1 TIMOTEO 4

1Hab'an yalni Comam Espíritu ta yet chuluj slahub'al tz'ayic, ay mac chi'aloj sb'a yin̈ cuywab'al b'ay ẍja' yuluj co c'ul ti'. Chocoj tzujnuj yin̈ scuywab'al yespíritu naj matzwalil sub'um anma, 2cat yab'enojtoj tzet chal anma lek'ti' ton̈e chal sb'a c'ulal, anma matxa chab'etoj tzet chal yanma. 3Chalni anma tu':Xiquiltaj co mohyi, b'oj ay ita xiquiltaj co loni, ẍi. Ita, ha' Comam x'anicanoj. Yuxin hayon̈ ẍja' yuluj co c'ul ti', johtajxa b'aytet st'in̈anil, c'ul co loni ita tu', ẍja'ni yuch'antioẍ tet Comam yu. 4Hantaj tzet swatx'ecan Comam Dios, c'ul, yuxin mach hunuj tzetet chu jalni ta xiquiltaj, tan̈e ẍja' yuch'antioẍ tet Comam yu. 5Haxca stzoti' Comam xalni ta mach xiquiltajoj, yuxin ẍjacoj yul sk'ab' Comam yet ẍja'ni yuch'antioẍ tet. 6Ta hactu' ha cuyni heb'ya' jetb'i yin̈ hunk'aan ti', c'ul hach schejab'oj Comam Cristo Jesús chaltu'. Chawiniloj hawet yin̈ tzoti' b'ay ẍja' yuluj co c'ul, b'oj yin̈ cuywab'al c'ul ayxa hawichitij ha yijyeni. 7Yaja' machawacoj ha nab'al yin̈ hej yic'ti'al hej ichmame tx'ojaln̈e chala, sucaln̈e yeyi. K'aytze ha b'a ha wehc'oj yin̈ c'ul yin̈ yet Comam Dios. 8Yeli c'ul co k'aytzen co b'ilen co nimanil yun̈e slab'anb'i yun̈e ay jip, yaja' ec'omn̈e ye hune' tu'. Wal co k'aytzen co b'a yin̈ c'ul yin̈ yet Comam, ha' k'a' c'ul, haxca chitij sc'ulal jib'an̈ tinan̈ b'oj yet schab'toj ti'. 9Hune' ti' caw yeli, sunil mac yet ay ya'ni yuluj sc'ul yin̈. 10Yuxin chon̈ munlayi ẍjitij janma jin̈, haxca yin̈ Comam Dios itzitz ẍjacoj scawxob'al co c'ul. Ha' Comam ch'a'ni scolb'anil sunil anma, yaja' k'a Scolomal to jet ye Comam hayon̈ ẍja' yuluj co c'ul yin̈. 11Ha ti' yet ay hawa'ni scuyu' anma, cha chejni yijyelaxoj. 12Tz'ajan chawute ha c'ul yun̈e mach mac chach b'uchni haxca tzehachto. Ehan̈c'oj yin̈ c'ul yun̈e chu ha yeni sc'ulal tzet chu hawehc'oj yin̈ sat heb'ya ayxac'oj yin̈ Comam, yin̈ ha tzoteli, ha b'elwub'al, hawochen hawet-anmail, hawa'ni yuluj ha c'ul yin̈ stzoti' Comam b'oj tzet chu hawehc'oj yin̈ mach ninoj ha tx'ojal. 13C'un hin apnian, acoj yin̈ ha c'ul hawalniltoj Stzoti' Comam Dios b'oj heb'ya' jetb'i, chawiptzen heb'ya' b'oj cha cuyni heb'ya'. 14Macha nahuln̈e ha yijyen hune' ha munil xa' Comam Dios tawet, hune' xhal-laxiltoj ta wib'an̈ yet xanicoj heb'ya' yancianoal iglesia sk'ab' yin̈ ha wi'. 15Acoj hawanma ha yijyen sunil hunk'aan tzet ẍwal ti'an yun̈e sunil mac ch'ilni ta lan̈an hawi'ni hawip yin̈ yet Comam. 16Tan̈e ha b'a b'oj nann̈e hawu yin̈ tzet chu ha cuywayi. Ta lin̈an hachn̈etic'a yin̈ hunk'aan ti', chach colchaoj b'oj ẍcolchaoj mactaj ch'ab'en tzet chawala.


Copyright
Learn More

will be added

X\