2 CORINTIOS 11

1Oẍimi ta c'uxan ẍtecha ninoj hin locoal ti' heyuan. Waxan̈ca mach b'in sje he c'ul heyab'e', yaja' yilal he nimann̈en he c'ul. 2Haca' hex xiquiltajn̈en Comam Dios, hactu' chex wute' paxan. Haca' chu st'in̈ican hune' mohilal, hactu' xu hin watx'encan b'oj Comam Cristoan ta chex wa'a'coj yul sk'ab' Comam haca' hune' ix ni'an k'opo maẍto tzet say yin̈. 3Yaja' tinan̈ chin xiwan, ta haca' xu sub'cha ix Eva yu no' lab'ah, hactu' chu he sub'chapaxoj, cat heyiniloj heyanma yin̈ Comam Cristo, cheyetantoj he b'a. 4Chin nanonan ta chex sub'chayi, haxca lan̈an heyab'entoj tzet chal hune' mac ẍb'ey halnoj hune'xa nan cuywab'al teyet. Nan Jesúsal ẍb'ey yala', mataj haca' co cuywa teyetan. Lan̈an he chani hune'xa nan espíritual, mataj hune' chab'ilxa heyu. Lan̈an heya'ni yuluj he c'ul yin̈ hune' tzoti' yet colb'anil mat hayon̈oj xjal teyetan. 5Yaja' hunk'aan heb'naj chal sb'a nimej apóstolal tu' mat k'a' ec'b'alojto ye heb'naj tin sataj ẍwab'ean. 6Waxan̈ca mach caw tzoteb'anil wuan, yaja' ay wohtajb'alan. Hune' ti', xax hin yeloj teyet yin̈ sunil hin cuywab'alan. 7Machin tohol xin k'anan yet xquin ec' walnojc'oj tzoti' c'ul yet colb'anil teyetan. Comon anma xwute hin b'aan, yaja' yu sc'ulaloj heyet. ¿Mato tx'oj hune' tzet xwu tu' cheyab'ean haxca mach hin tohol xin k'anan? 8Yet xin ec' walnojc'oj tzoti' c'ul yet chin munla te xolan, ha' hunk'aanxa iglesia x'a'ni stohol tzet x'ocnicoj wuan. Hune' tu' haca' elek' xwuan haxca hex yet ay heya'ni hin toholan haxca lan̈an hin munla te xolan. 9Yet ayin te xolan, ay b'ay xquin mahlanan, yaja' mach hunuj hex b'ay xin k'an hunuj tzetet x'ocnicoj wuan. Ha' heb'ya' juẍtaj ay Macedonia x'apni b'etu', ha' heb'ya' x'a'ni tzetet ch'ocnicoj wuan. Mat sje hin c'ul awojcoj teyin̈an. Hactu' ẍwute' yet ẍtoj ti'an. 10Chab'e Comam Cristo ta st'in̈anil ẍwalan, mach mac chu hin scachni wala'an ta mach stohol tzet xin lo x'aot b'et Acayaan. 11Yaja', ¿tzet yuxin hacti' hin tzotelan? ¿Mato machcoj wanma teyin̈an haxca xwalan ta machin tohol xin cha teyetan? Hajxa, yohtaj Comam Dios ta caw aycoj wanma teyin̈an. 12Yaja' hacn̈etic'a tu' ẍwute'an, yun̈e machu yanicoj heb'naj tu' smay, chalni heb'naj ta lahan smunla heb'naj haca' hin munla ti'an. 13Heb'naj tu' ton̈e chal sb'a heb'naj apóstolal. Sub'um anma heb'naj, haca' yapóstol Comam Cristo chal yute' sb'a heb'naj. 14Yaja' hune' chu heb'naj tu' mach ẍc'ay co c'ul yin̈, haxca hactu' chute naj matzwalil, chal sb'a naj yángeloj Comam Dios. 15Yuxin mach ẍc'ay co c'ul ta hactu' chutepax sb'a heb'naj haca' mac ẍcuyni stoholal, haxca schejab' naj matzwalil ye heb'naj. Yaja' ch'a'laxoj sya'tajil tet heb'naj yu xtx'ojal lan̈an yuni tu'. 16Chin napaxtij teyetan, matin locoojan, yaja' taca hactu' heyalni, c'ultic'a. Ab'ewej ninoj tzet ẍwal teyet haca' locoan, tan̈e yu waniatoj ninoj hin telan. 