1 TIMOTEO 5

1Macha may heb'ya' icham winaj yet ay tzet mataj chu, ak'anc'ulal chach tzotel tet heb'ya', haca' ha tzotel tet ha mam hactu' ha tzotel tet heb'ya'. Hactu' heb'naj tzehtaj, c'ulch'an ha tzotel tet heb'naj haca' hunuj caw hawuẍtaj. 2Hactu' tet heb'ya' comi', ak'anc'ulal chach tzotel tet heb'ya', haca' ha tzotel tet ha mi'. B'oj tet heb'ix k'opotaj, c'ulch'an ha tzotel tet heb'ix, hacojtam hunuj hawanab' b'ay chach tzoteli, yin̈ mach ninoj xtx'ojal nab'il hawu. 3Colwaan̈ yin̈ heb'ix camnajxa yichamil, mach b'ay ẍcawxi sc'ul. 4Yaja' ta ay yunin heb'ix, maca yihtxiquin heb'ix, ha' hunk'aan tu' yet ay scolwa yin̈ heb'ix haxca uninale yet ay scolwa yin̈ smam smi' yun̈e spajtzen yocb'al anmail. Hune' tu' caw c'ul, haxca hactu' chal sc'ul Comam Dios. 5Ha' heb' ix b'ay scha colwa iglesia, ha' heb'ix camnajxa yichamil mach b'ay ẍcawxi sc'ul, yin̈n̈e Comam Dios ẍcawxi sc'ul heb'ix, b'oj mach sb'ejcan heb'ix ya'ni yoración tz'ayic ak'b'al. 6Yaja' heb'ix camnajxa yichamil, ch'oc saya' swinaj, waxan̈ca itzitz snimanil heb'ix, yaja' yul sat Comam Dios camnajxa heb'ix. 7Hal hunk'aan chejb'anile ti' tet heb'ya' ayxacoj yin̈ Comam, haxin̈wal mach xtx'ojal ẍhal-laxoj yin̈ heb'ya'. 8Yilal co colwa yin̈ mac ayto ju cob'a b'oj, yaja' ha' ti' k'a' yilal, mac ay yul jatut. Haxca ta machoj, matzet chaliloj scuywab'al Comam Cristo jet, k'a tx'oj hon̈ tom sataj mac maẍto cha' yuluj sc'ul yin̈ Comam Dios. 9Yin̈ heb'ix camnajxa yichamil b'ay ẍcolwa iglesia, caw yilal han̈c'a heb'ix tz'ajanxa 60 hab'il ch'alaxcoj yin̈ b'isb'al, tan̈e mach sucal say heb'ix yin̈. 10Chu yalaxcoj heb'ix yin̈ b'isb'al ta c'ul sb'elwub'al heb'ix yalan̈to tu':C'ul mi xu ya'ni ocoj anmail heb'ix yunin, xcha heb'ix mac x'apni yatut, xa' heb'ix ha' ha' xtx'ahb'aniloj yoj heb'ya' jetb'i x'ec' yatut, xcolwa heb'ix yin̈ mac x'ec' ya' yanma, sunil mi hej tzetet c'ul swatx'e heb'ix. Ha heb' ix ti' yet ay yoc yin̈ b'isb'al. 11Machawacoj heb'ix k'opoto camnajxa yichamil yul b'isb'al, haxca ay heb'ix han̈c'a b'aytet chal sc'ul ha' choche yub', cat yin̈tajn̈en heb'ix Comam Cristo, han̈c'a tzet chu smohyi heb'ix hunecxa, ha' aycoj yin̈ sc'ul. 12Hactu' chu scan heb'ix tx'ojal, haxca matxa chu syijyen heb' ix tzet xta'we yib'an̈. 13B'oj hunxa, sti'lajn̈ah xan̈em choche heb'ix ec'oj sb'a, cat yisalican̈ heb'ix. Matmi ton̈eoj ch'isali heb'ix, to ẍk'ayiloj heb'ix halo' k'umale, b'oj chanicoj sb'a heb'ix xol hej tzoti', cat yoc heb'ix ioc'oj tzoti' mat yetoj ay yalnic'oj. 14Yuxin ẍwochean ta ẍmohyi heb'ix k'opoto camnajxa yichamil. Ehojab' yunin heb'ix, ya'ab'coj heb'ix spixan yatut, yun̈e mach ẍhal-lot co k'umal yu anma aycoj sowal jin̈. 15Haxca ayxa heb'ix xax yiloj sb'a yin̈ Comam, xtocan heb'ix yin̈ naj matzwalil. 16Ta ay hunuj ya' comi' ay hunuj ix camnajxa yichamil ayto yu sb'a ya' b'oj ix, colwaojab' ya' yin̈ ix, haxin̈wal mach ch'oc ix yijatzoj iglesia. Ha' b'ay yetwanoj scolwa iglesia, yin̈ heb'ix caw yeli mach b'ay ẍcawxi sc'ul. 17Heb'ya' anciano c'ul yijb'an iglesia ẍto cam alaxcan̈ stohol heb'ya'. K'a yilal ya'lax yak'b'il stohol heb'ya' lahb'ilc'oj smunla yin̈ scuywa yin̈ stzoti' Comam. 18Haxca chal Yum Comam Dios: Macha c'al sti' no' buey xan̈niltij sat ixim trigo, B'oj chalayoj yin̈ hune'xa:Naj munlawom, yet ay schani naj stohol. 19Mach ton̈c'a chawab'etoj tzet chal mac ch'a'wic'ule yin̈ hunuj ya' anciano, ta mach cawan̈ oxwan̈oj mac cha' sb'a yin̈. 20Ta ay hunuj ya' anciano yehn̈e yanicoj smul, yilal ha cachni ya' yin̈ sat sunil heb'ya' jetb'i yun̈e ẍnanon heb'ya' sunil. 21Yin̈ sat Comam Dios b'oj yin̈ sat Comam Cristo Jesús b'oj hej ángeles sic'leb'il yu Comam, chin tak'e hunk'aan chejb'anil ti' tawetan ta yilal ha yijyeni, mach mac xahan hinan hawu. 22Mach ton̈c'a niman chawa' schejb'anil hunuj maca ta maẍto cha pich'iloj tzet yeyi, haxca ta machoj, taj chach tz'atoj yin̈ smul. Nann̈e hawu yin̈ hej tzetet tx'oj. 23Haxca naun̈e ẍyab'i ha c'ul macha wuc' ha nab'a' ha', vino ha' chawuc' ninoj. 24Ay mac caw ixtan̈ jilni smul yalan̈to maẍto chitij Comam Dios cuenta yin̈, ay mac ẍto yi'a'tij Comam scuenta yin̈ catto yixtan̈woj smul. 25Hactu' ye pax anma chu hej tzetet c'ul ixtan̈ yil-laxi. Taca ay mac mat ixtan̈oj ye sc'ulal tu' tinan̈, masan ch'ixtan̈woj.


Copyright
Learn More

will be added

X\