1 TIMOTEO 6

1Hal pax tet mac aycoj yalan̈ schejb'anil naj yahaw munil, ayojab' yelapnoj ye naj b'ay ẍmunla tu' yu, yun̈e mach tx'oj ẍhal-lax yin̈ Comam Dios b'oj yin̈ cuywab'al lan̈an jalnic'oj ti'. 2Ta ayxacoj naj yahaw munil tu' yin̈ Comam, matoj haxca hactu' mat yijyomoj chute sb'a ya' juẍtaj munlawom tu'. To ha' yet ya', k'a' yijyomto chute sb'a ya' haxca yetb'ixacoj sb'a heb'ya' yin̈ Comam, b'oj caw xahanojab' chil sb'a heb'ya'. Hactu' chu scolwa ya' yin̈ ya' ay smunil tu'.Hunk'aan ti' cha cuyu, chawiptzen heb'ya' yin̈. 3Ta ay anma nan cuywab'al chalic'oj, to mat lahanoj b'oj hune' scuywab'al Jahaw Jesucristo, matca lahanoj b'oj stoholal ch'a'lax co cuyu', 4hunk'aan anma tu' can̈ ye yalni, yaja' matzet yohtaj. Tx'ojn̈etic'a nab'il yu, ton̈e choche steye'coj anma yin̈ tzet yelapnoj ye tzoti'. Hat ch'ichiloj schiwacoj sc'ul anma yin̈ yetb'i, cha'nican̈ howal, ton̈c'a tx'oj stzotel tet yetb'i, ton̈c'a chi'coj yetoj yin̈ yetb'i. 5Mat tan̈b'enoj ya'nicoj howal yin̈ yetb'i, huchanaj xatoj yul swi', matxa st'in̈anil stzoti' Comam Dios yin̈. Yu ay yala' ẍk'alomb'i yin̈ co cuyb'anil cha'lax jet, yuxin chacoj sb'a yin̈. 6Waltu' yeli, caw ay tzet ẍji'a' yin̈ co yijyen hune' cuyb'anil ch'a'lax jet, ta ẍco ta'wecoj jib'an̈ to chon̈ tzala yin̈ nian yec'b'al ju, 7haxca matzet ib'il ju xcon̈ hul satyib'an̈k'inal ti', machca tzet ẍji'atoj jin̈ chon̈ camoj. 8Ta ayna tzet ẍco lo b'oj xil co k'ap, c'ojb'ilnayi. 9Yaja' mac choche ẍk'alomb'i, sub'utaj slec'tx'an̈n̈en sb'a yin̈ yochen hej tzetet mach yelapnoj yeyi, yu yochentoj hunk'aan tu' ch'ay yin̈ tx'ojal cat yetantoj sb'a. 10Haxca yu jochentoj ch'en melyu, tzantzet xtx'ojal ch'ichican̈ jin̈. Ay heb'ya' jetb'i chiloj sb'a yin̈ tzoti' b'ay ẍja' yuluj co c'ul yu spalc'on yochentoj ch'en melyu, yuxin tx'ihal sya'tajil chul yib'an̈. 11Yaja' walach Timoteo schejab' Comam Dios haweyi, elan̈ tet sunil hunk'aan tx'ojal ti'. Say hawila' st'in̈anil, acoj Comam yin̈ hawanma, a' yuluj ha c'ul yin̈ Comam, oche Comam b'oj hawet-anmail, niman chawute ha c'ul b'oj huncuentan̈e chawute ha b'a. 12Itij hawanma ha lin̈b'an hawa'ni yuluj ha c'ul, yachb'iln̈etic'a ha k'inal mach stan̈b'al hawu, haxca yu ha chani hune' tu', cach yawte Comam Dios. Ha'tu' b'ay xa yeloj a b'a yin̈ c'ul yin̈ sat sunil anma. 13Tinan̈, yin̈ sat Comam Dios ch'a'ni sk'inal sunil tzetet, b'oj yin̈ sat Comam Cristo Jesús, c'ul xu sta'wi yin̈ sat naj Poncio Pilato, ẍwa' ha chejb'anilan: 14Cha yijyen tzet ẍwal ti'an yin̈ mach ninoj tzet cha man̈c'o, haxin̈wal mach ninoj b'ay chu ha maylaxoj yet tx'ixtan̈wojcan̈ Jahaw Jesucristo. 15Hune' ti' chija' sb'a yet' chuluj stz'ayicalil b'ay chal sc'ul Comam Dios. Caw sak'al yet Comam, han̈c'a Comam can̈ yeyi, ha' Comam Rey yib'an̈ sunil heb'naj rey, Yahaw yib'an̈ sunil heb'naj yahaw. 16Han̈c'a Comam mach stan̈b'al, ch'ehc'oj yin̈ hune' sajilk'inal b'ay mach mac chu shitzicoj sc'atan̈. Comam Dios mach hunuj mac xax ilni, machca mac ẍc'oji yilni. A'laxojab' smay Comam b'oj scan̈il ye yin̈ stohb'alk'inal. Amén. 17Mac ay sk'alomal satyib'an̈k'inal ti', hal tet ta mat lolo'oj chute sb'a, machca ẍcawxi sc'ul yin̈ sk'alomal tu', haxca ec'omn̈e yeyi. Ha' yet, cawxojab' sc'ul yin̈ Comam Dios, Comam ch'a'ni sunil tzetet jet yin̈ caw tx'ihal yu yocnicoj ju yin̈ c'ul. 18Hal tet heb'ya' ta mach chechemn̈e sb'a heb'ya', ta chacoj heb'ya' yin̈ sc'ul scolwa yuni tzetet c'ul, ta cha' heb'ya' hanic'oj tzetet ay tet mac matzet aya. 19Ta hactu' sb'elwi heb'ya' yuni tzetet c'ul, caw ay sk'alomal heb'ya' lan̈an scutxb'an yet schab'toj tu', cat schanoj heb'ya' k'inal yin̈ caw syelal. 20Hachti' Timoteo, caw c'ul chawute ha yan̈en hunk'aan cuyb'anil x'alaxcoj yul ha k'ab' tu'. Machawab'etoj hej tzoti' tx'oj b'oj sucal tzoti' chal anma. Machca chawab'etoj tzet chal heb'naj caw ay yohtajb'al yalni, yuxin ẍpaq'uic'oj heb'naj yin̈ cuywab'al st'in̈anil yeyi, 21haxca heb'ya' jetb'i x'oc tzujnuj yin̈ hune' scuywab'al heb'naj tu', xiloj sb'a heb'ya' yin̈ cuywab'al b'ay ẍja' yuluj co c'ul.Ya'ab' Comam Jahaw sc'ulch'anil sc'ul teyet.


Copyright
Learn More

will be added

X\