1 PEDRO 2

1Yuxin awecano sunil istx'ojal; sunil etal, yeb xin lek'ti'al, yeb ischiwa hec'ul, yeb hehobnican̈ tzoti'. 2- 3Ta caw yeli xaheyohtan̈elo sic'lebil ta c'ul Comam Dios jin̈, haca'ojab yochen huno nich'an nene' yim ismi', hacojab tu' heyochen hune' cuybanile yet Comam Dios mach sombiloj, hac tu' xin cheyik' heyip yin̈ hecolbanil. 4Hitzojon̈weco isc'atan̈ Comam Jesucristo, caw itzitz Comam. Comam Cristo tu' lahan haca' hunu ch'en ch'en caw niman yelapnoj ayayto xe'o n̈a. Yaja' xin k'ojbilcanilo ch'en yu ebnaj watx'emcan̈ n̈a, yaj wal xin Comam Dios sic'nicanicoj yeb caw niman yelapno ye yul sat. 5Wal xin itzitz Comam Cristo, yuxin itzitzon̈paxoj yin̈ Comam, xin jak'a'we hamanil tet Comam Dios cohunico yin̈ Comam Cristo yatutoj, yeb xin con̈yapaxico Comam sacerdotehal, yetxa Comam jehi. Yu Comam Jesucristo yuxin chu jak'ni coba xahanbalil tet Comam yet chicoyijen tzet chala. Ha' hune' tu', caw c'ul yul sat Comam Dios. 6Yuto chal yul Yum Comam Dios haca' ti': Yul con̈ob Sión wacojan hune' mac haca' ch'en ch'en ch'ayto xe'o yipo n̈a. Ha' hune' ch'en ch'en tu' sic'bililo ch'en wuhan, caw niman yelapno ye ch'en. Ha' mac chaco yanma yin̈ hune' mac tu', mach chican yin̈ tx'ixwilal, ẍiayoj. 7Han̈on̈ chijayto yul janma yin̈ Comam Cristo, caw niman yelapno ye Comam yul cosat, yaj wal mac mach chiyaco yanma yin̈ Comam, ha' yin̈ huntek'an tu' tz'ibn̈ebilcano yul Yum Comam bay chal haca' ti': Ha' hune' ch'en ch'en k'ojbilcanilo yin̈ ismunil yu ebnaj watx'em n̈a, ha' ch'en caw c'ul yoc xe'o n̈a, ẍiayoj. 8Chalpaxo yul Yum Comam haca' ti': Ha' hune' ch'en ch'en ti', ha' bay chitxak'mo anma cat yayc'ayi, ẍiayoj. Chitxak'mo anma yuto machi isyije tzet chal Istzoti' Comam Dios; halbilcanoj xin tato hac tu' chiyu anma tu'. 9Walon̈ ti' iscon̈obxa Comam jehi sic'bilon̈xalo yu Comam, sacerdoteon̈ yin̈ ismunil Comam Dios Jahawil, hune' niman con̈ob nanxa yehiloj yu Comam. Sic'bilon̈xa yu Comam yu joc yeto Comam yun̈e joc copujbanic'o isc'ulch'anil Comam. Xacon̈yilo Comam Dios xol k'ejholo, con̈yanico xol hune' issajilk'inal caw c'ulcanoj. 10Yet payat mach iscon̈obo Comam Dios heyehi, yaj wal tinan̈ iscon̈obxa Comam heyehi. Yet payat tu', machi mac chitz'ay isc'ul teyin̈, yaja' tinan̈ chitz'ay isc'ul Comam Dios teyin̈. 11Hex wuẍtaj, hex wanab, hex xahan ay wuti'an, han̈on̈ ti' mach cocon̈obo hune' yul sat yiban̈k'inal ti', ton̈e chon̈eq'ui; yuxin chintak'ecantojan teyet, mach chebeybaln̈e huntek'an tzet chiyoche henimanil, yuto ha' huntek'an istx'ojal tu' chiyak'le howal yeb janma. 