2 PEDRO 3

1Hex wuẍtaj hex wanab, hex xahan ay wuhan, ch'apni iscayel intz'ibn̈entojan incartahan teyet. Chinnatijan teyet, cat quexwiptzenan heyanico henabal yin̈ istoholal, haca' walnitojan yin̈ babel incartahan. 2Naweti tzet tz'ibn̈ebilcano yu ebnaj ischejab Comam Dios yet payat, yeb chejbanile yal Comam Jesucristo Jahawil, Cocolomal, huntek'an ak'bilxacano teyet juhan̈ han̈on̈ ischejab Comam jeti'an̈. 3Caw yilal heyohtan̈enilo hune' ti'; yin̈ islahobal tz'ayic caw ay anma ch'oc tzebo yin̈ baytet yet Comam Dios yehi. Ha' huntek'an anma tu' ch'ec'o yin̈ istx'ojal choche yanma, 4cat xin yoc anma tu' isk'ambeni: “¿Tzet tan̈cano hune' halbilcanoj tato chihul Comam Cristo hunelxa? Wal xin xalecamto ebnaj jichmam, yaj hune'n̈etic'a ha' xin ye haca' yet iswatx'i yul sat yiban̈k'inal ti',” ẍi ebnaj. 5Yaj mach isje isc'ul ebnaj tu' istxumulo yin̈ tzet yu iswatx'en Comam Dios satcan̈ yeb tx'o tx'otx' yu Istzoti' yet payat. Yu Istzoti' Comam tu' isyecan̈ isba tx'o tx'otx' xol ha ha', yoccano hoyno ha' yin̈ tx'otx'. 6Ha'tic'a ha ha' tu' xin, tan̈tzenilo yul sat yiban̈k'inal ti' yet yaniti Comam hune' niman yaxn̈ab yet payxa yin̈ istiempohal naj Noé. 7Yaj wal satcan̈ yeb xin tx'o tx'otx' ay tinan̈, yu Istzoti' Comam Dios lan̈an yechman isn̈uslaxto yu k'a k'a'. Yet chul tz'ayic yet chiillax tzet ch'elico anma, cat xin istan̈tzenilo Comam Dios anma machi yelapno Comam Dios yul sat, yin̈ huneln̈e. 8Yuxin hex xahan ay wuti'an, tajca chito nahul hune' ti' heyu, yuto hune' tz'ayic lahan haca' hune' mil habil yul sat Comam Dios Jahawil, hune' mil habil tu' xin haca'n̈e hune' tz'ayic ye yul sat Comam. 9Matolo ch'ec'to yet yijni isba yin̈ tzet haltebil yu Comam Dios haca' isnani hun majan anma tu', ¡machoj! Wal xin niman isc'ul Comam yechmali yuto mach chisje isc'ul Comam ta ay mac chic'aycantoj; yuxin chechma Comam ta ayto mac chisbejcano istx'ojal cat iscolchahi. 10Yaj wal yet chul Comam Jesucristo Jahawil hunelxa xin, haca' chu yul hunu naj elk'om yet tona nahul ayon̈, hac tu' chu yul lemna Comam yet hune' tz'ayic tu'. Caw ay yip isn̈irla yet chitan̈ilo satcan̈ yeb tzet ik'bil yu sat yiban̈k'inal chitan̈ilo yu k'a k'a', yeb xin chitan̈paxilo tx'o tx'otx' yeb sunil tzet ay sat tx'otx'. 11Yuxin tato hac tu' chu istan̈ilo sunil, ayxic'a jec' yin̈ isc'ulal tzet chal Comam, cat cam janico conabal yin̈ Comam. 12Jechmawe yul hune' tz'ayic bay chul Comam tu'. Jak'aweco jip comunla yin̈ yet Comam, hac tu' xin chu yul Comam yin̈ an̈e. Ha' yin̈ hune' tz'ayic tu' chitan̈ilo satcan̈ yu k'a k'a', yeb xin sunil tzet ay satcan̈ tu' chi'ulican̈, cat istz'acantoj. 13Yaja' han̈on̈ ti', lan̈an jechman hune' ac' satcan̈ yeb hune'xa tx'o tx'otx' caw ac' haltebilcano yu Comam Dios. Ha' bey tu' xin, sunil xan̈e caw tohol yeb caw c'ul. 14Yuxin hex xahan ay wuhan, yulbal ayexico heyechman huntek'an tzet ye tu' chihuli, aweco yin̈ hec'ul hewatx'en isc'ulal, haxinwal hayet chul Comam ayexico yin̈ ak'anc'ulal machi nino hemul yeb istx'ojal chilchalo teyin̈. 15Nachaojabilo heyu tato ayto isnimanc'ulal Comam Dios, yuxin maẍto chul Comam, hac tu' xin ay hamanil tet anma chaco isba yul isk'ab Comam. Chisje conaniti yin̈ juẍta Pablo, naj caw xahan ay ju, yuto hactic'apax tu' yu istz'ibn̈ento naj teyet yu ishelanil naj ak'lax yu Comam Dios. 16Yul hunun iscarta naj hactic'a tu' yu istz'ibn̈ento naj teyet. Caw yeli, ay tzet ya'ta cotxumnilo yul iscarta naj, yuxin ha' anma mach isnabal yeb maẍto caw yip yanma yin̈ Comam, ha' ton xin chihec'ni tzet chal te'. Chishec'nipaxo ebnaj huntek'an tzet chal Yum Comam Dios. Yu hune' istx'ojal chiswatx'e ebnaj tu', yuxin chic'ayc'anto ebnaj. 17Yuxin hex xahan ay wuhan, yalan̈tocanoj cheyabencano huntek'an ti', caw cheyil heba tajca chexhatxlaxto yu islek'ti'al ebnaj istx'ojaln̈etic'a chiswatx'e, cat heyinilo heba yin̈ ist'in̈anil bay ayexicoj. 18Wal xin cam ohtan̈ewelo Comam Jesucristo, Cocolomal. Ipojab xin hech'ib yin̈ isc'ulch'anil isc'ul Comam hunun tz'ayic. Yuxin caw nimanojab yelapno ye Comam Cocolomal yul hesat tinan̈, yeb yin̈ sunilbal tiempo. ¡Hacojab tu'!

will be added

X\