2 PEDRO 2

1Xol anma Israel ec'le ebnaj lek'ti'wom isbalico isba ischejabo Comam Dios, hactic'apax tu' texol hex ti', ay ebnaj lek'ti' cuywawom. Ha' ebnaj tu', niẍtejal quexiscuyni ebnaj yin̈ cuybanile maẍtaj ha' yecoj yun̈e yetaxto henabal yu cuybanil chak' ebnaj. Hac tu' chu ispaq'uico ebnaj isman̈c'on yin̈ tzet chal Comam, Comam coln̈ehon̈ yin̈ isya'tajil. Caw hac tu' xin yu yiniti ebnaj c'ayilal yiban̈ yin̈ an̈e. 2Tzetc'a anma ch'oc tzujno yinta istx'ojal ebnaj tu', hac tu' xin caw tx'oj tzoti' challax yin̈ cuybanile yet Comam, hune' caw isyelal. 3Yu ayco yanma ebnaj yin̈ ch'en melyu, yuxin chexyak' subchaho ebnaj yu cuybanile maẍtaj ha' yehi. Wal xin payxa ichi yechmalax ebnaj yalaxcanto yin̈ isya'tajil, mach ch'ec'to yet istan̈tzelaxilo ebnaj. 4Conabaweti yin̈ tzet elico ebnaj ángel yaco ismul sata Comam Dios. Wal xin mach yak' nimanc'ulal Comam yin̈ ebnaj. Ha' hune' utelax ebnaj, k'ojlaxto ebnaj bey hune' yehobal xol k'ejholo bay alaxico cadena yin̈ masanto yet chi'apni istz'ayical yet chilni Comam tzet chielico ebnaj. 5Mach chiyak'paxo Comam Dios nimanc'ulal yin̈ anma yet payxa yet yanayo Comam hune' niman yaxn̈ab yiban̈ sunil anma caw tx'oj yute isba. Han̈ech'an naj Noé colchahi yebpaxo hujwan̈ yetbi. Naj Noé tu', yalic'o naj tet anma yet yalan̈to tato c'ul chute isba, cat iswatx'enpaxico isnabal. 6Yebpaxo xin, yati Comam Dios isya'tajil yiban̈ anma ay bey Sodoma yeb anma ay bey Gomorra, isn̈usilo Comam cabeb con̈ob tu' yin̈ huneln̈e, caw tan̈xan̈e elcanico anma sunil. Cancano hune' tu' cuybanilehal tet anma machiswalil chute isba yin̈ tz'ujaniloxa. 7Wal xin han̈ech'an naj Lot colchalo xol anma tu', yuto ha' istoholal iswatx'e naj. Naj Lot tu' caw oc isya'il yin̈ yanma naj yilni istx'ojal huntek'an anma tu'. 8Wal naj Lot tu' xin, caw c'ul isbeybal naj, yaja' hunun tz'ayic hac'n̈etic'a tu' yilni naj yeb xin yaben naj istx'ojal chiswatx'e anma tu'. Yuxin bisc'ulaln̈etic'a ye naj yu anma. 9Hactic'apax tu' tinan̈, yohta Comam Dios iscolni yin̈ ilwebal macta ayco yanma yin̈ Comam, wal mac mach c'ulo isnabal chialaxayo isya'tajil yiban̈ yet chihul istz'ayical yet chilni Comam tzet ch'elico anma. 10Chayo Comam isya'tajil yiban̈ macta chisyijeto iswatx'en istx'ojal chiyoche isnimanil, yeb caw machi nich'ano yelapno Comam Dios Jahawil yul sat. Huntek'an ebnaj tu' caw lut'cano ebnaj, yeb caw can̈ye chute isba ebnaj. Machi nino chixiw ebnaj isbahwa yin̈ huntek'an caw ay yelapno ye ay satcan̈. 11Wal ebnaj ángel waxan̈ca caw ec'na ay ishelanil, yeb xin caw ak'bil yip ebnaj yul isk'ab, yaja' yet ayco huntek'an mac ay ismul yin̈ sat Comam Dios Jahawil, mach mak'bilo yoc ebnaj isk'anni isya'tajil yiban̈. 