2 CORINTIOS 11

1Hantam sak'al tato chitecha huntek'an tzet chiwaltoti'an heyu, hacojtam mach innabalan, yuxin hac tu' intzotelan, yaja' yilal heyak'ni techahoj. 2Caw tz'e' chiwute inbahan teyin̈ yuto xahan ayex wuhan haca' isxahanil chexyil Comam Dios, yuto xawak' tratohan yeb Comam Cristo tato chexwacojan yul isk'ab, haca' hunu ix k'opo maẍto chiyik'le hunu winaj. 3Yaja' chinxiwan yuto haca'taxca yu yak'ni subchaho no' laba ix Eva yu iscan̈il yehi, hactaxca tu' chu heyak'lax subchahoj, cat heyinilo heyanma yin̈ Comam Jesucristo, yeb xin matxataxca toholo cheyute heba haca' choche Comam. 4Hex ti' caw niman cheyute hec'ul heyaben tzet chal ebnaj chiec' halnoc'o huntek'anxa nan cuybanile yin̈ Comam Jesucristo, mach haca'o yu jalnihan̈ teyet. Lan̈an hechahnipaxo hune' nan espíritu, maẍtaj haca' hune' chabilxa heyu. Lan̈an hechahnipaxo hune' nan cuybanile, maẍtaj haca' Tzoti' c'ul yet colbanile hechah yet jec'an̈ jalnoc'ojan̈ teyet. 5Ha' huntek'an ebnaj chal isba ischejabo Comam Jesucristo bay tzujanex tu', mach ec'balo yelapno ebnaj insatajan. 6Waxan̈ca mach c'ulo intzotelan, yaja' ha' tzet wohtajan caw niman yelapnoj. Sunil tzet quinec'an inwatx'ehan texol ha' chalniloj tato caw ay inhelanilan. 7Hayet wec'an walnoc'ojan Tzoti' c'ul yet colbanile texol machi nich'ano tzet ink'anilojan teyet. ¿Tom waco inmulan yin̈ haca' tu'? Wal xin wiyo inbahan yun̈e heyinican̈ heba. 8Hayet inmunlahan texol yet wec'an walnoc'ojan Tzoti' c'ul yet colbanile, ha' huntek'anxa ebnaj juẍta nan con̈obal, ha' ebnaj colwa win̈an yun̈e yec' wuhan texol. 9Hayet wec'an texol, ay tiempo ay tzet ye tu' ti' caw ocnico wuhan, yaja' machi hunujex bay ink'anan nich'ano tzet ye tu'. Wal xin ha' ebnaj juẍtaj ay bey Macedonia apni inc'atan̈an, ha' ebnaj ak'ni tzet ocnico wuhan. Caw machi hunujex bay ink'anan hunu tzet ye tu', hactic'apax tu' chiwute inbahan tinan̈. 10Ha' isyelal Comam Jesucristo ayco win̈an, yuxin chiwalan tato matzet ink'anan yet wec'an texol hex wuẍta ay yul ismajul Acaya; ha' hune' tu' ayco istzalabalo inc'ulan. Hune' tzalahilal tu' machi mac chiinilo wetan. 11¿Tom mach ayoco wanmahan teyin̈ yuxin hac tu' walnihan? ¡Machoj! Wal xin yohta Comam Dios tato caw ayco wanmahan teyin̈. 12Yaja' hune'n̈etic'a ha' chiwutehan texol haca' yet yalan̈tocanoj. Chiwutehan haca' tu' yun̈e mach chiwak'an yub ebnaj chihalni tato lahan comunilan̈ yebi, cat yinican̈ isba ebnaj. 13Ha' ebnaj tu' ton̈e chisbalico isba ebnaj ischejabo Comam Jesucristo. Chak'ni subchaho ebnaj anma yin̈ tzet chala, chutenico isba ebnaj ischejabo Comam Jesucristo. 14Yaja' hune' chiswatx'e ebnaj tu' mach chic'ay coc'ul jilni yuto hac tu' chute naj matzwalil; chuteco isba naj c'ulal haca' ebnaj ángel. 15Yuxin mach chic'ay coc'ul ta chutepaxo isba ebnaj tu' haca' mac chicuyni istoholal, yuto ischejab naj matzwalil ye ebnaj. Yaja' chischah ebnaj tu' isya'tajil haca'tic'a istx'ojal chiswatx'e. 16Wal tinan̈ xin chiwalpaxtojan teyet hunelxa, mach locohojinan, yaja' ta ayex chetxumu tato locohinan xin, chahwe heyabe' tzet chiwalti'an. Haca' hunu mac mach chistxumu yin̈ tzet chala, hac tu' chu winican̈ inbahan nich'anoxa, haca' huntek'an ebnaj chican̈ isba ischuquil. 17Ha' huntek'an chiwaltojan teyet ti', maẍtaj Comam Dios chiak'ni wala'tojan. Haca'ojtam mach chintxuman yet chiwalnitojan teyet, yuto ton̈e chiwican̈ inbahan chiwalnitojan hune' ti'. 