2 CORINTIOS 12

1Nab'an̈em chin oc wa'a'coj hin mayan, yaja' yilal walni tzet x'aot wila' yu Comam Jahawan. 2Ay hune' ya' aycoj yin̈ Comam Cristo wohtajan, scan̈lan̈eb'xa hab'il tinan̈ yiottoj ya' satcan̈ b'ay ay Comam Dios. Mat wohtajojan ta han̈c'a yespíritu ya' x'iottoj, mato b'oj snimanil, hatcachan Comam Dios ohtajn̈e. 3Yaja' caw wohtajan, ta x'iottoj hune' ya' tu', ta b'oj snimanil, mato machoj, han̈c'a Comam ohtajn̈e. 4X'iottoj ya' b'etu'. Hat xab'e ya' hunk'aan tzoti' caw c'ayb'alc'ule jab'eni. Hunk'aan tzoti' tu' machu ya'lax yala' hunuj anma. 5Hune' ya' tu' sje wanicoj smay ya'an, walinan mach sje ẍwacoj hin mayan, han̈c'a ti', ha' hin quewa'ilan, ha' chu walni hin mayojan. 6Yaja' ta sje hin c'ul wa'a'coj hin mayan, ẍtic'am sje, matmi locoaloj, haxca st'in̈anilmi ẍwalan. Yaja' mach sje hin c'ul wute'an, haxca mach sje hin c'ulan ta ay mac ẍpalc'on yanicoj hin may sataj hantaj chilicoj win̈an b'oj hantaj chab'e walnian. 7Yun̈e mach'oc lolo'al win̈ yu yeltich'anil tzet x'aot wila'an, yuxin x'aotcoj hune' haca' te' tx'ix yin̈ hin nimanilan. Hune' tu' schejab' naj matzwalil ye yu hin yetanan yun̈e mach'oc lolo'al win̈an. 8Oxel xin k'an tet Comam Jahawan ta chiloj Comam hune' sya'tajil tu' win̈an. 9Yaja' xta'wi Comam wetan: Yu sc'ulal hin c'ul tawin̈an stechaoj hawu. K'a' c'ulto syeniloj sb'a scan̈il we tawin̈ yet soan hawa'ni, ẍi Comam. Yuxin caw chin tzalaan soan wa'nian, haxca hactu' chu syeniloj sb'a scan̈il ye Comam Cristo win̈an. 10Caw chin tzala yin̈ hin quewa'ilan, hin tzeyelaxan, hin mahlanan, hin cajlaxan, hantaj sya'tajil ẍwil sya'iloj Comam Cristoan, haxca yet k'a' soan wa'ni ẍwab'ean, ha' tu' k'a' can̈ wean. 11Haca' hune' mac huchanajtoj yul swi' xwute hin b'aan, xwanicoj hin mayan, yaja' hex ay he mul win̈an, hex yet ay heyanicoj hin mayan, haxca mat ninoj ec'b'aloj heb'naj nimej apóstol tu' wib'an̈an, heb'naj cheyab'etoj tzet chala. Waxan̈ca mach yelapnoj wean, yaja' mach ẍpalc'on heb'naj wib'an̈an. 12Yulb'al xquin munla te xolan, ayn̈etic'acoj Comam ya'ni c'ayb'alc'ule wub'an yu scan̈il yeyi. Ha' xyeni to caw yeli apóstol hinan. 13Mach xwacoj sya'tajil teyib'an̈ yin̈ tzet xwilan haca' xwute hunk'aanxa iglesiaan. A'wej nimanc'ulal win̈ yu hune' hin mul ti'an. 14Tinan̈ hin tojxa yin̈ syoxel hex wilnojan, yaja' mach hin k'ana' stohol tzet ẍwil teyetan. Haxca mataj tzet ayex ẍwochetojan, to ha' ch'a'ni sc'ulal teyet, ha' ẍwochetojan. Haxca yet aya mame mi'e ẍwatx'encan tzetet ch'a'ni ec'oj yu yuninal b'ak'in̈, mataj uninale yet ay ya'ni tet smam smi' tu'. 15Hactu' wean, chu hin c'ayniloj sunil tzet ayin yu sc'ulaloj heyetan, waxan̈ca hayin caw chin tan̈ilojan mach woc yin̈an. Yaja' haca' wilnian, yet k'a' chex wochenan, wal hex tan machin heyochean. 16Ay mac ohtajn̈e ta mach stohol yec'b'al wu xin k'an teyetan, yaja' cheyalpaxoj ta yu stz'ajanil hin c'ulan quex sub'cha wuan. 17¿Tox ay tzet chin hojiloj teyetan yet xwanitoj hunk'aan heb'ya' te xolan? 18Xin chej ya' Titoan ta xto ya' hex yila, xwanitoj hune'xa ya' yin̈ ya'an, ¿tox ay tzet shojiloj ya' teyet? ¿Tox mat haca'oj xwute hin b'aan hactu' sc'ulal xute sb'a ya' teyin̈? ¿Tox mat lahanoj quex jacoj yin̈ co c'ulan xin? 19Ayxam ichi heyalni ta lan̈an co colni co b'a yin̈ he satan yet ẍjalni hunk'aan ti'an, yaja' machoj. Yeton̈xa Comam Cristoan chon̈ tzotel yin̈ sat Comam Diosan yun̈e he lin̈b'an he b'a hex wuẍtaj hex wanab'. 20Chin xiw wapni hex wilnojan, haxca taj mat haca'oj chal hin c'ulan hactu' heyeyi chin apnian, b'oj hex hunxa, wac'am mat haca'oj chal he c'ul hactu' ẍwute hin b'aan. Chin nanon wapnian, wac'am ayex mache cha he b'a, ayex aycoj sawenal yin̈ heyanma, ayex ẍchichon he c'ul teyin̈, ta ay pohloj che yu, hob'o' tzoti', halo' k'umale, lolo'al b'oj he yah b'oc'nayi. 21Caw ẍwi' sk'ak'al wapni te xol hunecxaan, haxca taj xa' Comam Dios tx'ixwilal wila' heyuan, cat wok'ojcan̈ teyin̈ hantaj hex maẍtic'a che b'ejcanoj he yixli he sayni he winaj, b'oj heyuni hej squistalil.


Copyright
Learn More

will be added

X\