2 PEDRO 1

1Hayin Simón Pedro hin ti'an, schejab' b'oj yapóstol Comam Jesucristo wean. Ẍwatoj hune' wum ti' teyet hex xax heya' yuluj he c'ul yin̈ Comam haca' xu xja'ni yuluj co c'ul hayon̈ ti'an. Yuxin lahan yeltich'anil stzujcha heyu haca' yeltich'anil xax stzujcha ju ti'an, haxca caw tohol yanma Comam Jesucristo co Diosal b'oj Scolomal jet. 2A'laxojab' sc'ulch'anil sc'ul Comam Dios teyet b'oj ak'anc'ulal teyin̈ yu heyohtajn̈en Comam b'oj Jahaw Jesús. 3Yu scan̈il ye Comam Dios xa' Comam sunil tzetet ch'ocnicoj ju yun̈e chu jehc'oj haca' chal sc'ul Comam. Xa' Comam hune' tu' jet yet xjohtajn̈en Comam yin̈ syelal, xcon̈ yawte yu co yeniloj smay Comam b'oj sc'ulal. 4Hactu' xu ya'lax hej tzetet caw eltich'an b'oj caw ay yelapnoj ye halteb'il jet yu Comam Dios, yun̈e yu tzet xalte tu' ẍco chab' co k'inal haca' sk'inal Comam, cat co colchaloj yul sk'ab' squistalil ay satyib'an̈k'inal ti'. Ha' hune' squistalil ti' x'initij ec'najil yin̈ yanma anma. 5Yun̈e yijni sb'a hune' ti' mat han̈c'aoj ja'ni yuluj co c'ul, to ẍco tz'ajb'a sc'ulb'iloj janma, ẍcam johtajn̈e hej tzetet yet' Comam, 6ẍco cach co b'a, ẍtecha ilweb'al ju, ẍjacoj janma yin̈ Comam, 7ẍjochen heb'ya' jetb'i, b'oj ẍjoche sunil anma. 8Ta ay hunk'aan tzetet ti' jet, b'oj ta chon̈ watx'iloj yin̈ c'ul, mat nab'aoj ẍjohtajn̈e Jahaw Jesucristo chaltu'. 9Yaja' mac mach hunk'aan tzetet ti' tet, haca'tic'a machila, mato c'otzan smujlub'al. Xax snahuln̈etoj ta tx'ahb'ilxa smul aytic'acoj yin̈. 10Yuxin hex xahan ay wu ti'an, haxca xax con̈ yawte Comam Dios yetoj b'oj xax con̈ sic'le, ja'a'wej yilal scawxicoj hunk'aan tzetet ti' yin̈ janma. Ta hactu' ẍjute, maẍtic'a b'ay chon̈ lectaoj. 11Waltu' ch'a'laxoj yeltich'anil joccan tzujnuj yin̈ huneln̈ecanoj yul sk'ab' Jahaw Jesucristo Scolomal jet. 12Yuxin ẍtic'a hin natij hunk'aan ti' teyetan, waxan̈ca heyohtajxatic'a, b'oj lin̈anex yin̈ st'in̈anil b'ay cuyb'il exxa. 13Caw yettic'a aya chex wiptzean chin nanitij hunk'aan ti teyetan yulb'al ayintoc'oj ti'an, 14haxca xax ya' Jahaw Jesucristo wohtajn̈e'an ta toxa chin camojan. 15Yaja' ẍwa'a'can yilal hin tz'ib'n̈encan hunk'aan ti'an yun̈e yet lawi hin caman ẍtic'a he nab'tij. 16Yet ẍjalni teyetan tzet chu yuluj Comam Jahaw Jesucristo hunecxa yin̈ sunil sk'ak'al smay, mat ton̈eoj hob'b'ilcan̈, to hayon̈ caw xjil smay Comaman, 17yet xa'ni Comam Dios Padre elwanoj snimanil Comam Jesús. Xanicoj Comam Dios smay spixan yet x'eliloj hune' tzoti' xol asun syeni to ay Comam b'etu', chalni: Ha' naj ti' hin C'ahol caw xahan ay wuan, caw chin tzala yin̈ najan. 18Hayon̈ caw xjab'e hune' tzoti' x'ayiloj yul satcan̈ tu'an, haxca hun ayon̈can̈ b'oj Comam Jesús swi' witz b'ay xjil smay Comam tu'an. 19Ha' hune' tu' xcam tihniloj stzoti' Comam tz'ib'n̈eb'il yu heb'ya' schejab'lom. T'in̈an heyecoj cheyab'entoj hunk'aan tzoti' tu', haxca haca' hune' tzet ẍmujli xol k'ejholo, hactu' yeyi haxca ha' ẍmujlicoj yin̈ janma masanto ch'apni stz'ayical b'ay chuluj Comam Cristo. Ha' yet chuluj Comam ha' Comam ẍmujluj yin̈ janma haca ẍmujli sajb'es ch'ayiloj yet lan̈an sajb'iloj. 20Yaja' txumwejc'anab'i: To mach hunuj tzet tz'ib'n̈eb'il yu heb'ya' schejab'lom Comam Dios ta tzan mac chu stihniloj haca' chu xtxumni. 21Haxca heb'ya' schejab'lom Comam, mach hunecoj ta yul swi' heb'ya' xitij yet stzoteli, to iptzeb'il heb'ya' yu Comam Espíritu Santo, yuxin ha' tzet xal Comam, ha' xal heb'ya'.


Copyright
Learn More

will be added

X\