2 CORINTIOS 6

1Han̈on̈ti'an̈ chon̈colwahan̈ comunlahan̈ yin̈ ismunil Comam Dios, yuxin chi-elto-jawan̈ teyin̈ ta mach cheyintan̈ecanilto isc'ulch'anil isc'ul Comam Dios. 2Chal Comam Dios yul Yum haca' ti': Yin̈ istiempohal quinhawawtehan tawin̈, wabetojan tzet hawala; yin̈ istz'ayical hawoche hacolbanil quincolwahan tawin̈, ẍiayoj. Yuxin tinan̈ istiempohalxa heyawten Comam teyin̈, yeb xin istz'ayicalxa hechahni hecolbanil. 3Han̈on̈ti'an̈ caw c'ul chijute cobeybalan̈ yun̈e machi mac chijak' lectahojan̈, yuto mach chisje coc'ulan̈ tato ay mac chihalni isk'umal hune' comunilti'an̈. 4Wal xin caw chicoyehan̈ yin̈ tzet chicowatx'ehan̈ ta caw yeli ischejab Comam Dios jehan̈, yuxin chijak' janmahan̈ jijlenan̈ isya'tajil chihul jiban̈an̈, yeb man̈tzetal, yebpaxo yec'ya' janmahan̈. 5Ay bay caw con̈mak'laxan̈, ay bay xin con̈alaxicojan̈ preso, yeb xin ay bay ah wejna anma jin̈an̈, ay bay xin caw con̈ec'ya'an̈ comunlahan̈, aypaxo bay xin el cowayan̈an̈, ay bay jijlepaxojan̈ wahil. 6Chicoyenipaxilojan̈ tato ischejab Comam Dios jehan̈ yu isc'ulal chicowatx'ehan̈, johtaxahan̈ baytet ist'in̈anil, yuxin chijak' nimanc'ulalan̈ yin̈ anma, c'ulch'an chijutepaxo coc'ulan̈ yuto ayco Comam Espíritu Santo yul janmahan̈, cat cotzalapaxojan̈ yin̈ jet anmahil. 7Chicoyepaxilojan̈ tato ischejab Comam Dios jehan̈ yuto ha' cuybanile caw yel chijalan̈, yeb yu ayco yip Comam Dios jin̈an̈. Haca' hunu naj soldado chiscol isba yu ismunlabal cat yak'nipaxo naj howal yu ismunlabal tu'; hacon̈tu'an̈ yuto ha' istoholal chijalic'ojan̈. 8Ay bay niman jelapnojan̈ yul sat anma, aypaxo bay xin chiilaxilo copixanan̈. Ay bay c'ul istzotel anma jin̈an̈, ay bay xin tx'oj istzotel anma jin̈an̈. Ay bay chon̈hallaxan̈ lek'ti'al, waxan̈ca xin ha' isyelal chijalan̈. 9Ay bay challaxi tato mach con̈yohtajojan̈ anma, waxan̈ca xin caw ohtabilon̈an̈ yu. Camomon̈xahan̈ yalni anma, yaja' itzitzon̈an̈, chi'alaxpaxayo isya'tajil jiban̈an̈, yaja' mach chon̈caman̈. 10Haca'tan̈e bisc'ulal jehan̈, yaja' wal xin tzalahilaln̈etic'a jehan̈ yin̈ sunilbal tiempo. Waxan̈ca caw meba'on̈an̈, yaja' tzetc'a mac k'alom yul sat Comam Dios juhan̈. Waxan̈ca machi nich'ano tzet ayon̈an̈, yaja' yul sat Comam Dios tz'ajan yeco sunil yul cok'aban̈. 11Hex wuẍtaj, hex wanab, hex ayex bey Corinto, caw chijaltojan̈ isyelal teyet yeb sunil tzet ay yin̈ janmahan̈. 12Caw machi hunu tzet ye tu' chijebahan̈ teyet, wal hex ti' xin ay huntek'an tzet ye tu' ewan ye jetan̈ heyu. 13Haca' yay sat hunu naj mame tet isc'ahol, hac tu' yay insatan teyet, chink'annihan tato ha' caw isyelal ha' cheyal wetan, haca' chu walnitojan tzet ay yul wanmahan teyet. 14Mach chu heyetbin̈en heba yeb anma maẍto chichahni Comam yul yanma, yuto ¿tom chu yetbin̈en isba isc'ulal yeb istx'ojal? Yeb xin ¿tom chu yetbin̈en isba sajilk'inal yeb k'ejholo? ¡Wal xin mach chuhi! 15Yeb ¿tom chu islahban isnabal Comam Jesucristo yeb naj matzwalil? Yeb xin han̈on̈ xacochah Comam Jesucristo yul janma, ¿tom chu colahban conabal yeb mac maẍto chichahni Comam yul yanma? ¡Mach chuhi! 16¿Tom ay yocbalto tioẍ yul yatut Comam Dios? ¡Machoj! Yuto han̈on̈ ti' yatut Comam Dios itzitz jehi, haca' yalni yul Yum Comam Dios bay chala: Haninti'an chinehayojan xol ebnaj cat xin wec'an yeb ebnaj, haninan xin chinocan isdiosaloj, cat yoc ebnaj incon̈obojan, ẍi Comam. 17Yu hune' tu', yuxin yalpaxo Comam: Elan̈we xol ebnaj, pohilo heba yin̈ ebnaj. Mach chetzab huntek'an tzet ye tu' machiswalil, hac tu' xin chexinchahan inc'atan̈an. 18Chinocan hemamoj, cat heyoc inc'aholojan yeb xin incutz'inojan, ẍi Comam Dios Jahawil, Comam chisje iswatx'en sunil tzet ye tu', ẍiayoj.

will be added

X\