1 TESALONICENSES 4

1Hex wuẍtaj hex wanab', ẍcam co tak'ecan teyetan, hacojtam Jahaw Jesús ẍhalni, ta cheyac'oj yin̈ he c'ul cam he watx'eniloj he b'a haca'tic'a cheyute. Ha' hune' ti' xe cuyiloj jin̈an tzet chu heya'ni tzalaoj Comam Dios yu he b'elwub'al. 2Heyohtaj b'aytet he cuyb'anil xja' teyet yu schejb'anil Jahaw Jesúsan. 3Ha' choche Comam Dios ta cheyacoj he nimanil tet Comam yin̈ mach ninoj squistalil, machex ixli, machca say heb'ix ix swinaj. 4Sc'aytzeab' sb'a hunun mac stan̈en snimanil yin̈ mach ninoj squistalil haxca yetn̈e Comam jeyi. 5Mataj tzet choche he nimanil che sayc'oj, haca' snab'al anma mat ohtajn̈eoj Comam Dios. 6Machca mac ch'eb'an sat hunujxa yet-anmail, chetaob'tajn̈en yetb'i, haxca cha'a' Comam Jahaw sya'tajil tet mac hactu' chuteni. Xaxtic'a jal hune' ti' teyetan. 7Haxca mach xcon̈ yawte Comam Dios yu juni quistalil, to ha' co yan̈en co nimanil yin̈ sc'ulch'anil, ha' choche Comam. 8Yuxin mac ẍman̈c'on hune' cuywab'al ti', mataj anma b'ay lan̈an sman̈c'oni, to ha' caw Comam x'a'ni Yespíritu Santo jet, ha' b'ay lan̈an sman̈c'oni. 9Yin̈ heyochen heb'ya' jetb'i, mach yeẍtooj chin tz'ib'n̈etoj he cuyb'anilan, haxca cuyb'ilexxa yu Comam Dios yin̈ heyochen heb'ya' jetb'i. 10Johtajan, ta hactu' chu heyochen sunil heb'ya' ay b'et Macedonia, yaja' chex jiptzean ta ẍto cam heyoche heb'ya'. 11A'wej heyanma heyehc'oj yin̈ ak'anc'ulal, ha' he munil cheyac'oj yin̈ he c'ul, tz'ajan che yute he c'ul yin̈ tzet che munla haca' xu jalni teyetan. 12Ta che yijye hunk'aan ti', matzet chex mahlanoj, b'oj c'ul stzoteloj anma teyin̈, anma maẍto cha' yuluj sc'ul yin̈ Comam. 13Hex wuẍtaj hex wanab', caw ẍjochean ta cheyohtajn̈e tzet cha'le' heb'ya' ayxacoj yin̈ Comam xax cami, yun̈e mach'oc b'isc'ulal heyu haca' anma mach scawxob'al sc'ul yin̈ Comam Dios. 14Haca' ja'ni yuluj co c'ul ta xcam Comam Jesús, yaja' xpitzc'acan̈, hactu' ja'ni pax yuluj co c'ul to cha'a'tij Comam Dios mactaj xax ya' yuluj sc'ul yin̈ Comam Jesús yet xcami. 15Yuxin ẍjal hune' scuywab'al Jahaw Jesús ti' teyetan: Ta hayon̈ itzitzal to je yet chuluj Comam, machon̈ b'ab'ojtoj sataj mac xax cami. 16Ha' yet ch'ayojiloj Comam Jahaw satcan̈, ch'ab'elaxoj yal-lax hune' chejb'anile, ch'ab'elaxoj yawi hune' arcángel, ch'ab'elaxoj yok' strompeta Comam Dios. Mactaj ayxacoj yin̈ Comam Cristo yet xcami, ha' b'ab'el ẍpitzc'aojcan̈. 17Lawitu', hayon̈ ayon̈toc'oj ti', chon̈ ilaxojcan̈ b'oj heb'ya' tu', cat jocoj xol asun cat co toj chawal yin̈ Comam Jahaw xol cak'e', cat jehojc'oj b'oj Comam yin̈ huneln̈e. 18Yuxin a'wej yak'lob'al he c'ul hununex yin̈ hune' cuywab'al ti'.


Copyright
Learn More

will be added

X\