1 JUAN 3

1Wal xin txumweloj yin̈ ta mach isbi hanta caw isxahanil ayon̈ yu Comam Dios, yuxin chon̈yal Comam Dios yuninaloj, caw xin yeli con̈ yuninalon̈xa Comam. Wal anma yet yul sat yiban̈k'inal ti', caw mach chik'oji istxumniloj tato yuninalxa Comam Dios jehi. Hacpax tu' yak'le Comam Jesucristo, maẍtic'a txumchalo yu anma tato Isc'ahol Comam Dios ye Comam. 2Hex wuẍtaj, hex wanab, hex caw xahan ay wuti'an, caw yuninalxa Comam Dios jehi, yaj maẍto chisyelo isba sunil isc'ulal Comam chiyak' jet. Caw johtaj tato yet chihul Comam Jesucristo tu', caw lahanxa chon̈elico yebi, yuto chijila' yin̈ Comam haca' caw yehi. 3Sunilon̈ ayco hune' ti' yipo coc'ul chicosajn̈e janma yin̈ istx'ojal, haca' Comam Jesucristo caw machi nino istx'ojal yin̈. 4Ha' mac chaco ismul chisman̈c'o cuybanile yet Comam Dios, yuto yet chijanico comul, chicoman̈c'o cuybanile aycano jet yu Comam. 5Johtaxa ta yu yinilo Comam Jesucristo mule, yuxin hulic'o Comam yul sat yiban̈k'inal ti', machi xin nino ismul Comam. 6Yuxin han̈on̈ ayon̈xaco yul isk'ab Comam matxa chicowatx'e istx'ojal. Wal mac chito watx'en istx'ojal, maẍto yohtajo Comam, maẍto chitxumchapaxo Comam yu. 7Hex xahan ay wuti'an, mach cheyak' subchaho heba tet hunuxa maca. Tato ha' istoholal chicowatx'e, caw c'ulon̈paxo haca' Comam Jesucristo, yuto han̈c'an̈e caw istoholal iswatx'e Comam. 8Wal mac chito watx'en istx'ojal, caw yet naj matzwalil yehi, yuto caw mulumtic'a naj matzwalil tu' yettax iswatx'i yul sat yiban̈k'inal ti'. Wal Comam Jesucristo Isc'ahol Comam Dios, hulic'o yul sat yiban̈k'inal yun̈e yetanto ismunil naj matzwalil tu'. 9Han̈on̈ pitzc'anajon̈xa yin̈ Comam Dios, matxa chicowatx'e istx'ojal, yuto ayxa isk'inal Comam yul janma, matxa xin chicowatx'epaxo istx'ojal yuto yuninalxa Comam jehi. 10Hac tu' xin, chiyu isyenilo isba mac yuninal Comam Dios, yeb xin mac yuninal naj matzwalil, yuto ha' mac chiwatx'en istx'ojal yeb xin mach xahano chil yet anmahil, caw mach yeto Comam Dios yehi. 11Hune' cuybanile ti' heyabe yettax heyanico heba yul isk'ab Comam Dios tato yilal coxahann̈en coba hununon̈. 12Mach chijutewe coba haca' yute isba naj Caín, naj tu' yet naj matzwalil ye naj, yuto ismak' camo naj yuẍtaj. ¿Tzet yin̈ ismak' camo naj yuẍta tu'? Yuto caw isc'ulal iswatx'e yuẍta naj, wal naj Caín tu' machiswalil tzet iswatx'e naj. 13Hex wuẍtaj, hex wanab, mach cheyak' c'ayo hec'ul ta chichiwaco isc'ul anma yet sat yiban̈k'inal ti' teyin̈. 14Yet yalan̈to, ayon̈ico yul isk'ab camical mach istan̈bal. Wal tinan̈ xin, caw xa'ak'lax hune' cok'inal mach istan̈bal. Caw johta hune' tu' yuto caw xahan chijil coba hununon̈. Tato mach xahano chijil coba hununon̈, caw ayon̈toco yul isk'ab camical. 15Tato chichiwa coc'ul jin̈ hununon̈, caw lahan yeb mak'omon̈. Walex hex ti' xin, caw heyohtaj ta mach hunu naj mak'om camo anma chischah isk'inal tet Comam Dios. 16Johtaxa tzet chalilo coxahann̈en coba, yuto yak' camo isba Comam Jesucristo jin̈; hacon̈pax tu' hinanojabon̈ jak'ni camo coba yin̈ hunu juẍtaj. 17Yaja' k'inalo ta ay hunu mac ay tzet aya, ton̈e xin chil yec' yuẍta yin̈ man̈tzetal, machi xin chicolwa yin̈, chal yelapnoj tato caw machi isc'ulch'anil Comam Dios yul yanma. 18Hex caw xahan ayex wuti'an, caw machn̈eojabtaj coti' chalni ta xahan chijil juẍtaj, caw yilal cocolwa yin̈, hac tu' xin chiyu coyeniloj tato caw xahan chijil coba hununon̈ yin̈ caw isyelal. 19- 20Hac ton tu' xin, chiyu johtan̈eniloj tato caw yin̈ ist'in̈anil ayon̈icoj, yuxin matxa con̈xiw yin̈ sat Comam Dios. Wal xin ta chitzotel janma tato ay hunu istx'ojal ayco jin̈, mach chon̈xiwi yuto ec'bal Comam cosataj, yohta Comam sunil tzet chiec' yul janma. 21Yaja' xin hex wuẍtaj hex wanab, hex xahan ay wuti'an, tato caw ak'anc'ulal ye janma, ta caw machi cotx'ojal chijabe, caw mach chon̈xiw yul sat Comam Dios. 22Hac tu' xin chak' Comam sunil tzet chicok'an tet, yuto chicoyije sunil ischejbanil Comam, yeb chicowatx'e tzet choche isc'ul. 23Ha' chejbanile halbilcano jet yu Comam Dios, ha' janayto yul janma tato Isc'ahol Comam Dios ye Comam Jesucristo, yeb xin coxahann̈en coba hununon̈, haca' yute yalnicano Comam jet. 24Tato chicoyije tzet chal Comam, caw ayxaco Comam jetbiho chal tu', yeb ayon̈xaco yul isk'ab Comam. Caw xin johtaj tato ayco Comam Dios jin̈, yu Comam Espíritu Santo xayak' Comam jet.

will be added

X\