2 CORINTIOS 6

1Haxca schejab' Comam Dios je hayon̈ ti'an, caw ẍco k'an teyetan, oẍimi mat nab'a'ojn̈e ẍe cha sc'ulch'anil sc'ul Comam xa' teyet. 2Chal Comam yul Yum: Yet x'apni stz'ayical hin heyawten teyin̈an xwab'etoj tzet xeyalan.Yet stz'ayical xeyoche he colb'anil xquin colwa teyin̈an, ẍiayoj.Tinan̈, yet-xa ay heyawten Comam teyin̈, stz'ayical he chani he colb'anil. 3Hayon̈ ti'an mach sje co c'ulan ta ay mac ẍja' lectaojan, yuxin caw nann̈e juan haxca mach sje co c'ulan ta ay mac ẍhalni sk'umal hune' co munil ti'an. 4Ha' jetan to lan̈an co yenian ta caw yeli schejab' Comam Dios jean. Yuxin ẍja' techaoj sya'tajil chul jin̈an, man̈ tzetal, b'oj ilb'alc'ule. 5Ay b'ay xcon̈ mak'laxan, ay b'ay xcon̈ alaxictoj yul presuan, ay b'ay x'ah b'oc'na anma jin̈an, ay b'ay xpalc'on co munlaan, ay b'ay x'el co wayan̈an, xjab'en n̈ohchalalan. 6Ẍco yenian ta schejab' Comam Dios jean haxca yin̈ stoholal chon̈ ehc'ojan, ẍco yeni b'aytet st'in̈anilan, ẍco nimann̈en co c'ul yin̈ anmaan, c'ulch'an ẍjute co c'ulan, caw yeli ẍjoche jet anmailan, ch'ixtan̈wi pax scan̈il ye Comam Espíritu Santo jin̈an. 7Ẍco yenipaxan ta schejab' Comam jean haxca st'in̈anil tzoti' c'ul ẍjalan, b'oj yu scan̈il ye Comam Dios aycoj jin̈an. Haca' hune' naj soldado ẍto yin̈ howal, ay sch'en naj ch'a'ni howal, ay sch'en naj ẍcolni, hactu' jean, ha' stoholal ẍjuan haca' co ch'en ab'al howal yean. 8Ay b'ay ch'aotcoj co pixanan, ay b'ay ch'iotiloj. Ay b'ay c'ul yalni anma jin̈an, ay b'ay tx'oj stzotel anma jin̈an. Ay b'ay chon̈ hal-lax lek'ti'alan c'ajam st'in̈anil ẍjalan. 9Ay b'ay ẍhalot ta b'ami elnajon̈cojan, yaja' yin̈ caw yeli ohtajb'ilon̈an. Haca'xa camom je yalni anmaan, yaja' yehn̈e jec'ojan. Ch'aot sya'tajil jila'an, yaja' mat b'ehoj co caman. 10B'isc'ulal je chil anmaan, yaja' tzalalaln̈etic'a jean. Caw meb'a'on̈ chil anmaan, yaja' caw tx'ihal mac ẍk'alomb'i juan. Caw matzet ayon̈ chil anmaan, yaja' sunil ay jetan. 11Hex wetb'i ah Corinto, st'in̈anil xjal teyetan, matzet xjeb'a teyetan. 12Hayon̈ ti'an matxa co c'as ẍcan teyet yin̈ hex jochenan, wal hex ayto he c'as jetan, haxca k'a' caw ni'anch'an heyanma jetan. 13Caw chin k'an teyetan ta cheya' spaj jet haca' caw yean. Haca' stzotel hunuj naj mame tet sc'ahol, hactu' hin k'anni teyetan. 14Mache hunb'a he b'a b'oj mac maẍto ch'a'ni yuluj sc'ul yin̈ Comam, haxca machu shunb'an sb'a b'aytet stoholal b'oj b'aytet mat stoholaloj. Machu shuni sajilk'inal b'oj k'ejholo. 15Machu yoc Comam Jesucristo yin̈ lahc'ulal b'oj naj matzwalil. Machu co lahb'an tzet ib'il yu co c'ul hayon̈ xax ja' yuluj co c'ul yin̈ Comam b'oj mac maẍto cha' yuluj sc'ul. 16Mach yocb'altoj hej tioẍ yul yatut Comam Dios. Hayon̈ ti' yatut Comam Dios itzitz jeyi, haca' yalni Comam yul Yum: Mactaj wet-xaan, chin ehojc'oj xolan, xwetb'in̈ean, hayin chin ocoj sDiosojan, hin con̈ob' chub'canan. 17Yuxin elan̈wej xol hunk'aan tu', nan che pohiloj he b'a; mache tzab' b'aytet chin yahan, haxin̈wal chex hin chaan, 18cat woc he Mamojan, cat heyoc wuninalojan., ẍi Comam Jahaw Sunil Chu Yu


Copyright
Learn More

will be added

X\