18Tzetc'a ebnaj chican̈ isba yin̈ tzet chiswatx'e, haquintu'an chiwican̈ hanic'o inbahan haca' chute ebnaj tu'. 19Caw helanex heyalni, yaja' cheyak' techaho tzet chal ebnaj mach c'ulo tzet chiswatx'e teyin̈. 20Ay ebnaj chexlan̈ni yu heyak'ni cheja' heba tet, cat yinicanic'o ebnaj sunil tzet ayex. Caw yahawilxa chute isba ebnaj teyin̈, chexyak'nipaxo subchaho ebnaj. Chexisyahni ebnaj, chiocpaxo yin̈ isnabal ebnaj ispak'nilto hesat. Wal hex ti' xin cheyak' techaho sunil tzet chexyute ebnaj tu'. 21Wal xin chintx'ixwihan walnitojan teyet yuto han̈on̈ti'an̈ caw tz'on jute cobahan̈ texol, mach haca' yute isba ebnaj tu' teyin̈. Yaja' ta chican̈ isba ebnaj tu', haquinpaxtu'an chiwipaxocan̈ inbahan. Hayet chiwalnihan hune' ti', haca'tan̈e mach tz'ajano yul inwi'an chiwalnihan. 22Ebnaj tu' Hebreo ebnaj, haquinpaxtu'an Hebreo inan; Israel ebnaj, haquinpaxtu'an, Israel inan; yin̈ naj Abraham titna ebnaj, haquinpaxtu'an, yin̈ naj Abraham tu' titnajinpaxojan. 23Ischejab Comam Cristo ye ebnaj yalni, walinan xin ec'balto ischejab Comam wehan sata ebnaj. Hayet chiwalnitojan huntek'an ti' teyet haca'ojtam mach chintxuman yin̈ tzet chiwalan. Wal haninti'an caw ec'balxa chinmunlahan sata ebnaj, tx'i'alxa el chinalaxictojan yul preso sata ebnaj. Ec'balxapaxo el chinmak'laxan sata ebnaj, tx'i'alxa el xin chielico incaman. 24Howel quinismak'an ebnaj wet Israelan, treinta y nueve tz'um wijan yu ebnaj hunta el. 25Oxel xin alaxayto te' c'ax win̈an, hunel xin quink'ojlaxcan̈an. Yet wec'an yin̈ inbelan, oxel to te' barco yich hayet ayinicojan yul te'. Ay hunel ti' xin, hune' tz'ayic yeb hune' ak'bal ayinicojan yiban̈ ha ha' yuto tocano te' barco yich ha'. 26Mach isbi hayel quinec'an yin̈ inbelan. Ay bay quinelicojan quinyijnitojan ha ha', ay bay quinelicojan incaman yu ebnaj elk'om, yeb yul isk'ab wet con̈oban, yebpaxo yul isk'ab anma nan con̈obal. Aypaxo bay quinelicojan incaman yulaj con̈ob yeb yulaj beh, yeb yiban̈ ha' mar, yeb xin caw quinelicojan incaman yul isk'ab ebnaj ton̈e chisbalico isba juẍtajoj. 27Ay bay caw quinsiquihan inmunlahan, wak'lenan isya'tajil. Tx'i'al el mach quinwayan, ay bay wijlehan n̈ohchahilal, yeb tajinti'al. Tx'i'al el mach quinwa'han. Ay bay xin wetapaxo inc'ulan yu chew, yeb tx'i'al el quincancanojan man̈ xilk'apehal. 28Mach han̈c'an̈eho huntek'an isya'tajil tu' wak'lenan, wal xin ayn̈etic'aco yin̈ inc'ulan yin̈ ebnaj juẍtaj ay yul hunun con̈ob. 29Yuto ta ay hunu mac maẍto chiyik' yip yin̈ yet Comam caw chiwik' bisc'ulalan yin̈, haca'tan̈e maẍto chiwik'paxo wipan chute innanihan. Ta ay ebnaj chietaxto isnabal yu hunuxa maca, caw chitac inc'ulan. 30Ta caw yilal chiwican̈ inbahan, chimwican̈ inbahan yin̈ huntek'an lan̈an walniti'an, yuto ha' huntek'an ti' chiyeniloj tato machi bin wipan. 31Ha' Comam Dios, Ismam Comam Jesucristo, ha' ay yet yalaxico ismay yin̈ sunilbal tiempo, caw yohta Comam tato caw yel chiwalan. 32Yet hunel, yet ayinic'ojan yul con̈ob Damasco, ischejni naj gobernador chimunla yinta naj rey Aretas tato chioc ismajomal isti' hunun ispultahil ch'en c'ub hoyanico yin̈ con̈ob tu' yun̈e intzablaxayojan. 33Yaja' quinalaxaytojan yul hune' motx yu huntek'an ebnaj juẍtaj, walaxiltijan yul isventanahil ch'en c'ub tu'. Hac tu' yu incolchahan yul isk'ab naj gobernador tu'.

will be added

X\