2 CORINTIOS 8

1Hex wuẍtaj hex wanab', ẍjal teyetan tzet xu syeni Comam Dios sc'ulch'anil sc'ul yin̈ hej iglesia ay Macedonia. 2Waxan̈ca caw meb'a' heb'ya' b'oj ay hune' niman sya'tajil chil heb'ya', yaja' yuxa hantaj tzalalal aycoj yin̈ yanma heb'ya', maẍtic'a xeche heb'ya' ya'ni syam melyu. 3Hayin caw xwilan ta caw sunil sc'ul heb'ya' xa'ni heb'ya' ch'en yam melyu tu'. Xa' heb'ya' hantaj chuapnoj yu, hasta ec'b'al xa' heb'ya'. 4Chilan chal heb'ya' jetan ta ẍch'alaxcoj heb'ya' xol heb'ya' ẍyamni ch'en melyu ẍto tet heb'ya' yet-xa Comam. 5Ham jalnian ta hanic'n̈e cha'a' heb'ya', yaja' tx'ihal xa' heb'ya'. B'ab'el shin sb'a heb'ya' tet Comam Jahaw b'oj haca'tic'a shinpax sb'a heb'ya' jetan, haca' chal sc'ul Comam. 6Ha' x'a'ni jiptze' ya' Tito ti'an ta slah ya' yinican̈ ch'en yam melyu cheya' yu sc'ulal he c'ul, ch'en xaxtic'a yichecoj ya' yinican̈. 7Haca' spalc'on sc'ulal Comam Dios cha' teyet yin̈ heya'ni yuluj he c'ul, yin̈ stz'ajanil he c'ul he tzoteli, he txumni, he colwayi, b'oj yin̈ hon̈ heyochenan, hactu' jochen paxan ta ẍpalc'on he c'ulal yin̈ hune' ch'en melyu ẍyamlax ti'. 8Mat chejb'aniloj hune' ẍwal teyet ti'an; to ton̈e chin tzote' sc'ulal hunmajanxa heb'ya' jetb'i teyetan, yun̈e he yenipaxoj ta yeli cheyoche heb'ya' b'ay ch'a'lax hune' melyu tu'. 9Heyohtajxa hantaj sc'ulal sc'ul Jahaw Jesucristo. Caw ay sk'alomal Comam b'ay aya, yaja' meb'a' xute sb'a b'eti' yu sc'ulaloj jet, yun̈e ta yu smeb'a'il Comam chon̈ k'alomb'i. 10Ha' ti' ẍwal teyetan tzet wal heyuten he b'a yin̈ ch'en yam melyu cheya'a', haxca yettax hunb'i, matoj ton̈e xeyam ch'en melyu, to hex b'ab'el xeyichecan̈ heyamni ch'en. 11Yuxin lahwej he yinican̈ ch'en. Haca' yecoj heyanma yin̈ yet xeyichencoj heya'ni, hactu' chu he lahnipaxoj hantajtic'a chuapnoj heyu heya'ni. 12Haxca yet caw sunil co c'ul ẍja'ni jofrenda hantaj chuapnoj ju, scha Comam Dios, haxca mach yeẍtooj ẍja' tx'ihal ta matzet ayon̈. 13Haxca mach sje ta yu he colwa yin̈ hunuj anma chex mahlanoj, 14to yun̈e lahan ch'ec' ju b'oj mac lan̈an smahlani. Yuxin b'aytet matzet ay hunujxa jetb'i, hayon̈ ẍco tz'ajb'acoj. Yun̈e ta c'uxan yet chex mahlani, ha' heb'ya' stz'ajb'anoj heyet tu'. Yin̈ hactu' lahan ẍco colque co b'a. 15Hactu' yalni Yum Comam Dios: Matzet xpalc'on tet naj tx'ihal xi'a, machca xmahlan naj hanic'n̈e xi'a. 16Ẍwa' yuch'antioẍ tet Comam Diosan, haxca ha' Comam x'anicoj yin̈ sc'ul ya' Tito haca' xu yanicoj yin̈ hin c'ulan yu hex yiptzen ya' yin̈ hune' yam melyu ti'. 17Yuxin yet xwalni tet ya'an ta ẍto ya' hex yila, lemb'il sta'we ya' stoyi, haxca ayextic'acoj yin̈ sc'ul ya'. 18Ay hune'xa ya' juẍtaj ẍjatoj yin̈ ya'an, hune' ya' ti', caw ch'aotcoj smay ya' yu sunil hej iglesia yu hantaj munil xax yu ya' yin̈ tzoti' yet colb'anil. 19B'oj hunxa, ha' ya' ti' sic'leot yu hej iglesia yu sto jin̈an yu yec' ya' yinojcan̈ ch'en yam melyu ti'. Chon̈ ec' ji'a'can̈ ch'en ti'an yu smayoj Comam Jahaw b'oj ẍjoche pax colwaoj co b'a yin̈ heb'ya' xmahlanan. 20Ẍto heb'ya' ti' jin̈an yun̈e mach mac ẍhob'nican̈ hunuj tzetet jin̈ yu hune' yam melyu caw tx'ihalxa sb'isil ẍji'acan̈ ti'an. 21Haxca ẍjochean ta hab'an chucan hune' ti' tet anma, matn̈e yin̈oj sat Comam Jahaw. 22Yin̈ heb'ya' tu', ẍjatoj hunxa ya' juẍtajan, hune' ya' ti' tx'ihal el xax jilan ta caw sac'an ya' scolwayi. Tinan̈ k'a' sunil to sc'ul ya' ẍto ya' haxca ẍcawxi sc'ul ya' to chex colwaoj. 23Ta ay mac ẍk'amb'eni tzet yuxin ẍto ya' Tito, cheyala' ta wetb'i ya'an, win̈ ẍmunla ya' yu hex jilnian, b'oj ta ay mac ẍk'amb'eni tzet yuxin ẍto cawan̈xa heb'ya' ti', cheyala' ta hunk'aanxa iglesia ch'anitoj heb'ya', caw chacoj heb'ya' ti' smay Comam Cristo. 24Ẍwochean ta c'ul chu he chani heb'ya' haxin̈wal chil hunk'aanxa iglesia ta c'ulex haca' xu walnian.


Copyright
Learn More

will be added

X\