2 CORINTIOS 5

1Ha' hune' co nimanil ti', haca' hune' ni'an lechpat yeyi, yaja' yet ẍtan̈ojiloj, ayxa hune' jatut b'et satcan̈, ha' caw Comam xwatx'eni, matxa ẍtan̈ojiloj haxca mat anmaoj watx'en̈e. 2Yuxin yulb'al ayon̈ b'eti' ch'ah co c'ul ẍco nab'entoj hune' jatut tu', ay jala' chon̈ tona ehoj b'etu'. 3Hune' tu' chon̈ en̈lenoj haca' hune' xilk'ape yun̈e machon̈ can t'eb'noj. 4Yulb'al ib'il hune' co nimanil ti' ju, caw ch'ah co c'ul, ya'taj ẍjab'e. Ay jala' machon̈ can t'eb'noj, matoj sje co c'ul ta ton̈e ch'ilaxiloj hune' co nimanil ti' to ẍjoche ta ch'a'lax co nimanil ac' sheleloj co nimanil camb'eal ye ti'. 5Ha' caw Comam Dios x'anicoj yin̈ sc'ul shelni hune' co nimanil ti', xa'ni Comam Yespíritu jet yu scawxi co c'ul to ẍco chab' hune' tu'. 6Yuxin stohb'alk'inal ẍcawxi co c'ul yin̈ hune' tu', johtaj ta yulb'al ayon̈toc'oj yul co lechpat ti' nahat jeloj yin̈ yatut Comam Jahaw. 7Tinan̈ maẍto chu jilni hune' tu', han̈c'a ja'ni yuluj co c'ul yin̈, ha' lin̈b'an̈eon̈ tinan̈. 8Yuxin ẍcawxi co c'ul, ay jala' ẍjanacan hune' co nimanil ti' yun̈e co tona ehoj sc'atan̈ Comam Jahaw. 9Yuxin ha' ja'ni tzalaoj Comam Jahaw, ha' ẍjacoj yin̈ co c'ul juni, wal ayon̈toc'oj yin̈ co nimanil ti' mato xax jacanoj. 10Haxca co hunilon̈ chon̈ ocojtoj yin̈ sat Comam Cristo yul sdespacho, yu co chanoj spaj hununon̈ yin̈ hej tzet ẍju yet ayon̈coj yin̈ co nimanil ti', ta x'ocnicoj tzetet xco watx'e tu' mato machoj. 11Haxca chon̈ nanon tet Comam Jahawan, yuxin ẍja' yilal janicoj yin̈ sc'ul anmaan ta ẍmeltzocoj yin̈ Comam. Ixtan̈ je yul sat Comam Diosan to st'in̈anil ẍjuan, ẍjalan, oẍimi hactu' je pax yul he satan. 12Matoj lan̈an co tak'en co b'a teyet hunecxaan, to lan̈an ja'ni yip he c'ul yin̈ st'in̈anil ẍjuan yun̈e ẍcawxi he c'ul jin̈an. Ta hactu', chu he pajtzen stzoti' heb'naj ch'anicoj smay, yaja' jilnin̈e, wal yanma mat hacoj tu' smunlayi. 13Ta haca' chab'ilxa locoal ju cheyilan, yaja' yu yoc smay Comam Dios. Taca ak'anc'ulal je cheyilan, to yu sc'ulaloj heyet. 14Haxca ha' hon̈ yochen Comam Cristo chon̈ iptzenan, johtaj ta xa' camoj sb'a Comam ju co hunil, yuxin co hunil ay joc yin̈ scamical Comam. 15Ju co hunil yuxin xcam Comam Cristo yun̈e hantajon̈ itzitzon̈, matxa chon̈ ehc'oj haca' chal co c'ul, to haca' chal sc'ul Comam. Yeli, xcam Comam b'oj xpitzc'acan̈ yu sc'ulaloj jet. 16Yuxin matxa ẍji'coj jetoj yin̈ anma yu tzet ẍjil yu sb'ak' co sat to haxa tzet ye yanma ha' ẍji' yet. Yet yalan̈to hactu' xwute wi'nicoj wetoj yin̈ Comam Cristoan, yaja' tinan̈ matxa hacoj tu' walni yin̈an. 17Yuxin mac ayxacoj yin̈ Comam Cristo nanxa slow xucanoj. Tzettic'a ye payxa xax tan̈canoj. ¡Wac'a' yaq'uil xucaniloj! 18Sunil hunk'aan ti' yin̈ Comam Dios ẍtita, haxca yu scamical Comam Cristo xcon̈ yacoj Comam Dios yin̈ ak'anc'ulal b'oj, xa'ni hune' co munil yin̈ janipaxcoj anma yin̈ ak'anc'ulal b'oj. 19Haxca yin̈ Comam Cristo aycoj Comam Dios xhul yanojcoj anma yin̈ ak'anc'ulal b'oj, matxa snatij Comam smul anma. Yul co k'ab' xacoj Comam hune' chejb'anil ti' yu jalnic'oj yun̈e yoc anma yin̈ ak'anc'ulal b'oj. 20Yuxin tinan̈ schejab'xa Comam Cristo jean, haca'tic'a ha' caw Comam Dios chex monten yin̈ tzoti' ẍjal teyet ti'an. Yuxin hacojtam Comam Cristo ẍhalni teyet ta cheyacoj he b'a yin̈ ak'anc'ulal b'oj Comam Dios. 21Mach hunuj smul Comam Cristo xacoj, yaja' haca' ahmul x'uteot Comam yu Comam Dios yu sc'ulaloj jet, yun̈e yet ayon̈xacoj yin̈ Comam Cristo ay joc yin̈ stoholal ye Comam Dios.


Copyright
Learn More

will be added

X\