2 CORINTIOS 4

1Haxca sc'ulch'anil sc'ul Comam x'anicoj hune' munil ti' yul co k'ab' yin̈ co pujb'ancoj ac' lahc'ulalan, yuxin machon̈ pax jin̈tajan. 2Ha' jetan sajsajil chon̈ ehc'oj yin̈ sat anmaan, mach tzet tx'ixwub'al ẍco watx'ean. Mach sub'wal nab'il juan, machca ẍco som stzoti' Comam Dios b'oj comon tzoti'an, to han̈c'a st'in̈anil ẍjal yin̈ sat anmaan b'oj yin̈ sat Comam Dios. Hactu' chu co yenian ta hune' co munil ti'an st'in̈anil yeyi. 3Yaja' ta c'ayub'to chucan hune' tzoti' yet colb'anil chon̈ ec' jalac'oj ti' yul sat hunmajanojxa anmaan, hunk'aan tu' ẍtic'a sc'aya'toj sb'a. 4Macha' yuluj sc'ul haxca huchanajtoj yul swi' yu naj yahaw satyib'an̈k'inal ti'. Haca'tic'a ha' naj ch'a'ni c'ayoj smujlub'al, yun̈e machu yilni yelwan smay sk'ak'al tzoti' c'ul yet Comam Cristo. Ha' Comam Cristo yechel Comam Dios yeyi. 5Mat hayon̈oj ẍjalic'oj co b'aan, to ha' Comam Cristo Jesús ẍjalicojan ta ha' Jahaw yeyi. Walon̈an, chejab'n̈e je teyet yu jochen Comam Jesúsan. 6Hatic'a Comam Dios xhalni: Ocojab' sajilk'inal xol k'ejholo, ẍi. Hatic'a Comam x'a'ni sajilk'inal yin̈ janma yun̈e chu johtajn̈en smay sk'ak'al Comam Dios, hune' ch'elwan yin̈ sat Comam Jesucristo. 7Haca' hune' k'alomal ahaytoj yul hune' tx'otx' xih, hactu' ye stzoti' Comam Dios ib'il ju yin̈ co nimanil ti'an. Ha' ẍyeniloj ta hune' scan̈il ye stzoti' Comam ec'b'al smay, yet Comam yeyi, mat scan̈iloj je yean. 8Waxan̈ca hoyb'ilon̈ yu sunil sya'tajilan, yaja' machon̈ ay yuan. Sunilxan̈etic'a chalcantij sb'a jin̈an, yaja' mach ẍcab'concan̈ co c'ul yuan. 9Sunil mac chon̈ cajnian, yaja' maton̈ tin̈chab'ilojcanan. Chon̈ mak'otc'oj wejnaan, yaja' mat mak'b'iloj co tan̈ilojan. 10Tzan b'ay chon̈ toan, camb'ealn̈etic'a je haca' xa'le Comam Jesúsan, yun̈e syeni pax sb'a sk'inal Comam jin̈an. 11Waxan̈ca itzitzon̈ chil anmaan, yaja' camb'ealn̈e je hunun tz'ayic sya'iloj Comam Jesúsan, yun̈e hactu' syeniloj sb'a sk'inal Comam yin̈ co nimanil camb'eal ye ti'an. 12Yulb'al lan̈an smunla camical jin̈an, lan̈an he chani he k'inal hexti'. 13Ay hune' mac ẍhalni yul Yum Comam Dios: Xwa' yuluj hin c'ulan, yuxin xquin tzotelan, ẍi. Hactu' je pax hayon̈ ti'an, ẍja' yuluj co c'ul yin̈ Comam Diosan yuxin chon̈ tzotelan. 14Johtajan ta ha' Comam Dios xpitzc'ancan̈ Jahaw Jesús, hatic'a Comam chon̈ pitzc'anojpaxcan̈ b'oj Comam Jesús, hun b'oj hex chon̈ yi'a'toj Comam Dios yin̈ satan. 15Hacti' chute sb'a hunk'aan ti' jin̈an, yu sc'ulaloj heyet, yun̈e ta caw tx'ihal mac ẍchani sc'ulch'anil sc'ul Comam Dios, tx'ihal mac ch'a'ni pax yuch'antioẍ tet Comam smayoj. 16Yuxin mach ẍcab'concan̈ co c'ulan. Waxan̈ca b'elay spax yip co nimanil ti'an, yaja' wal janmaan, cam yac'b'iloj hunun tz'ayic. 17Hantaj sya'tajil ẍjil tinan̈an, lemb'il ch'ec'ojtoj, ec'omn̈e yenayi, yaja' wal yeltich'anil cha' jetan, k'a' caw ec'b'alcanoj, b'oj mach stan̈b'al. 18Haxca machon̈ oc t'an̈noj yin̈ b'aytet ẍjilicoj yin̈an, to yin̈ b'aytet mach ẍjilicoj yin̈an, haxca hej tzetet ẍjilicoj yin̈, lemb'il ẍtan̈ojiloj, wal b'aytet mach ẍjilicoj yin̈, ch'ehojc'oj stohb'alk'inal.


Copyright
Learn More

will be added

X\