12C'ulojab cheyute hebeybal xol anma maẍto ohtan̈eo Comam Dios, waxan̈ca xin chexhallax tx'ojal tinan̈ haca'tan̈e caw ay hemul, yaja' yu isc'ulal cheye, yuxin chal ebnaj c'ulla tzoti' yin̈ Comam Dios yet chi'ilchati sunil anma yin̈ hune' tz'ayic yet chul Comam. 13Yun̈e mach chiel ispixan Comam Dios heyu yijemojab cheyute heba tet ebnaj ayicto yul capil, hactic'apax tu' tet naj jahaw, yuto ec'na aycan̈ yip ismunil naj. 14Cat heyijenpaxo tzet chal ebnaj yahaw ak'bil ismunil yu naj yanico anma yin̈ isya'tajil yet chiyanico ismul, cat yalni ebnaj c'ulla tzoti' yin̈ mac c'ul tzet chiswatx'e. 15Choche Comam Dios ta caw c'ul cheyute hebeybal, ha' xin wal matzet tz'aj yala' anma tx'oj isnabal teyin̈ yeb anma ayco yin̈ issucal. 16Ec'an̈we yin̈ isc'ulal yuto colbilexxa. Yaja' matolo yu xahechah hecolbanil tu' yuxin chexoc hewatx'e' istx'ojal, ¡machoj! To ischejabxa Comam Dios heyehi. 17Xiwan̈we tet Comam Dios, cat xin hexahann̈enpaxo anma ayxaco yul isk'ab Comam. Ayojab yelapno ye heyet anmahil yul hesat, yebpaxo naj jahaw, ayojab yelapno ye naj yul hesat. 18Hex chejab heyehi, ayojab yelapno heyahaw yul hesat, yijewe tzet chiyal ebnaj. Yaj maẍn̈etaj tet ebnaj c'ul isnabal, yeb ebnaj caw c'ul isc'ul, wal xin yijewepaxo tet ebnaj ton̈e chichichon yanma. 19Yuxin ta yu ayco conabal yin̈ Comam Dios, yuxin ton̈e chon̈etalaxi, machi xin comul, yaj ta chitecha ju, caw chitzala Comam Dios jin̈. 20Yaja' ta yu hunu istx'ojal chiju yuxin chon̈oc yin̈ isya'tajil cat xin jak'ni techahoj, caw matzet chaliloj yuto comultic'a yehi. Yaj ta yu hunu isc'ulal chicowatx'e, cat yak'lax isya'tajil jila', cat jak'ni techahoj, wal hune' tu' caw niman tzet chalilo yul sat Comam Dios. 21Yu hune' tu' yuxin con̈yawte Comam. Hayet yec'ya' yanma Comam Cristo ju, isyenicano Comam yin̈ tzet chu cobeybaln̈eni. 22Machi nino ismul Comam yacoj, machipaxo lek'ti'al yala. 23Hayet isbuchlax Comam, machi ispajtze. Hayet yalaxico Comam yin̈ isya'tajil yu ebnaj, machi yalpaxo Comam howalil. Ha' hune' yute Comam, ton̈e yaben̈eto isba yul isk'ab Comam Dios, yuto yohta Comam tato ha' Comam Dios ch'ilni tzet ch'elico yin̈ istoholal. 24Ha' Comam Jesucristo ijnicanocan̈ comul yin̈ isnimanil yet iscam yin̈ te' culus. Hac tu' xin matxa chu yak'ni cabo isba istx'ojal jin̈, yuto camnajon̈xalo yin̈ mule, hac tu' utebilon̈cano yu Comam, yuxin chu cowatx'enico cobeybal yin̈ istoholal. Caw yabe Comam isya'tajil yin̈ isnimanil ju yun̈e cocolcha yul isk'ab hune' yabil ayco yin̈ janma, ha' ton comul. 25Hayet yalan̈to tu', lahanex haca' no' me' c'aynatoj, wal tinan̈ xin xaquexmeltzoco yul isk'ab Comam Cristo, yuxin haxa Comam chextan̈eni yeb xin ha' ch'ilni heyanma.

will be added

X\