1 TESALONICENSES 5

1Wal b'ak'in̈ chub' hune' tu', mach yeẍtooj chin tz'ib'n̈etoj teyetan. 2Haxca hex caw heyohtaj tzet chu yuluj stz'ayical Comam Jahaw. Haca' yul lemna hune' naj elk'om elek' yet ak'b'alil yet nahul ye anma, hactu' chu yuluj Comam. 3Yet chalnoj anma: ¡A..! Tinan̈ sunil ak'anc'ulal yeyi, ta ẍi, hatu' chuluj lemna c'ayilal yib'an̈ heb'jetb'i, haca' yichican̈ sya'il ay ix ix toxa ẍwatx'oj sc'ul, hactu' cha'le' heb'jetb'i, matxa ẍcolchaoj. 4Yaja' hayon̈ti', hex wuẍtaj hex wanab', mat yin̈oj k'ejholo ayon̈, cat co to nahul yet chuluj Comam. 5Co hunilon̈ sajilk'inalxa ye janma, b'oj haca' tz'ayicalxan̈c'a b'ay ayon̈. Mat hon̈ yetoj ak'b'alil, mat yetoj k'ejholo ye janma. 6Yuxin mach ẍco wayc'uln̈e co b'a, haca' ye hunk'aan heb'jetb'i tu', to itz'atn̈etic'a jeyi b'oj nann̈etic'a ju. 7Haxca ak'b'alil ẍway anma, ak'b'alil scamtze swi' yu te' uq'ue. 8Walon̈, yetwanoj tz'ayicalil jeyi, yuxin nann̈etic'a ju. Haca' yen̈len naj soldado snimanil yu ch'en coraza, hactu' co colni co b'a yu ja'ni yuluj co c'ul yin̈ Comam Dios, b'oj yu jochen jetb'i. Haca' yen̈len naj soldado swi' yu ch'en casco, hactu' co colni co b'a yu scawxi co c'ul to colb'ilon̈xa. 9Haxca hayon̈ ti' mat yuuj yaniayoj Comam showal jib'an̈, yuxin xcon̈ sic'le, to yu co chani co colb'anil yu Jahaw Jesucristo. 10Ju yuxin xcam Comam Jesucristo, yun̈e jehc'oj b'oj Comam, wal itzitzon̈ wal camnajon̈xa, hunxa je b'oj Comam. 11Yuxin a'wej yak'lob'al he c'ul hununex, b'oj he colwa yin̈ cam he watx'eniloj he b'a, haca'tic'a cheyute. 12Hex wuẍtaj hex wanab', ẍco k'an teyetan ta xahan cheyil heb'ya' ẍmunla te xol, chex yijb'an heb'ya', b'oj chex scuyni yin̈ stzoti' Comam Jahaw. 13Xahan cheyil heb'ya' b'oj che yan̈e heb'ya' yu smunil chu te xol. Ehan̈wejc'oj yin̈ ak'anc'ulal. 14Ẍco k'an teyetan ta che may ninoj heb'ya' mach sje sc'ul munlaoj. Iptzewej heb'ya' etza ẍpax yin̈taj, b'oj chex colwa yin̈ heb'ya' soanto ya'ni. Caw ay he nimanc'ulal yin̈ sunil heb'ya'. 15Nann̈e heyu taj ayex chex pajni yin̈ mac tx'oj chu teyin̈. Ha' jet, ja'wej yilal juni sc'ulal xol heb'ya' jetb'i, yaja' matn̈etaj yin̈ heb'ya', to sunil mac b'ay ẍju hej tzetet c'ul. 16Ehojon̈wejc'oj yin̈ tzalalal. 17Ja'wej joración stohb'alk'inal. 18Ja'wej yuch'antioẍ tet Comam Dios yin̈ sunil tzetet, haxca ha' tu' choche Comam ta ẍju hayon̈ ayon̈xacoj yin̈ Comam Cristo Jesús. 19Mach jiloj yip Comam Espíritu yin̈ janma. 20Mach jin̈tajn̈e tzet chal heb'ya' i'n̈e stzoti' Comam. 21Co pich'awejiloj sunil tzet ẍhal-laxi cat co c'ub'an yin̈ janma b'aytet sc'ulal. 22Co pohwejiloj co b'a yin̈ sunil hej tzetet tx'oj. 23Comam Dios ch'a'ni ak'anc'ulal, ha' chex pohniloj yetoj yala', chex syan̈en Comam yin̈ mach ninoj he tx'ojal yin̈ heyespíritu, heyanma, b'oj he nimanil yet chuluj Jahaw Jesucristo. 24Comam xcon̈ sic'len yetoj, chij sb'a tzet chala, ha' ch'ilnoj ta sunil ti' chija' sb'a. 25Hex wuẍtaj hex wanab', txahlan̈wej jin̈an. 26A'wej scawil sunil heb'ya' jetb'i yin̈ tzalalal. 27Haxca schejab' hin Comam Jahawan, chin tak'e teyetan ta cheyila tzet ahayoj yul hune' te hum ti', cat heyalni xol heb'ya' jetb'i. 28Ya'ab' Jahaw Jesucristo sc'ulch'anil sc'ul teyet.


Copyright
Learn More

will be added

X\