec'oj ya' heyanma tinan̈, cha'a' Comam xewoj heyanma, haca' ya'noj xewoj janma hayon̈ ti'an, yet ẍtij Jahaw Jesús satcan̈ b'oj hej yángel caw ay scan̈il yeyi. 8Chuluj Comam ya'a' spaj tet mactaj mach yelapnoj ye Comam Dios yul sat, mach sje yab'e'toj tzoti' c'ul yet Comam Jahaw Jesús. Ha' hune' spaj ch'a'laxoj tet, ha' hune' k'a' ch'ah lon̈layi. 9Hunk'aan anma tu', chila' sya'tajil stohb'alk'inal, cat spohlaxojcaniloj caw nahat yin̈ sat Comam, matxa b'ak'in̈aloj chila' smay sk'ak'al Comam. 10Yet tu', chuluj Comam Jahaw yu yil-laxoj smay yu mactaj yet-xa, b'oj yal-laxoj smay yu sunil mac xa' yuluj sc'ul yin̈. Xol hunk'aan tu' ayexcoj, haxca xeya' yuluj he c'ul yin̈ tzet xjal teyetan. 11Ẍja' joración teyin̈an yun̈e stzujchaapnoj hune' ti' heyu. Ẍco k'anni pax tet Comam Diosan, ta cha' Comam sc'ulal teyet yun̈e schani sb'a tzet chu he b'elwi yin̈ hune' b'ay awteb'ilex yu Comam ti'. Xco k'anni paxan ta yu scan̈il ye Comam chija' sb'a sunil hej sc'ulal cheyoche heyub', yu heya'ni yuluj he c'ul yin̈ Comam. 12Yin̈ hactu' ch'ocoj smay Jahaw Jesús teyin̈, cat yocoj pax he may yu, yu sc'ulch'anil sc'ul Comam Dios b'oj Jahaw Jesucristo.


Copyright
Learn More

will be added

X\