1 PEDRO 2

1Ja'a'wejxacan sunil tzetet tx'oj: Lek'ti'al, sub'wal, schiwacoj co c'ul yin̈ jetb'i, b'oj halo' k'umale. 2Haca' yochen niẍtej tz'ul unin ime mach scalil aycoj, hactu' yet' ay jochen stzoti' Comam Dios mach scalil aycoj, yun̈e co ch'ib' yin̈ tzet ye co colb'anil, 3haxca yeli xax jab'eloj sc'ulal sc'ul Comam Jahaw. 4- 5Hitzojon̈wejcoj sc'atan̈ Comam Jesucristo, haxca ha' Comam haca' hune' ch'en itzitzal yeyi sb'ejiloj heb'naj aomcan̈ n̈a. Yaja' Comam Dios sic'len Comam Cristo, caw ay yelapnoj ye Comam. Hacon̈ pax tu' lahan on̈ b'oj ch'en ch'en itzitzal yeyi, lan̈an jocnicoj yu Comam Dios yun̈e swatx'encan̈ hune' yatut b'ay ch'ehi. Chon̈ yanipaxcoj Comam sacerdoteal yun̈e jocnicoj yu Comam yu ja'ni xahanb'al ẍwayitij yin̈ janma. Hunk'aan xahanb'al ti' caw sak'al yul sat Comam Dios haxca yu Comam Jesucristo chij sb'a hunk'aan ti'. 6Chal Yum Comam yin̈ tzet ye Comam Cristo: Yul con̈ob' Sión ẍwacoj hune' ch'en ch'en ẍcawxencan te' n̈ahan, ch'en ch'en sic'leb'il tu', caw ay yelapnoj yeyi. Mactaj ch'a'ni yuluj sc'ul yin̈, mach ẍcan yin̈ hacn̈eti', to ẍchab' b'aytet xalte Comam. 7Jet hayon̈ ẍja' yuluj co c'ul yin̈ Comam Cristo, caw ay yelapnoj yeyi. Yaja' tet mac macha' yuluj sc'ul yin̈, chij sb'a yin̈ tzet chal Yum Comam, chalni: Ha' ch'en ch'en sb'ejiloj heb'naj aomcan̈ n̈ah, ha ch'en x'oc scawxeb'aniloj te' n̈ah. 8Chalpaxayoj: Haca' hune' ch'en ch'en b'ay xtxak'mo anma cat yayc'ayi, hactu' ye Comam, ẍipaxayoj.Ẍlecta heb'jetb'i haxca mach syijye heb'jetb'i stzoti' Comam. Halb'ilxatic'a ta hactu' ẍtan̈oj heb'jetb'i. 9Yaja' walon̈, hune' con̈ob'al anma sic'leb'ilxa jeyi, hune' majan sacerdote aycoj yin̈ smunil naj rey, hune' con̈ob' pohb'ilxaloj yetoj Comam Dios. Sic'leb'ilon̈xa yu Comam yu joc yetoj, haxca choche Comam ta ẍco pujb'ac'oj yeltich'anil ye Comam. Ha' Comam xcon̈ iniloj xol k'ejholo xcon̈ yanicoj yin̈ sajilk'inal caw eltich'an yelwani. 10Yet yalan̈to tu', comon anman̈e heyeyi, yaja' tinan̈ scon̈ob'xa Comam heyeyi haca' je ti'an. Yet yalan̈to tu', mach stz'a' sc'ul Comam teyin̈, yaja' tinan̈, cawxa stz'a' sc'ul Comam teyin̈ b'oj jin̈an. 11Hex xahan ay wuan, johtaj to ec'om je satyib'an̈k'inal ti', mataj caw yul co con̈ob' ayon̈, yuxin chin tak'ecan teyetan ta che cach he b'a yin̈ hej tzetet tx'oj chochetoj he nimanil, hunk'aan ch'a'nicoj howal yin̈ janma. 12Yin̈ stoholal chon̈ ehc'oj yin̈ sat anma matto yohtajoj Comam Dios, yuxin waxan̈ca chon̈ halot tx'ojal yu anma tinan̈, haca' to caw ay co mul, yaja' yu sc'ulal ẍco ye', cha'a'coj heb'jetb'i smay Comam Dios, hatotu' chila' Comam tzet ẍtan̈oj sunil anma. 13Yun̈e mach'el spixan Comam Jahaw, yijyom ẍjute co b'a tet hej autoridad ay satyib'an̈k'inal ti': Ha' ye tet naj yahaw haxca ha' naj sat yecoj jin̈, 14ha' ye tet heb'naj gobernador ab'il chejb'anile yu naj, yu ya'ni tz'a'oj sat anma tx'oj, cat yoc smay anma c'ul. 15Haxca choche Comam ta hej tzetet c'ul ẍju, yun̈e mach b'ay stzab'i anma ẍhalni tx'oj jin̈, anma mat c'uluj snab'al. 16Ehojon̈c'oj haca' mac yet-xa sb'a, yaja' macha' matanil jala' cat joc junuj xtx'ojal. Ha' jet, haca' schejab' Comam Dios ẍjute co b'a. 17Xahan ẍjil sunil anma, jochewej sunil heb'ya' jetb'i ayxacoj yin̈ Comam, chon̈ nanon tet Comam Dios, yijyom ẍjute co b'a tet naj yahaw. 18Hex chejab'ex, chex nanon tet heyahaw, b'oj yijyom cheyute he b'a tet heb'naj. Matn̈etaj tet heb'naj c'ulch'an sc'ul teyin̈ b'oj chex nanitoj, to hasta tet heb'naj chex etani. 19Haxca caw c'ul waxan̈ca matanil ẍja' ec'oj ya' janma, yaja' ẍja' nimanc'ulal haxca chon̈ nanon tet Comam Dios. 20Ta yu juni xtx'ojal ch'a'ot tz'a'oj co sat, matzet c'ul ẍco chab' spajoj, waxan̈cami ẍto ja' nimanc'ulal yin̈. Wal ta ẍja' nimanc'ulal yet ayon̈coj yin̈ sya'tajil yet lan̈an juni hunuj tzetet c'ul, wal tu' caw c'ul yul sat Comam. 21- 23Yu hune' tu' xcon̈ yawte Comam yetoj, haxca ju x'ec' ya' yanma Comam Cristo. Mach hunuj smul Comam xacoj, machca lek'ti'al xala. Yet xhalot tx'oj tet, mach x'oc smohn̈e'toj. Yet x'aot ec'oj ya' yanma, mach xala ta ẍpajnoj, to xacoj sb'a yul sk'ab' Comam Dios tohol yi'ni cuenta yin̈ tzetet. Ha' hune' ti' sye Comam jet yun̈e joc tzujnuj yin̈. 24Ha' caw Comam Cristo x'i'ni hej co mul yin̈ snimanil yet xcam yin̈ culus, yun̈e matxa chon̈ ehc'oj yin̈ mule. Yin̈ hactu' xa hu jehc'oj yin̈ stoholal. Ha' hantaj sya'tajil xil Comam, ha' x'a'ni tan̈oj co mul. 25Yet x'ec'can tu', haca' canelu c'aynajtoj jeyi, wal tinan̈ xcon̈ meltzocoj yin̈ Comam Cristo, ha' Comam stan̈eomal jet, haxa Comam ch'ilni tzet ye janma.


Copyright
Learn More

will be added

X\