1 PEDRO 4

1Yuxin haca' xu yec' ya' Comam Cristo yet xcami, hactu' chu co ta'wen pax hune' sya'tajil tu' jin̈, haxca mac xax ec' ya' yanma matxa yoc mule yin̈. 2Yuxin ehojon̈coj haca' chal sc'ul Comam Dios yin̈ hanic'xa ayon̈toc'oj ti', matxa haca'oj chal yec'najil janma chon̈ ehc'oj. 3Yet yalan̈to tu' nahatil xeyu xtx'ojal haca' chute anma mat ohtajn̈eoj Comam Dios. Yet tu', quex ehc'oj yin̈ hej squistalil, hej xtx'ojal xeyu. Xe camtzen he wi' yu te uq'ue, ec'tze' k'in̈ yin̈ xtx'ojal, b'oj squistalil xeyu xe hak'en hej tioẍ. 4Tinan̈ xa c'ay sc'ul anma teyin̈ haxca matxa hexoj hun chex ec' yin̈ nimejtaj xtx'ojal chu anma tu', yuxin tx'ojxa chal teyin̈. 5Yaja' hunk'aan anma tu' yilal sta'woj yin̈ xtx'ojal chu, yet ẍtij scuenta Comam Jesús yin̈, ab'ilxa schejb'anil Comam yinojtij cuenta yin̈ mac itzitz, b'oj mac xax cami. 6Yuxin xal-lax tzoti' c'ul yet colb'anil yab'e' mactaj camnajxa. Hunk'aan mac xax cam tu' xcamtoj yu showal Comam Dios, haca' chu scamtoj sunil anma. Yaja' xal-lax tzoti' c'ul tet, yun̈e yehojc'oj yin̈ yanma haca' chu yehc'oj Comam Dios. 7Lan̈anxa yul stz'ayical b'ay ẍtan̈ojiloj sunil hej tzetet. Yuxin nann̈e ju, itz'at ẍjute co b'a ja'ni joración. 8Ha' k'a' yilal ayon̈n̈etic'acoj jochen heb'ya' jetb'i, haxca ta caw yeli ẍjoche heb'ya' jetb'i tu', caw tx'ihal smul heb'ya' ẍco nahuln̈ecantoj. 9Yet ch'apni hunuj heb'ya' jetb'i co c'atan̈ yul jatut, sunil co c'ul ẍco chani heb'ya', mach ẍcajtza co c'ul yin̈ heb'ya'. 10Colwaojon̈ yin̈ heb'ya' jetb'i yin̈ hantaj scan̈il je xa' Comam jet. Nanann̈e tzetet sc'ulal sc'ul Comam x'a'lax jet, yuxin ẍco yijye yin̈ c'ul jitxk'antoj xol jetb'i. 11Mac ch'a'ni stzoti' Comam Dios, hacojtam ha' Comam stzoteli. Mac ẍcolwa yin̈ yetb'i, yub'ab' yu hantaj yip xa' Comam. Ta hactu' ẍjute, ẍjacoj smay Comam Dios yin̈ sunil hej tzetet yu Comam Jesucristo, Comam yetwanoj yalaxcoj smay. Hallaxojab'i to caw ay scan̈il ye yin̈ stohb'alk'inal. Hactu' yeyi. 12Hex xahan ay wuan, mach c'ay co c'ul yu hune' niman ilweb'al caw ya'taj chul jin̈, jala'xic'a ta mat yetoj aya chuli. 13Ha jet, to chon̈ tzalayi haxca hayon̈ hun ẍjil sya'tajil yin̈ Comam Cristo, yun̈e hayon̈ hun chon̈ tzalaoj yet ẍyelaxoj smay Comam. 14Ta ẍpohlicoj anma jin̈ sya'iloj Comam Cristo, sak'al jet, haxca Yespíritu Comam Dios ay smay, lan̈an syeni sb'a jin̈. 15Yeli, ay b'ay ch'ec' ya' janma, yaja' tan̈e mat yuuj potx'wal, elek', mato hunujxa mule k'a' xiquiltaj, matcataj yu janicoj co b'a yin̈ tzet chu anma. 16Yaja' ta ẍjil sya'tajil haxca tzujanon̈ yin̈ Comam Cristo, mat yetoj aya chon̈ tx'ixwi, to ẍjacoj smay Comam Dios, haxca ayon̈xacoj yin̈ Comam. 17Haxca yulujxa stz'ayicalil b'ay ch'ichicoj yi'lax cuenta jin̈, hayon̈ hon̈ yet-xa Comam Dios ti'. Yaja' ta jin̈ ch'ichicoj hune' tu', ¿tzet taxca ẍtan̈oj anma mach ẍyijyen Stzoti' Comam lan̈an yal-lax ti'? 18Ta caw ya'taj stzujcha colb'anil yu heb'ya' c'ulxa yul sat Comam Dios, ¿tzet taxca ẍtan̈ anma mach Dios sat b'oj caw tx'oj? 19Yuxin ta chon̈ ec' ya' haca' yalni Comam, machon̈ lin̈i juni hej tzetet c'ul, ja'acoj janma yul sk'ab' Comam swatx'eomal jet, Comam chij sb'a tzet chala.


Copyright
Learn More

will be added

X\