2 PEDRO 2

1Ay heb'naj lek'ti' chal sb'a schejab'lomoj Comam Dios x'ec'le xol anma israel. Hactu' chub' pax te xol, ay pax heb'naj cuywaom lek'ti' chia'can̈ sb'a. Heb'naj tu' mañatajn̈e chu yanojictoj heb'naj nan cuywab'al chon̈ etanojtoj. Hasta sb'alac'ayoj heb'naj Comam xcon̈ lok'ni yu schiq'uil, hactu' chu yinojtij heb'naj c'ayilal yib'an̈ yin̈ lemb'il. 2Tx'ihal mac ch'ocoj tzujnuj yin̈ hej tx'ixwub'al chub' heb'naj, yuxin tx'oj ẍhal-laxoj yin̈ cuywab'al st'in̈anil yeyi. 3Yu spek'al heb'naj yin̈ ch'en melyu chex sub'u' heb'naj yu hej cuywab'al hob'b'ilcan̈ yu; yaja' payxa ichi yechmaotc'oj heb'naj yu sjuez, majb'ilxa heb'naj yu mac ẍc'aynojiloj. 4Mach xa' Comam Dios nimanc'ulal yin̈ hej ángel x'ay yin̈ smul, to hat xaytoj Comam yul hune' xab' Tártaro sb'ih b'ay xc'alicanoj xol hune' b'ay k'a' k'ejholo masanto ẍtij scuenta Comam yin̈. 5Machca xa' Comam nimanc'ulal yin̈ anma mach Dios sat x'ec'le yet payxa, yet xnohcan̈ satyib'an̈k'inal ti' yu ha' niman n̈ab'. Han̈c'a ya' Noé, ya' xhalnic'oj tzet chu yehc'oj anma yin̈ stoholal, han̈c'a ya' scolcan Comam b'oj hujwan̈xa maca. 6Sc'aynipaxiloj Comam con̈ob' Sodoma b'oj Gomorra, sn̈usiloj Comam yin̈ huneln̈e, yun̈e scan hune' tu' syeb'aniloj tet anma mach Dios sat ẍto huluj. 7B'oj scoliloj Comam ya' Lot xol anma haxca ya' tu' caw c'ul ya' b'oj ẍtac sc'ul ya' yilni xtx'ojal chu anma tx'oj. 8Ya' Lot tu' caw c'ul ya', yet x'ehc'oj ya' xol heb'jetb'i tu' hunun tz'ayic stac sc'ul ya' yilni b'oj yab'en xtx'ojal chu heb'jetb'i. 9Hactu' chu syeniloj sb'a to scol Comam heb'ya' ch'ec' yin̈ ilweb'al, heb'ya' ayxacoj yin̈ Comam. Smajchen Comam anma tx'oj yin̈ sya'tajil b'ela c'un hul stz'ayicalil b'ay chiatij Comam cuenta yin̈. 10Ta hactu' xute Comam, k'a ẍto ya'a' Comam ec'oj ya' yanma mactaj ch'ec' yi'a' hej tzetet caw tx'oj chochetoj, b'oj chiloj heb'naj spixan mac ay schejb'anil.Heb'naj tu' mach yanma, han̈c'a heb'naj can̈ ye chab'e; mach xiw yalni tx'oj yin̈ hej ángel. 11Yaja' hej ángel tu' k'a' ay scan̈il yeyi, b'oj k'a' ay smay, yaja' matoj yu, can̈tajn̈e ye chute. Yuxin ha' chanicoj ángel tu' smul naj matzwalil yin̈ sat Comam Dios, mat mak'b'iloj stzotel yin̈ naj matzwalil tu'. 12Yaja' heb'naj tu', tx'ojn̈etic'a stzotel yin̈ hej tzetet mach xtxumu. Lahan heb'naj b'oj no' nok' mach snab'al, ch'ehc'oj heb'naj satyib'an̈k'inal ti' yun̈e yetantoj tzetet. Lahan chub' heb'naj b'oj no nok' stohxa potx'laxoj, yuxin haca' chu scam no nok' potx'b'eal yeyi hactu' ẍtan̈ojcan heb'naj. 13Ch'ec'oj ya' yanma heb'naj haca' chu ya'ni heb'naj ec'oj ya' yanma hunujxa maca. Sajsajil chute heb'naj hej tzetet tx'oj, cha'ni tzalaoj sb'a heb'naj yin̈, chiloj heb'naj he pixan chinitij heb'naj tx'ixwilal te xol, cha'ni tzalaoj sb'a heb'naj yu hej xtx'ojal chu yet aycoj te xol yet ay yaman waoj. 14Machub' yila'toj heb'naj hunuj ix ix, xa yochenatoj heb'naj ix. Mach ẍcajtza sc'ul heb'naj yuni xtx'ojal. Sub'cha anma soan ya'ni yu heb'naj. k'aynaj heb'naj yochencoj tzetet mat c'uluj. ¡Tz'actin̈eb'ilxa heb'naj! 15C'aynajtoj heb'naj haxca nan b'ehal ib'il yu heb'naj, mataj b'eh tohol yetb'i heb'naj. Ha' tzet xu naj Balaam sc'ahol naj Beor ib'il yu heb'naj. Naj tu' xacoj naj smul haxca caw xochetoj naj ch'en melyu xhaltelax tet. 16Yaja' yu hune' smul naj tu' xcachot naj yu hune' no' aẍna. Maẍtic'a b'ay stzotel no' nok' tu', yaja' stzotelcan̈ no', ha' no' mach xchani yub' naj hune' sucal nab'il yu tu'. 17Heb'naj tu' haca' hunuj ok' mach ya'il. Lahan heb'naj b'oj asun ẍmak'ottoj yu cak'e', cawxinajxacoj yib'an̈ heb'naj ta xol k'ejholo ch'ehojc'oj heb'naj stohb'alk'inal. 18Heb'naj tu' caw lolo' stzotel heb'naj, waxan̈ca mach yelapnoj ye tzet chal heb'naj. Chalni heb'naj ta mat tx'ojoj juni sunil tzet chochetoj co nimanil. Hactu' chu smoncha anma yu heb'naj, hunk'aan mac hawalto yel xol mactaj aytocoj yin̈ hej tzetet mat st'in̈aniloj yeyi. 19Chalni heb'naj ta chon̈ colchayi ta chon̈ oc tzujnuj yin̈ heb'naj, c'ajam ha' caw heb'naj aytoj yul sk'ab' xtx'ojal, haxca hantaj mac tx'oj chu, ayxatoj yul sk'ab' xtx'ojal. 20Xaxtic'a colchaloj heb'naj tet hej xtx'ojal ay satyib'an̈k'inal ti', yet xohtajn̈en heb'naj Jahaw Jesucristo Scolomal jet, yaja' tzujanxa xa'ni ayc'ayoj sb'a heb'naj. Hactu' xu scan heb'naj yul sk'ab' xtx'ojal hunecxa, k'a' tx'ojto xucan heb'naj sataj yet yalan̈to. 21K'a' c'ulmi ta mach xohtajn̈ena heb'naj tzet chu co can c'ulal yul sat Comam Dios, sataj yohtajn̈en heb'naj, lawitu' xiniloj sb'a heb'naj yin̈ schejb'anil Comam ab'il jet. 22Yuxin yin̈ heb'naj chij sb'a hune' stzotelb'al anma yet chalni: ẍmeltzo metx tx'i' slob'can̈ xaw. Chalnipaxoj: No' txitam, lawi yaẍniloj no', ẍto no' sb'alnoj sb'a xol tz'otz'ew hunecxa, .


Copyright
Learn More

will be added

X\