2 CORINTIOS 2

1Yuxin xaintxumilojan tato mach chintohan ilwal teyin̈ hunelxa, yun̈e machi cam chiwacojan bisc'ulal texol hununex. 2Yuto ta chintohan wak'a'cojan bisc'ulal teyin̈, ¿mactaxca xin chu yak'ni tzalaho wanmahan? Wal xin mach chisje inc'ulan wak'acojan bisc'ulal texol, yuto caw hex cheyak' tzalahilal yul wanmahan. 3Yuxin watojan incartahan teyet yun̈e mach cheyak' bisc'ulal wabe'an yet chinapnihan bay ayex tu'. Ha' heyet to tzalahilal cheyak' wabe'an. Wal xin t'in̈anxa wehan ta hesunil chextzalapaxoj, haca' hune' tzalahilal ayco yin̈ wanmati'an. 4Hayet wanitojan hune' incartatu'an teyet, caw wik' bisc'ulalan, caw quinok'an heyu, yaj maẍtaj yu yoc bisc'ulal teyin̈ yuxin intz'ibn̈etojan hune' carta tu', walxinto yun̈e heyilni tato xahan ayex wuhan. 5Ay hune' mac anico bisc'ulal, yaja' maẍn̈etajinan wabehan hune' bisc'ulal tu', to hex heyabepaxo nich'an. “Nich'an” quinchiyan yuto mach chisje inc'ulan tato chich'ib isya'tajil naj tu' yiban̈. 6Ha' texol tu' etza hesunil heyaco isya'tajil yiban̈ naj, yaja' c'uxanxa isya'tajil heyaco yiban̈ naj tu'. 7Haxa tinan̈ xin, ak'we nimanc'ulal yin̈ naj, iptzewe naj haxinwal matxa chislahico bisc'ulal yin̈ naj. 8Yuxin chiwalpaxtojan teyet ta chexahann̈e naj haca'tic'a yet yalan̈tocanoj. 9Yu hune' tu', yuxin intz'ibn̈etojan hune' incartatu'an teyet yun̈e wilnihan ta yijemex yin̈ tzet chiwalan teyet. 10Ha' mac cheyak' nimanc'ulal yin̈ yu hunu istx'ojal chiswatx'e, chiwak'paxo nimanc'ulalan yin̈, waxan̈ca mach wetojan yaco ismul, yaja' heyu yuxin chiwak'an nimanc'ulal, yu isc'ulalo teyin̈ sata Comam Jesucristo. 11Hac tu' chijute haxinwal mach chik'oji naj matzwalil jin̈, yuto johtaxa tzet chu yoc naj etlo jin̈. 12Hayet wapnihan bey con̈ob Troas yu walnic'ojan Tzoti' c'ul yet colbanile yin̈ Comam Jesucristo, caw yak' isba munil wetan yin̈ yet Comam. 13Yaj oc hanic' bisc'ulal yin̈ wanmahan, yuto machi ilcha juẍta Tito wuhan bey tu', yuxin quintak'licanojan tet ebnaj juẍtaj ay bey tu', intohan yul ismajul Macedonia. 14Jak'a' yuch'andiosal tet Comam Dios yuto yu Comam Jesucristo yuxin sunilbal tiempo chon̈k'oji. Han̈on̈ xin chon̈isk'an Comam yu jak'ni ohtan̈elaxo Istzoti' tet anma. Ha' hune' Tzoti' tu' caw sunil bay chipujnatoj, haca' yec' isxuk'al sam hunu tzet ye tu' caw xuk' sam. 15Han̈on̈ ti' haca' isxuk'al sam pom chiyeni isc'ulal Comam Cristo yin̈ sat Comam Dios, hac tu' jehi yet chon̈ec' jalno Istzoti' Comam tet anma chicolchahi yeb xin tet anma chic'aytoj. 16Ha' mac chic'aytoj yahbeta sam hune' Tzoti' c'ul yet colbanile yul sat yuto ayco yin̈ camical, walpaxo mac chicolcha xin, caw xuk' sam chabe yuto chischah isk'inal tet Comam. ¿Mactaxca xin chik'oji iswatx'en hune' munil ti'? 17Yuto han̈on̈ti'an̈ maẍtaj yu jik'nihan̈ melyu yuxin chon̈ec'an̈ jala'c'ojan̈ Istzoti' Comam Dios haca' chute huntek'anxa ebnaj soman ye isnabal. Wal xin caw haca'tic'a caw ye yul sat Comam Dios, hac tu' chu jalnic'ojan̈, yuto ha' Comam ak'n̈e hune' comunilti'an̈, yeb hunxan̈e jehan̈ yin̈ Comam Jesucristo.

will be added

X\