2 CORINTIOS 4

1Mach chicabcon coc'ulan̈ yuto yu isc'ulch'anil isc'ul Comam Dios yuxin yaco Comam hune' munil ti' yul cok'aban̈. 2Wal tinan̈ sunil tzet caw tx'ixobal chiswatx'e anma yin̈ ewantajil yahbilxacano juhan̈, machi mac chijak' subchahojan̈, mach chicosoman̈ Istzoti' Comam Dios yeb comon tzoti'. Wal xin han̈e isyelal chijalan̈ sata anma yeb sata Comam Dios, hac tu' chu coyenilojan̈ tato hune' comunilti'an̈ ayco yin̈ istoholal. 3Hayet chon̈ec'an̈ jalnoc'ojan̈ Tzoti' c'ul yet colbanile, ay mac ti' mach chitxumchalo yu, ha' ton huntek'an mac tu' chic'aytoj. 4Yaja' yu mach chayto yul yanma yin̈ Istzoti' Comam; yuxin ha' naj yahawil yin̈ hune' yul sat yiban̈k'inal ti', ha' naj machi ak'ni yohtan̈elo anma yun̈e mach chu yilni istzejla isk'ak'al hune' Tzoti' yet colbanile, yet Comam Cristo caw aycano yip, Comam yechel Comam Dios. 5Maẍtajon̈an̈ chijalic'o cobahan̈, walxinto ha' Comam Jesucristo chijalic'ojan̈ ta ha' Comam Jahawil. Wal han̈on̈an̈ xajaco cobahan̈ hechejaboj yuto chitzala janmahan̈ yin̈ Comam. 6Ha'tic'a Comam Dios chejni ta chitzejla sajilk'inal xol k'ejholo, hapaxo Comam ak'ni sajilk'inal yul janma yun̈e johtan̈enilo isk'ak'al yip Comam Dios, hune' chitzejla yin̈ sat Comam Jesucristo. 7Haca' hunu k'alomal ayayto yul hunu tx'otx' xi, hac tu' ye Istzoti' Comam Dios yin̈ conimanil, yun̈e isyenilo isba ta ha' Istzoti' Comam caw aycano yip; yin̈ Comam Dios chitita, mach jetojan̈ yehi. 8Yuxin waxan̈ca hoybilon̈an̈ yu isya'tajil, yaja' mach chon̈ayc'ayan̈ yul isk'ab. Ay tzet ye tu' chijaco yin̈ coc'ulan̈, yaja' mach chicabcon coc'ulan̈ yu. 9Chon̈cajlaxan̈, yaja' mach bejbilon̈canojan̈, chon̈mak'laxcan̈an̈, yaja' mach mak'bilo cotan̈ilojan̈ yin̈ huneln̈e. 10Bajxan̈etu'wal chon̈tohan̈ ayon̈n̈etic'acojan̈ yul isk'ab camical, haca' yak'le Comam Jesucristo, hac tu' chu isyenilo isba jin̈an̈ yin̈ tzettaj yak'le Comam. 11Han̈on̈ti'an̈ waxan̈ca itzitzon̈an̈, yaja' ayon̈n̈etic'acojan̈ yul isk'ab camical sunilbal tiempo yu chon̈munlahan̈ yin̈ ismunil Comam Cristo. Hac tu' chu isyenilo isba tzettaj yak'le Comam yin̈ hune' conimanilan̈ cambehal ye ti'. 12Yuxin han̈on̈ti'an̈ ayon̈n̈etic'acojan̈ yul isk'ab camical yun̈e hechahnicano hek'inal tet Comam. 13Chal yul Yum Comam Dios haca' ti': “Xawaytojan yul wanmahan yuxin quintzotelan,” ẍi. Hac tu' jepaxojan̈ han̈on̈ti'an̈ xajaytojan̈ yul janmahan̈ yin̈ Comam Dios, yuxin chon̈tzotelan̈. 14Han̈on̈ti'an̈ johtajan̈ ta ha' Comam Dios ak'ni itzitzbocan̈ Comam Jesucristo Jahawil, ha'tic'a Comam xin chon̈ak'ni itzitzbocan̈ yuto yeton̈xa Comam Jesucristo, hunxa xin chu con̈yinito Comam isc'atan̈. 15Caw chijak'lehan̈ huntek'an isya'tajil ti' yu isc'ulalo teyin̈, yeb yun̈e tx'i'al mac chichahni isc'ulch'anil isc'ul Comam Dios, haxinwal tx'i'al mac chiak'nipaxo yuch'andiosal tet Comam, hac tu' chu yoc ismay Comam. 16Yu hune' tu', yuxin mach chicabcon coc'ulan̈ waxan̈ca lan̈an ispax yip conimanilan̈, yaja' wal janmahan̈ xin hunun tz'ayic yoc yin̈ yac'tohal. 17Sunilal isya'tajil chijilan̈ yul sat yiban̈k'inal ti', yin̈ an̈e chiec'toj yuto chiapni istiempohal bay chilahwi, yaja' wal isc'ulch'anil chak' Comam jet xin ec'bal niman yelapnoj, yeb xin mach istan̈bal. 18Han̈on̈ti'an̈, maẍtaj yin̈ huntek'an tzet ye tu' chijilico yin̈ bay chijaco conabalan̈. Wal xin yin̈ huntek'an tzet ye tu' mach chijilico yin̈ ha' bay ayco conabalan̈, yuto sunil huntek'an chijilico yin̈, yin̈ an̈e chitan̈iloj. Wal huntek'an mach chijilico yin̈ ayn̈etic'a yin̈ sunilbal tiempo.

will be added

X\