1 PEDRO 5

1Tinan̈ xin, chex wiptze hex anciano hex ayex xol heb'ya' xax ya' yuluj sc'ul yin̈ Comam, haxca haquinan anciano hin paxan, b'oj hayin caw xwil sya'tajil x'ec'toj yin̈ Comam Cristoan. Hun xin, chin chab' tzet yetwanoj ay hin chanian yin̈ yeltich'anil smay Comam Cristo ẍto yelaxoj. 2Tan̈e'wej heb'ya' yet-xa Comam Dios aycoj yul he k'ab', haca' chute naj tan̈eom canelu. Sunil he c'ul che yuni, mat chilb'ab'iloj heyub', matca yuuj ch'en melyu, yuxin che yu, to caw ch'el yin̈ he c'ul che yuni haca' choche Comam. 3Mat haca'oj yahaw cheyute he b'a yin̈ heb'ya' ab'ilcoj yul he k'ab', yewej tet heb'ya' tzetet yet' ay yuni heb'ya'. 4Ha' syenojcan̈ sb'a Comam swi'al jin̈ hayon̈ ẍco tan̈e heb'ya' jetb'i ti', ay hune' spaj cha'a' Comam jet, hune' caw elti'ch'an, mach ẍtan̈ojiloj. 5Chex wiptze pax hex tzehtaj hexti'an, b'oj hex k'opotaj hex, yijyom cheyute he b'a tet heb'ya' anciano. Ayojon̈wej ni'anb'ail jet hununon̈, haxca chal Yum Comam: Ẍpaq'uicoj Comam yin̈ mac can̈tajn̈e ye chute sb'a, yaja' ẍcolwa Comam yin̈ mac chiyoj sb'a. 6Yuxin ayojon̈ ni'anb'ail tet scan̈il ye Comam, yun̈e hon̈ yinojcan̈ Comam yet ch'apnoj stz'ayicalil. 7Ja'a'coj sunil co b'isc'ulal yul sk'ab' Comam haxca chon̈ yacoj Comam yin̈ sc'ul. 8Nann̈e ju itz'atn̈etic'a jeyi, haxca naj matzwalil schichoncoj sc'ul jin̈, lahan naj b'oj no' b'alam ch'el yaw, ch'ec' saynoj mac sc'uxu'tuj. 9Sunil co c'ul ẍco pahnitoj naj, haxca ẍja' yuluj co c'ul yin̈ Comam. Johtaj to heb'ya' jetb'i pujantoj sunil satyib'an̈k'inal ti' lan̈an yilni pax heb'ya sya'tajil ẍjil ti'. 10Yaja' lawi jilni ninoj sya'tajil, chon̈ slin̈b'a' Comam, tz'ajan chon̈ yute' Comam, ay yip ẍjub' yu, b'oj t'in̈an ẍjub'canoj. Hatic'a Comam ch'a'ni sc'ulch'anil sc'ul jet b'oj chon̈ yawten co chanoj tzet cha'a' Comam jet yin̈ hune' yeltich'anil mach stan̈b'al yu Comam Cristo. 11Ha' Comam Dios Yahawn̈etic'a yin̈ stohb'alk'inal. ¡Hactu' yeyi! 12Ẍwatoj hune' wum ti' teyet yin̈ ya' juẍtaj Silvanoan, ya' ti' b'ay ẍcawxi hin c'ulan to caw yijyom ya'. Yu hayeb' tzoti' ti' chex wiptzean. Chin tihniloj teyetan b'aytet sc'ulch'anil sc'ul Comam Dios yin̈ st'in̈anil. Lin̈an hexn̈etic'a yin̈ hune' ti'. 13Heb'ya' ay Babilonia sic'leb'ilxa yu Comam haca' xu hex sic'leni, chatoj heb'ya' he cawil. Pax ya' Marcos haca' hin c'ahol yean, chatoj ya' scawil he c'ul. 14A'wej scawil sc'ul heb'ya' jetb'i yin̈ tzalalal.Ehojab' ak'anc'ulal teyin̈ hex ayexcoj yin̈ Comam Cristo.


Copyright
Learn More

will be added

X\