1 TIMOTEO 2

1Ha' ti' k'a' yilal chin tak'ecan tawetan, ta yet cheya'ni heyoración tet Comam Dios che k'ana ta ẍcolwa Comam ya'ni sc'ulch'anil sc'ul yib'an̈ sunil anma, cat heya'ni yuch'antioẍ yu jet-anmail tu'. 2Yilal ja'ni joración yin̈ heb'naj yahaw yul hunun con̈ob', b'oj sunil hej autoridad, yun̈e jehc'oj yin̈ ak'anc'ulal, matzet tx'oj chul co xol, haxin̈wal chu janicoj janma yin̈ Comam Dios. 3Hune' ti' caw c'ul, sak'al yul sat Comam Dios Scolomal jet, 4haxca choche Comam ta sunil anma scha scolb'anil, cat stzujcha yohtajn̈en b'aytet st'in̈anil. 5Haxca hune'n̈e Comam Dios aya, hune'n̈e mac iomc'oj tz'oti' co xol hayon̈ anma hon̈ ti' b'oj Comam, hune' tu' ha' Comam Cristo Jesús, anma paxoj. 6Ha' Comam Jesús ti', xanicoj sb'a yul sk'ab' camical yun̈e schani sunil anma scolb'anil. Ha' hune' ti' x'a'lax ohtajn̈elaxoj yet stzujchaapnoj stz'ayicalil. 7Xquin yacoj Comam apóstolalan yu hin pujb'anc'oj stzoti'an, chin cuyni anma mat israeloj yin̈ tzoti' st'in̈anil ye b'ay ẍja' yuluj co c'ul ti'an. Hune' ẍwal ti'an, st'in̈anil yeyi, mat lek'ti'aloj. 8Yuxin ẍwochean ta cha' heb'ya' winaj yoración sunil b'aytu'alicoj, smohb'ancan̈ heb'ya' sk'ab' tet Comam Dios, yin̈ mach squistalil ib'il yu yanma heb'ya', mach howal, machca cajqueb'ail nab'il yu. 9Hactu' heb'ix ix, ẍwochean ta sk'aptze sb'a heb'ix yin̈ comonaln̈e haca' caw yub'anil. Mach cha' heb'ix ixtan̈woj snimanil. B'oj yet xinitoj heb'ix xil swi', mach caw stzantze sb'a heb'ix yin̈ lolo'al, haca'na a'octoj ome oro, b'oj yanicoj xil k'ape caw ay stohol. 10Ha' yet heb'ix to ha' yanma heb'ix stzantze yu sc'ulal chu haxca ab'ilxacoj sb'a heb'ix yul sk'ab' Comam Dios. 11Heb'ix ix yet aya tucan heb'ix yet ch'a'lax cuyb'anile, ayojab' heb'ix ni'anb'ail. 12Mach sje hin c'ulan ta ẍcuywa heb'ix ix xol heb'naj winaj, machca ẍpalc'on heb'ix yib'an̈ heb'naj. Wocheb'alan ton̈e chab'e' heb'ix tzet ẍhal-laxi. 13Haxca b'ab'el swatx'e Comam Dios naj Adán, scab'xa swatx'e Comam ix Eva. 14Mataj naj Adán tu' sub'chayi, to ha' ix Eva tu' xa' sub'u sb'a, x'ay ix yin̈ smul. 15Yaja' ẍcolcha heb'ix ix ta c'ul chu ya'ni ch'ib'oj heb'ix niẍtej yunin, ta lin̈an uninale tu' ya'ni yuluj sc'ul yin̈ Comam, yochen yet-anmail, caw aycoj yanma yuni tzet chal Comam Dios, b'oj tohol chute snab'al yin̈ tzet chu.


Copyright
Learn More

will be added

X\