1 Yet chachcachwa yin̈ ebnaj ichamtaxa, mach howo chu hatzotel tet ebnaj, wal xin hak'anc'ulal chaẍtzotel tet ebnaj, haca' chiyu hatzotel tet hamam. 2 Hac pax tu' tet ebix janab ixnamtaj, c'ulch'anojab chiyu hatzotel tet ebix, haca' chawute hatzotel tet hami'. Yebpaxo tet ebix k'opotaj, c'ulojab chiyu hatzotel tet ebix hacojtam tet hunu hawanab chaẍtzoteli. Machojab nino istx'ojal nabil hawu. 3 Colwahan̈ yin̈ ebix camnaxa yichamil, ebix machi bay chicawxi isc'ul. 4 Ta ay ebix hun ix tu' ay yunin, maca yunin yunin, ha' huntek'an tu' yet ay iscolwa yin̈ tzet chiocnico yu ebix. Yuto ebnaj uninale yilal isyijen ebnaj iscolwahi, yeb ispajtzen tet ismam maca ismi', yuto caw c'ul hune' tu' yul sat Comam Dios, caw chitzala Comam yin̈. 5 Yaj wal hunu ix hunix caw ischuquilxan̈e matxa mac yin̈ chicawxi isc'ul, cachann̈e yin̈ Comam Dios chicawxi isc'ul, yeb xin mach chisbej ix istxahli tet Comam ch'ec' tz'ayic, ch'ec' ak'bal, chu iscolwa ej yuninal Comam Dios yin̈ ix. 6 Yaj tato ay huno ix hunix chiec' yin̈ istx'ojal, mach chu iscolwa yuninal Comam yin̈ ix, yuto waxan̈ca itzitz isnimanil ix, yaj wal yul sat Comam Dios camom ix. 7 Halpax huntek'an cuybanile ti' tet ebnaj juẍtaj, yeb tet ebix janab, haxinwal machi huno istx'ojal chihallaxico yin̈ sat. 8 Ta ay huno juẍtaj mach chicolwa yin̈ mac ayto yu isba yebi, yeb ta hac tu' chutepaxo yul yatut, hune' mac tu' matxa chu yalni isba yuninalo Comam Dios, yeb ec'na machiswalil sata anma maẍto chichahni Istzoti' Comam yul yanma. 9 Ha' ix hunix bay wal iscolwa yuninal Comam Dios, ha' ix tz'ajanxa yin̈ sesenta habil yeb xin ta mach issay ix hunuxa winaj yet aytoc'o yichamil. 10 Yeb tato ohtabil isc'ulal iswatx'e ix yet yalan̈tocanoj, ta c'ul yu yak'ni ch'ibo ix yunin, yeb tato yak' ix bay chiway anma ec' isc'atan̈, yeb tato istx'ah ix yoj yuninal Comam ec' isc'atan̈, yeb xin ta colwa ix yin̈ anma ya'ta yecoj, yeb xin ta isc'ulaln̈etic'a iswatx'e ix; ta hac tu' chu iscolwa yuninal Comam Dios yin̈ ix. 11 Wal ebix hunix k'opoto mach chu hawanico ebix yin̈ istxolal isbi ebix hunix, yuto ay ebix ha' tzet choche isc'ul ha' chiswatx'e, chisbejnicano ebix hune' munil yet Comam Jesucristo, yuto ha' ismohyi ebix ha' ayco yin̈ isc'ul. 12 Hac tu' chu iscancano ebix tx'ojal cat isman̈c'oncan̈ hune' munil chabilxa yu tu'. 13 Yeb istila xan̈e n̈a ch'ec' ebix choche, cat isk'ayilo ebix isahil. Maẍn̈etaj hune' tu', wal xin chik'aypaxilo ebix halo k'umal, chanito isba ebix xol tzettaj ye tu' yeb tzoti' mach chiyoc ebix yin̈. 14 Yuxinto chiwochehan tato chimohyi ebix hunix k'opoto, ayojab yunin ebix cat yoc ebix yilno yatut; haxinwal machi bay chicawxi anma chon̈cajni yin̈ Istzoti' Comam Dios. 15 Chiwaltojan huntek'an ti' tawet yu ay ebix hunix ti' xameltzoto yintaj. Haxa tzet chal naj matzwalil lan̈an isyijen ebix tinan̈. 16 Tato ay huno naj juẍtaj maca huno ix janab ay huno ix hunix yul yatut, yilal iscolwa yin̈ ix. Machojab chioc ix yijatzo yuninal Comam, haxinwal han̈e yin̈ ebix yin̈ caw yeli machi hunu mac bay chicawxi isc'ul, ha' bay chicolwa yuninal Comam. 17 Ha' ebnaj anciano c'ul yijbali yin̈ ebnaj juẍtaj, yilal niman yelapno ebnaj yul sat ebnaj juẍtaj sunil. Hactic'apax tu' ebnaj anciano chipujbanic'o Istzoti' Comam Dios, yebpaxo ebnaj chicuywa yin̈ Istzoti' Comam Dios yilal ischahni ebnaj istohol, yeb nimanojab yelapno ye ebnaj yul sat ebnaj juẍtaj. 18 Yuto chal Istzoti' Comam Dios haca' ti': “Mach chub heyak'aco yet isti' no' wacax yet chixan̈wi trigo no',” ẍiayoj. Chalnipaxoj: “Ha' ebnaj munlawom, yilal ischahni ebnaj istohol,” ẍiayoj. 19 Mach ton̈ehojabn̈etic'a chawabeto yin̈ tzet chal hunu mac chioc ak'oc'ule tawet yin̈ hunu naj anciano, wal xin yilal ay cawan̈ maca oxwan̈ testigo chihalni ta yeli. 20 Tato ay hunu naj juẍtaj maca ix janab mach chisbej yanico ismul, yilal hecachni yin̈ sat sunil yuninal Comam Dios, haxinwal chixiw sunil yuninal Comam yanico ismul. 21 Yin̈ sat Comam Dios yeb xin yin̈ sat Comam Jesucristo yeb xin yin̈ sat ebnaj yángel Comam Dios, chintak'etojan huntek'an chejbanile ti' tawet tato caw yilal hayijeni. Lahanojabn̈e chawute haba yin̈ ebnaj juẍta yeb ebix janab; machojab chawato haba yin̈ hunu maca. 22 Mach comono chawaco ismunil huno naj juẍta yul isk'ab yin̈ an̈e yalan̈to maẍto chawil isbeybal naj, haxataxca ch'elicoj hach hunach chawato haba yin̈ istx'ojal hune' mac tu'. Wal xin, machojab chawato haba xol tzet ye tu' machiswalil. 23 Chiwaltojan tawet yu hune' ya'c'ul nawn̈e chi'oc tawin̈, mach chiyu hawuc'ni ha ha' ischuquil, wal xin c'ul ta chawuc'paxo niẍtejo te' vino an̈il. 24 Wal yin̈ isbeybal anma, ay mac ti' ixtan̈ jilni ismul yet yalan̈to maẍto chi'illaxi tzet chielicoj. Ay mac xin hato yet chiillaxi tzet chielicoj catto yiẍtan̈wi ismul. 25 Hac pax tu' ye anma chiuten isc'ulal, ixtan̈ yillaxi, yaj ay mac ti' mach ixtan̈o isc'ulal lan̈an iswatx'en tinan̈, masantic'a chiixtan̈wiloj cat xin isyenilo isba, mach chicancano yin̈ ewantajil.
