1 PEDRO 1

1Hayin Pedro hin ti'an, yapóstol Comam Jesucristo wean, chin tz'ib'n̈etoj hune' wum ti' teyet, hex pujanextoj yulaj scon̈ob'al Ponto, Galacia, Capadocia, Asia, b'oj Bitinia. 2Hexti' sic'leb'il hexxa yu Comam Dios Padre, haca' xu snani Comam yettax x'ichitij. Yu Yespíritu Comam quex yacoj yetoj, yun̈e he yijyen tzet chal Comam Jesucristo, cat he sajb'ican yu schiq'uil.Ya'ab' Comam caw sunil sc'ulch'anil sc'ul b'oj ak'anc'ulal teyet. 3Ja'a'coj smay Comam Dios Smam Jahaw Jesucristo, haxca yu stz'a' sc'ul Comam jin̈ xcon̈ ya'ni pitzc'aoj yun̈e scawxi co c'ul co chani co k'inal mach stan̈b'al. Hune' ti' xax tzujcha ju haxca xpitzc'acan̈ Comam Jesucristo yin̈ camical. 4Xa' Comam sk'inal jet yu co chanoj tzet yan̈eb'ilxa jet sc'atan̈ Comam. Hune' tu' machu sc'ayojiloj, machu yetaxojtoj, machca ẍtan̈ojayoj. 5Chon̈ stan̈e Comam yu scan̈il yeyi, haxca ẍja' yuluj co c'ul yin̈ Comam, yun̈e stzujchaapnoj co colb'anil t'in̈anxa ye yu, hune' ẍyelaxoj yin̈ slahub'al tz'ayic. 6Tzalaan̈wej yu hune' ti', waxan̈ca tx'ihalto hej sya'tajil b'ay yilal chex ec'oj hayeb'ojxa stz'ayicalil. 7Haca' yilwelax ch'en oro xol k'a' k'a' ta matzet aycoj xol ch'en, hactu' jilwelaxi ta caw ẍja' yuluj co c'ul yin̈ Comam Dios. Haxca ja'ni yuluj co c'ul ec'b'al yelapnoj ye sataj ch'en oro ẍtic'a tan̈iloj. Ta yu ja'ni yuluj co c'ul yin̈ Comam ẍtecha hej sya'tajil ju, yin̈ hactu' ẍhal-laxoj tzoti' c'ul yin̈ Comam b'oj ch'alaxojcoj smay spixan cat syelaxoj to ay yelapnoj yeyi yet chuluj Comam Jesucristo. 8- 9Waxan̈ca mach b'ay xeyil yin̈ Comam, yaja' caw ocheb'il heyu. Waxan̈ca mat lan̈anoj heyilni, yaja' yu scawxi he c'ul yin̈ caw chex tzalayi haxca lan̈an he chani he colb'anil. Hune' he tzalalal ti' caw eltich'an hasta mach tzoti' ẍc'oji yalniloj sc'ulch'anil yin̈. Ha' hune' ti' xin, ch'oc yipoj he c'ul ta stzujchaapnoj he colb'anil heyu, yuxin xeya' yuluj he c'ul yin̈ Comam. 10Heb'ya' schejab'lom Comam Dios x'ehc'oj yet' payxa xal heb'ya' hantaj sc'ulch'anil sc'ul Comam cha' jet, sayni heb'ya' yila' yin̈ nanc'ulal tzet caw yelapnoj ye hune' co colb'anil ti'. 11Ha' Yespíritu Comam Cristo aycoj yin̈ heb'ya', ha' x'a'ni yohtajn̈e' heb'ya' tzet chu yec'oj ya' yanma Comam, b'oj yeltich'anil tzet ẍto huluj yet schab'toj co sataj ti'. Heb'ya' tu', xtxumtxun sc'ul heb'ya', mac hune' chal Espíritu tu' b'oj b'ak'in̈ chuluj. 12Yaja' xa' Comam Dios yohtajn̈e heb'ya' to hune' munil chu heb'ya' yin̈ yalnic'oj hune' tzoti' tu', mat yetoj heb'ya' yeyi, to jet ye hayon̈ ti'. Tinan̈ ha' hune' ti' x'a'lax heyohtajn̈e' yu heb'ya' xpujb'anc'oj tzoti' yet colb'anil yu scan̈il ye Comam Espíritu Santo ab'il xtit Comam sc'atan̈ Comam Dios. Ha' hune' ti' k'a' ẍto cam yoche hej ángel yohtajn̈e'. 13Yuxin itz'at ẍjute co b'a, co cacha' co b'a. Cawxojab' co c'ul yin̈ hantaj sc'ulch'anil sc'ul Comam Dios cha'a' jet, yet chuluj Comam Jesucristo. 14Haca' uninale caw yijyom, hactu' ẍjute co b'a, matxa chon̈ ehc'oj yin̈ jochentoj hej tzetet tx'oj xju yet yalan̈to tu', yet maẍto ẍjohtajn̈e Comam Dios. 15Ha' jet to chon̈ ehc'oj yin̈ mach ninoj co tx'ojal, haxca Comam Dios chon̈ awten yetoj, mach ninoj xtx'ojal. 16Chal Comam yul Yum: Ehan̈wejc'oj yin̈ mach ninoj he tx'ojal, haxca hayin ti'an, mach ninoj hin tx'ojalan. 17Haxca ẍjawte Comam Dios jin̈ co Mamoj, Comam mach xahan mach hinan yul sat yet chinojtij cuenta jin̈, yuxin yet ay co nanon tet Comam yulb'al hayon̈c'oj satyib'an̈k'inal ti', haxca ec'omn̈e jeyi. 18Haxca quex colcha tet squewa'il tzet xu heyehc'oj, hune' xeyi'iloj yin̈ he yichmam. Johtaj to co colb'anil tu' mach xlok'lax yu hej tzetet ẍtan̈iloj, haca' ch'en oro mato ch'en plata, 19to xlok'lax yu schiq'uil Comam Cristo caw ay stohol, Comam x'a'lax xahanb'alil haca' hune' canelu caw c'ul, machcoj yab'il yin̈. 20Nab'ilxatic'a hune' ti' yin̈ Comam yet maẍto ẍwatx'i satyib'an̈k'inal ti', haxa tinan̈ syecan̈ sb'a Comam yin̈xa slahub'al ti' yu sc'ulaloj jet. 21Yu Comam, xja' yuluj co c'ul yin̈ Comam Dios, Comam xpitzc'ancan̈ Comam Cristo tu' yin̈ camical, xa'ni smay. Yuxin scawxob'alxa co c'ul ye Comam Dios haxca xja' yuluj co c'ul yin̈. 22Yu co yijyen b'aytet st'in̈anil, sajxa ye janma, yuxin chu jochen hantaj juẍtaj janab' yin̈ caw yel ẍjala. Tinan̈ sunil co c'ul, b'oj sunil jip jochewej jetb'i. 23Haxca xcon̈ pitzc'a yin̈ scayel, mat yin̈oj comam comi' camb'eal yeyi, machoj, to yu stzoti' Comam, hune' tzoti' itzitzn̈etic'a. 24Haxca chal Yum Comam: Sunil anma haca'n̈e telaj yeyi, hantaj scan̈il yeyi, haca' xumac telaj. Ẍtajiloj telaj cat yay hona xumac, 25yaja' wal stzoti' Comam Jahaw, ch'ehojc'oj stohb'alk'inal. Ha' hune' ti' tzoti' c'ul yet colb'anil halb'ilxatic'a heyab'e'.


Copyright
Learn More

will be added

X\