2 CORINTIOS 7

1Hex wuẍtaj hex wanab', caw xahan ay wuan, haxca xalte Comam Dios hunk'aan ti' jet, yuxin co b'eja'can juni hej tzetet ch'etantoj co nimanil b'oj janma. Haxca chon̈ nanon tet Comam, ja'a'coj co b'a yin̈ caw tz'ajan lahan yul sk'ab' Comam. 2Yewej ninoj sc'ulch'anil he c'ul jetan, haxca mach mac xja' tacoj sc'ulan, mach mac xjetatoj yanmaan, machca mac xjelk'a tzet ayan. 3Mach ẍwal hune' ti'an yun̈e yoc he muluj, haxca xax wal teyetan ta wal itzitzinan, wal lan̈an hin caman, ayexcoj yin̈ wanmaan. 4Ẍcawxi hin c'ulan to c'ul chex elojcoj, yuxin chin tzala teyin̈an. Waxan̈ca sya'tajil lan̈an wilnian, caw ch'ak'locan̈ hin c'ulan b'oj ch'oc hune' niman tzalalal yin̈ wanma ẍwab'ean. 5Yettax xcon̈ hul Macedonia ti'an, maẍtic'a ak'anc'ulal xjilan, to tzantic'a b'ay chon̈ ec'an masan ẍchalo sya'tajil juan. Ha' ya'ni anma howal jin̈an, b'isc'ulaln̈etic'a ẍjilan. 6Yaja' Comam Dios A'om yak'lob'alc'ule yet b'isc'ulal jeyi, ha' Comam x'a'ni yak'lob'al co c'ulan, yet xhul ya' juẍtaj Tito. 7Matn̈etaj yu xhul ya' x'ak'locan̈ co c'ulan, to haxca xeya' yak'lob'al sc'ul ya' yet ay ya' te xol. Ha' xhul ya' xalni ya' jetan to cheyoche hon̈ heyila'an, xalni pax ya' to caw b'isc'ulal xeyucan yu tzet xui, b'oj ta ayincoj yin̈ he c'ulan. Ha' xwab'en hunk'aan ti'an, k'a' xto cam tzalacan̈ hin c'ulan. 8Waxan̈ca x'oc b'isc'ulal heyu yu wum xwatoj teyetan, yaja' mach tac hin c'ul tinan̈an. Yet yalan̈to caw xtac hin c'ulan, yet xwab'enan to x'oc b'isc'ulal heyu hayeb' tz'ayical yet xeyab'en tzet chal te'. 9Yaja' tinan̈, xa hin tzalaan, matoj yu b'isc'ulal xa' te' teyet, to hune' b'isc'ulal tu' yin̈ Comam Dios xtita, ha' x'a'ni snab' sb'a he c'ul, yuxin matzet b'ay xquex jetatojan. 10Ta yin̈ Comam Dios ẍtit co b'isc'ulal yu co mul ẍjacoj, hatic'a hune' tu' ch'a'ni co b'eja'can janicoj co mul, cat co chani co colb'anil. Yaja' b'isc'ulal chul jin̈ yu hej tzetet yet satyib'an̈k'inal ti', hune' tu' chon̈ yitoj yin̈ camical. 11Chim heyila hantaj sc'ulal xu Comam Dios teyin̈ yu b'isc'ulal xeyila. Xeyacoj yin̈ he c'ul he watx'en hune' tu' yu he colni he b'a, xtit he howal yu hune' tzet xu te xol, caw xtac he c'ul yu. Yuxin hasta xeyoche ta ayincoj te xolan, lemb'il xeyalna heya'a' tz'aoj sat naj xacoj smul tu'. Hactu' xu he yeni ta mache mul yin̈ tzet xu tu'. 12Yet xin tz'ib'n̈entoj hune' wum tu' teyetan, mataj yu naj xacoj smul tu', matcataj yu mac b'ay xacoj naj smul. Yuxin xin tz'ib'n̈etoj te'an, to yun̈e yil-lax yin̈ sat Comam Dios hantaj yecoj heyanma jin̈an. 13Hune' ti', caw yak'lob'al co c'ul yean.Mat ton̈eoj ch'oc yak'lob'aloj co c'ulan, to caw chon̈ tzalacan̈an yu stzalalal ya' juẍtaj Tito yet xalni ya' to xeya' yak'lob'al sc'ul ya'. 14Yel xwalan, yet xwalni he c'ulal tet ya'an. Heyohtaj ta st'in̈aniln̈etic'a xwal teyetan, pax tinan̈, mat lek'ti'aloj x'elicoj tzet xwal tet ya' teyin̈an. 15Yuxin tinan̈, k'a' chex yoche ya', haxca ẍtit yin̈ sc'ul ya' ta hexti' caw yijyom xeyute he b'a yet ay ya' te xol, b'oj caw xahan xeyil ya'. 16Yuxin tinan̈, caw chin tzalaan, caw b'itzantaj ẍcawxi hin c'ul teyin̈an.


Copyright
Learn More

will be added

X\