2 CORINTIOS 13

1Wal xin yin̈xa yoxel chintohan quexwila'an. Hayet chinapnitu'an tzijxan̈e tzet mulehal chioc lahti' yin̈, yaja' yilal yin̈ sat cawan̈ maca oxwan̈o testigo chicowatx'e. 2Hayet inbeycanic'ojan quexwilnojan yin̈ iscayel ay huntek'an tzet intak'ecanojan teyet, yaja' chiwalpaxtojan hunelxa, waxan̈ca machijinan texol bey tu' yet chiwalnihan hune' ti' tet mac xayaco ismul yet yalan̈to tu', yeb xin teyet hesunil. Hayet chinapnihan quexwilnotu'an xin mach chiwak' nimanc'ulalan teyin̈. 3Hac tu' chu heyohtan̈eliloj tato ha' Comam Cristo chiak'ni wipan intzotelan. Comam Cristo mach tz'ono yak'ni Comam texol, walxinto caw chisyelo yip Comam texol. 4Haca' hunu mac machi yip, hac tu' yu yalaxcan̈ Comam Jesucristo yin̈ te' culus, yaja' itzitz Comam tinan̈ yu yip Comam Dios. Hac tu' xin jehan̈ han̈on̈ti'an̈, tz'on chijute cobahan̈, yu hunxa jehan̈ yeb Comam, yaja' yu yip Comam yuxin itzitzon̈an̈ yeb yu comunlahan̈ texol. 5Txumwelo hununex tato caw yeli ayco heyanma yin̈ Comam Jesucristo. Txumwepaxiloj tato lan̈an hech'ib yin̈ yet Comam, mato ton̈e chebalico heba yuninalo Comam Dios. 6Yaja' chijochehan̈ ta cheyohtan̈eloj tato c'ul con̈elicojan̈ yet con̈heyilwenan̈, hac tu' chu isyenilo isba tato yetxa Comam Jesucristo jehan̈. 7Caw chintxahlihan teyin̈ tet Comam Dios yun̈e hewatx'en isc'ulal, maẍtaj yu cocanan̈ c'ulal yul hesat, machoj, waxan̈ca xin mach c'ulo con̈elicojan̈ yet con̈heyilwenan̈ haca' yallaxi. 8Yuto mach chisje cowatx'enan̈ istx'ojal yin̈ hune' cuybanile caw yel chal ti', wal xin ha' jetan̈ caw ayon̈icojan̈ colwal yin̈. 9Yuxin chon̈tzalahan̈ yet machi jipan̈, walex xin caw ay heyip, yuxin caw chicolahicojan̈ cotxahlihan̈ teyin̈, yun̈e caw tz'ajan chexelcanico yin̈ yet Comam. 10Chiwatojan hune' incartati'an teyet yalan̈to maẍto chintohan quexwila'an, haxinwal hayet chinapnitu'an mach yilalo chincachwahan teyin̈ yu wipan ak'bil yu Comam. Mach yuho quexwetanan yuxin ak'bil wiptu'an, walxinto yun̈e hech'ib yin̈ yet Comam. 11Wal tinan̈ hex wuẍtaj hex wanab, ayojabico tzalahilal yul heyanma. Caw watx'eweco henabal yin̈ ist'in̈anil yin̈ sunilbal tiempo. Iptzewe heba hununex yin̈ yet Comam. Hunxan̈ehojab henabal. Ayojab ak'anc'ulal texol. Ha'ojab Comam caw xahan ayon̈ yu yeb chiak'ni ak'anc'ulal yul janma chioc heyetbihoj. 12K'ambewej hanic' heye hununex, ha' xin chiyeniloj tato xahan cheyil heba. 13Chi-xin-isk'ambeto ebnaj juẍtaj ay bey ti' hanic' heye bey tu'. 14Ha'ojab Comam Jesucristo chiak'ni isc'ulch'anil isc'ul teyet, yeb xin chexxahann̈e Comam Dios, yeb ha'ojab Comam Espíritu Santo chioc heyetbihoj.

will be added

X\