2 CORINTIOS 3

1Yet ẍjalni hunk'aan ti' teyetan, ¿ham heyalni ta lan̈an jalni co b'a c'ulalan? Mat yeẍtooj ay hunuj jum ẍco ye teyetan yun̈e hon̈ stak'en teyetan haca' chute hunmajanxa heb'naj. Mat yeẍtooj ay pax hunuj hum ẍco k'an pax teyetan yun̈e hon̈ stak'en pax tet hunmajanojxa anmaan. 2Hexn̈e haca' hune' jum ch'ocnicoj juan, hune' hum tz'ib'n̈eb'ilcoj yin̈ janmaan, hune' tu' sunil mac ohtajn̈e b'oj chu yilni. 3Caw ixtan̈ yeyi to hexti' haca' hune' hum tz'ib'n̈eb'il yu Comam Cristo heyeyi, hayon̈ xin xjac'oj hune' hum ti'an. Mat tintaoj stz'ib'n̈eni, to Yespíritu Comam Dios itzitz. Matca satoj ch'en ch'en tz'ib'n̈eb'il, to yin̈ heyanma tz'ib'n̈eb'ilcoj. 4Yu Comam Cristo ẍcawxi co c'ul yin̈ sat Comam Diosan ta hactu' yeyi. 5Matoj hayon̈ ay scan̈il je juni hunuj tzetet c'ulan. Machoj, to hantajtic'a scan̈il je junian, yin̈ Comam Dios ẍtita. 6Ha' Comam x'a'ni scan̈il je joc schejab'oj yin̈ hune' ac' lahc'ulal ti'an, mataj hune' ley tz'ib'n̈eb'ilcanoj ẍji' yetan to chij sb'a hune' ti' yu Yespíritu Comam Dios. Hune' ley tz'ib'n̈eb'ilcan tu' chon̈ yitoj yin̈ camical, wal Yespíritu Comam Dios cha' k'inal mach stan̈b'al jet. 7Hune' ley tz'ib'n̈eb'ilcoj sat ch'en ch'en, caw ay smay sk'ak'al xu yuli, yuxin matxa c'oji heb'jetb'i israel yilni sat ya' Moisés yu caw schawi, yaja' hune' tu' ec'omn̈e yeyi. Ta hune' ley chon̈ a'ni camoj caw xiquiltaj xu ya'lax yab'e' anma. 8Hajxam yeltich'anil chu ya'lax stzoti'al hune' ac' lahc'ulal chij sb'a yu Espíritu. 9Ha' yelapnoj ẍwal ti'an, ta caw ay smay xu ya'lax stzoti'al hune' ley xcon̈ initoj yin̈ camical, hajxam yeltich'anil jalni stzoti'al tzet chon̈ anicoj c'ulal yul sat Comam Dios. 10Haxca smay hune' ley x'a'lax yalan̈to tu', mat ninoj lahanoj b'oj smay hune'xa xhul ti', haxca hune'xa ti' k'a' caw ay smay. 11Yuxin ta caw x'oc smay hune' ley lemb'il ẍtan̈iloj, hajxam yeltich'anil hune' lahc'ulal ch'ehojc'oj stohb'alk'inal. 12Haxca ẍcawxi co c'ul yin̈ hune' ti'an, yuxin yin̈ sajsajil chon̈ tzotelan. 13Mach ẍjute haca' xute ya' Moisésan. Xacoj ya' yen̈el sat yu hune' k'ape, yun̈e machil hej yetcon̈ob' israel ya' stan̈iloj yelwan hune' sk'ak'al smay ib'il yu ya' tu'. 14Yaja' mach xu xtxumni heb'jetb'i ta xtan̈iloj hune' tu'. Hasta tinan̈ yet chilni heb'naj Yum Comam Dios b'ay ahayoj b'ab'el lahc'ulal, ay hune' haca' k'ape aycoj yen̈eloj sat heb'jetb'i, yuxin mach xtxumu', haxca hatcachan Comam Cristo ch'iniloj hune' haca' yen̈el sat heb'naj tu'. 15Yuxin hasta tinan̈, yet chilni heb'naj te' hum yet ya' Moisés tu', mach txum heb'naj haxca aycoj yen̈el snab'al heb'naj. 16Yaja' yet ẍmeltzojcoj hune' mac yin̈ Comam Jahaw ch'ilaxiloj yen̈el snab'al mach'a'ni xtxumu' tu'. 17Ha' Comam ti' Espíritu, haxca yet ay Yespíritu Comam Jahaw jin̈, matxa tzet ch'eb'an co sat, hab'anxa jilni. 18Yuxin yet matxacoj hune' yen̈el co sat tu', lahanon̈xa b'oj hune' ch'en espejo, b'ay ch'elwan smay Comam Jahaw, yuxin lan̈an shelni sb'a co nab'al haca' snab'al Comam, haxca b'elay k'a' ayxa smay Comam jin̈. Hune' ti' chij sb'a yu scan̈il ye Comam Jahaw, ha'tic'a Comam Espíritu.


Copyright
Learn More

will be added

X\