2 CORINTIOS 13

1Stz'ajna syoxel chin toj hex wila'an. Tzantzet ẍco watx'e' b'etu' yet chin apnojan, yaja' yin̈ sat cawan̈ maca oxwan̈oj anma ẍco watx'e'. 2Yet xquin b'ey hex wilnoj yet x'ec'can tu'an, xin tak'ecan teyetan ta che na he b'a. Tinan̈ ẍwal paxtoj teyetan, waxan̈ca machin b'etu'an, ẍwal hune' ti' tet mac xacoj smul yalan̈to tu'an, b'oj teyet te hunil. Yet chin apnoj hex wilnojan mach ẍwa'a' nimanc'ulal teyin̈an. 3Hactu' chu heyohtajn̈enoj ta Comam Cristo ch'a'ni yip hin tzoti'an. Haxca wal Comam Cristo mat soanoj ya'ni te xol, to sye Comam scan̈il yeyi. 4Waltu' yeli, haca' hune' mac mach yip xu yalaxcan̈ Comam yin̈ culus, yaja' yu scan̈il ye Comam Dios, itzitz Comam tinan̈. Hactu' je hayon̈ ti'an, ay joc yin̈ hune' soanil ye Comam tu'an, yaja' chon̈ ehojc'oj b'oj Comam yu scan̈il ye Comam Diosan, yun̈e jilnojan tzet chex tan̈i. 5Pichwejiloj he b'a hununex yun̈e heyilni ta yeli lin̈anex heya'ni yuluj he c'ul. Ilwewej he b'a ta t'in̈an heyecoj. ¿Tox mat heyohtajoj to ayxacoj Comam Jesucristo teyin̈? Han̈c'a ti' ta mat eyohtajoj, yuxin ton̈e che hob'c'oj sb'ih Comam teyin̈. 6Ẍcawxi hin c'ulan ta cheyohtajn̈eloj to c'ul xcon̈ elcoj yin̈ b'ay ẍcon̈ ilwelaxan. 7Ẍco k'an tet Comam yin̈ joraciónan ta mach tx'oj cheyu. Yaja' matoj yu co can c'ulalan, yuxin ẍja' joraciónan, to yu heyuni hej tzetet c'ul, waxan̈cami tx'oj ẍalot jin̈an. 8Haxca machu co paq'uicoj yin̈ st'in̈anil tzoti'an, to yin̈ ẍja' co b'aan. 9Yuxin chon̈ tzalaan yet soan ja'nian, tan̈e caw ay he yip. Ẍcam co k'ana' yin̈ joraciónan yun̈e tz'ajan lahan chucan heyanma yin̈ Comam. 10Ẍwatoj hune' wum ti' teyet yalan̈to maẍto chin to hex wila'an, yun̈e yet chin apnojan, mat yilaloj chin howb'oj teyin̈ yu yip hune' hin chejb'anil xa' Comam wet ti'an, haxca mat yuuj hex wetantojan, yuxin xa' Comam wetan, to yun̈e cam he lin̈b'an he b'a. 11Stan̈b'alojcanoj hex wuẍtaj hex wanab', ẍwochean ta sak'al ch'ec' heyu, cam he t'in̈b'ancoj he b'a yin̈ Comam Dios. Iptzewej he b'a, occan̈wej yin̈ ak'anc'ulal, haxin̈wal Comam Dios Yahaw ak'anc'ulal caw chon̈ ocheni, ch'oc he yetb'ioj. 12A'wej he cawil hununex yin̈ tzalalal. 13Sunil heb'ya' juẍtaj ayxacoj yin̈ Comam ch'anitoj he cawil. 14Ẍwochean ta cheyab'e sc'ulal sc'ul Jahaw Jesucristo teyin̈ b'oj cheyab'e ta ocheb'il hex yu Comam Dios. Ẍwoche paxan ta huninaj hexcoj yin̈ Comam Espíritu Santo.


Copyright
Learn More

will be added

X\