1 TESALONICENSES 1

1Hanin Pablo inti'an, yeb juẍta Silvano yeb juẍta Timoteo, chicotz'ibn̈etojan̈ hune' carta ti' teyet hesunil hex ayexxaco yul isk'ab Comam Dios bey con̈ob Tesalónica, hex hunxa heye yin̈ Comam Dios Mame, yeb yin̈ Comam Jesucristo. Yak'ab Comam isc'ulch'anil isc'ul yeb ak'anc'ulal teyet. 2Maẍtic'a chicobejan̈ jak'nihan̈ yuch'andiosal tet Comam Dios teyin̈ hesunil, cat quexconanitijan̈ yin̈ cotxahan̈ tet Comam Dios. 3Ayon̈n̈etic'acojan̈ quexconanitijan̈ yin̈ cotxahan̈ tet Comam Dios Mame yu hemunil yin̈ Comam, yu xaheyayto yul heyanma yin̈ yet Comam, cheyijenpaxo yin̈ tzet chal Comam yuto caw ayco heyanma yin̈ Comam. Cheyak'nipaxo techaho sunil isya'tajil chiay teyiban̈, yuto caw ayco Comam Jesucristo yipo hec'ul. 4Hex wuẍtaj hex wanab, caw ochebilex yu Comam Jesucristo, yeb xin johtaj tato ha' Comam Dios sic'n̈ehexcanoj. 5Yet jalnihan̈ cuybanile yet colbanile teyet, maẍn̈etaj cotzoti'an̈ munlahi, to ha' hun yip Comam Espíritu Santo munla teyin̈, caw xin johtajan̈ tato hune' cuybanile tu' caw yel chalcanoj. Walex hex ti', heyohtaj tato c'ul jute cobahan̈ texol, cosaynihan̈ baytet isc'ulalo teyin̈. 6Haxa hex ti' xin quexoc tzujno yin̈ej isc'ulal coyecanojan̈, yeb xin beybale isyecano Comam Jesucristo, hechahnicano Istzoti' Comam yin̈ caw tzalahilal chiyak' Comam Espíritu Santo, waxan̈ca yet hechahni tu' heyil isya'tajil yu anma. 7Hac tu' yu heyenilo isc'ulal yin̈ sat sunil macta ayxaco yul isk'ab Comam ay bey yul ismajul Macedonia yeb ismajul Acaya. 8Yu hune' hebeybal tu' pujnacan̈ yabelaxilo Istzoti' Comam, yaj maẍn̈etaj yul ismajul Macedonia yeb Acaya, wal xin caw sunil yulajla con̈ob ohtan̈elaxiloj tato heyayto yul heyanma yin̈ Comam Dios, yuxin matxa tzet wal jalnihan̈ tet anma yin̈ hune' tu'. 9Ha' caw anma tu' chalni tzet yu cobeyc'ojan̈ texol, yeb xin ta caw c'ul yu con̈hechahnihan̈, yeb yin̈ tzet yu hebejni hetxahli tet hetioẍ, heyoc heyijen tzet chal Comam Dios itzitz, yeb caw Dios yin̈ caw isyelal. 10Chiyalpaxo anma tu', tato caw ayco yin̈ heyanma heyechman Isc'ahol Comam Dios chitit yul satcan̈, ha' ton Comam Jesucristo itzitzbican̈ xol camom yu yip Comam Dios. Ha' xin chon̈colni xol hune' niman isya'tajil chihul yu Comam Dios.

will be added

X\