1 JUAN 5

1Mactaj ch'a'ni yuluj sc'ul to ha' Comam Jesús ha' Cristo, yuninal Comam Dios ye chaltu'. Ta ẍjoche hune' mame, ẍjoche pax yuninal. 2Yet ẍjochen Comam Dios b'oj ẍco yijye tzet chala, johtaj to ẍjoche pax mactaj yuninal Comam. 3Yet ẍjochen Comam ẍco yijye pax schejb'anil. Schejb'anil Comam tu' mat ya'tajoj. 4Mactajon̈ hon̈ yuninalxa Comam Dios matxa ẍja'ayoj co b'a tet hej xtx'ojal chu anma ẍcajni Comam, haxca yu ja'ni yuluj co c'ul yin̈ Comam, yuxin ch'ay hunk'aan xtx'ojal tu' ju. 5Han̈c'a mac ch'a'ni yuluj sc'ul ta ha' Comam Jesús ha' Sc'ahol Comam Dios yeyi, ha' ch'ay xtx'ojal tu' yu. 6Haxca yet xi'ni ha' Comam Jesús, b'oj yet xcami, syeniloj sb'a ta Sc'ahol Comam Dios hulnajc'oj satyib'an̈k'inal ti' yeyi. Matn̈etaj yu yi'ni ha' syeloj sb'a, to yu x'el pax schiq'uil. Ha' Comam Espíritu ẍhalni st'in̈anil, xa' pax sb'a yin̈ Comam Jesucristo. 7- 8Cha' sb'a Comam Espíritu yin̈ tzet ye Comam Jesucristo. Ayto cab'xa tzet cha' sb'a yin̈, ha' yet xi'ni ha', b'oj yet x'el schiq'uil yet xcami. Ha' ox majan ti', lahan yalni ta ha' Jesucristo Sc'ahol Comam Dios yeyi. 9Yu hunk'aan ti' xa' sb'a Comam Dios yin̈ Sc'ahol. Ẍja' yuluj co c'ul yin̈ tzet chal anma, hajxam tzet chal Comam Dios, to k'a ayto yelapnoj ye Comam. 10Hayon̈ ẍja' yuluj co c'ul yin̈ Sc'ahol Comam, lan̈an yalni Comam Espíritu jet to yel chal Comam Dios yin̈ Sc'ahol. Yaja' mactaj mach'a'ni yuluj sc'ul yin̈ Comam, haca'n̈e lek'ti' Comam yul sat, haxca macha' yuluj sc'ul yin̈ tzet chal Comam yin̈ Sc'ahol. 11Ha' hune' xal Comam tu', to xa' co k'inal mach stan̈b'al. Hune' k'inal tu' yin̈n̈e Sc'ahol Comam aycoj. 12Yuxin ta aycoj Sc'ahol Comam yin̈ janma, ay co k'inal mach stan̈b'al. Yaja' mactaj machcoj Sc'ahol Comam yin̈ yanma, mach hune' k'inale tu' yin̈. 13Hex cheya' yuluj he c'ul yin̈ Sc'ahol Comam Dios, teyet chin tz'ib'n̈e hune' wum ti'an, yun̈e heyohtajn̈eni to ay co k'inal mach stan̈b'al. 14Johtaj paxoj ta yet ẍja'ni joración tet Comam, tzantzet ẍco k'ana, ta haca' chal sc'ul Comam chu co k'anni, ẍtic'a yab'etoj Comam. 15Johtaj ta chab'e Comam tzet ẍjala yet ẍja'ni joración tu', yuxin johtaj paxoj to ẍtic'a ya'a' Comam tzet ẍco k'an tu'. 16Ta ẍjila ta ay hunuj heb'ya' jetb'i lan̈an yanicoj smul, hunk'aan mule machon̈ initoj yin̈ camical, co k'ana' tet Comam yu, cat ya'ni Comam sk'inal. Ay mule ch'initoj anma yin̈ camical, yaja' mach ẍwalan ta ẍco k'an tet Comam yu hune' mac chacoj smul tu'. 17Sunil xtx'ojal ẍju, mule, yaja' ay hunmajan mule machon̈ initoj yin̈ camical. 18Johtaj ta mactaj yuninalxa Comam, matxa chacoj smul, to haxa Sc'ahol Comam ẍtan̈eni, yuxin matxa chu yoc sk'ab' naj matzwalil yin̈. 19Johtaj to hon̈ yet-xa Comam, yaja' wal anma machcoj yin̈ Comam, yul sk'ab' naj matzwalil aycoj. 20Johtajpaxoj to xax hul Sc'ahol Comam. Ha' xhajnitoj co nab'al yun̈e johtajn̈en Comam Dios yin̈ st'in̈anil. Yuxin ayon̈xacoj yin̈ Comam Dios caw yel chala. Ha' chaliloj hune' ti', to ayon̈xacoj yin̈ Sc'ahol Comam. Ha' Comam Jesucristo ti' caw yeli Dios, ch'a'ni co k'inal mach stan̈b'al. 21Hex xahan ay wu ti'an, mach ja'ayoj co b'a tet hunk'aanxa tzetet chacoj anma sdiosoj.


Copyright
Learn More

will be added

X\