1 PEDRO 1

1Hanin Pedro inti'an, ischejab Comam Jesucristo wehan. Chintz'ibn̈etojan hune' carta ti' teyet hex ayexxaco yul isk'ab Comam pujanilto yul ismajul Ponto, yeb Galacia, yeb Capadocia, yeb Asia, yeb yul ismajul Bitinia. 2Hex ti' sic'bilexxa yu Comam Dios Mame haca'tic'a yu istxumni Comam yet caw payat. Yu Yespíritu Comam, yuxin quexyacanico yetoj, yun̈e heyijen tzet chal Comam Jesucristo, cat hesajbicano yu isch'iquil Comam. Yak'ab Comam tx'i'al isc'ulch'anil isc'ul yeb ak'anc'ulal teyet. 3Jalawe c'ulla tzoti' yin̈ Comam Dios, ismam Comam Jesucristo. Yu isc'ulch'anil isc'ul Comam Dios jin̈, yuxin yak' Comam hune' cok'inal caw ac'to; ha' hune' tu' ayco yipo janma. Hune' ti' xatzujcha ju yuto itzitzbican̈ Comam Jesucristo xol camom yu yip Comam Dios. 4Xayak' Comam Dios cok'inal yu cochahni tzet c'ubabil jet yu Comam yul satcan̈. Hune' tu', mach chi'etaxtoj, machi tz'il chihitzico yin̈, yebpaxo xin maẍtic'a chitan̈iloj. 5Yuto xajayto yul janma yin̈ Comam Dios, yuxin chon̈isc'uba Comam yu yip yun̈e istzujcha apno cocolbanil t'in̈anxa ye yu Comam, hune' chiyelax yet ch'apni islahobal tz'ayic. 6Yu hune' ti', yuxin caw chon̈tzalahi, waxan̈ca yilal jec' yin̈ej isya'tajil hanic'oxa tiempohal. 7Haca' ch'en oro, caw yilal chi'ilwelax ch'en xol k'a k'a' yun̈e yilchaloj ta caw c'ul ch'en maca ta mach c'ulo ch'en. Hacon̈pax tu', caw yilal chon̈ilwelaxi, cat yilchaloj tato caw yeli ayco janma yin̈ Comam Dios maca mach xin. Hayet chitecha ilwebal ju xin yu ayco janma yin̈ Comam, ec'bal yelapno hune' tu' yul sat Comam Dios sata ch'en oro chiilwelax tu', waxan̈ca xin chitan̈ilo ch'en. Yaj ta chitecha ilwebal ju, caw chitzala Comam Jesucristo jin̈ yet chihul Comam, cat yak'ni Comam issak'alil isc'ul jet, yeb caw ay yelapno chon̈elcanico yul sat. 8Waxan̈ca matxa heyil Comam Jesucristo, yaja' xahan ay Comam heyu. Waxan̈ca mach lan̈ano heyilni, yaja' cheyayto yul heyanma yin̈ Comam, yuxin caw chextzalacanoj. Ha' hune' hetzalahilal tu', caw c'ulch'ancanoj, machi tzoti' chik'oji yalnilo isc'ulch'anil teyet. 9Yuto xatzujcha apno hecolbanil heyu yu heyaco heyanma yin̈ Comam. 10Ebnaj ischejab Comam Dios ec'lena yet payxa, tzotel ebnaj yin̈ hanta isc'ulch'anil Comam Dios chak' jet. Issayni ebnaj yin̈ nanc'ulal yin̈ caw tzet yelapno ye colbanile ti'. 11Ha' Yespíritu Comam Cristo ayco yin̈ ebnaj, ha' ak'ni yohtan̈elo ebnaj yin̈ tzet chu yec'ya' yanma Comam Cristo, yeb xin isc'ulch'anil chihul yet chiyijni isba tu'. Ha' ebnaj tu' issay ebnaj yila' mac hune' chal Yespíritu tu' yeb yin̈ tzet tiempohal chu huntek'an tu'. 