1 TIMOTEO 4

1Yaj haban yalni Comam Espíritu Santo tato yet chihul islahobal tiempo, tx'i'al anma chilo isba yin̈ cuybanile bay ayco yanma, cat isto yinta huntek'an espíritu lek'ti'wom chiak'ni subchaho anma, yeb yin̈ cuybanile chitit yin̈ ebnaj ischejab naj matzwalil. 2Chabento anma tzet chal ebnaj lek'ti'wom chal isba c'ulal. Ha' huntek'an ebnaj tu' camnajilo isnabal, matxa chiyabeto tzet chal yanma. 3Huntek'an ebnaj tu' chiscach ebnaj ismohyi anma. Aypaxo huntek'an tzet chilolax ti' chiscach ebnaj islolaxi; yaja' xin ha' Comam Dios an̈ecano tzet chilolaxi. Han̈on̈ ayon̈xaco yul isk'ab Comam ti', yu coloni yuxin aycano yu Comam. Hayet chicoloni xin chijak' yuch'andiosal yin̈ tet Comam Dios, yuto johtaxa isyelal. 4Sunil tzet watx'ebil yu Comam Dios caw c'ul, yuxin mach chu jalni ta ay huno tzet ti' machiswalil. Sunil chu coloni, cachann̈e chijak' yuch'andiosal yin̈ tet Comam yet chicoloni. 5Yuto ha' Istzoti' Comam Dios chihalni ta sunil tzet iswatx'e Comam caw c'ulcanoj, yebpaxo cotxah chihalni c'ulal sunil tzet chicolo. 6Tato chacuycanto ebnaj juẍtaj yeb ebix janab yin̈ huntek'an ti', c'ulach ischejabo Comam Jesucristo chal tu', lan̈an hach'ib yin̈ caw c'ul yin̈ tzet chu janico janma yin̈ Comam, yeb yin̈ cuybanile caw c'ul chi-tic'a-hayije. 7Wal xin, mach chachah huntek'an yic'ti'al ebnaj jichmam machi nino isc'ulal chak' jet, yuto sucal tzoti'n̈e yehi. Ha'ojab yet Comam Dios chak'aytze haba yin̈. 8Yin̈ caw yeli yet chicok'aytzen coba jak'ni labanbo conimanil yin̈ hunu sajach chicolwa jin̈, yaja' ta chicok'aytze coba yin̈ yet Comam Dios, ec'balto c'ul, yuto chak' isc'ulal jet yul sat yiban̈k'inal ti', yeb yet ayon̈xa yul satcan̈. 9Ha' hune' chiwalti'an caw yeli, sunil anma yilal yanayto yul yanma. 10Yuxin ch'ahilo coc'ul jak'ni jip comunla yin̈ yet Comam Dios, yuto ha' Comam itzitz ayco yipo janma. Ha' Comam tu' Iscolomal sunil anma, yuxin ha' mac chichahni yul yanma, chicolchahi. 11Huntek'an chiwalti'an, ha' chawak' iscuyu' anma, cat hawalni tet tato chisyije. 12Machojab mac chalni tato matzet hawohtaj yuto tzehachto. Wal xin toholojab chawute haba haxinwal chayelo xol ebnaj juẍtaj tato hac tu' chiyutepaxo isba. C'ulojab hatzoteli, toholojab habeybal, yebpaxo xin xahan chawil hawet anmahil, yeb hayenilo yin̈ tzet chu janayto yul janma yin̈ Comam Dios, cat hapohnilo haba yin̈ istx'ojal haca' yuninal Comam Dios. 13Hayet maẍto chinapnihan, aco yin̈ hac'ul hawilni Istzoti' Comam Dios yabe' ebnaj juẍtaj yeb ebix janab. Chawiptzenpaxo ebnaj yin̈ Istzoti' Comam, cat hacuyni ebnaj yin̈. 14Caw mach chahinc'uln̈e hune' hahelanil ak'bil tawet yu Comam Dios, hune' hallaxilto yet yanayo isk'ab ebnaj anciano tawiban̈. 15Aco hawanma yin̈ sunil huntek'an chiwalti'an, haxinwal sunil mac chi'ilni tato hunun tz'ayic hawik'ni hawip yin̈ yet Comam. 16Chawil haba yin̈ tzet chawu yeb xin yin̈ tzet chiyu hacuywahi. Lahico habelwi yin̈ huntek'an ti'. Tato toholn̈etic'a chawute haba yin̈ chaẍcolcha yu, cat iscolcha sunil mac chi'aben tzet chawal tu'.

will be added

X\