2 JUAN 1

1Hayin anciano hin ti'an, chin tz'ib'n̈etoj hune' wum ti' tawetan, wanab' sic'leb'ilxa yu Comam Dios, b'oj tet hej hawunin. Yin̈ caw yeli chex wochean, yaja' mat hayinojn̈ean, to ha'xa hun mactaj ohtajn̈e cuyb'anile caw st'in̈anil yeyi, ha'xa hun chex ocheni. 2Caw chach jochean yu hune' cuyb'anile caw st'in̈anil aycoj yin̈ janma, b'oj ch'ehojc'oj jin̈ yin̈ stohb'alk'inal. 3Tz'a'ojab' sc'ul Comam Dios b'oj Sc'ahol Jesucristo jin̈, ya'ab' sc'ulch'anil sc'ul, b'oj ak'anc'ulal jet yin̈ st'in̈anil haxca chon̈ yoche Comam. 4Caw xquin tzalaan haxca xchalo haywan̈ hawunin yijyom wuan yin̈ cuywab'al st'in̈anil yeyi, haca' xute Comam yalnican jet. 5Tinan̈ chin k'an tawetan ta caw xahan ẍjil co b'a. Hune' chejb'anil ẍwa' teyet ti'an, mat sb'ab'elojto ẍjab'e, to xaxtic'a jab'e yet xcon̈ oc tzujnuj yin̈ Comam. 6Ta t'in̈an co yijyen schejb'anil Comam, yin̈ hactu' ẍjoche Comam chaltu'. Ha' hune' chejb'anil ti' xjab'e yet xcon̈ oc tzujnuj yin̈ Comam, ha' jochen jet-anmail. 7Tinan̈ tx'ihal heb'naj ch'ec' sub'u anma satyib'an̈k'inal ti', chalni heb'naj ta mach x'ec' Jesucristo yi'a' snimanil. Hactu' yalni heb'naj haxca sub'um anma heb'naj, b'oj ẍcajwa heb'naj yin̈ Comam Jesucristo. 8Yuxin nann̈e ju, taj nab'n̈e ẍja'le, yin̈ hantaj co munil xax ju, taj mat tz'ajanoj ẍco chab' spaj tet Comam Dios. 9Mac ch'ec' b'ab'oni, yaja' mach'ec' yi'a' scuywab'al Comam Cristo, machcoj Comam Dios yin̈. Ta scuywab'al Comam Cristo b'ay tzujanon̈, wal tu' aycoj Comam Dios b'oj Sc'ahol jin̈. 10Ta ay hunuj mac nan cuywab'al ib'il yu chul co c'atan̈, mach ẍco cha yul jatut, machca ẍco k'an scawil tet Comam Dios. 11Ta chon̈ oc co k'ana' scawil hunk'aan tu' tet Comam, hacatic'a chon̈ colwa yin̈ hune' cuywab'al tu'. 12Tx'ihalto tzet ẍwoche wala' teyetan, yaja' mach hin tz'ib'n̈etoan, haxca chin toj hex wila' walnian, cat co tzotel yin̈ caw c'ul, waltu' caw tzalalal ẍjub'canoj. 13Ha' hej yunin ha noh sic'leb'il pax yu Comam Dios, ha' ch'anitoj scawil he c'ul.


Copyright
Learn More

will be added

X\