2 CORINTIOS 2

1Yuxin xwalan ta maẍto chin tona hex wila'an yun̈e mat cam wa'a' b'isc'ulal teyetan. 2Haxca ta ẍwa' b'isc'ulal teyetan, ¿mactaxca ch'a'ni tzalalal wetan? To ha' mac xwa' b'isc'ulal tetan ha' mi ch'a'ni tzalalal wetan. 3Yuxin xwatoj hune' wum teyetan, yun̈e macheya' b'isc'ulal wetan yet chin apnoj b'etu'an. Ha' heyet to tzalalal cheya'a' wetan. Ẍcawxi hin c'ulan ta yet tzalalal wean, hex hun chex tzalapaxoj. 4Yet xwanitoj hune' wum tu' teyetan, caw ẍtac hin c'ulan, hasta xquin ok'an. Yaja' mat yuuj yoc b'isc'ulal heyu yuxin xin tz'ib'n̈etoj hune' wum tu'an, machoj, to yun̈e heyilni to caw chex wochean. 5Ay hune' mac x'a'ni b'isc'ulal wila'an, yaja' mat hayinojn̈ean, to hex mi hun xeyil pax hanic'oj win̈an. Hactu' walnian haxca mach sje hin c'ulan ta ẍnimejalb'i smul naj yib'an̈. 6Te xol ec'b'al hex xeyala ta ch'a'lax tz'aoj sat hune' naj tu', yaja' c'ojb'ilna yin̈ hanic' tu'. 7Yuxin tinan̈ a'wej nimanc'ulal, iptzewej naj haxca taj k'a' caw x'oc ni'anc'ulal yu naj. 8Yuxin chin k'an teyetan ta che ye sc'ulch'anil he c'ul tet naj. 9Xaxtic'a watoj hune' wum tu' teyet yin̈ hune' ti'an, yun̈e wilnian ta yijyomex yin̈ tzet xwal teyetan. 10Yuxin ta cheya' nimanc'ulal yin̈ hune' naj tu', haquinan ẍwa' pax nimanc'ulalan. Ta hayin caw ẍwa' nimanc'ulalan, yin̈ sat Comam Cristo ẍwa' nimanc'ulal chaltu'an, yaja' yu sc'ulaloj heyet. 11Hactu' ẍjutean haxin̈wal machon̈ ay yu naj matzwalil, haxca johtajxa tzet nab'il yu naj jin̈. 12Yet xquin apni yul con̈ob' Troas hin pujb'acoj stzoti' Comam Cristo Jahawan, caw xa' sb'a munil hin munla'n̈e yu Comaman. 13Yaja' mataj ti' ay wanmaan haxca mach xwil ya' juẍtaj Titoan. Yuxin xquin tak'li tet heb'ya' jetb'i ay b'etu'an, xquin to Macedoniaan. 14Ja'a' yuch'antioẍ tet Comam Dios haxca stohb'alk'inal ayon̈coj yin̈ hune' haca' hune' b'ay sojb'a sb'a anma yet ch'ec'tzelaxi tzet chu yi'wa Comam Cristo Jesús yib'an̈ mac ch'a'nicoj howal yin̈. Haca' yec' xuk'al sam te' pom ẍn̈uslax yin̈ desfile tu' hactu' jeyi. Hayon̈ chon̈ ocnicoj yu Comam yet ch'a'lax ohtajn̈elaxoj stzoti', hune' tzoti' tu' caw sunil b'ay ẍpujnayi. 15Haxca hayon̈ ti' haca' xuk'al sam incienso syeni smay Comam Cristo yin̈ sat Comam Dios hactu' jeyi. Spujnatoj xol anma ẍcolchayi b'oj xol anma ẍc'ayojtoj. 16Tet mac ẍc'ayojtoj, tx'oj yab'en sam hune' incienso ti' haxca lan̈an scami, wal tet mac ẍcolchaoj, caw xuk' yab'en sam haxca schab' k'inal. ¿Mac taxca ẍc'oji yuni hune' munil caw mimej xiquiltaj ye ti'? 17Hayon̈ mian, haxca mat yuoj ji'ni co melyuan yuxin chon̈ ec' jala'c'oj stzoti' Comam Dios haca' chute hunmajanxa heb'naj. Ha' jetan to ha' b'aytet syelal, ha' ch'ec' jala'c'ojan. Yin̈ sat Comam Dios chon̈ tzotelan haxca schejab' Comam je yin̈ Comam Cristo b'oj hexan.


Copyright
Learn More

will be added

X\