2 PEDRO 3

1Hex xahan ay wu ti'an, x'apni scayel chin tz'ib'n̈etoj hune' wum ti' teyetan. Yul scab' wum ti' chin natij teyetan, chex wiptzen heyanicoj he nab'al yin̈ hune' cuywab'al st'in̈anil ye ti'an. 2Nawejtij tzet stz'ib'n̈enaj heb'ya' schejab'lom Comam Dios, b'oj schejb'anil Comam Jahaw Scolomal jet ẍjal teyet hayon̈ apóstolon̈ ti'an. 3Caw yilal he txumniloj hune' ti': Yet slahub'al tz'ayic tu' caw ay anma chex stzeyenoj. Anma tu' ch'ehojc'oj haca' chal yec'najil yanma, 4cat sk'amb'enoj: ¿Tzet xtan̈can hune' ẍhalot ta chuluj pax Cristo? Haxca yichotax scamtoj heb'ya' jichmam, yehb'aln̈etic'a ye haca' yet x'ichitij satyib'an̈k'inal ti', ẍi. 5Yaja' mach sje sc'ul xtxumuluj ta swatx'e Comam satcan̈ b'oj tx'otx'otx' yu stzoti'. Yettax x'ichitij xwayican̈ tx'otx'otx' yu ha' ha', ch'ixtan̈wican̈ tx'otx' xol ha'. 6Hatic'a ha' tu' xmujnican tx'otx' yet payxa yet sc'ayniloj Comam sunil tzetet yulb'al x'ehc'oj ya' Noé. 7Hactu' ye satcan̈ b'oj tx'otx'otx' tinan̈, yutic'a stzoti' Comam yan̈eb'ilxa yu yechman stij hune' k'a' k'a' yet chinojtij Comam scuenta yin̈ anma mach Dios sat, cat sc'aynojiloj Comam heb'jetb'i. 8Hex xahan ay wu ti'an, mache nahuln̈etoj hune' ti', to hune' tz'ayic haca' mil hab'il yul sat Comam Jahaw, mil hab'il haca'n̈e hune' tz'ayic yeyi. 9Matoj ha' Comam Jahaw ch'a'ni ec'otoj tzet halb'ilcan yu, haca' yalni hunmajan anma tu'. To niman sc'ul Comam jin̈ yechmani, mach sje sc'ul Comam ta ay mac ẍc'ayotoj, to chechma Comam ta sunil mac sb'ejcan smul cat scolchayi. 10Yaja' stz'ayical yulb'al Comam Jahaw hunecxa, haca' chu yul hune' naj elk'om, hactu' chu yuluj lemna Comam. Yet tu' xin, caw ay yip sk'an̈oj yet stan̈ojiloj satcan̈. Sunil tzet ib'il yu yib'an̈k'inal ti' ẍc'ayojiloj yu k'a' k'a', cat stz'a'ojtoj tx'otx'otx' ti' b'oj sunil tzetet ay sat tx'otx'. 11Yuxin ta hactu' chu stan̈ojiloj sunil tzetet, yet aya yin̈ stoholal chon̈ ehcoj cat cam janicoj janma yin̈ Comam. 12Jechma'c'oj stz'ayical yulb'al Comam Dios, ja'a' yilal yulna lemb'il. Yet hune' tz'ayic tu' ẍc'aylaxojiloj satcan̈ yu k'a' k'a', b'oj sunil tzetet ay yul yib'an̈k'inal ch'ulujtoj yu xaj k'a' k'a'. 13Walon̈ lan̈an jechman hune' satcan̈ ac' b'oj hune' tx'otx'otx' ac', halteb'ilcan yu Comam, b'ay sunilxan̈c'a tohol sb'elwi. 14Yuxin hex xahan ay wuti'an, yulb'al ẍjechmac'oj hunk'aan ti', nann̈e ju haxin̈wal yet chuluj Comam, ak'anc'ulal jeyi, mach ninoj co mul, machca chon̈ maylaxoj. 15Co txumuwejiloj to yu hantaj snimanil sc'ul Comam Jahaw chon̈ colchayi. Hactu' xu stz'ib'n̈en ya' juẍtaj Pablo teyet yu stz'ajanil sc'ul ya' x'a'laxi, ya' caw xahan ay ju. 16Hatic'a ti' chal sunil hej yum ya' tz'ib'n̈eb'il yu. Yeli ay tzetet ya'taj co txumni yul yum ya', yuxin anma mach yohtajb'al yin̈ stzoti' Comam b'oj anma ch'ec' hec'on snab'al, nan slow chu xtxumni tzet chal te'. Yaja' matoj han̈c'a tu', hactu' chu shec'ni pax heb'naj tzet chal hunk'aanxa tzoti' yul Yum Comam, yuxin hunk'aan heb'naj tu' sc'aya'toj sb'a heb'naj. 17Hex xahan ay wu ti'an xax heyab'ecan tinan̈, nann̈e heyu taj quex sub'cha yu heb'naj quistal snab'al tu', cat heyiniloj he b'a yin̈ b'ay lin̈anon̈. 18Ja'a' janma cam johtajn̈en Jahaw Jesucristo Scolomal jet, b'oj ja'a' janma cam stzujcha sc'ulch'anil sc'ul Comam ju. ¡Ja'a'coj smay Comam tinan̈ b'oj yin̈ stohb'alk'inal! ¡Hactu' yeyi!


Copyright
Learn More

will be added

X\