2 CORINTIOS 3

1Yet chijalnihan̈ huntek'an ti' teyet, ¿chimhetxumu tato lan̈an jalni cobahan̈ c'ulal? Wal xin ¿tom chicoyehan̈ carta chon̈abenicojan̈ yul hek'ab? maca ¿chicok'anan̈ carta chexabenico yul cok'aban̈ haca' chute huntek'anxa ebnaj? ¡Machoj! 2Wal xin hexn̈ech'an cocartahan̈, ha' xin chiocnico juhan̈. Hune' carta chexabenico tu' tz'ibn̈ebil yin̈ janmahan̈, hune' carta tu' sunil mac ohtan̈e yeb sunil mac chi'ilni. 3Caw xin ixtan̈ yehi, yuto hex ti' haca' hunu carta tz'ibn̈ebil yu Comam Cristo hac tu' heyehi, han̈on̈ti'an̈ xin chijic'ojan̈ hune' carta tu'. Hune' carta tu' maẍtaj yu tinta tz'ibn̈ebil, to yu Yespíritu Comam Dios itzitz. Machipaxotaj yin̈o ch'en ch'en tz'ibn̈ebilicoj, wal xin yin̈ heyanma tz'ibn̈ebilxacoj. 4Yu Comam Cristo yuxin chicawxi coc'ul sata Comam Dios tato hac tu' ye huntek'an tu'. 5Hayet chijalnihan̈ hune' ti' mach lan̈ano jalnihan̈ tato chisje cowatx'enan̈ hunu tzet ye tu' yul jetan̈ cochuquilan̈, wal xin sunil tzet chisje cowatx'enan̈, yaj yu Comam Dios chicolwa jin̈an̈. 6Ha' Comam ak'ni jipan̈ jocan̈ chejabo yin̈ hune' ac' trato, maẍtaj yin̈ hune' ley tz'ibn̈ebilcanoj. Hune' iscab trato ti' chij isba yu Yespíritu Comam Dios. Hune' isley naj Moisés tz'ibn̈ebilcano tu' chon̈yito yin̈ camical, wal Yespíritu Comam Dios chak' cok'inal mach istan̈bal. 7Hune' isley naj Moisés tz'ibn̈ebilcanico yin̈ ch'en ch'en, caw ay isk'ak'al yip isjepla yet yuli, yuxin matxa yu isk'oji ismujlico ebnaj Israel yin̈ naj Moisés yu istzejtzoni, yaja' yec'baniln̈e yehi. Yuxin ta ha' hune' ley chon̈ak'ni camoj caw xiwquilta yu yak'lax tet anma, 8¡hajxampaxo xin hune' iscab trato chij isba yu Comam Espíritu Santo, ec'balto isc'ulch'anil chu yak'lax istzoti'al! 9Ha' chal yelapno hune' chiwalti'an to ta caw ay ismay yu yak'lax istzoti'al hune' ley chon̈anico yin̈ camical, hajxam xin jaben isc'ulch'anil istzoti'al tzet chon̈anico c'ulal sata Comam Dios. 10Yuto waxan̈ca caw ay yelapno hune' isley naj Moisés yet yalan̈to tu', yaja' wal tinan̈ matxa yelapno ye yul sat hune'xa ti', yuto caw ec'bal isc'ulch'anil. 11Ta caw niman yelapno ye hune' ley txann̈e istiempohal tu', hajxam xin hune' trato maẍtic'a istan̈bal, to caw ec'naxa isc'ulch'anil. 12Ayco hune' ti' yipo janmahan̈, yuxin yin̈ sunil janmahan̈ chijalnic'ojan̈. 13Mach chijutehan̈ haca' yute naj Moisés, yuto yaco naj hune' k'ap k'ap yen̈elo sat yun̈e mach chil ebnaj Israel istan̈ilo ismujli hune' isk'ak'al yip Comam ayico yin̈ sat naj tu'. 14Yaja' mach istxum ebnaj tato chitan̈ilo isk'ak'al hune' tu', yebpaxo xin tinan̈ yet chilni ebnaj Istzoti' Comam Dios bay ayayo hune' babel trato, haca' totic'a ayco hune' k'ap k'ap tu' yen̈elo isnabal ebnaj. Ha' xin mach chiak'ni istxumulo ebnaj tzet chala, yuto maẍto chiak'lax yohtan̈elo ebnaj tato yet yul Comam Cristo istan̈canilo babel trato tu'. 15Yuxin hayet chiyilni ebnaj isley naj Moisés tinan̈ haca'tan̈e aytoco k'ap k'ap yen̈elo isnabal ebnaj. 16Yaja' yet chanico isba anma yul isk'ab Comam Cristo Jahawil, chiilaxilo hune' yen̈el isnabal haca' k'ap k'ap tu'. 17Yuto ha' Comam Cristo Jahawil, Espíritu ye Comam, yuxin yet ayxaco Yespíritu Comam jin̈ habanxa cotxumni tzet chal Yum Comam Dios, matxa ayon̈octo yalan̈ yip hune' babel trato. 18Yuxin matxa hune' haca' ismaj sate tu' yin̈ cosat cosunil. Wal tinan̈ xin lahanon̈xa haca' hunu ch'en espejo bay chi'illax isk'ak'al yip Comam, yuto ha' jin̈ chi'ilchalo isc'ulal Comam Cristo Jahawil. Yuxin lan̈an isch'ib conabal haca' isnabal Comam, yeb xin lan̈an istz'ajnalo isc'ulch'anil Comam jin̈. Hune' ti' chij isba jin̈ yu yip Comam Espíritu.

will be added

X\