12Yaja' yak' Comam Dios yohtan̈elo ebnaj tato ha' huntek'an cuybanil yal ebnaj tu', mach yeto ebnaj yehi; to jet ye han̈on̈ ti'. Tinan̈ xin, xaak'lax heyohtan̈elo yu ebnaj pujbanic'o Tzoti' yet colbanile yu ishelanil Comam Espíritu Santo alaxti yul satcan̈. ¡Ha' huntek'an tu' xin, caw yoche ebnaj ángel yila'! 13Yuxin helanojab cheyute heba, txumwe yin̈ tzet chewatx'e, cawxojab hec'ul yin̈ isc'ulch'anil isc'ul Comam Dios chak' jet yet chul Comam Jesucristo hunelxa. 14Hex ti', yuninalxa Comam Dios heyehi caw yijemex tet Comam yuxin matxa chexec' yin̈ heyochento tzettaj tx'oj hewatx'e yet yalan̈tocanoj, yet maẍto cheyohtan̈elo Comam Dios. 15Wal xin ec'an̈we yin̈ isc'ulal, machojab nino istx'ojal chewatx'e, yuto Comam Dios quexawten̈eni, caw machi nich'ano istx'ojal yin̈ Comam. 16Yuto chal Comam yul Yum haca' ti': “Ec'an̈we yin̈ isc'ulal, machojab nino istx'ojal teyin̈ yuto haninti'an machi nich'ano intx'ojal win̈an,” ẍi Comam. 17Ha' Comam Dios tu', chi'ilni tzet chielico hunun anma hatatic'a tzet chiswatx'e. Caw lahan chi'ilchati anma yu Comam, machi hunu ti' cheba'to Comam ismul. Yuxin tato chijal Comam Dios Comamoj, ayojab yelapno Comam yul cosat yulbal ayon̈toc'o yul sat yiban̈k'inal ti'. 18Comam Dios xacon̈iscolilo yin̈ hune' cobeybal matzet chaliloj, hune' cochah tet comam comi'. Johtaj ta cocolbanil mach lok'bilo yu tzet chitan̈iloj yul sat yiban̈k'inal ti' haca' ch'en oro yeb ch'en plata. 19Wal xin ha' ischiq'uil Comam Jesucristo caw niman yelapnoj, ha' k'oji islok'ni cocolbanil. Ak'lax camo Comam yu yoc xahanbalil, haca' hunu no' me' machi nich'ano isya'bil, machipaxo istzaca'il. 20Nabilxatic'a hune' ti' yin̈ Comam yet maẍto chiwatx'i hune' yul sat yiban̈k'inal ti' yu Comam Dios. Yaj wal tinan̈ xin xaisyecan̈ isba Comam Jesucristo yin̈ islahobal tz'ayic ti' yu yak'lax isc'ulal jet. 21Yu Comam Jesucristo, yuxin xajaco janma yin̈ Comam Dios. Ha' Comam Dios ak'ni itzitzbocan̈ Comam Jesucristo xol anma camom, yak'ni isc'ulch'anil isc'ul tet. Yu Comam Jesús tu', yuxin chijaco janma yin̈ Comam Dios, cat xin iscawxipaxo coc'ul yin̈ Comam. 22Wal tinan̈ xin yu xacoyije hune' cuybanil caw yel chala, yuxin sajxa ye janma yu Comam Dios. Hac tu' xin xahan chijil ebnaj juẍtaj yeb ebix janab, yuxin caw yilal coxahann̈en coba yin̈ sunil janma yeb xin yin̈ sunil jip. 23Yuto pitzc'anajon̈xa yet iscayel yaj mach yin̈o comam comi' cambehal yehi, wal xin yu Istzoti' Comam Dios pitzc'anajon̈xa. Yuto ha' Istzoti' Comam caw itzitz, ayn̈etic'a yin̈ sunilbal tiempo. 24Yuto chiyal yul Yum Comam Dios haca' ti': Sunil anma lahan haca' te' telaj, haxa iscan̈il ye xin, lahan haca' isxumaquil te' telaj tu', chitajilo te' cat ishowayo isxumaquil te'. 25Yaj wal Istzoti' Comam Dios Jahawil, ayn̈etic'ac'o yin̈ sunilbal tiempo, ẍiayoj. Ha' ton xin hune' ti' Tzoti' c'ul yet colbanile halbilxa jabe'.

will be added

X\