17Yin̈ hune' waniatoj hin tel ẍwal ti'an, mataj Comam x'a'ni wala'an, to somanil ye hin wi' ch'a'ni wala'an. 18Haxca tx'ihal mac ch'aniatoj stel yin̈ tzet chu, haquinan wa'a'toj ninoj hin telan. 19Hexti' caw tz'ajan he c'ul, yuxin ak'anextajn̈e ch'ijcha heb'naj loco heyu. 20Haxca x'ijcha heyu yet quex chil-laxcoj yin̈ munil yu mac ẍhojniloj tzet ayex, chex sub'ni, chex syahni, hasta stz'itcoj naj he sat. 21Caw tx'ixwilal ẍwa'lean, haxca mat haca'oj heb'naj tu' ẍwutean, to quewa' xwute hin b'a te xolan.Yak'n̈e sb'a ay heb'naj chahtoj stel, haquinan ẍwapaxatoj hin telan, waxan̈ca locoal ni'an yeyi ẍwalni hune' ti'an. 22Ta hebreo heb'naj yalni, haquinan hebreo hin paxan, ta israel heb'naj yalni, haquinan israel hin paxan, ta yic'al ya' Abraham ye heb'naj yalni, haquinan yic'al ya' Abraham we paxan. 23Ta schejab' Comam Cristo ye heb'naj yalni, hasta k'a' ec'b'alto schejab' Comam we sataj heb'najan, waxan̈ca mat caw t'in̈anoj ye yul hin wi'an ẍwalni hune' ti'an. K'a' ec'b'alto chin munla sataj heb'najan, k'a' tx'ihalto el xquin octoj yul presu sataj heb'najan, k'a' tx'ihalto el xquin mak'lax sataj heb'najan, b'oj tx'ihal el xc'atzla hin caman. 24Howel x'ec' ya' wanma yu heb'naj israelan xwijni no' 39 tz'uman. 25Oxel xquin shate heb'naj yu te' xic'omte'an, hunel xquin sc'oj heb'najan. Yet xquin ec' yin̈ b'elan, oxel xto te' barco yich ha' walan̈an, hunec hune' tz'ayic hune' ak'b'al ayincoj yib'an̈ ha' maran haxca xtocan te' barco yich ha'. 26Mach sb'ih hayel xquin ec' yin̈ b'elan, ay b'ay xc'atzla hin yijnitoj ha'ha'an yet ch'ib'naj ha', ay b'ay xquin c'atzla tet heb'naj elk'oman, b'oj yul sk'ab' heb'naj wetcon̈ob'an b'oj heb'naj nancon̈ob'al. Xc'atzla hin cam yulaj hej con̈ob'an, b'oj yulaj b'eh b'oj yul ha' mar, hasta xquin c'atzla tet heb'naj ton̈e chal sb'a ta ayxacoj yin̈ Comam. 27Tx'ihal el xquin siqui hin munlaan, caw x'ec' ya' wanmaan. Tx'ihal el mach hunmutz'uj xquin wayan, xwab'e n̈ohchalalan b'oj tajin̈ti'al. Tx'ihal el mach xquin wa'an. Ay b'ay x'ec' ya' wanma wab'en chewan b'oj man̈ xilk'apeal. 28Matn̈etaj tu', ay hej to chin na sya'ilan, hunun tz'ayic ya' yecoj yin̈ wanma sya'iloj heb'ya' ayxacoj yin̈ Comam yul hunun iglesia. 29Ta ay hune' mac ẍpaxiloj yip, caw chin na hune' tu'an, b'oj ta ay mac ẍlecta yu hunujxa maca, ẍtit hin howal yin̈ hune' mac ch'a'ni lectaoj hune' mac tu'an. 30Ta sje hin c'ul wa'a'coj hin mayan, ham hin quewa'il ẍwal hin mayojan. 31Ha' Comam Dios, Smam Jahaw Jesús, yet ay yalaxcoj smay yin̈ stohb'alk'inal, yohtaj Comam ta yel ẍwalan. 32Yet ayin yul con̈ob' Damascoan, xchejni naj gobernador, schejab' naj rey Aretas ta ch'alaxcoj heb'naj soldado stan̈e' hunun spultail tapial hoyn̈e con̈ob', yun̈e hin tzab'laxan. 33Yaja' ay heb'ya' xquin aniaytij yul hune' te' niman xuc yul swentanail tapial tu'an, hactu' xu hin colcha yul sk'ab' naj gobernador tu'an.


Copyright
Learn More

will be added

X\