1 TIMOTEO 1

1Hayin Pablo hin ti'an, yapóstol Comam Cristo Jesús wean, haxca hactu' x'el yin̈ sc'ul Comam Dios Scolomal jet b'oj Comam Cristo Jesús b'ay ẍcawxi co c'ul. 2Chin tz'ib'n̈etoj hune' wum ti' tawetan Timoteo. Haca'ojtam hin c'ahol hawean haxca wuan xawa' yuluj ha c'ul yin̈ syelal. Tz'a'ojab' sc'ul Comam Dios Padre, b'oj Jahaw Cristo Jesús tawin̈; ya'ab' sc'ulch'anil sc'ul b'oj ak'anc'ulal tawet. 3Yet in toxa b'et Macedoniaan, xin k'an tawetan ta chach cancan yul con̈ob' Éfeso yu ha cachni hun cawan̈ heb'ya' ta mach cuywa heb'ya' yin̈ cuyb'anile mat t'in̈anoj yecoj. 4Machca sc'ay heb'ya' stz'ayic yab'entoj hej yic'ti'al b'oj xtxolil tzet ye hej jichmam x'ec'le payxa. Hunk'aan tu' ec'omn̈e yeyi. Mach ẍcolwa jin̈ johtajn̈en tzet t'in̈b'ab'ilcan yu Comam Dios, hune' ẍjohtajn̈e yu ja'ni yuluj co c'ul yin̈ Comam. Ha' tu' cam chin tak'e tawetan. 5Ha' yelapnoj ye hune' chejb'anil ẍwal tawet ti'an, to yilal ha cuyni heb'ya' jetb'i ta caw c'ul chute heb'ya' snab'al, ta caw yeli cha' heb'ya' yuluj sc'ul, b'oj cam yochen sb'a heb'ya', haxca hune' jochen jetb'i tu', ha' ẍwayitij yin̈ janma yet caw saj yeyi. 6Ay mac te xol xax yiloj sb'a yin̈ cuywab'al c'ul, chab'entoj hej tzetet sucal, matzet chaliloj. 7Ay yala hunk'aan tu' cuywaom yin̈ sley ya' Moisés, yaja' mach xtxum hej tzetet chala, machca xtxum hej cuywab'al ẍchilb'a ta syijye anma. 8Johtaj to c'ul ley tu', ta ha' tzet nab'il yu Comam Dios yin̈, ha' chon̈ ec' ji'a'. 9Txumwejc'anab'i to mataj yu anma c'ul yuxin xcancanoj ley, to yu scachni anma tx'oj, yuxin aycanoj. Ha' anma b'ay chij sb'a hune' ley ti':Ha' mac ẍman̈c'on ley b'oj mat sje' sc'ul syijye', anma tx'oj b'oj ahmul, anma mach nanon tet Comam Dios b'oj hej tzetet ab'ilcan yu Comam, anma ẍpotx'ni smam smi' b'oj hunk'aanxa mac potx'om anma, 10heb'naj ch'ec' yin̈ ixloj b'oj hej ix ix sayni swinaj, heb'naj cheta yet winajil b'oj heb'ix cheta yet ixal, anma chelk'a hunojxa anma cat xtxon̈ni, anma lek'ti' b'oj anma ẍlocni sb'i Comam Dios yin̈ lek'tial, b'oj anma aycoj yin̈ hunk'aanxa tx'ojal mach chawicoj yin̈ cuywab'al c'ul. 11Hune' cuywab'al ẍjal ti' scha sb'a b'oj tzoti' yet colb'anil caw eltich'an x'a'lax wala'c'oj yu Comam Dios ayn̈etic'a stzalalal. 12Ẍwa' yuch'antioẍ tet Jahaw Cristo Jesúsan, haxca xa' wipan, haxca yijyomin chil Comaman, yuxin xquin yacoj yin̈ smunil ti'an. 13Waxan̈ca xwal tzoti' tx'oj yin̈ Comam yet yalan̈toan, xquin cajwaan, xwuni ec'najilan, yaja' stz'a'can̈ sc'ul Comam Dios win̈an, haxca mat wohtajojan ta tx'oj ẍwuan yet maẍto ẍwa' yuluj hin c'ul yin̈ Comam Cristoan. 14Yuxin caw tx'ihal sc'ulch'anil sc'ul Comam Jahaw xa' wetan, xa'ni wa'a' yuluj hin c'ul yin̈an, b'oj wochen haca' je hayon̈ hunxa jecoj yin̈ Comam Cristo Jesús ti'an. 15Hune' ẍwal ti'an caw yeli, yet aya sunil mac ch'a'ni yuluj sc'ul, ta xhul Comam Cristo Jesús satyib'an̈k'inal ti' yu scolni anma ahmul. Yin̈ hantaj mac ahmul tu', hayin k'a' ahmul hintoan. 16Stz'a'can̈ sc'ul Comam Dios win̈an, yun̈e win̈ b'ab'el sye Comam Jesucristo hantaj snimanil sc'ul Comam. Hactu' xu woc syeb'aniloj yin̈ hantaj mac cha' yuluj sc'ul yin̈ Comam, yu schani k'inal mach stan̈b'al. 17Yuxin ja'a'coj smay spixan co Rey yin̈ stohb'alk'inal, Comam mach b'ak'in̈ ẍtan̈ojiloj, Yahaw yin̈ stohb'alk'inal, han̈c'an̈e Dios, ewan ye yin̈ co sat. Amén. 18Timoteo, haca' hune' hin c'ahol hawean. Haca' xu yalni hunk'aan heb'ya' tawin̈ yu Comam Espíritu, hactu' chu wa'ni ha chejb'anilan, yu hawinitij hawanma tawin̈ haca' hune' naj soldado mach xiw sto yin̈ howal. Lin̈anach yin̈ hawa'ni yuluj ha c'ul cat hawab'entoj tzet chal hawanma. 19Ay mac mach xab'e'toj tzet chal yanma, yuxin xetatoj sb'a yin̈ hune' b'ay ẍja' yuluj co c'ul ti'. 20Hactu' xa'le ya' Himeneo b'oj ya' Alejandro. Heb'ya' tu' xwac'oj heb'ya' yul sk'ab' naj matzwalilan, yun̈e scuycha heb'ya' yin̈ matxa chal heb'ya' tzoti' tx'oj yin̈ Comam Dios.


Copyright
Learn More

will be added

X\