2 TESALONICENSES 1

1Hanin Pablo inti'an yeb juẍta Silvano yebpaxo juẍta Timoteo chijatojan̈ hune' carta ti' teyet hex ayexxaco yul isk'ab Comam Jesucristo bey yul con̈ob Tesalónica, hex hunxa heye yin̈ Comam Dios yeb yin̈ Comam Jesucristo. 2Yak'abayo Comam Dios yeb Comam Jesucristo isc'ulch'anil isc'ul yeb ak'anc'ulal texol hesunil. 3Hex wuẍtaj hex wanab, caw yilal chijak'an̈ yuch'andiosal tet Comam Dios teyin̈, haca' caw yehi yuto hunun tz'ayic isch'ib heyanico heyanma yin̈ Comam Dios, yebpaxo xin caw ec'balto chexahann̈e heba hununex. 4Yuxin caw chitzala janmahan̈ chijalnihan̈ hec'ulal xol hunun majan macta ayxaco yul isk'ab Comam Jesucristo, yuto caw niman hec'ul, cheyanipaxico heyanma yin̈ Comam Dios, waxan̈ca xin caw chextzumbelaxic'oj cat heyetalaxi. 5Ha' ton ti' chihalniloj tato chil Comam yin̈ caw istoholal yin̈ tzet chielico anma, cat yalni Comam teyet tato ay heyoc yin̈ bay chioc Comam yahawiloj, yuto lan̈an heyetan heyanma tinan̈. 6Wal xin caw ha' istoholal chiswatx'e Comam Dios, yuxin yilal yanayo Comam isya'tajil yiban̈ huntek'an anma chiak'ni ec'oya' heyanma. 7- 8Hex lan̈an heyaben isya'tajil tinan̈, chexyik'alo Comam Dios xol isya'tajil tu' jintajan̈ yet chitit Comam Jesucristo yul satcan̈ yeb ebnaj ángel caw aycano yip. Chul Comam xol k'a k'a' yak'a' isya'tajil tet anma mach chisje yohtan̈elo Comam Dios, anma mach chiyoche yabe' istzoti'al colbanile aycano yu Comam Jesucristo. 9Chialaxcanto anma tu' yin̈ isya'tajil yin̈ huneln̈e, cat yilaxilo sata Comam Dios, hac tu' xin matxa bak'inal chiyil anma tu' isc'ulal Comam yeb yip Comam. 10Hayet hune' tz'ayical yet chihul Comam tu', caw niman yelapno ye Comam yul sat macta yetxa Comam yehi, yeb mac xayayto yul yanma yin̈ Comam. Xol mac tu' xin ayexico hex ti', yuto heyaco heyanma yin̈ hune' tzoti' halbilcano juhan̈. 11Yuxinto caw chon̈txahlihan̈ teyin̈, chicok'annihan̈ tet Comam Dios haxinwal caw c'ulex yul sat, ay heyoc yin̈ yawtebal Comam. Chijalnipaxojan̈ ta chak' Comam yip teyet hewatx'en sunil isc'ulal choche hec'ul, yeb yin̈ munil chewatx'e tet Comam, yuto ayco heyanma yin̈ Comam. 12Hac tu' xin chialaxico ismay Comam Jesucristo heyu. Chialaxpaxico hewinajil yu isc'ulal Comam Dios yeb xin Comam Jesucristo.

will be added

X\