2 CORINTIOS 8

1Tinan̈ xin hex wuẍtaj hex wanab, chijaltojan̈ teyet yin̈ tzet yu isyeni isba isc'ulch'anil isc'ul Comam Dios yin̈ hunun majan ebnaj juẍtaj ay yul ismajul Macedonia ti'. 2Waxan̈ca caw ay ilwebal chihul yiban̈ ebnaj, yaja' caw chitzala yanma ebnaj, yeb xin waxan̈ca caw meba' ebnaj, yaja' caw chipalc'on ebnaj yak'ni yofrenda, haca'tan̈e caw k'alom ebnaj. 3Haninti'an chiwak' inbahan walnihan ta caw yin̈ sunil yanma ebnaj ch'ak' ebnaj yofrenda, hatatic'a hanta ay yul isk'ab ebnaj, ay bay ti' xin chipalc'on yak'ni ebnaj. 4Caw oc ebnaj yala' jetan̈ tato chicochahan̈ yofrenda ebnaj, yuto choche ebnaj chicolwa ebnaj yin̈ ebnaj juẍta ay bey Jerusalén. 5Caw ec'balcano yak' ebnaj yiban̈ haca' conanihan̈. Yuto yin̈ babelal ishin isba ebnaj yin̈ ismunil Comam Dios Jahawil, lahwi tu' xin yanipaxico isba ebnaj yijemal jetan̈ haca' choche Comam. 6Yuxin xajalan̈ tet naj Tito ta chito naj ilwal teyin̈, cat ischahni naj hecolwal cheyak' yu isc'ulch'anil hec'ul, yuto ha' naj ichico ischahni hecolwal yet babelal. 7Haca'ojab ispalc'on iscawxi hec'ul yin̈ Comam Dios yeb hehelanil hetzoteli, yeb yitz'atil hewi', yeb yin̈ sunil heyanma chewatx'en hunu tzet ye tu', yeb con̈hexahann̈enpaxojan̈; hacojab tu' ispalc'on heyak'ni heyofrenda tet Comam Dios. 8Mach chejbanile hune' chiwalti'an, wal xin ton̈e chiwochehan chiwalan teyet yin̈ isc'ulch'anil isc'ul huntek'anxa ebnaj juẍtaj. Haquexpax tu' yet cheyak'ni heyofrenda chohtan̈elo ebnaj bay chiak'lax hune' heyofrenda tu' ta xahan cheyil ebnaj. 9Han̈on̈ ti' johtaj ta Comam Jesucristo caw c'ulch'ancano isc'ul. Caw tzetc'a isk'alomal Comam ay bey satcan̈, yaja' yute isba Comam meba'il yuto caw xahan ayon̈ yu yun̈e joc k'alomal yul sat Comam Dios. 10Chiwaltojan teyet tzet chiec' yin̈ innabalan yin̈ heyofrenda, yuto yettax hunbi hex babel quexichico heyak'ni heyofrenda, caw xin yin̈ sunil heyanma heyak'a. 11Wal tinan̈ xin mach chebej heyak'ni heyofrenda tu'. Wal xin ak'we yin̈ sunil heyanma haca'ojab yu heyichenicoj, hacojab tu' xin cheyute tinan̈, hatatic'a tzet ayex. 12Yuto ta yin̈ sunil janma chijak' jofrenda, caw chitzala Comam Dios jin̈, hatatic'a tzet ay yul cok'ab. Wal xin mach chisk'an Comam hunu tzet ye tu' jet ta machi yul cok'ab. 13Mach chiwochehan ta chexcan yin̈ man̈tzetal yu heyak'ni hecolwal. 14Yaja' chiwochehan tato lahanojab tzet ayon̈ cosunil. Yuxin tinan̈, hex ay tzet ay yul hek'ab colwahan̈we yin̈ ebnaj matzet aya, haxinwal haxa yet matzet ayex haxa ebnaj chicolwa teyin̈. Ta hac tu' lahan chicocolle coba. 15Haca' yalni yul Yum Comam Dios, bay chala: “Ha' mac tzetc'a yet isc'utxbacan̈, mach palc'oncan̈ yul isk'ab. Haxa mac hanic'n̈e yet iscutxbacan̈ xin, c'uxann̈e ec' yu,” ẍiayoj. 16Chiwak'an yuch'andiosal tet Comam Dios, yuto ha' Comam anico yul yanma naj Tito quexyanico yin̈ isc'ul, haca'tic'a heyeco yin̈ inc'ulan. 17Yuxin hayet walnihan tet naj tato chito naj ilwal teyin̈, caw yin̈ an̈e istak'we naj istohi yuto ayco yin̈ isc'ul naj isto quexyilnoj. 18Ay xin hune' naj juẍta ti' chijatojan̈ yetbiho naj Tito. Ha' hune' naj ti' caw c'ul istzotel ebnaj juẍtaj yul huntek'anxa con̈ob yin̈ naj, yuto caw c'ul ismunil naj yin̈ yalnic'o Tzoti' c'ul yet colbanile yin̈ Comam Jesucristo. 19Ha' naj xin saybil yu ebnaj juẍtaj yu yoc naj jetbiojan̈, cat iscolwa naj jin̈an̈ iscutxbancan̈ ch'en yofrenda ebnaj juẍtaj. Hac tu' xin chi'ilchalo isc'ulch'anil isc'ul Comam Dios jin̈, cat yilchapaxilo isc'ulch'anil hec'ul. 20Hac tu' chijutehan̈ yun̈e machi hunu mac chihobnican̈ lek'ti'al jin̈an̈ yin̈ ch'en colwal caw ay yelapno chicocutxbacan̈tu'an̈. 21Yuxin chijaco yin̈ coc'ulan̈ ta c'ul chijute cobahan̈ yin̈ hune' munil ti'; maẍn̈etaj sata Comam Dios, walxinto c'ul chijutepaxo cobahan̈ sata anma. 22Ay xin hune'xa naj juẍta chijatojan̈ yinta ebnaj ti', hune' naj juẍta ti' tx'i'alxa el chijilan̈ tato caw chitzala naj iscolwahi bajxan̈etic'a yin̈ tzet ye tu'. Yuxin tinan̈ caw ec'balto chitzala naj yuto ayexico yipo yanma naj. 23Ta ay mac chik'amben teyet tzet ye naj Tito ti', cheyala ta wetbi inbahan yeb naj, yuxin chinchejtojan naj yu iscolwa naj teyin̈. Yeb xin ta ay mac chik'ambenpaxo yin̈ ebnaj cawan̈, cheyala tato chejbilto ebnaj yu ebnaj juẍtaj ay yul huntek'anxa con̈ob ay bey ti'. Ebnaj ti' caw chisyelo ebnaj isc'ulch'anil Comam Cristo yu tzet chiswatx'e ebnaj. 24Caw chiwochehan tato c'ul chu hechahni ebnaj, haxinwal chil huntek'anxa ebnaj juẍtaj tato yeli c'ulex, haca' yu walnitojan teyin̈.

will be added

X\