2 CORINTIOS 10

1- 2Hayin Pablo hin ti'an ay hune' tzet ẍwal teyetan. Ab' ẍhalot ta yet ayin te xolan, caw chuntal ẍwute hin b'aan, wal yet nahat ayinan, ab' can̈tajn̈e ye ẍwutean. Yin̈ sc'ulch'anil sc'ul Comam Cristo, chin k'an teyetan ta yet chin apnoj te xolan, mat yeẍtooj chin ye scan̈il we yin̈ hin chani hin b'a b'oj mactaj ẍhalni ta comonaln̈e chon̈ munlaan. 3Waltu' yeli anmaon̈, yaja' mat hacaoj ya'ni anma howal, mat hacojtu' ja'ni howalan. 4Haxca mataj hej ch'en ch'en yet howal yet satyib'an̈k'inal ti' ch'ocnicoj juan, to scan̈il ye Comam Dios ẍc'oji sc'ayniloj tzetet caw ay yip, ha' ẍmunla juan. Yuxin chu co c'ayniloj tzetet mat st'in̈aniloj chal anmaan, 5b'oj lolo'al ẍpahni yohtajn̈elax Comam Dios. Sunil tzet tx'oj nab'il yu anma, ẍjacoj yalan̈ yoj Comam Cristoan, yun̈e syijyen tzet chal Comam. 6Yet tz'ajnaoj he yijyen tzet chal Comam Cristo, ẍja'a' tz'a'oj sat mactaj mach sje sc'ul syijye'. 7I'wejiloj heyet yin̈ b'aytet st'in̈anil. Ta ay haywan̈oj mac te xol chal sb'a ta schejab' Comam Cristo, yilal xtxumnipaxiloj ta hayinti'an, hayin k'a' schejab' Comam wean. 8Waxan̈ca chin lolo'n̈e ninoj hin b'a yin̈ hune' hin chejb'anil wetb'i ti'an, yaja' machin tx'ixwian. Haxca ha' Comam Jahaw x'a'ni hune' hin chejb'anil ti'an yun̈e cam he lin̈b'an he b'a yin̈ Comam, matoj yun̈e hex wetantojan yuxin xa' Comam wetan. 9Mach sje hin c'ulan, ta cheyala' ta yu hex hin xib'tenan, yuxin hacti' walniayoj yul wum ti'an, machoj. 10Haxca ay mac ẍhalni ta yet ẍwanitoj hune' wum teyetan caw mak'b'il hin stzotel yul te'an b'oj chin̈e hin chilb'a hunuj tzetet xwalan, yaja' yet ayin te xolan, tolob' suctajn̈e ẍwutean b'oj mat helanoj hin tzotelan. 11Yaja' mac hactu' yalni, yilal yohtajn̈eni ta haca'tic'a hin tzotel yul wum ti'an yet nahat ayinan, hactu' ẍwute' paxan yet chin apnoj te xolan. 12Yin̈ caw yeli, mach sje co c'ul co lahb'a co b'a b'oj mac ch'anicoj smay. Hunk'aan tu' chacoj sucal yin̈ chaniatoj stel slahb'an sb'a b'oj hunk'aanxa yetb'i. 13Wal hayon̈ ti'an, mach jacoj co mayan, machca chon̈ palc'onan, haxca Comam Dios x'anicoj smalil b'ay ẍcachna co munlaan. Yuxin hat ta xcon̈ apni te xol yul con̈ob' Corinto tu'an. 14Yuxin mat ton̈c'aoj xjacoj co b'a te xolan. K'inaloj ta mach hunecoj xcon̈ apni te c'atan̈an, matmi yetoj ay co munla te xolan, yaja' hayon̈ b'ab'el xcon̈ apni te xolan, xjalni tzoti' c'ul yin̈ Comam Cristoan. 15Mat lan̈anoj jalni co b'a can̈yeal yin̈ smunil hunujxa anmaan. Mat lan̈anoj co palc'on yin̈ b'ay cachan co munil sye Comaman. Ha' jetan, to ẍjechma cam heya'ni yuluj he c'ulan, haxin̈wal yu he colwal chu jinitoj stzoti' Comam te satajtoj tu'an, yaja' tan̈e machon̈ palc'on yin̈ b'ay yeb'il jet yu Comam Diosan. 16Ẍtic'a jochean ta chon̈ hitztoj jala'c'oj tzoti' yet colb'anil tet anma te satajtoj tu'an, yaja' yin̈ machon̈ palc'on b'ay xax yichecoj hunujxa anma smunlayi yun̈e mach ẍco tz'aj co lolo'n̈e co b'a yin̈ smunil hunujxa anmaan. 17Ta ay mac choche ya'acoj scawxob'al sc'ul yin̈ hunuj tzetet, k'a' c'ul mi ta yin̈n̈e Comam Dios Jahaw ẍcawxi sc'ul. 18Mataj anma chal sb'a c'ulal k'a' c'ul, to ha' mac chal Comam ta caw ay smay, ha' k'a' c'ul.


Copyright
Learn More

will be added

X\