1 TIMOTEO 3

1Caw yel hune' ti', ta ay mac choche ch'oc yilomaloj scon̈ob' Comam Dios, caw eltich'an hune' munil tu'. 2Mac ẍchani hune' schejb'anil tu', mach ninoj xtx'ojal yul sat anma chala. Mach hunujxa ix say yin̈, ẍc'oji scachni sb'a, cha' hala' sb'a yin̈ st'in̈anil chu, ẍtic'a scha' anma ch'ec' sc'atan̈, b'oj helan scuywayi. 3Yocheb'al mach ch'uq'ui, matca a'omoj howal, to c'ulch'an sc'ul chala, huncuentan̈e chute sb'a, b'oj mat pek'oj yin̈ ch'en melyu. 4C'ul yijb'ali yul yatut, yohtaj scuy yuninal yun̈e yijyom ch'elcoj yuninal tu' tet, huncuentan̈e chute sb'a hej uninale tu'. 5Haxca ta mat yohtajoj yijb'ali yul yatut yin̈ c'ul, machmi chu yoc ijb'alomal yin̈ scon̈ob' Comam Dios. 6Machu yoc mactaj ac'to yoc tzujnuj yin̈ Comam ijb'alomal, haxca sub'utaj yoc lolo'al yin̈, cat yayc'ay haca' xu yayc'ay naj matzwalil. 7Mac chu yoc ijb'alomal tu', yilal cha' hala' sb'a yin̈ c'ulal yin̈ sat anma maẍtocoj yin̈ Comam, ta mach syijye sb'a, ch'ilaxojiloj spixan yu anma, cat yayc'ay yul slec'ab' naj matzwalil. 8Hactu' mac ch'oc diáconoal, yilal ya'ni hala' sb'a yin̈ c'ul yin̈ sat anma maẍtocoj yin̈ Comam, ta mat nananojn̈e chala, machca ch'uq'ui, machca sayo' melyu yin̈ xtx'ojal nab'il yu, 9ta chacoj yanma yin̈ cuywab'al ab'il jet yu Comam Dios, hune' b'ay ẍja' yuluj co c'ul, b'oj ya'n̈etic'a snanon yin̈ tzet chu yehc'oj. 10B'ab'el ch'ilwelaxi, ta mach smul ẍnawitij yin̈, waltu' chu yoc yin̈ diáconoal. 11Hactu' heb'ya' janab' ay yoc heb'ya' yin̈ hune' munilti', cha' hala' sb'a heb'ya' yin̈ c'ul yu anma, mat hob'omoj tzoti', nann̈e yu yin̈ tzet chu, yijyom chute sb'a yin̈ sunil. 12Ha' mac ch'oc diáconoal mach hunujxa ix say yin̈, b'oj ta yohtaj yijb'ali yul yatut yin̈ c'ul b'oj yohtaj scuy yuninal. 13Yin̈ caw yeli ta c'ul smunla heb'ya' diácono yin̈ schejb'anil, caw ch'ocoj smay heb'ya'. Yin̈ hactu' caw ay yip stzotel yin̈ scuywab'al b'ay ẍja' yuluj co c'ul yin̈ Comam Cristo Jesús. 14Ẍwochean ta pet chin to hach wila'an, yaja' chin tz'ib'n̈etoj hune' hum ti' tawetan 15yun̈e ta c'uxan ay tzet ch'a'ni ec'ojtoj yet hin toan, chu hawohtajn̈eni tzet chu co watx'enc'oj xtxolal smunil Comam co xol hayon̈ hon̈ yuninalxa, yiglesiaxa Comam Dios itzitz jeyi. Jetwanoj co colni cuywab'al st'in̈anil yeyi, b'oj ja'ni yip tzoti' tu' yin̈ sat anma. 16Yin̈ caw yeli, caw ay smay tzet yelapnoj ye co cuyb'anil ch'a'lax jet haca' yalni:Xhul Comam syeb' sb'a jet yin̈ anmail yeyi. Comam Espíritu syeni to st'in̈anil yeyi. X'ilot yu hej ángel. Xhal-laxc'oj tet sunil hej con̈ob'. Tx'ihal anma xa' yuluj sc'ul yin̈. C'ul xu schaot sc'atan̈ Comam Dios, ẍi.


Copyright
Learn More

will be added

X\