2 CORINTIOS 1

1Hayin Pablo hin ti'an, x'el yin̈ sc'ul Comam Dios apóstolin yin̈ Comam Cristo Jesúsan. Hayin b'oj ya' juẍtaj Timoteo chin tz'ib'n̈e hune' wum ti' teyet hex ayexcoj yin̈ yiglesia Comam Dios ay yul con̈ob' Corinto, b'oj mactaj yet-xa Comam ay yul scuenta Acaya. 2Ya'ab' Comam Dios co Mamwej, b'oj Jahaw Jesucristo sc'ulch'anil sc'ul teyet, b'oj ak'anc'ulal. 3Jala' tzoti' c'ul yin̈ Comam Dios, sMam Jahaw Jesucristo, co Mam ẍtic'a tz'a' sc'ul jin̈, co Dios ch'a'ni yak'lob'al co c'ul. 4Ha' Comam ch'a'ni yak'lob'al co c'ul yin̈ hej sya'tajil ẍjila, yun̈e chu ja'ni pax yak'lob'al sc'ul hej jetb'i ch'ilni sya'tajil. Haca'tic'a yak'lob'al co c'ul xco cha tet Comam, hactu' ja'ni pax yak'lob'al sc'ul heb'ya' jetb'i aycoj yin̈ sya'tajil. 5Haca' jilni hune' niman sya'tajil b'oj Comam Cristo, hactu' co chanoj pax hune' niman yak'lob'al co c'ul cha' Comam jet. 6Ha' sya'tajil lan̈an jilni ti'an, ha' ch'a'ni yak'lob'al he c'ul yun̈e he colchayi. Cha' Comam yak'lob'al co c'ulan, yun̈e he chani pax yak'lob'al he c'ul, yun̈e chu stecha yin̈ nimanc'ulal hej sya'tajil heyu haca' hune' b'ay lan̈an jec' ti'an. 7Ẍcawxi co c'ulan to ẍtechaoj sya'tajil heyu. Hexti' lan̈an yec' ya' heyanma haca' xu jilni sya'tajilan, yuxin che chab' pax yak'lob'al he c'ul haca'tic'a xu co chani yak'lob'al co c'ulan. 8Hex wuẍtaj hex wanab', ẍjal teyetan hantaj sya'tajil xjil b'et Asiaan. Hune' ilweb'al caw ya'taj xjilcanojan, ham jalnian ta mach ẍtechaoj juan, hasta xjalan ta matxa chon̈ colchaojan. 9Hat mi chon̈ camojcan b'etu' jalnian. X'ec'toj hune' tu' jin̈an yun̈e co txumnilojan ta machu scawxi co c'ul jin̈, to yin̈n̈e Comam Dios co Mam ẍpitzc'ancan̈ hej camom, chu scawxi co c'ul. 10Yin̈ caw syelal ha' Comam xcon̈ colni tet hune' niman huchan b'ay etza xcon̈ caman, ẍto cam on̈ scolo' Comam tetan, ẍcawxi co c'ulan to chon̈ to scolo' Comaman. 11Ta chex colwa heya'ni heyoración jin̈an b'oj yoración hunk'aanxa heb'ya', tx'ihal mac ch'a'noj pax yuch'antioẍ tet Comam yu sc'ulal cha'a' jetan. 12Ay hune' tzet ch'a'ni tzalaoj co c'ulan, hune' tu' janma ẍhalnian to saj co satan, mach co mulan yet xcon̈ ec' te xolan, haca'tic'a xu jehc'oj xol hunk'aanxa anmaan. Hune' ti' matoj yu hunuj stz'ajanil co c'ulan yuxin c'ul ẍjute co b'aan, to sc'ulch'anil sc'ul Comam Dios ẍcolwa jin̈an. 13- 14Yet xjanitoj hune' hum teyetan, mach hunujxa tzet xjayoj yul te'an to han̈c'a tzet ixtan̈ he txumni, ha' xco tz'ib'n̈ean. Lan̈an ichi he txumniloj tzet jean, yaja' ẍwochean ta che txum yin̈ c'ul, yun̈e yet chuluj pax Jahaw Jesús chex tzalaoj jin̈an haca' co tzalaoj pax teyin̈an. 15Haxca to scawẍi hin c'ulan, yuxin hactu' xwute walnian, ta b'ab'el chin to hex wila'an haxin̈wal cayel chin ec'na yin̈ lemb'il te xolan, yun̈e he chani sc'ulal Comam Dios. 16Xwalan ta chin ec' hex wila' b'ab'elan yet chin toj Macedoniaan. Yet chin meltzooj b'etu'an, cat wec'oj hex wilnoj paxan. Waltu' chex colwa win̈ yin̈ hin toj Judeaan. 17Yet ẍwalni hune' ti'an, ¿tom mat suniloj hin c'ulan ẍwalni heyalnian? ¿Tom cheyala ta chin etli haca' chute comon anmaan? Ta lan̈an walnian ta chin toan, yaja' lawitu' matxa chin toan, lek'tial mi ẍwalan. 18Yohtaj Comam Dios to mach hunecoj ẍjal teyetan: Ho' c'ultic'a, con̈ chian, yaja' mataj chal janmaan. 19Comam Jesucristo Sc'ahol Comam Dios xin tzotec'oj te xol b'oj ya' Silvanoan, b'oj ya' Timoteo, matoj lawi yalni Comam hunuj tzetet, lawitu' mach chij sb'a tzet chala, haxca Comam Cristo han̈c'a st'in̈anil x'ec' yala'c'oj. 20Yuxin ha' ẍjalni, hactu' chub', con̈ chi', smayoj Comam Dios ẍjala, haxca johtaj ta chija' sb'a yu Comam Cristo sunil tzet halteb'ilcan yu Comam Dios. 21Ha' Comam Dios chon̈ t'in̈b'ancoj yin̈ Comam Cristo, ha'tic'a Comam xcon̈ sic'lenpaxoj, 22xanicoj yechel janma yu Comam Espíritu Santo, yun̈e syeniloj ta ẍco chab' tzet xhalte Comam jet. 23Yohtaj Comam Dios to yun̈e mat wa'a tacoj he c'ulan, yuxin maẍto chin apni Corinto tu' haca' xu walni teyetan. 24Mat hayon̈oj ẍjala' teyetan tzet chu heya'ni yuluj he c'ul haxca lin̈anexxa yin̈ hune' b'ay cheya' yuluj he c'ul ti'. Ton̈e ẍjoche colwaoj teyin̈an yun̈e he chani yak'b'il tzalalal yin̈ heyanma.


Copyright
Learn More

will be added

X\