1 TESALONICENSES 1

1Hayin Pablo hin ti'an, ya' Silvano b'oj ya' Timoteo, ẍco tz'ib'n̈etoj hune' hum ti' teyet hex ayexcoj yin̈ yiglesia Comam Dios ay yul con̈ob' Tesalónica, hex hun heye yin̈ Comam Dios Padre, b'oj yin̈ Jahaw Jesucristo. Ya'ab' Comam Jahaw sc'ulch'anil sc'ul b'oj ak'anc'ulal teyet. 2Ẍtic'a ja' yuch'antioẍ tet Comam Dios heyu te hunilan, chex co nanitij yin̈ joraciónan. 3Ẍtic'a co natij yin̈ sat co Dios co Mamwej, hantaj chex munlayi haxca cheya' yuluj he c'ul yin̈ Comam, hantaj cheyitij heyanma teyin̈ yu heyochen Comam, b'oj hantaj stechaapnoj sya'tajil heyu haxca ẍcawxi he c'ul yin̈ Jahaw Jesucristo. 4Hex wuẍtaj hex wanab' ocheb'il yu Comam Dios, johtajan to ha' Comam xquex sic'leni. 5Yet xjalni tzoti' yet colb'anilan, mat tzoti'ojn̈e xjal teyetan, to aycoj scan̈il ye Comam Espíritu Santo yin̈, yun̈e scawxi he c'ul to st'in̈anil ye hune' tzoti' tu'. Hexti' heyohtaj to caw c'ul xjute co b'a texolan, xco sayni b'aytet sc'ulal heyetan. 6Waxan̈ca caw ay sya'tajil xeyila, yaja' xe cha' tzoti' c'ul yin̈ tzalalal cha' Comam Espíritu Santo teyet. Hactu' xu heyoc tzujnuj yin̈ tzet xjute co b'aan, b'oj tzet xul yub'c'uj Comam Jahaw. 7Hactu' xu syeniloj sb'a teyin̈ yin̈ sat heb'ya' ta xtecha sya'tajil heyu, yuxin x'oc tzujnuj sunil heb'ya' cha' yuluj sc'ul yin̈ Comam ay b'et Macedonia b'oj b'et Acaya. 8Yu hune' tu' xpujna stzoti' Comam Jahaw, matn̈etaj b'et Macedonia b'oj Acaya, to sunil b'ay ohtajb'ilxa ta cheya' yuluj he c'ul yin̈ Comam Dios, yuxin matxa yeẍtooj ay tzet ẍjal yin̈ hune' tu'an. 9Hatic'a anma xalni tzet xu hon̈ he chani yin̈ c'ulan yet xcon̈ b'eyc'oj texolan, b'oj tzet xu heyanican hej tioẍ, xquex oc he yijyenoj Comam Dios itzitz caw yeli Dios, 10b'oj heyechman stij Sc'ahol Comam satcan̈, Comam Jesús xpitzc'aotcan̈ yin̈ camical yu Comam Dios. Ha' Comam Jesús ti' chon̈ colnoj tet hune' niman sya'tajil chuluj yu showal sc'ul Comam Dios.


Copyright
Learn More

will be added

X\