1 TIMOTEO 6

1Chiwaltojan tawet yin̈ ebnaj lok'bil yu ispatrón yu yoc chejaboj. Ayojab yelapno yahaw ebnaj tu' yul sat, haxinwal mach chibuchlax isbi Comam Dios yebpaxo xin cuybanile chijalan̈. 2Yaj tato ay huno mac ayxaco ispatrón tu' yul isk'ab Comam Dios, machojabtaj yu tu' yuxin matxa yelapno naj yul sat, wal xin yilal isyijen naj chejab tu' tzet chal ispatrón yuto yuẍtaxa isba iscawan̈il yin̈ Comam. Caw c'ulojab chiyu ismunla naj chejab yul isk'ab ispatrón, yuto naj chichahni hune' munil tu' ayxaco yul isk'ab Comam, juẍtaxa yehi, yeb caw xahan ay ju. Ha' huntek'an tu', yilal hawoc hacuyni cat hawalni tato yilal isyijelaxi. 3Tato ay anma nan cuybanile chiyalic'oj, mach lahano yeb cuybanile yet Comam Jesucristo caw yel chala, yeb mach lahano yeb hune' caw tohol ak'bil cocuyu', 4huntek'an anma tu', caw can̈ye yalni, yaj xin caw matzet yohtaj. Huntek'an anma tu' ton̈e chiyoche isteye'co anma yin̈ tzet yelapno ye tzoti'. Ha' ton yin̈ tu' chi'ichico chichonc'ulal, yeb howal, yeb buchwal, hac tu' xin chu yoc cabc'ulal. 5Maẍtic'a chisbej anma tu' yak'ni howal, caw matxatic'a c'ulu yul iswi', matxa isyelal Istzoti' Comam Dios ayco yin̈. Ha' hune' nabil yu anma, ha' ton yik'ni niman melyu yin̈ cuybanile chabilxa ju. Mach chahunba haba yeb huntek'an anma tu'. 6Yaja' yin̈ caw yeli, niman isc'ulal chicochah yin̈ cuybanil chahbilxa ju tu', yaj xin ta chijak' tzalaho coc'ul yin̈ tzet ay yul cok'ab. 7Wal xin, matzet ik'bil ju yet copitzc'a yul sat yiban̈k'inal ti', yeb xin matzet chijipaxto jintaj yet chon̈camtoj. 8Yuxin ta ay tzet chicolo yeb xin ta ay xil cok'ap, jak'a' tzalaho coc'ul. 9Yuto ha' mac choche chioc k'alomal, subuta yayc'ay yul isk'ab istx'ojal, cat yochento tzettaj ye tu' machi nino isc'ulal chiswatx'e yin̈, cat yochenpaxto ismachiswalilal. Hac tu' chu yetaxcanto isnabal, cat isc'aycantoj. 10Yuto ta chijaco janma yin̈ ch'en melyu, ha' ton xe' sunil istx'ojal. Ay ebnaj juẍta ti' yu yaco yanma yin̈ ch'en melyu yilo yanma yin̈ Comam, istitcano niman bisc'ulal yiban̈ ebnaj. 11Wal hach ti' wuẍta Timoteo, yet Comam Dios hawehi. Elan̈ tet huntek'an istx'ojal tu', ha' isc'ulal chasayiloj. K'an yip hawanma tet Comam Dios. Tohol chawute habelwi yin̈ Comam yin̈ sat anma. Xahan chawil hawet anmahil, ijle isya'tajil chi'ay tawiban̈. Chewojab chawute haba. 12Aco yin̈ hac'ul halahnico hawanico hawanma yin̈ Comam Dios, caw yachyon̈e chawuco yin̈ hune' hasabehal, ha' ton hak'inal mach istan̈bal. Yu hune' tu', yuxin awtebilach yu Comam Dios, yeb xin caw c'ul yu hatak'wen yin̈ sat tx'i'al ebnaj tato ha' Comam Jesús, ha' Jahawil yehicoj. 13Wal tinan̈ yin̈ sat Comam Dios, chi'ak'ni isk'inal sunil tzettaj ye tu', yeb xin yin̈ sat Comam Jesucristo, Comam halni isyelal sata naj Poncio Pilato, chiwaltojan hachejbanil. 14Yilal hayijen huntek'an cuybanile ti'. Machojab nino tzet chaman̈c'o, haxinwal machi baytet yin̈ chaẍcachlaxi masanto yet chihul Comam Jesucristo hunelxa. 15Wal xin chihul hune' tiempohal haca' chiyoche Comam Dios, cat yijni isba huntek'an ti', yuto yul isk'ab Comam Dios ay sunil. Caw sak'al yet Comam, isreyal ebnaj rey ye Comam, yahawilpaxo ebnaj yahawil ye Comam. 16Han̈ech'an Comam Dios machi bak'inal chicami. Ay Comam xol hune' issajilk'inal bay machi hunu mac chiyu ishitzico isc'atan̈. Maẍto hunu mac xa'ilni yin̈ Comam, machipaxo mac chu isk'oji yilni Comam. ¡Bitn̈elaxojab isbi Comam yu ishelanil yeb yu yip ay yin̈ sunilbal tiempo! ¡Hacojab tu'! 17Ebnaj juẍta ay isk'alomal yul sat yiban̈k'inal ti', hal tet ebnaj tato mach chislolo'n̈e isba ebnaj. Machojab xin chaco yanma ebnaj yin̈ isk'alomal, yuto hune' k'alomal tu' chitan̈iloj. Wal xin yak'abico yanma ebnaj yin̈ Comam Dios. Comam ch'ak'ni sunil tzettaj ye tu' jet yin̈ caw niman yu isc'ulalo jin̈. 18Hal tet ebnaj tato caw c'ul chute isc'ul ebnaj. Yak'abico ebnaj yin̈ isc'ul iswatx'en isc'ulal, colwahojab ebnaj yin̈ anma matzet aya, machojab ch'ok' ebnaj yak'ni. 19Ta chisbeybaln̈e ebnaj isc'ulal, ay isk'alomal ebnaj lan̈an iscutxban satcan̈, cat xin ischahni hune' k'inale mach istan̈bal. 20Hach Timoteo, caw chawil haba yin̈ tzet abebilico yul hak'ab. Mach chawabeto huntek'an tx'oj tzoti' machi nino isc'ulal chak'a. Mach chawabepaxto huntek'an helanile maẍtaj yecoj chal ebnaj chon̈cajni yu chijalic'o isyelal. 21Ebnaj oc tzujno yinta huntek'an cuybanile tu', xaisheq'uilo isba ebnaj yin̈ isyelal. Ha'ojab Comam Dios chiak'ni ak'anc'ulal tawet. ¡Hacojab tu'!

will be added

X\