1 JUAN 3

1Txumwejc'anab'i to mach sb'ih hantaj chon̈ yoche Comam Dios Padre, yuxin chu jal-lax yuninaloj. Yin̈ caw yeli hon̈ yuninalxa Comam, yaja' anma maẍto ch'oc yul sk'ab' Comam mach ẍc'oji xtxumni ta yuninalxa Comam jeyi, haxca mach xohtajn̈e anma tu' Comam Dios. 2Hex xahan ay wu ti'an, yuninalxa Comam Dios je tinan̈. Waxan̈ca maẍto syelaxi tzet chon̈ elojcoj, yaja' johtaj ta yet syenojcan̈ sb'a Comam Jesucristo, lahan ẍjub'can b'oj, haxca ẍjila' tzet caw yeyi. 3Hantajon̈ ẍcawxi co c'ul to lahan chon̈ elojcoj b'oj Comam, b'elay mi k'a' co sajn̈en janma haca' ye Comam. 4Mac yehn̈e yanicoj smul, ẍtic'a sman̈c'o schejb'anil Comam Dios, haxca ha' chaliloj mule, ha' co man̈c'on schejb'anil Comam. 5Johtaj to yu yiniloj Comam Jesús co mul xhul satyib'an̈k'inal ti', wal Comam mach hunuj smul. 6Yuxin ta yeli ayon̈coj yin̈ Comam, matxa ẍju hej tzetet tx'oj, haxca mac yehn̈e yuni hej tzetet tx'oj, maẍto b'ay chil Comam, matca yohtajoj Comam. 7Hex xahan ay wu ti'an, macheya' sub'u' he b'a tet hunuj maca. Ta stoholal ẍju, c'ulon̈ pax haca' Comam chaltu', haxca han̈c'a stoholal xu Comam. 8Yaja' mac yehn̈e yuni hej tzetet tx'oj, yet naj matzwalil yeyi, haxca ahmul naj yettax x'ichitij, hasta tinan̈ yehn̈e yuni naj xtx'ojal. Yuxin xhul Sc'ahol Comam satyib'an̈k'inal ti', yun̈e sc'ayniloj smunil naj. 9Ta yeli yuninalxa Comam jeyi, matxa xji'toj sb'elal tx'ojal tu', haxca sk'inalxa Comam ib'il ju. Yuxin matxa chu juni tx'ojal haxca yuninalxa Comam jeyi. 10Hactu' chu syeniloj sb'a mac yuninalxa Comam b'oj mac yuninalxa naj matzwalil. Ta mat c'uluj ẍjute co b'a, ta mach ẍjoche heb'ya' jetb'i, mat yetoj Comam jeyi. 11Ha' hune' chejb'anile ti' xeyab'e yet xquex oc tzujnuj yin̈ Comam Dios, ha' jochen co b'a hununon̈. 12Mach ẍjute haca' xute naj Caín. Naj tu' yet naj matzwalil ye naj, yuxin spotx' naj yuẍtaj. ¿Tzet yuxin xpotx' naj yuẍtaj? Haxca xtx'ojal xu naj, wal yuẍtaj naj, sc'ulal xu. 13Yuxin mach ẍc'ay he c'ul hex xahan ay wu ti'an, ta ẍchiwacoj sc'ul anma jin̈, anma tu' maẍto ch'oc yul sk'ab' Comam. 14Yet yalan̈to, ayon̈tocoj yul sk'ab' camical. Yaja' tinan̈ johtaj to xax a'lax co k'inal mach stan̈b'al, haxca xa joche heb'ya' jetb'i. Ta mach xjoche heb'ya' jetb'i, ayon̈tocoj yul sk'ab' camical. 15Ta ẍchiwacoj co c'ul yin̈ hunuj heb'ya' jetb'i, potx'waomon̈ chaltu'. Ixtan̈ yeyi to mach hunuj potx'waom ay sk'inal mach stan̈b'al. 16Ha' chaliloj jochen heb'ya' jetb'i, ha' sye Comam Jesucristo yet xa'ni camoj sb'a ju, yuxin yet aya hactu' ẍjute hayon̈ ti', ẍco hin co b'a yin̈ heb'ya' jetb'i. 17K'inaloj ta caw ay yec'b'al ju, yaja' machon̈ colwa yin̈ mac ya'taj yecoj, nab'an̈em ẍjala' ta aycoj sc'ulch'anil sc'ul Comam Dios jin̈. 18Hex xahan ay wu ti'an, mat c'ojb'ilojn̈e jalni ta ẍjoche jet-anmail tu', to yilal co colwa yin̈, hactu' chu co yeni ta ẍjoche jet-anmail yin̈ st'in̈anil. 19Ta yeli ẍjoche co b'a hununon̈, chu johtajn̈eni ta tzujanon̈ yin̈ st'in̈anil. Yuxin matxa chon̈ b'isb'on yin̈ sat Comam Dios 20yet chalni janma ta ay hunuj xtx'ojal aycoj jin̈, haxca k'a' ec'b'al to stz'ajanil sc'ul Comam, yohtajn̈en tzet jeyi. 21Hex xahan ay wu ti'an, ta mach ninoj tx'ojal aycoj yin̈ janma ẍjab'e, machon̈ b'isb'on japni yin̈ sat Comam. 22Ta hactu', cha'a' Comam sunil tzet ẍco k'an tet, haxca ẍco yijye schejb'anil Comam b'oj sunil b'aytet choche. 23Ha' schejb'anil Comam cha' jet, to ẍja' yuluj co c'ul yin̈ Sc'ahol tu', ha' Comam Jesucristo, b'oj ta ẍjoche co b'a hununon̈ haca' xu yalni Comam jet. 24Ta ẍco yijye tzet chal Comam, ayon̈coj yin̈ Comam b'oj aycoj Comam jin̈. Ha' Yespíritu Comam a'b'il jet, ch'a'ni johtajn̈e to aycoj Comam jin̈.


Copyright
Learn More

will be added

X\