1 TESALONICENSES 2

1Hex wuẍtaj hex wanab', heyohtaj to mat nab'a'oj xcon̈ ec' te xolan. 2Xeyab'e' sk'umal ta xcon̈ cajotan, hasta xcon̈ mak'ot b'et Filiposan, yaja' mach ninoj xcon̈ xiwan, haxca xcolwa Comam Dios jin̈an. Xco pujb'ac'oj stzoti' Comam texolan, waxan̈ca lemantij chil anma jin̈an. 3Yin̈ caw yeli st'in̈anil tzoti' xhul jala' teyetan, mach tx'oj nab'il juan, machca sub'wal nab'il juan. 4Ha' jetan to ilweb'ilon̈xa yu Comam Diosan, xa'ni Comam co munil yin̈ jalnic'oj tzoti' yet colb'anilan. Yuxin mataj tzetet choche anma ha' xjalic'ojan, to ha' tzet choche Comam Dios ha' xjalan. Yohtaj Comam tzet ib'il yu janmaan. 5Hexti' xam heyila to maton̈ k'aynajoj ẍco monte anma yu hej tzoti' c'ulch'an ẍjal yayb'alojtij sc'ul anmaan. Yohtaj Comam Dios to mach sub'waloj nab'il juan yu jochentoj tzet ayexan. 6Mataj yu yoc co may heyuan mato yu yalni hunujxa anma ta caw ay yelapnoj jean, mataj yu hune' tu' yuxin xja'lean. 7Xtic'am hu co chilb'anan ta che yijye tzet xjalan, haxca yapóstol Comam Cristo jean, yaja' machoj, to ha' jetan, c'ulch'an ẍjute janma teyin̈an, haca' hune' ix mi'e sya'iln̈e ni'an yunin. 8Hactu' heye yul co satan, yuxin mat han̈c'aoj tzoti' c'ul yet Comam Dios xjal teyetan, to hasta ẍco hin co b'a teyin̈an, haxca caw chex jochean. 9Hex wuẍtaj hex wanab', tijab' yin̈ he c'ul hantaj xcon̈ munlaan, xjab'en siquilalan, xco sayni tzet ch'ocnicoj yec'b'aloj juan. Xcon̈ munla tz'ayic ak'b'alan, yun̈e mach on̈ oc eyijatzojan, yulb'al ẍjal tzoti' c'ul yet Comam Dios teyetan. 10Chim heyila, b'oj chil Comam Dios to caw c'ul xjute co b'aan yet ayon̈ te xolan. Mach co tx'ojal chu yal-laxcoj yin̈ co satan, b'oj stoholaln̈e xju yin̈ he satan hex cheya' yuluj he c'ul yin̈ Comam ti'. 11Heyohtaj paxoj to xquex jiptzean, b'oj xja' yak'lob'al he c'ul haca' chute hune' naj mame yuninal. 12Ẍco tak'en teyetan, ta c'ul cheyute he b'a haca' mac yet-xa Comam Dios, Comam xcon̈ awten joc yul sk'ab' yin̈ yelti'ch'anil. 13Yu hune' ti', ẍja' yuch'antioẍ tet Comam Diosan, haxca yet xeyab'en tzoti' xjal teyetan, st'in̈anil stzoti' Comam Dios xe cha, mat stzoti'oj anma. Hune' tzoti' tu', yehn̈e smunla teyin̈ hex cheya' yuluj he c'ul ti'. 14Hex wuẍtaj hex wanab', yet x'ec' ya' heyanma he cajot yu heyet con̈ob', lahan xeya'le haca' xa'le heb'ya' aycoj yin̈ yiglesia Comam Dios ay b'et Judea, heb'ya' yet-xa Comam Cristo Jesús, xcajot heb'ya' yu yetcon̈ob' israel. 15Hatic'a heb'naj israel tu' xpotx'ni Comam Jahaw Jesús, haca' xu spotx'ni heb'naj heb'ya' schejab'lom Comam Dios x'ec'le yet payxa. Xcon̈ scajni pax heb'najan. Caw tx'ojaln̈e chu heb'naj yul sat Comam Dios, caw scajyat heb'naj ye sunil anma. 16Mach scha heb'naj jala' stzoti' yet colb'anile tet anma mat israelojan. Hactu' chu stz'ajb'an heb'naj smul. Yuxin xhul hune' niman sya'tajil yib'an̈ heb'naj yu showal sc'ul Comam Dios. 17Hex wuẍtaj hex wanab', xcon̈ iotiloj te xol hayeb' stz'ayicalan, yaja' ayextic'acoj yin̈ janmaan. Caw chex jochean, yuxin xja' yilal co to hex jilnojpaxan. 18Xjilwe co to hex jilnojan. Hayin Pablo hin ti'an, tx'ihal el caw xwoche xquin toan, yaja' naj matzwalil mach xquin chani tojan. 19Yaja' ¿mac c'anab' scawxob'al co c'ulan, b'oj spaj co munil ch'a'ni co tzalalalan? Hex stzalab'al co c'ul heyean yin̈ sat Jahaw Jesús yet chuluj. 20Yin̈ caw yeli heyu yuxin caw chon̈ tzalaan, co may co pixan heye tinan̈an.


Copyright
Learn More

will be added

X\