1 JUAN 4

1Wuẍtaj wanab, tato ay ebnaj chiec' halnoj tato caw ischejab Comam Dios yehi, caw mach ton̈eo cheyayto tzet chal ebnaj tu' yul heyanma. Caw babel cheyabe istzotel ebnaj tato Istzoti' Comam Dios chal ebnaj, yuto caw tx'i'al ebnaj lek'ti'wom chalni tato ischejab Comam Dios yehi. 2Hac ti' chu hetxumniloj tato ayco Yespíritu Comam Dios yin̈ ebnaj, ta chal ebnaj haca' ti': “Caw anma yute isba Comam Jesucristo yet yulic'o Comam yul sat yiban̈k'inal ti',” ta ẍi ebnaj, wal tu' ayco Yespíritu Comam yin̈ ebnaj. 3Wal mac mach chihalni yin̈ Comam Jesús haca' tu' xin, caw mach ayoco Yespíritu Comam Dios yin̈, ha' yespíritu naj chicajni Comam Jesucristo ayco yin̈. Hune' espíritu tu' xaheyabe tato chihuli, mach yetto bak'in chihul hun tu', wal xin ayxac'o yul sat yiban̈k'inal ti' tinan̈. 4Hex xahan ay wuhan, caw yetxa Comam Dios je tinan̈. Wal xin xacon̈k'oji yin̈ ebnaj lek'ti'wom tu', yuto ec'na caw ay yip Comam ayayto yul janma satapaxo naj ayco yul yanma anma yet yul sat yiban̈k'inal ti'. 5Caw yet yul sat yiban̈k'inal ti' ye ebnaj, yuxinto han̈c'an̈e tzet ay yul sat yiban̈k'inal ti' caw chiyalobtan̈e ebnaj. Wal anma yet yul sat yiban̈k'inal ti', caw sak'al yabento tzet chal ebnaj. 6Yaj walon̈ ti' xin, yetxa Comam Dios jehi, yuxin ha' mac ohtan̈enxa Comam Dios, ha' chiyabeto tzet chijala, wal anma mach yeto Comam Dios xin, caw mach chiyoche yabe' tzet chijala. Hac tu' xin, chiyu johtan̈enilo macta ayco isyelal Yespíritu Comam Dios yin̈, yeb xin mac ayco yespíritu naj yahawil lek'ti'al yin̈. 7Hex xahan ay wuti'an, xahanojab chijil coba hununon̈ yuto yin̈ Comam Dios chitit hune' coxahann̈en coba ti'. Tato caw xahan chijil coba hununon̈, chal yelapnoj tato ayon̈xaco yuninalo Comam Dios, johtaxa Comam. 8Yaja' tato mach xahano chijil coba, caw maẍto johtajo Comam Dios chal tu', yuto wal Comam Dios caw xahan ay anma yu. 9Isyelo Comam tato caw xahan ayon̈ yu, yuto yati hunpilan Isc'ahol yul say yiban̈k'inal ti' yun̈e yak'ni cok'inal mach istan̈bal. 10Ha' xin chiyenilo tzet caw yu con̈yochen Comam Dios. Wal xin, caw maẍtajon̈ babel coyelo jochen Comam Dios, to ha' Comam con̈ochen babel, yuxin yati Comam Isc'ahol yak'ni isba yin̈ xahanbalil, yak'nicano tan̈o comul. 11Hex wuẍtaj hex wanab, hex xahan ay wuti'an, yilal coxahann̈en coba hununon̈, yuto hac tu' yu con̈isxahann̈en Comam. 12Waxan̈ca maẍto hunu mac chi'ilni Comam tu' huneloj, yaja' tato xahan chijil coba hununon̈, caw ayco Comam yul yanma. Hac tu' chu isyenilo isc'ulal isc'ul Comam Dios jin̈ yin̈ istoholal. 13Hac tu' chu johtan̈eniloj ta ayon̈xaco yul isk'ab Comam Dios, yeb ta aypaxico Comam yul janma, yuto xayak' Comam Yespíritu jet. 14Yuto han̈-caw-on̈an̈ jilan̈ yin̈ Isc'ahol Comam Dios, yuxinto chijalan̈ tato ha' Comam Dios an̈eti Isc'ahol iscolno anma ay yul sat yiban̈k'inal ti'. 15Macn̈etic'a chalni tato Isc'ahol Comam Dios ye Comam Jesucristo, ayxaco yul isk'ab Comam Dios chal tu', yeb ayxapaxico Comam yul yanma. 16Hac tu' xin chu johtan̈eniloj cat janipaxayto yul janma ta caw chon̈yoche Comam Dios. Wal Comam Dios, caw chiyoche Comam anma, yuxinto ha' mac chixahann̈e yet anmahil, caw ayco Comam Dios yul yanma. 17Hac tu' chu isch'ib coxahann̈en coba hununon̈, yun̈e yet chiapni istz'ayical hune' isya'tajil chihuli, mach chon̈xiwcan̈, yuto caw haca' ye Comam Jesucristo, hac tu' jehic'o yul sat yiban̈k'inal ti'. 18Hayet chijochen Comam Dios yin̈ caw ist'in̈anil, wal tu' machi bay chalti isba xiwquilal, yuto yet chon̈xiwi chon̈nanon tet isya'tajil. Yuxin ta ay mac chixiwi, mach xahano ay Comam Dios yu. 19Walon̈ han̈on̈ ti' chijoche Comam Dios, yuto ha' Comam babel con̈ocheni. 20Yaja' tato ay hunujon̈ chijal haca' ti': “Wal haninti'an caw chiwochehan Comam Dios,” ta con̈chi, yaj caw caj chijilpaxo juẍtaj, yin̈ haca' tu' lek'ti'on̈. Yuxin tato mach chicoxahann̈e hunu juẍta chijilico yin̈, ¿tzet xin chiyu jochen Comam Dios mach chijilico yin̈? 21Comam Jesucristo ak'n̈ecano hune' cuybanile ti' jet: “Ha' mac chiochen Comam Dios, caw yilal isxahann̈enpaxo yuẍtaj,” ẍi Comam.

will be added

X\