2 CORINTIOS 12

1Matzet chiwik'an yin̈ winican̈ inbahan, yaja' yilaltic'a walnihan huntek'an yak' Comam Dios wila'an, yeb tzet yelax wetan yu Comam. 2Ay hune' naj ohtabil wuhan, caw ayco yanma naj yin̈ Comam Cristo. Can̈lan̈ebxa habil tinan̈ yilaxto naj satcan̈ bay ay Comam Dios. Yaja' mach wohtajojan ta beyc'o naj yeb isnimanil maca han̈c'an̈e yanma naj, han̈ech'an Comam yohtaj. 3Caw wohtajan tato ilaxto hune' naj tu', yaja' ha' hune' mach wohtajojan ta ilaxto naj yeb isnimanil maca machoj, han̈ech'an Comam Dios yohtaj. 4Ha' hune' wohtajan to ilaxto naj bey paraíso. Bey tu' yabe naj huntek'an tzoti' machi mac ohtan̈e, yeb xin machi mac chisje yalnic'oj. 5Ha' hune' naj tu' chisje winican̈an, wal inti'an xin ha' yin̈ huntek'an isya'tajil chiwilan, ha' bay chiwican̈ inbahan. 6K'inalo tato chiwochehan chiwican̈ inbahan chitic'am isje yuto ha' isyelal chiwalan, mach sucojinan yin̈ haca' tu'. Yaja' mach chiwican̈ inbahan yuto chiwochehan tato machi hunu mac chinani ta caw ec'bal welapnojan yiban̈ tzet chil anma win̈an, yeb xin tzet chiyabe anma walnihan. 7Yaja' yun̈e machi oc lolo'al win̈an yu huntek'an tzet c'ulch'an yelax wila'tu'an, yuxin ak'lax hune' isya'tajil wetan yu naj matzwalil, haca' hunu te' tx'ix alaxico yin̈ innimanilan, hac tu' yu yak'lax hune' isya'tajil ti' win̈an. 8Oxelxa chink'anan tet Comam Dios ta chilo Comam hune' isya'tajil ti' win̈an. 9Yaja' tak'wi Comam wetan haca' ti': “Ak' tzalaho hac'ul yin̈ isc'ulch'anil inc'ulan xawak'an tawet, yaj yu inhelanilan chitecha hawu. Han̈c'an̈e hune' tu' xin chiocnico hawu yuto caw ec'na caw c'ul isyenilo isba wipan yin̈ isya'tajil,” ẍi Comam. Hac tu' xin caw chintzalahan yin̈ isya'tajil chihul wiban̈an, yuto chisyelo isba yip Comam Cristo win̈an. 10Yuxin caw chintzalahan yin̈ ej isya'tajil chihul wiban̈an, yuxin waxan̈ca chibuchwa anma win̈an, yeb waxan̈ca matzet ayinan, yeb waxan̈ca chincajlaxan, yeb waxan̈ca chihul isya'tajil wiban̈an, yaj yu chinmunlahan yin̈ yet Comam Jesucristo. Yaj caw chitzala wanmahan yuto hayet machi caw wipan chiwabehan, caw chiwik'canocan̈ wipan, yaja' yu Comam. 11Haca' hunu mac mach c'ulo ye yul iswi', hac tu' wute inbahan wanicojan inwinajilan, yaja' hex ay hemul win̈an yuto hex wal heyanico inwinajilan, yuto mach ec'balo ebnaj chisbalico isba ischejabo Comam Jesucristo tu' insatajan, ha' ebnaj cheyabeto tzet chala. Waxan̈ca mach chiyelapno wehan, yaja' mach chu ispalc'on ebnaj wiban̈an. 12Hayet wec'an texol caw niman wute inc'ulan teyin̈. Inyehan c'aybalc'ule yeb yechel yip Comam Dios texol; ha' xin chalniloj tato caw yeli ischejab Comam Jesucristo wehan. 13Hune'xan̈e tzet mach lahano quexwutehan haca' huntek'anxa ebnaj juẍtaj ay yul hunun con̈ob, yuto mach ink'anan yin̈ tzet ocnico wuhan, yuxin ak'we nimanc'ulal yin̈ hune' inmultu'an. 14Tinan̈ xin toxa chintohan quexwila'an yin̈ yet yoxel, yaja' matzet chink'anpaxojan teyet yin̈ tzet chu yec' wuhan bey tu'. Yuto maẍtaj yin̈ tzet ayex bay ayco wanmahan, walxinto hex ayexico yin̈ inc'ulan. Yuto haca' hunu naj mame tinan̈ yilal yak'ni naj tzet chiocnico yu yuninal, maẍtaj yuninal naj tu' chiak'ni tzet chiocnico yu. 15Haninti'an, hinaninan inc'aytzenilojan sunil tzet ayinan yeb innimanilti'an yu isc'ulalo teyin̈. Yaja' chiwilan, hayet ec'balto chiwaco wanmahan teyin̈, walex xin ip heyinilo heyanma win̈an. 16Yaja' waxan̈ca ay ebnaj yohtaj ta machi hunelo ti' waco inbahan heyijatzo yin̈ tzet chiocnico wuhan, yaja' chal ebnaj tato yu inhelanilan yin̈ istx'ojal yuxin quexwak' subchahojan ink'annihan tzet ye tu' teyet. 17¿Tom quexwak' subchahojan yu ebnaj juẍtaj watojan yu isto quexyilnoj? 18Ink'anan tet naj Tito tato chito naj quexyila' yeb hunxa naj juẍta to yinta naj. ¿Tom quexyak' subchaho naj Tito tu'? ¡Machoj! Wal xin haca' innabalan yeb isc'ulch'anil inc'ulan, hac tu' yute isba naj texol. 19Hex wuẍtaj hex wanab, hex xahan ay juhan̈, ham hetxumni tato lan̈an cocolni cobahan̈ yin̈ hesat yet chijalnihan̈ huntek'an ti', ¡machoj! Wal xin yet Comam Cristo jehan̈ yuxin chon̈tzotelan̈ yin̈ ist'in̈anil sata Comam yun̈e hech'ib yin̈ yet Comam Dios. 20Chinxiwan c'uxantaxca mach lan̈ano hewatx'en haca' chiwochehan yet chinapnihan ilwal teyin̈, yebpaxo ta mach chischah hewi' yin̈ tzet chinwatx'ehan. Chinxiwpaxojan wapnihan c'uxantaxca aytoco howal texol, maca ta chi-to-chiwa hec'ul teyin̈ hununex, maca ta ayco chichonc'ulal texol, maca ta ayex lan̈an heyinican̈ heba, maca ayex cheyal tx'oj tzoti' yin̈ hunu ebnaj juẍtaj, maca tato ayex halo k'umal cheyu, maca ta ayex chelolo'n̈e heba, maca ta ayex lan̈an hewatx'en tzet ye tu' mach toholoj. 21Yet chinapnihan quexwila'an hunelxa, c'uxantaxca chintx'ixwican̈an sata Comam Dios, cat wocan ok'o teyin̈, hex maẍtic'a chebejcano heyanico hemul, heyixli maca hewinajli, yeb huntek'an istx'ojal k'aynajextic'a hewatx'eni.

will be added

X\