12Huntek'an ebnaj lek'ti' tu' lahan ebnaj haca' no nok', caw machi nino isnabal ebnaj, han̈ech'an tzet chiyoche isc'ul ebnaj, ha' chiswatx'e. Haca' no nok' haxan̈c'an̈e istzablaxayoj, cat yalaxico ch'en yin̈ cat iscami, hac tu' ye ebnaj. Ton̈etic'a chibuchwa ebnaj yin̈ huntek'an tzet ye tu' mach yohtajoj. Chitan̈tzelaxilo ebnaj haca' no nok' tu' yuto machiswalil chiyute isba ebnaj. 13Ch'ec'oya' yanma ebnaj haca' chu yak'ni ec'o ebnaj ya' yanma hunuxa maca. Caw xin chitzala ebnaj chak'ni ebnaj tzet choche yanma. Hac tu' xin chu yinilo ebnaj hepixan, chiniti ebnaj tx'ixwilal texol yet chak'ni tzalaho yanma ebnaj yu istx'ojal chiswatx'e yet chehunban heba hewa'i. 14Ya'xan̈e yilnito ebnaj ebix ix, cat yochenico ebnaj ebix. Caw maẍtic'a chitibayo yu ebnaj yanico ismul. Chak' subchaho ebnaj macta maẍto caw yip yin̈ yet Comam; k'ayna ebnaj yochenico tzet ye tu' mach c'uloj. Caw xin tz'acti'n̈ebilxa ebnaj tu'. 15C'aynato ebnaj yuto xaisheq'uilo isba ebnaj yul hune' beh caw tohol. Ha' isbeybal naj Balaam ik'bil yu ebnaj, hune' ischejab Comam Dios yet payat, isc'ahol icham Beor. Naj Balaam tu' yaco naj ismul yuto caw yocheco naj ch'en melyu haltelax tet, yaj yu iswatx'en naj istx'ojal. 16Yaja' maylax naj yu hune' no' burro yu hune' istx'ojal iswatx'e naj tu'. Wal xin maẍtic'a bay chijabe istzotel hunu no nok', yaj tzotelcan̈ no' tu' haca' anma. Ha' no' xin cachwahi yun̈e mach chiswatx'e naj hune' istx'ojal tu'. 17Ha' huntek'an ebnaj cuywawom machiswalil chute isba tu', lahan ebnaj haca' hunu c'uh machi ha' ayayto yul, yeb xin haca' moyan nanann̈e bay chi-caw-yilaxto yu jak'ek', hac tu' ye ebnaj. Wal xin caw t'in̈anxa yeco yiban̈ ebnaj isto xol k'ejholo, ha' tu' xin chiec' ebnaj yin̈ sunilbal tiempo. 18Ch'oc ebnaj yala' tzoti' machi yelapno yehi. Chismontento ebnaj anma iswatx'en istx'ojal haca' yin̈ ixloj; anma lan̈anto iscolchalo xol macta aytoco yin̈ tzet ye tu' mach t'in̈ano yehi. 19Chal ebnaj tato chicolcha macta chioc tzujno yinta ebnaj, yaja' ha' hun ebnaj maẍto chicolchalo yul isk'ab istx'ojal, yuto aytoco ebnaj yak'ni cheja' isba yin̈ tzet ye tu' mach c'uluj. Yuto ha' mac chiwatx'en istx'ojal chejab yeco yin̈ istx'ojal tu'. 20Yuto ha' mac xatic'a colcha tet istx'ojal yul sat yiban̈k'inal ti', ohtabilxa Comam Jesucristo Jahawil yu, Comam Cocolomal, yaj ta tzujanxa ch'ayc'ayi, chicancano yul isk'ab istx'ojal tu' hunelxa; hac tu' xin yelaxa, caw machiswalil chielico sata yet yalan̈tocanoj. 21Ha' mac hac tu', ec'balto c'ul mach yohtan̈elo hune' beh caw tohol, sata lahwi yohtan̈eniloj cat isbejnicano chejbanile yet Comam Dios ak'bilxa tet. 22Ha' yin̈ ebnaj chij isba hune' tzoti' chal anma haca' ti': “Metx tx'i' chilahwi isxabi metx, cat isto metx islonocan̈ isxaw hunelxa,” yeb hunxa ti': “No' txitam, lahwi yaẍn̈elax no', cat istopaxo no' yin̈ an̈e issomnoto isba xol tz'otz'ew hunelxa,” ẍi.

will be added

X\