1 PEDRO 3

1- 2Haquex hex ixale ex ti', awejcoj he b'a yalan̈ schejb'anil heyichamil, b'oj yijyom cheyute he b'a, yun̈e ta ay hex c'uxan ay heyichamil machcoj yin̈ Comam Dios, yaja' ha' chilni heb'naj to c'ul cheyute he b'a b'oj chex nanon tet Comam Dios, yuxa hune' tu', ch'oc yin̈ sc'ul heb'naj ẍchani Comam, waxan̈ca mach tx'ihal tzoti' cheyal tet. 3Ha' heyet c'ul cheyute he b'a, mataj he tzantzen he b'a yin̈ he xinitoj xil he wi' yin̈ caw loloal, maca he yanicoj heyanma yin̈ ch'en ome maca ch'en uwe caw ay stohol hacana ch'en oro pax xil k'ape caw ay stohol. 4Ha' wal heyuni sc'ulch'anil heyanma ha' che yil he watx'e'. Ha' hune' sc'ulch'anil tu' ha' cheya' elwanoj b'oj ak'anc'ulal aycoj yin̈ heyanma. Ha' hune' ti' xin, mach b'ak'in̈ ch'etaxojtoj, caw ay yelapnoj ye yul sat Comam Dios. 5Yet payxa hactu' chu swatx'en sb'a heb'ix ab'ilxacoj sb'a yul sk'ab' Comam, heb'ix xcawxi sc'ul yin̈ Comam Dios, b'oj xacoj sb'a yalan̈ schejb'anil yichamil. 6Hactu' xute ya' Sara, caw yijyom xute sb'a ya' tet ya' Abraham, hasta xal ya' ya' yahawoj. Haca' mi yunin ya' Sara tu' chex elicoj, ta chex ec' he yi'a' tzet xu ya', b'oj ta machex pax teyin̈taj yu xiwquilal. 7Haquex ichamile hex, tz'ajan cheyute he c'ul che nanitoj heyixal, xahan cheyil heb'ix, haxca mach caw yip heb'ix te sataj. Yuxin c'ul cheyute he b'a, haxca lahan he k'inal che chab' b'oj heb'ix tet Comam Dios, yin̈ hactu' matzet ẍpahni yab'en Comam heyoración. 8B'oj hunxa, lahc'ulal ẍjute co b'a co hunil, co nab'toj jet-anmail, co yan̈e' b'oj xahan ẍjil heb'ya', haca' mac ayto yu sb'a. C'ulch'an ẍjute co c'ul, b'oj huncuentan̈e ẍjute co b'a. 9Machon̈ pajni yin̈ mac tx'oj chu jin̈, machca chon̈ pohli yin̈ mac ẍpohli jin̈. Ha' jet sc'ulch'anil ẍja' spajoj haxca awteb'ilon̈ yu Comam yu co chani sc'ulch'anil sc'ul. 10Haxca chal Yum Comam: Mac choche yila' sc'ulch'anil, cat yehc'oj yin̈ tzalalal, yilal scachni sti' yalni tzoti' tx'oj, machca chal lek'ti'al. 11Yilal spohniloj sb'a yin̈ xtx'ojal, cat yuni sc'ulal, ya'ab' yanma yehc'oj yin̈ ak'anc'ulal. 12Haxca syan̈e Comam Jahaw mac stoholal chu, chab'entoj Comam tzet chala yet cha'ni yoración, yaja' ẍhowb'i Comam yin̈ mac xtx'ojaln̈e chu. 13Ta sc'ulaln̈e ẍjoche jub', ¿mactaxca chu on̈ yetani? 14Yaja' ta yu juni sc'ulal chon̈ cajot, sak'al jet, machon̈ xiw tet mac chon̈ cajni tu', machca ẍcab'concan̈ co c'ul. 15Ha' jet co hak'e Comam Cristo yin̈ janma, haxca han̈c'a Jahaw yeyi. Itz'at ẍjute co b'a co ta'wi tet mac ẍk'anb'en jet tzet yuxin ẍco lin̈b'a co b'a yin̈ b'ay ẍcawxi co c'ul. Huncuentan̈e ẍjute co b'a b'oj ẍco natoj anma tu' yet ẍco pajtzen tzetet sk'amb'e jet. 16C'ul ẍjute co b'a yin̈ sat anma yun̈e saj co sat, haxin̈wal xtx'ixwojcan̈ mactaj tx'oj stzotel jin̈ yu sc'ulal ẍju haxca ayon̈xacoj yin̈ Comam Cristo. 17K'a' c'ul mi ta ch'ec'na ya' janma juni sc'ulal, ta hactu' ch'el yin̈ sc'ul Comam Dios, sataj yec' ya' janma yu juni xtx'ojal. 18Haxca hactu' xa'le Comam Cristo xcam yu co mul yin̈ huneln̈ecanoj. Mach xtx'ojal Comam, yaja' x'ec' ya' yanma ju hayon̈ tx'ojon̈ ti' yu hon̈ yinitoj tet Comam Dios. Xpotx'ot snimanil Comam yu anma, yaja' xpitzc'aotcan̈ yanma Comam yu Comam Dios. 19Xb'ey yanma Comam yala' tet hej spixan mactaj majan, to x'i'wa Comam. 20Hunk'aan anma tu' xman̈c'on tzet chal Comam yulb'al x'ehc'oj ya' Noé, yaja' ẍto snimann̈e Comam sc'ul yechmani ta sna sb'a anma tu', c'untic'a swatx'e ya' te' arca b'ay scoliloj Comam waxajwan̈ anma yu ha' ha'. 21Ha' tzet xa'le ya' Noé b'oj sfamilia tu' ha ẍyeniloj tzet chu ji'ni ha' tinan̈. Ha' chon̈ colni, yaja' mataj yu sajb'ican co nimanil yin̈ squistalil yeyi, to ha' yet ẍji'ni ha' tu', ẍco k'an tet Comam Dios ta sajb'ican co nab'al b'oj janma. Yu xpitzc'acan̈ Comam Jesucristo xol hej camom, yuxin chon̈ colchayi. 22X'ahtoj Comam satcan̈, x'apni yin̈ swatx' Comam Dios. Yuxin sunil hej ángel, sunil mac ay schejb'anil, b'oj mac ay scan̈il yeyi, ẍcan yalan̈ schejb'anil Comam Jesucristo.


Copyright
Learn More

will be added

X\