1 TESALONICENSES 3

1Haxca matxa xtecha ju jab'enan tzet heyecoj, yuxin xco lahc'uln̈e co b'aan, hactu' xu hin can hin chuquil yul con̈ob' Atenasan. 2Hactu' xu janitoj ya' juẍtaj Timoteo hex yila'an, ya' schejab' Comam Dios spujb'anc'oj tzoti' c'ul yin̈ Comam Cristo. Xjatoj ya' hex yila'an yun̈e ya'ni ya' he yip b'oj ya'ni scawxob'al he c'ul yin̈ b'ay cheya' yuluj he c'ul, 3yun̈e mach mac ẍcab'concan̈ sc'ul yin̈ hej sya'tajil chila. Haxca heyohtaj to tak'tic'a ye jib'an̈ ta ch'ec' ya' janma yu hunk'aan tzetet ti'. 4Haxca yet ayon̈toc'oj te c'atan̈an, xtic'a jal teyetan ta ay sya'tajil ẍjila'an. Yeli cheyila to hactu' xute sb'a. 5Haxca matxa ẍtecha wu wab'enan, yuxin xwatoj ya' Timoteo hex yilaan, hanic' heyecoj yin̈ heya'ni yuluj he c'ul. Caw chin xiwan, ta chex sub'cha yu naj matzwalil, cat mi sc'aycantoj co munilan. 6Yaja' tinan̈ xhul ya' sb'ey b'ay ayex tu'. Xinitij ya' tzoti' ta c'ul he b'elwi yin̈ heya'ni yuluj he c'ul, b'oj yin̈ heyochen heb'ya' jetb'i. Chal ya' to chex tzalayi chon̈ he nanitijan, b'oj ay heyala' chon̈ heyilan, hacon̈an ay jala'an chex jilpaxan. 7Yuxin tinan̈ hex wuẍtaj hex wanab', waxan̈ca xol b'isc'ulal, xol sya'tajil, xco cha yak'lob'al co c'ulan yet xjab'enan to lin̈anex yin̈ heya'ni yuluj he c'ul. 8Ha' xjab'enan to caw lin̈anex yin̈ Comam Jahaw, caw ch'oc jip ẍjab'ean. 9¿Tzettaxca to hunuj ab'al yuch'antioẍ chu ja'ni tet Comam Dios yu hune' niman tzalalal ẍjab'e yin̈ sat Comam heyuan? 10Ayon̈coj co k'anni hunun tz'ayic ak'b'al tet Comam heyuan, ta ch'el yin̈ sc'ul Comam hayon̈ caw chon̈ to hex jila'an, yun̈e cam heyohtajn̈eniloj hune' b'ay xja' yuluj co c'ul ti'. 11Caw ẍjochean ta ha' caw co Dios co Mamwej b'oj Jahaw Jesús ẍcolwa jin̈an yun̈e chu co to hex jilnojan. 12Ha' Comam Jahaw ẍcam a'ni heyoche' heb'ya' jetb'i, b'oj heyochen sunil anma, haca' hex jochen hayon̈ ti'an. 13Ẍjochean ta caw cha' Comam yip heyanma yun̈e tohol he b'elwi, mach he mul yin̈ sat co Dios co Mamwej yet chuluj Jahaw Jesús hunecxa b'oj sunil mactaj yet-xa.


Copyright
Learn More

will be added

X\